1-2. (a) Sar utičije o lafija ando Isaija 41:10 upro jekh phen so vičini pe Jošiko? (b) Kase šaj te koristinen o lafija kotar akava stih?

I DOKTORKA vačerdža jekh lošno haberi jekha verno phenjače so vičini pe Jošiko. Oj vačerdža olače so ačhilo la samo pana nekobor masekija te živini. Sar reagujia i Jošiko? Oj setindža pe ko jekh stih kova najviše mangela, Isaija 41:10. (Čitinen.) A palo odova ko jekh mirno način vačerdža e doktorkače so na darala, sose o Jehova ičeri la kotar vas. * O utešna lafija kotar akava stih pomožije amare manglje phenjače te mothovi potpuno poverenje upro Jehova. Akava stih šaj hem amendže te pomožini te ačhova smirime ked isi amen phare situacije. Te šaj te haljova sar šaj te pomožini amen akava stih, najangljeder te dikha sose o Devel vačerdža akala lafija e Isaijase.

² O Jehova podstaknija e Isaija te pisini akala lafija te šaj te utešini e Jevrejen, kola palo disavo vreme hine ljegarde ko phanljipe ko Vavilon. Ama, o Devel manglja akala lafija te ačhon te šaj oljendar te ovel ljen korist na samo o Jevreja, nego hem sa oljese sluge dži avdisutno dive (Isa. 40:8; Rim. 15:4). O vreme ko kova živinaja tano „but pharo“ hem o ohrabrujuća lafija kola tane pisime ko Isaijaso ljil valjanena amendže pobuter nego li bilo ked angljeder (2. Tim. 3:1).

3. (a) Kola obećanja tane pisime ko Isaija 41:10, ko e beršeso stiho ko 2019. berš? (b) Sose valjanena amendže akala obećanja?

³ Ko akava članko ka dikha trin obećanja so dindža o Jehova kola šaj te čeren amari vera te ovel pozoralji, a kola  tane pisime ko Isaija 41:10: (1) O Jehova ka ovel amenca, (2) ov tano amaro Devel hem (3) ov ka pomožini amen. Akala obećanja * valjanena amendže sebepi so sar i Jošiko, svako amendar šaj te ovel ko phare situacije. Isto adžahar, o lošna buča so ovena ko sveto šaj te čeren amendže pharipa. Disave amendar trpinena progonstvo kotar vlastija. Te dikha akala trin obećanja jekh po jekh.

4. (a) Kova tano o prvo obećanje koljestar ka vačera akana? (Dikh i fusnota.) (b) Kolje lafenca o Jehova vačerdža peklje osećanja premalo amende? (c) Sar utičini upro tute odova so vačerdža o Devel?

⁴ O Jehova najangljeder utešini amen e lafenca: „Ma dara, sose me hijum tuva.“ * Ov mothovi soj tano amenca odoljea so mothovi amendže potpuno pažnja hem baro mangipe. Dikh kolje lafenca o Devel vačerdža peklje nežna hem hor osećanja premalo amende: „Tu hijan vredno ko me jačha, mothovdo tuče čast hem me mangava tut“ (Isa. 43:4). Nijekh sila ko svemir našti te čhinavi e Jehova te mangel pe slugen – ov niked na ka mukel ljen (Isa. 54:10). Oljeso mangipe hem amaljipe dena amen bari hrabrost. Ov hem avdije ka arakhi amen, isto sar so arakhlja pe amalje e Avrame (Avrahame). O Jehova vačerdža oljese: „Ma dara, Avram. Me ka arakhav tut“ (1. Moj. 15:1).

5-6. (a) Sose hijam uverime so o Jehova mangela te pomožini amen te borina amen e problemenca? (b) So šaj te sikljova kotar amari phen Jošiko?

⁵ Uverime hijam so o Jehova mangela te pomožini amen te borina amen e problemenca odoljese so obećija pe narodose: „Ako nakheja kotar panja, me ka ovav tuva. Ako nakheja kotar ljenja, on na ka poplavinen tut. Ako nakheja kotar jag, na ka thabljove hem o plameno na ka tharel tut“ (Isa. 43:2). So značinena akala lafija?

⁶ O Jehova na obećini amendže so ka cidel o problemija so čerena amaro dživdipe pharo, ama ov na ka mukel o problemija kola tane sar „ljenja“ te poplavinen  amen ja o kušnje kola tane sar „plameno“ te čeren amendže trajno šteta. Ov uverini amen so ka ovel amenca hem ka del amen snaga te nakha kotar pharipe so ka oven amen. So ka čerel o Jehova? Ov ka pomožini amen te pobedina i dar te šaj te ačhova oljese verna, čak hem ako džanaja so šaj te mera (Isa. 41:13). I Jošiko, kolatar vačerdžam ko početko ando akava članko, uverija pe ko odova. Olaki čhaj vačeri: „Hijam lje oduševime kobor mi daj hine smirimi. Čače dikhljam so o Jehova dija la poklo mir. Dži ko paluno dive kotar olako dživdipe vačeri hine e medicinsko sestra hem avere manušenca ando Jehova hem ando oljese obećanja.“ So sikljovaja kotar Jošiko? Ako isi amen poverenje upro Devljese obećanja so ov ka ovel amenca, tegani hem amen šaj te ova zoralje hem hrabra dži trpinaja o kušnje.

