1. So šaj te avel amenđe ki godi đi razmislinaja ando sa o buća kola o Jehova ćerđa?

KED razmislinaja ando sa odova so o Jehova ćerđa, šaj osetinaja amen sar o psalmista David, kova ki molitva phenđa e Jehovase: „Ked dikhava o nebo, kova tu ćerđan te vastencar, o mesec hem o ćerenja kola tu ćerđan, ki godi avela maje: Soj tano jekh obično manuš te misline upro leste hem o manušikano ćhavo te brinine tut olestar?“ (Ps. 8:3, 4). Sar o David, ked razmislinaja ando ćerenja kola o Jehova ćerđa, šaj hem amen mislinaja so hijam but tićkore. Ama, bahtale hijam sose đanaja so o Jehova brinini pe amendar. Ko početko, o Jehova na samo so brininđa pe kotar o Adam hem i Eva, već hem mukhlja len te oven deo andi olesi porodica.

2. So o Jehova manglja o Adam hem i Eva te ćeren?

² O Adam hem i Eva hine e Jehovase prva ćhave ki phuv, a ov hine olengo nebesko Dad. Ked ćerđa len, ov phenđa lenđe: „Nek ovel tumen but ćhave hem tumendar nek oven but manuša, pheren i phuv hem vladinen upro late“ (Post. 1:28). On valjanđe te ovel len ćhave hem te brininen pe andi phuv. Ked bi o Adam hem i Eva šunena hine e Devle, on hem olenge ćhave zauvek bi ovena deo andi e Jehovasi porodica.

3. Sose šaj te phena so o Adam hem i Eva hine len važno than ki e Jehovasi porodica?

³ O Adam hem i Eva hine len but važno than ki e Jehovasi porodica. Sar so pisini ko Psalam 8:5, ked o David vaćerđa ando odova sar o Jehova ćerđa e manuše, ov phenđa: „Ćerđan le te ovel hari potikno ando anđelija, mothovđan  lese slava hem čast.“ O Jehova na dinđa e manušenđe isto moć, godi hem sposobnostija sar e anđelenđe (Ps. 103:20). Ama, o manuša tane samo „hari potikne“ ando moćna anđelija. Šaj li te zamisline samo kobor šužo životi o Jehova dinđa e Adamese hem e Evaće!

4. (a) So hine e Adameja hem e Evaja sebepi so na šunđe e Jehova? (b) Sostar ka vaćera ko akava članko?

 ⁴ Ama, o Adam hem i Eva na šunđe e Jehova hem odolese više na hine deo andi olesi porodica. Sebepi odova, olenge ćhave hine len but bare problemija. Ama, odova so o Jehova kotar početko manglja te ćerel e manušenđe, na menjinđa pe. Ov mangela o manuša kola šunena le, zauvek te oven olese ćhave. Akana ka dikha sar o Jehova mothovđa amenđe kozom hijam važna olese. Palo odova ka dikha, sar šaj te mothova so mangaja te ova deo andi e Jehovasi porodica. Ko krajo, ka dikha save blagoslovija ka ovel len e Jehovase ćhave ki phuv.

5. Sar šaj te mothova so hijam zahvalna e Devlese sose ćerđa amen premali pi slika?

⁵ Ćerđa amen premali pi slika (Post. 1:26, 27). Odolese so hijam ćerde premali e Devlesi slika, šaj te mothova olese but šuže osobine, sar soj tane mangipe, saosećanje, vernost hem pravednost (Ps. 86:15; 145:17). Ked daja sa amendar te mothova akala osobine, amen slavinaja e Jehova hem mothovaja so hijam zahvalna olese (1. Petr. 1:14-16). Ako ćeraja odova so amaro nebesko Dad rodela amendar, tegani ka ova bahtale. Isto ađahar, odolese so ćerđa amen premali pi slika, amen šaj te ova asavke manuša save o Jehova mangela ki pi porodica.

