1-2. So sikljovaja ando Anđelito?

DA LI tane teklje roditeljija e Jehovase svedokija? Ako ja, tegani ma bistri so ako on tane e Jehovase amala, odova na značini so hem tu ka ove e Jehovaso amal. Da li amare roditeljija služinena e Devljese ja na, svako amendar mora kokri te čerel ko poklo amaljipe e Jehovaja.

² Razmislin ando jekhe phraljeso iskustvo kova vičini pe Anđelito. Ov barilo ki porodica kuri tane sare e Jehovase svedokija. Ama, ked hine poterno, ov na mislindža soj tano but paše e Devljeja. Ov phenela: „Me služindžum e Jehovase samo sebepi mi porodica.“ Ama, o Anđelito odlučindža pobuter te čitini e Devljeso Lafi hem hor te razmislini ando odova so čitindža. Isto adžahar, počmindža počesto te molini pe e Jehovase. So ulo palo odova? O Anđelito phenela: „Haljiljum so jedino način te ovav paše me Dadeja, e Jehovaja, tano me te pendžarav lje.“ E Anđelitoso iskustvo čhivela amen te razmislina ando disave važna pučiba: Koja razlika isi maškaro odova te pendžare e Jehova hem te džane lje šukar? So šaj te čera te šaj pošukar te pendžara e Jehova?

3. Koja tani razlika maškaro odova te pendžara e Jehova hem te džana lje šukar?

³ Amen šaj te phena so jekh manuš pendžari e Jehova, ako oljese tano pendžardo sar o Devel vičini pe. Šaj pendžarde tane ljese disave buča kola ov vačerdža ja čerdža. Ama, odova na značini so ov šukar džanela e Jehova. Aso odova valjani amendže diso pobuter. Najangljeder, mora te arakha vreme te sikljova ando Jehova hem oljese šukar osobine. Palo odova, amen šaj te haljova sose ov phendža ja čerdža diso. Odova ka pomožini amen te haljova da li  o Jehova mangela odova sostar razmislinaja hem so čeraja. Ked haljovaja so o Jehova mangela te čera, amen odova valjani te čera.

4. So ka sikljova ando Mojsije hem ando David?

⁴ Disave manuša šaj marena amendže muj odoljese so mangaja te služina e Jehovase. Isto adžahar, šaj protivinena pe amendže ked počminaja te dža ko sastankija. Ama, ako isi amen poverenje upro Jehova, ov niked na ka ačhavi amen. Adžahar ka počmina te čera ko amaro amaljipe e Jehovaja kova ka trajini celo dživdipe. Da li čače šaj šukar te pendžara e Jehova? Ja, šaj! O primerija ando nesavršena manuša, sar soj tane o Mojsije hem o kralj David mothovena so šaj. Dži ka sikljova oljendar ka dobina odgovor ko duj pučiba: So on čerdže te šaj šukar te pendžaren e Jehova? So šaj te sikljova ando oljengo primer?

5. So birindža o Mojsije te čerel?

⁵ O Mojsije birindža te služini e Devljese. Ked hine lje oko 40. berš, o Mojsije birindža te ovel deo ando e Devljese narodo, o Izrael. Ov na manglja te ovel pendžardo sar o „čhavo andi e faraonesi čhaj“ (Jevr. 11:24). O Mojsije ačhavdža o baro položaj. O Mojsije pomožindža e Izraelcendže, iako džandža so o faraon, kova hine moćno kralj hem kas o Egipćanja dikhlje sar pe devlje, but ka holjani. Akava mothovdža so o Mojsije hine lje zoralji vera. Celo poklo dživdipe o Mojsije hine paše e Jehovaja, sose hine lje poverenje upro oljeste (Posl. 3:5).