7-8. (a) Kova tano o dujto obećanje so o Jehova dija hem so odova značini? (b) Sose o Jehova pheja e Jevrejendže te na brininen pe? (c) Kola lafija ando Isaija 46:3, 4 sigurno ohrabrije e Devljese narodo?

⁷ Dikh o dujto obećanje so pisija o Isaija: „Ma brinin tut, sose me hijum to Devel.“ So značinena akala lafija? O hebrejsko lafi kova tano prevedimo „ma brinin tut“ vačeri ando manuš kova „ki dar dikhela palo peste hem kova adžičeri svako momenti diso lošno te ovel ljese“.

⁸ Sose o Jehova vačerdža e Jevrejendže kola hine ko phanljipe ko Vavilon te na brininen pe? Odoljese so ov džandža so o manuša kotar odija phuv ka daran. Sostar ka daran? Ko krajo ando 70-to berš ando Jevrejengo phanljipe, o Vavilon ka ovel napadimo kotar zoralji medo-persijsko vojska. O Jehova manglja te koristini akija vojska te šaj te oslobodini peklje narodo ando Vavilon (Isa. 41:2-4). Ked o Vaviloncija hem avera narodija ko odova vreme šundže so o dušmani avela popaše, on probije te ohrabrinen jekh jekhe lafenca: „Ov zoralo.“ Isto adžahar, počmije te čeren pana pobuter idolija sebepi so nadisalje so on ka arakhen ljen (Isa. 41:5-7). Dži tegani, o Jehova utešija e Jevrejen akalje lafenca: „A tu, Izrael, [a na avera narodija] tu hijan mo sluga [...] Ma brinin tut, sose me hijum to Devel“ (Isa. 41:8-10). Dikh so o Jehova vačeri: „Me hijum to Devel.“ Akalje lafenca uverija peklje verno slugen so ov na bisterdža ljen, so ov tano pana oljengo Devel hem so on pana tane oljeso narodo. Ov vačerdža oljendže: „Me ka akharav tumen [...] hem ka spasinav tumen.“ Akala utešna lafija sigurno but ohrabrije e Jevrejen kola hine ko phanljipe. (Čitinen Isaija 46:3, 4.)

9-10. Sose na valjani te dara? Vačer jekh primer.

⁹ Avdije, pobuter nego li bilo ked angljeder, o manuša brininena pe sebepi so i situacija ko sveto tani sa pološno. Džandžola pe, hem amen našti te naša kotar asavke problemija. Ama, na valjani te dara. O Jehova vačeri amendže: „Me hijum to Devel.“ Sose akala lafija dena amen jekh baro razlog te ačhova smirime?

¹⁰ Razmislin kotar akava primer: Duj džene, o Ismeti hem o Damiri, tane ko avioni kova sebepi i bari bavlal počmija but te tresini. Dži o avioni džala upre-telje, o piloti vačeri sarinendže ko avioni: „Molinaja tumen, ma phraven o pojasija. Disavo vreme o avioni adžahar ka tresini.“ O Ismeti but darandilo. Ama, tegani o piloti vačerdža: „Tumenca vačeri o piloti. Isi man kontrola upro avioni, odoljese ma brininen tumen.“ O Ismeti pheja: „E, akana baš utešija amen!“ Ama, ov dikhela so  o Damiri na brinini pe. Odoljese pučela olje: „Sar šaj te ove odoborkha smirimo?“ O Ismeti asala hem vačeri oljese: „Pendžarava e pilote but šukar. Ov tano mo dad. Ked bi džaneja kobor tano šukar piloti, tegani ne bi daraja. Te vačerav tuče diso oljestar...“

11. So sikljovaja kotar primer ando duj manuša kola putujinena avioneja?

¹¹ So šaj te sikljova kotar akava primer? Isto sar o Damiri hem amen hijam smirime sebepi so but šukar pendžaraja amare Dade kova tano ko nebo, e Jehova. Džanaja so ov bezbedno ka nakhavi amen prekalo problemija kola tane sar jekh bari bavlal ko akala palune dive ko akava sveto (Isa. 35:4). Isi amen poverenje upro Jehova, odoljese šaj te ova smirime dži o manuša ko sveto živinena ki dar (Isa. 30:15). Hem amen, sar o Damiri, mangaja te vačera averendže sose isi amen odoborkha poverenje ko Devel. Adžahar hem on šaj te oven sigurna, save god problemija ka ovel ljen, o Jehova ka pomožini ljen.

12. (a) Kova tano o trito obećanje so dija o Jehova? (b) Ko so setinčeri amen o lafi e Jehovaso „vas“?