6. Sar o Jehova mothovđa so o manuša tane važna olese?

⁶ Dinđa amen than kaj te živina. But berša angleder so ćerđa e prvone manuše, o Jehova ćerđa i phuv e manušenđe (Jov 38:4-6; Jer. 10:12). Odolese soj tano šukar hem phravde vasteso, o Jehova dinđa amen but šukar buća kola ćerena amen bahtale (Ps. 104:14, 15, 24). Ked dikhlja sa odova so ćerđa ki phuv, ov hine zadovoljno (Post. 1:10, 12, 31). O Jehova mothovđa e manušenđe bari čast ađahar so dinđa lenđe te vladinen upro sa o buća kola ov ćerđa ki phuv (Ps. 8:6). Ov mangela o manuša te oven savršena hem te brininen pe ando odova so ov ćerđa. Da li redovno zahvalineja tut e Jehovase aso odova so mangela te ćerel?

7. Sar odova so pisini ko Isus Navin 24:15 mothovi so o manuš isi le slobodno volja?

⁷ Dinđa amen slobodno volja. Amen šaj kokri te birina so ka ćera ko amaro životi. (Čitin Isus Navin 24:15.) Odija sposobnost kokri te birina so ka ćera vićini pe slobodno volja. Amaro manglo Dad tano bahtalo ked birinaja te služina olese (Ps. 84:11; Posl. 27:11). Amen šaj te koristina amari slobodno volja te ana šukar odluke ko amaro životi. Hajde te dikha o primer kova aćhavđa amenđe o Isus.

8. Sar o Isus koristinđa pi slobodno volja? Vaćer jekh primer.

⁸ Ako oponašinaja e Isuse, tegani ka ćhiva avere manušen anglo amende. Jekhvar, o Isus hem olese učenikija hine but umorna. Odolese, on đelje ko jekh than hari te odmorinen pe. Ama, našti hine te ćeren odova. But manuša alje koro lende hem manglje o Isus te sikavi len. Iako o Isus hine umorno, ov na holjanđa, već sažalinđa  pe upro odola manuša. Odolese, ov „počminđa te sikavi len ando but buća“ (Mar. 6:30-34). Ked oponašinaja e Isuse, ađahar so koristinaja amaro vreme hem i snaga te pomožina averenđe, tegani radujinaja amare nebesko Dade (Mat. 5:14-16). Uzo odova, ađahar mothovaja e Jehovase so mangaja te ova deo andi olesi porodica.

9. Savo šužo poklon o Jehova dinđa e manušenđe?

⁹ Dinđa e manušenđe sposobnost te ovel len ćhave hem odgovornost te sikaven len te mangen e Jehova hem te služinen olese. Ako hijan roditelj, da li hijan zahvalno aso odova but šužo poklon? Iako o anđelija isi len razna sposobnostija, o Jehova na ćerđa len ađahar te šaj te ovel len ćhave. Ako isi tumen ćhave, oven zahvalna so isi tumen čast te barjaćeren tumare ćhaven. Tumen kola hijen roditeljija, isi tumen odgovornost „te vaspitinen hem te usmerinen [tumare ćhaven] premali e Jehovasi volja“ (Ef. 6:4; Pon. zak. 6:5-7; Ps. 127:3). E Jehovasi organizacija mangela te pomožini tumenđe. Odolese isi amen but publikacije, video-materijalija, đilja hem člankija ko amaro sajt kola šaj te pomožinen tumenđe te vaspitinen tumare ćhaven. Akava mothovi so o Jehova hem oleso Ćhavo but mangena e ćhaven (Luka 18:15-17). O Jehova tano but bahtalo ked dikhela sar o roditeljija osloninena pe upro leste đi dena sa pestar te brininen pe ando pe ćhave. Asavke roditeljija pomožinena pe ćhavenđe hem on zauvek te oven deo andi e Jehovasi porodica.

10-11. Savi prilika isi len o manuša sebepi so o Jehova dinđa pe Ćhave?