6. So šaj te sikljova ando e Mojsijeso primer?

⁶ So amen sikljovaja? Sar o Mojsije, sare amen valjani te odlučina da li ka služina e Devljese hem da li ka ova oljese narodoja. Šaj valjani te čera žrtve te šaj te služina e Devljese hem okola kola na pendžarena e Jehova šaj ka protivinen pe amendže. Ama, ako isi amen poverenje ko amaro Dad, šaj te ova sigurna so ov ka pomožini amen.

7-8. So o Mojsije hem ponodri sikljilo?

⁷ O Mojsije hem ponodri sikljilo ando e Jehovase osobine hem čerdža oljesi volja. Na primer, ked o Jehova phendža e Mojsijese te oslobodini e Izraelcen ando Egipat, ov na hine lje poverenje upro peste hem but putija phendža e Jehovase so ov našti te čerel odova. E Devljesi reakcija mothovdža soj tano saosećajno Devel, kova haljilo sar o Mojsije osetindža pe hem pomožindža lje (Izl. 4:10-16). Odoljese, o Mojsije šajindža te vačeri e faraonese e Devljesi osuda. Palo odova, o Mojsije dikhlja sar o Jehova koristini piklji moć ked spasindža e Izraelcen, a uništindža e faraone hem oljese vojska ko Crveno more (Izl. 14:26-31; Ps. 136:15).

⁸ Palo odova so o Mojsije oslobodindža e Izraelcen ando Egipat, on uvek arakhlje diso sose te žalinen pe. Ama, o Mojsije dikhlja kobor baro strpljenje o Jehova hine lje e Izraelcencar (Ps. 78:40-43). Isto adžahar, ked o Mojsije molindža e Jehova te na uništini e Izraelcen, ov šundža lje hem na čerdža odova. Odoljeja o Jehova mothovdža kobor tano ponizno (Izl. 32:9-14).

9. Premalo Jevrejima 11:27, kobor o Mojsije hine paše e Jehovaja?

⁹ Palo odova so oslobodindža e Izraelcen ando Egipat, o Mojsije ulo odobor paše e Jehovaja, samči dikhlja peklje nebesko Dade. (Čitinen Jevrejima 11:27.) Amen haljovaja kobor o Mojsije  hine paše e Jehovaja sose ki Biblija pisini: „O Jehova vačerdža e Mojsijeja direktno, baš sar so jekh manuš vačeri e manušeja kova tano oljeja paše“ (Izl. 33:11).

10. So valjani te čera te šaj šukar te džana e Jehova?

¹⁰ So amen sikljovaja? Ako mangaja šukar te džana e Jehova, na valjani samo te sikljova ando oljese osobine, nego hem valjani te čera oljesi volja. Avdije, e Jehovasi volja tani „sa o manuša te spasinen pe hem šukar te pendžaren o čačipe“ (1. Tim. 2:3, 4). Jekh način sar amen čeraja e Devljesi volja tano adžahar so sikavaja averen ando Jehova.

11. Sar odova so sikavaja averen ka pomožini amen pošukar te pendžara e Jehova?

¹¹ But putija ked sikavaja averen ando Jehova hem amen pendžaraja lje pana pošukar. Na primer, najbaro dokaz so o Jehova tano saosećajno tano odova so igari amen dži o iskrena manuša, kola mangena te oven oljese amala (Jov. 6:44; Dela 13:48). Amen dikhaja so e Devljeso Lafi isi lje moć odoljese so pomožini e manušen koljen sikavaja andi Biblija te ačhaven peklje lošna navike hem te menjinen piklji ličnost (Kol. 3:9, 10). Isto adžahar, amen dikhaja kobor tano o Jehova strpljivo odoljese so bičhalji amen but putija koro ljende te pomožini ljen te sikljon oljestar hem te oven spasime (Rimlj. 10:13-15).