¹² Te dikha o trito obećanje: „Me ka čerav tut zoralo hem ka pomožinav tut.“ O Isaija već pheja sar o Devel ka čerel peklje narodo te ovel zoralo, ked pheja: „O Jehova, ka ovel sar zoralo junako hem oljeso vas ka vladini“ (Isa. 40:10). Ki Biblija, but puča o lafi „vas“ značini moć. Odoljese, o lafija so e Jehovaso „vas ka vladini“, setinčeri amen so o Jehova tano moćno Kralj. Ov koristija piklji sila so nane la krajo te šaj te pomožini hem te arakhi peklje slugen ko purano vreme, ama hem avdije pomožini hem arakhi okoljen so isi ljen poverenje upro oljeste (5. Moj. 1:30, 31; Isa. 43:10).

13. (a) Posebno ki koja situacija o Jehova ičeri pe ko pe lafija so ka čerel amen te ova zoralje? (b) Kova obećanje dela amen snaga hem poverenje?

 ¹³ Posebno ked progoninena amen o dušmanja, o Jehova ičeri pe ko peklje lafija: „Me ka čerav tut zoralo.“ Ko nesave delija ko sveto avdije, amare dušmanja dena sa pestar te čhinaven amen te na vačera o šukar haberi ja zabraninena amari organizacija. Ama, amen na brinina amen but sebepi odova. O Jehova dija jekh obećanje kova dela amen snaga hem poverenje. Ov vačerdža: „Nisavo oružije kova tano čerdo protiv tute na ka ovel uspešno“ (Isa. 54:17). Akala lafija setinčerena amen ko trin važna buča.

14. Sose na hijam iznenadime so napadinena amen e Devljese dušmanja?

¹⁴ Sar jekhto, sar Isusese učenikija, amen džanaja so avera ka mrzinen amen (Mat. 10:22). O Isus vačerdža so oljese učenikija ka oven but progonime ko palune dive (Mat. 24:9; Jov. 15:20). Sar dujto, e Isaijaso proročanstvo upozorini amen so amare dušmanja nane samo te mrzinen amen, nego hem ka koristinen različito oružije protiv amende. Odova oružije šaj te ovel ked širinena o informacije so nane potpuno tačna ja ked vačerena čista hovajba amendar, ja ked tane but gruba dži progoninena amen (Mat. 5:11). O Jehova na ka čhinavi amare dušmanen te koristinen asavko oružije dži borinena pe protiv amende (Efe. 6:12; Puč. 12:17). Ama, na valjani te dara. Sose phenaja odova?

15-16. (a) Koja tani i trito buti so valjani te pamtina hem sar odova potrvdinena o lafija ando Isaija 25:4, 5? (b) Premalo Isaija 41:11, 12, so ka ovel okoljenca so borinena pe protiv amende?

¹⁵ Te dikha i trito buti so valjani te pamtina. O Jehova pheja so „nisavo oružije“ so ka koristini pe protiv amende „na ka ovel uspešno“. Isto sar jekh zido so šaj te arakhi amen kotar bari bavlal, adžahar o Jehova šaj te arakhi amen kotar e dušmanenge napadija, kola tane „sar bavlal so khuvela ko zidija.“ (Čitinen Isaija  25:4, 5.) Amare dušmanja niked na ka uspinen te čeren amendže trajno šteta (Isa. 65:17).

¹⁶ O Jehova zorjačeri amaro poverenje koro ljeste adžahar so detaljno objasnini amendže so ka ovel okoljenca soj tane but holjame upro amende. (Čitinen Isaija 41:11, 12.) Bizo razlika kobor but amare dušmanja ka borinen pe protiv amende ja kobor god te ovel opasno odova maribe, o kraj uvek ka ovel isto – sare soj tane e Devljese narodose dušmanja ka oven uništime.

17-18. (a) Sar šaj te bajačera amaro poverenje ko Jehova odoljeja so ka čitina i Biblija? Vačer jekh primer. (b) Sar šaj te pomožini amen odova so ka razmislina hor ando beršeso stiho kotar 2019. berš?

¹⁷ Amaro poverenje upro Jehova čeraja te ovel pozoralo adžahar so ka da sa amendar te pendžara lje pana pošukar. A jedino način sar šaj pošukar te pendžara lje tano adžahar so šukar ka čitina i Biblija hem hor ka razmislina odoljestar so čitijam. Koro late isi tačno izveštaj odoljestar sar o Jehova arakhlja poklo narodo ko purano vreme. Akava čerela te ovel amen poverenje so hem avdije ka brinini pe amendar.

¹⁸ Te dikha jekh but šužo primer so koristija o Isaija te šaj te pomožini amen te haljova sar o Jehova arakhi amen. Ov uporedija e Jehova jekhe pastireja, a e Devljese slugen e bakrenca. O Isaija vačerdža: „Pe vasteja ka čedel e bakren, ki janglja ka akhari oljen“ (Isa. 40:11). Ked hijam svesna so o Jehova ičeri amen ki piklji janglja, osetina amen zaštitime hem smirime. Te šaj te ačhova smirime čak ked isi amen problemija, o verno hem o razborito robo birija o Isaija 41:10 te ovel e beršeso stiho ko 2019. berš: „Ma brinin tut, sose me hijum to Devel.“ Razmislin hor ando akala utešna lafija. On ka den tut snaga te izdržine o pharipa so ka oven tut.