¹⁰ Dinđa pe Ćhave te šaj palem te ova deo andi olesi porodica. Sar so vaćerđam ko  štarto odlomko, o Adam hem i Eva više naštinđe te oven deo andi e Jehovasi porodica, a ni olenge ćhave (Rimlj. 5:12). Odova ulo sebepi so o Adam hem i Eva svesno birinđe te na šunen e Devle. Ama, so ulo olenge ćhavencar? Sebepi so mangela e manušen, o Jehova dinđa pe Ćhave te šaj okola kola šunena le te oven deo andi olesi porodica (Jov. 3:16; Rimlj. 5:19). Ađahar, o Jehova šaj hine te usvojini 144 000 manuša te oven olese ćhave (Rimlj. 8:15-17; Otkr. 14:1).

¹¹ Uzo odova, isi milionija avera manuša kola tane verna hem šunena e Devle. On isi len nada so pali završno kušnja ko krajo andi Hiljadaberšengi vladavina, ka oven deo andi e Jehovasi porodica (Ps. 25:14; Rimlj. 8:20, 21). Odolese so isi len odija nada, on već avdije dikhena e Jehova sar pe Dade (Mat. 6:9). Isto ađahar, okola kola ka uskrsninen ka ovel len prilika te sikljon ando Jehova. Okola so ka šunen le ka oven deo andi olesi porodica.

12. Sostar ka vaćera akana?

¹² Sar so dikhljam, o Jehova već avdije ćerđa but buća te mothovi so o manuša tane važna olese. Ov već usvojinđa e pomazanikonen te oven olese ćhave. Okolenđe kola tane deo ando „baro mnoštvo“, o Jehova dela nada so hem on ka oven olese ćhave ko nevo sveto (Otkr. 7:9). Sar šaj već avdije te mothova so mangaja te ova deo andi olesi porodica?

13. So valjani te ćera ako mangaja te ova deo andi e Jehovasi porodica? (Marko 12:30)

¹³ Mothov e Jehovase so mangeja le ađahar so ka služine lese celone vileja. (Čitin Marko 12:30.) O Jehova dinđa amen but poklonija. Najbaro olendar tano odova so  šaj te služina olese. Amen mothovaja so mangaja e Jehova ađahar so „ićeraja amen ko olese zapovestija“ (1. Jov. 5:3). Prekalo po Ćhavo, o Jehova zapovedinđa amenđe te ćera učenikonen hem te krstina len (Mat. 28:19). Isto ađahar, ov zapovedinđa amenđe te manga jekh jekhe (Jov. 13:35). Okola so šunena e Jehova ka oven deo andi olesi porodica (Ps. 15:1, 2).

14. Sar šaj te mothova so mangaja averen? (Matej 9:36-38; Rimljanima 12:10)

¹⁴ Mothov so mangeja averen. O mangipe tano jekh ando e Jehovase najvažna osobine (1. Jov. 4:8). O Jehova mothovđa so mangela amen angleder so penđarđam le (1. Jov. 4:9, 10). Ked mothovaja so mangaja averen, tegani oponašinaja e Jehova (Ef. 5:1). Najšukar način te mothova so mangaja e manušen tano te sikava len ando Jehova, đi pana isi vreme. (Čitin Matej 9:36-38.) Ađahar pomožinaja lenđe te oven deo andi e Jehovasi porodica. Palo odova so o manuš krstini pe, amen valjani hem ponodri te mothova so mangaja le hem so poštujinaja le (1. Jov. 4:20, 21). Odova šaj te ćera ađahar so ka mothova so isi amen poverenje upro leste. Ked ćerela diso so na haljovaja, amen na ka mislina so ov isi le lošno motivi. Umesto odova, valjani te mothova so poštujinaja amare phrale hem so upro leste dikhaja sar pobaro amendar. (Čitin Rimljanima 12:10; Fil. 2:3.)