12. Premalo Izlazak 33:13, so o Mojsije molindža e Jehova hem sose?

¹² O Mojsije cenindža poklo amaljipe e Jehovaja. O Jehova prekalo Mojsije čerdža but čudija hem odoljese o Mojsije šukar džandža koj tano o Jehova. Ama, ov paljem molindža e Jehova te pomožini lje te pendžari lje pana pošukar. (Čitinen Izlazak 33:13.) Tegani, o Mojsije hine lje pobuter ando 80 berš, ama džandža so pana valjani te sikljol ando poklo manglo Dad.

13. Kova tano jekh način sar šaj te mothova so ceninaja amaro amaljipe e Devljeja?

¹³ So amen sikljovaja? Nane važno kobor berš služinaja e Jehovase, važno tano uvek te cenina amaro amaljipe oljeja. Jekh način sar šaj te mothova so ceninaja amaro amaljipe e Devljeja tano te molina amen oljese.

14. Sose tani i molitva odobor važno te šaj te sikljova ando Jehova?

¹⁴ Ako mangeja te ove nekasa paše amal, valjani počesto te vačere oljeja. Odoljese, te šaj te ove paše e Jehovaja, molin tut često hem ma dara te phene ljese so mislineja hem sar osetineja tut (Ef. 6:18). Amari phen i Krista, koja živini ki Turska, phenela: „Svako puti ked ki molitva phenava e Jehovase sostar razmislinava hem ked palo odova dikhava sar pomožini man, moklo mangipe premalo Jehova hem moklo poverenje upro ljeste barjola. Ked dikhava sar o Jehova odgovorini ko meklje molitve pana popaše hijum oljeja. O Jehova tano maje hem Dad hem amal.“

15. So o Jehova phendža ando David?

¹⁵ O kralj David bijandilo ki porodica hem ko narodo kova služindža e Jehovase. Ama, o David na služindža e Jehovase samo odoljese so oljesi porodica služindža e Devljese. Ov kokri zorjačerdža poklo amaljipe e Jehovaja hem odoljese o Jehova but manglja lje. O Jehova phendža so o David tano „manuš palo [Oljeso] vilo“ (Dela 13:22). Sar o David ulo paše e Jehovaja?

16. So o David sikljilo ando Jehova dži dikhlja o buča kola ov stvorindža?

 ¹⁶ O David sikljilo ando Jehova kotar buča kola o Jehova stvorindža. Ked o David hine terno, ov arakhlja pe dadese bakren hem odoljese hine but vreme avrijal. Tegani ov šaj razmislindža ando buča kola o Jehova čerdža. Na primer, ked o David dikhlja o nebo račate, ov na dikhlja samo o zvezde. Ov šaj hine te dikhel kola osobine isi lje okova kova stvorindža ljen. Odoljese, o David pisindža: „Sa o buča soj tane čerde ko nebo mothovena e Devljesi slava, on vačerena kotar sa so ov čerdža peklje vastencar“ (Ps. 19:1, 2). Ked o David razmislindža sar ov hem avera manuša tane stvorime, ov haljilo kobor tani bari e Jehovasi mudrost (Ps. 139:14). Isto adžahar, ov haljilo kobor tano tikno ked uporedini pe e Jehovaja (Ps. 139:6).

17. So šaj te sikljove ako razmislineja ando buča kola o Jehova stvorindža?

¹⁷ So amen sikljovaja? Sikljov ando buča kola o Jehova stvorindža. Odvojin vreme te dikhe kola šukar buča o Jehova čerdža hem uživin ano ljende! Svako dive, razmislin sar o buča kola tane uzo tute, sar soj tane o biljke, o životinje hem o manuša, sikavena tut diso ando Jehova. Tegani, svako dive ka sikljove pobuter ando toklo manglo Dad (Rimlj. 1:20). Isto adžahar, ka dikhe sar to mangipe premalo oljeste barjola.