15. Premalo kaste valjani te ova milosrdna hem šukar?

¹⁵ Ov milosrdno hem šukar premalo sa o manuša. Ako mangaja te ova deo andi e Devlesi porodica, valjani te ićera amen ko e Devleso Lafi. Na primer, o Isus sikavđa amen te ova milosrdna hem šukar premalo sa o manuša, čak hem premalo amare dušmanja (Luka 6:32-36). Podijekh puti odova šaj te ovel pharo. Ama, valjani te sikljova te razmislina hem te postupina sar o Isus. Ked daja sa amendar te šuna e Jehova hem te oponašina e Isuse, tegani mothovaja amare nebesko Dadese so ćaće mangaja zauvek te ova deo andi olesi porodica.

16. So valjani te ćera te na lađaćera e Jehovasi porodica?

¹⁶ Ma lađaćer e Jehovasi porodica. Ko but porodice šaj te dikha so o tikneder oponašini e phuredere phrale. Ako o phureder ićeri pe ko e biblijake načelija, tegani ov ka ovel šukar primer e tiknederese. Ama, ako o phureder ćerela lošna buća hem o tikneder šaj ka ćerel odova. Ađahar tano hem ki e Jehovasi porodica. Ako jekh hrišćanin kova verno služinđa e Jehovase ovela otpadnik ja ćerela nemoral ja avera lošna buća, avera šaj ka mangen te ćeren odova so ov ćerela. Asavke lađaćerena e Jehovasi porodica (1. Sol. 4:3-8). Amen na valjani te mukha olengo lošno primer te utičini upro amende hem odova te cidel amen ando Jehova.

17. Sar na valjani te razmislina hem sose?

¹⁷ Oslonin tut upro Jehova, a na ko materijalna buća. Ako ćhivaja o Kraljevstvo ko prvo than hem ako šunaja e Jehova, ov dela po lafi so ka ovel amen so te ha, so te urava hem kaj te živina (Ps. 55:22; Mat. 6:33). Ako ćaće verujinaja lese, tegani na ka mislina so o materijalna buća ka zaštitinen amen hem so ka ćeren amen bahtale. Amen đanaja so mir šaj te ovel amen samo ako ćeraja odova so o Jehova rodela amendar (Fil. 4:6, 7). Šaj isi amen pare te ćina but buća, ama valjani te razmislina da li ka ovel amen vreme te sikljova te koristina odola buća hem te brinina amen olendar. Valjani te puća amen: „Kobor tane maje važna o  buća kola isi man?“ Na valjani te bistra so o Jehova već dinđa amen jekh važno buti koja valjani te ćera. Odolese, na valjani te dozvolina nikase hem nisose te cidel amen andi amari najvažno buti. Na mangaja te ova sar o barvalo ćhavo, kova odobor manglja odova so hine le, so odbinđa te ovel e Isuseso učeniko. Odolese, ov našalđa i prilika te služini e Jehovase hem ađahar te ovel jekh ando e Devlese usvojime ćhave (Mar. 10:17-22).

18. Koja čast hem save blagoslovija ka ovel len o manuša?

¹⁸ O poslušna manuša ka ovel len bari čast – te mangen e Jehova hem zauvek te služinen lese. Okola so isi len nada te živinen večno ki phuv, ka oven bahtale te brininen pe ando sa odova so o Jehova ćerđa. Pana hari, e Devleso Kraljevstvo ka ćerel te ovel raj ki phuv. O Isus ka cidel sa o problemija kola ulje sebepi so o Adam hem i Eva na šunđe e Jehova. O Jehova ka vazdel bute manušen kola mulje hem ka del len prilika te živinen večno ko raj ki phuv (Luka 23:42, 43). Ked o manuša kola služinena e Jehovase ka oven savršena, on ka ovel len „slava hem čast“ andi koja o David pisinđa (Ps. 8:5).

19. Sostar valjani te razmislina svako dive?

¹⁹ Ako hijan deo ando „baro mnoštvo“, tu isi tut but šuži nada. O Devel mangela tut hem mangela te ove deo andi olesi porodica. Odolese, de sa tutar te šune le. Svako dive razmislin ando olese obećanja. Ov zahvalno so isi tut čast te služine amare nebesko Dadese hem cenin odova so šaj te slavine le zauvek!