18. Sar so pisini ko 18. Psalam, so o David haljilo?

¹⁸ O David haljilo so o Jehova pomožindža lje. Na primer, ked o David arakhlja pe dadese bakren ando lav hem ando medvedi, ov haljilo so o Jehova pomožindža lje te mudari akalje životinjen. Ked pobedindža e dive, e Golijate, o David jasno dikhlja so o Jehova vodini lje (1. Sam. 17:37). Isto adžahar, ked našlja ando ljubomorno kralj Saul, ov haljilo so o Jehova spasindža lje (Ps. 18, uvod). O ponosno manuš šaj te mislini so sa o buča kokri čerdža. Ama, o David hine ponizno hem odoljese šajindža te dikhel so o Jehova pomožini lje ko sa (Ps. 138:6).

19. So šaj te sikljova ando David?

¹⁹ So amen sikljovaja ando David? Amen na valjani samo te molina e Jehova te pomožini amen, nego valjani te čera pana diso. Valjani te haljova ked hem sar ov pomožini amen. Ako hijam ponizna, ka haljova so našti sa te čera kokri. O Jehova pomožini amen te čera odova so našti te čera. Isto adžahar, svako puti ked dikhaja sar o Jehova pomožini amen, amaro amaljipe oljeja ovela pozoralo. O Isak, jekh phral ando Fidži, kova but berša služini e Jehovase, uverindža pe ko odova. Ov phenela: „Ked razmislinava ando mo dživdipe, šaj te dikhav so sar počmindžum te sikljovav andi Biblija pa dži avdije, o Jehova pomožini man. Odoljese, hijum pana popaše e Jehovaja.“

20. So šaj te sikljova ando odova so o David hine paše e Jehovaja?

²⁰ O David oponašindža e Jehovase osobine. O Jehova stvorindža amen adžahar te šaj te oponašina oljese osobine (Post. 1:26). So pobuter sikljovaja ando e Jehovase osobine, pošukar ka oponašina lje. Odoljese so o David šukar džandža pe Dade, ov šajindža averencar te postupini sar o Jehova. Hajde te dikha jekh primer. Ked čerdža preljuba e Vitsavejaja hem palo odova mudardža olake rome, o David grešindža protiv o Jehova (2. Sam. 11:1-4, 15). Ama, o Jehova hine milosrdno premalo David, odoljese so o David hine milosrdno premalo avera. Ov hine paše e Jehovaja hem o Izraelcija but manglje lje. Ov hine odobor šukar manuš  so o Jehova avere kraljen ko Izrael uporedindža oljeja (1. Kralj. 15:11; 2. Kralj. 14:1-3).

21. Premalo Efešanima 4:24 hem 5:1, sose tano šukar ako „oponašinaja e Devlje“?

²¹ So amen sikljovaja? Amen valjani te „oponašina e Devlje“. Ked amen oponašinaja e Devlje, odova tano amare šukaripase hem sa pošukar pendžaraja lje. Isto adžahar, ked oponašinaja e Devljese osobine, amen mothovaja so hijam oljese čhave. (Čitinen Efešanima 4:24; 5:1.)

22-23. So ka ovel ako primeninaja odova so sikljovaja ando Jehova?

²² Sar so dikhljam, amen šaj te sikljova ando Jehova prekalo buča kola ov čerdža hem prekalo oljeso Lafi, i Biblija. Ki Biblija isi but primerija ando oljese verna sluge koljen amen šaj te oponašina, sar soj tane o Mojsije hem o David. O Jehova čerdža sa te pomožini amen te šaj šukar te pendžara lje. Akana, amen valjani te da sa amendar pana pošukar te pendžara lje.

²³ Amen niked na ka čhinava te sikljova ando Jehova (Prop. 3:11). Nane važno kobor džanaja oljestar, nego so čeraja odoljeja so džanaja. Ako amen primeninaja odova so sikljovaja hem trudinaja amen te oponašina amare Dade, ov hem ponodri ka ovel paše amencar (Jak. 4:8). Prekalo poklo Lafi, ov obećini amendže so niked na ka ačhavi okoljen kola trudinena pe šukar te pendžaren lje.