1. Ko pomožindža te čerel pe i skupština ko Filipi?

KED o apostol Pavle, o Sila, o Luka, hem o Timotej reslje ki diz Filipi, odothe arakhlje bute manušen kola manglje te džanen pobuter ando šukar haberi. Akala štar revna phralja pomožindže te čerel pe i skupština. Palo odova, neve phralja hem phenja počmindže te čeden pe, verovatno ko e Lidijako čher, koja hine but gostoljubivo (Dela 16:40).

2. Kola pharipa hine ljen o phralja sigate palo odova?

² Sigate palo odova so hine čerdi akija skupština, počmindže bare pharipa. O Beng čhivdža e dušmanen, kola na manglje o čačipe, te protivinen pe e phraljendže kola propovedindže. E Pavle hem e Sila phanlje, mardže hem čhivdže ljen ko phanljipe. Ked mukhlje ljen, on dželje te posetinen hem te ohrabrinen e neve phraljen. Palo odova, o Pavle, o Sila hem o Timotej, dželje kotar odija diz, a o Luka izgleda ačhilo odothe. Sar osetindže pe akala neve phralja hem phenja? O Jehova pomožindža ljen prekalo poklo sveti duh hem on nastavindže verno te služinen oljese (Fil. 2:12). O Pavle čače hine lje baro razlog te ovel ponosno upro oljende!

3. Premalo Filipljanima 1:9-11, save bučendže o Pavle molindža pe?

³ Koro deš berš palo odova, o Pavle pisindža ljil e skupštinače ki diz Filipi. Ked čitineja odova ljil šaj te dikhe kobor o Pavle manglja pe phraljen. Ov pisindža ljendže: „Sose o Devel džanela kobor sarine tumen mandže nedostajinena hem so mangava tumen mangipaja kova isi lje o Hrist Isus“ (Fil. 1:8). Ov pisindža so molindža e Jehova te pomožini ljen oljengo mangipe te ovel sa pobaro,  te prosudinen soj tano najvažno, te oven bizi mana, te na spotakninen averen hem te anen plod andi pravednost. Avdije, hem amen šaj but te sikljova kotar e Pavlese lafija. Odoljese, hajde te čitina so o Pavle pisindža e phraljendže ko Filipi. (Čitinen Filipljanima 1:9-11.) Palo odova ka dikha so phendža ljendže hem sar šaj amen te primenina odova.

4. (a) Premalo 1. Jovanova 4:9, 10, sar o Jehova mothovdža poklo mangipe premalo amende? (b) Kobor amen valjani te manga e Devlje?

⁴ O Jehova mothovdža poklo baro mangipe, adžahar so bičhaldža peklje Čhave te merel amendže. (Čitinen 1. Jovanova 4:4, 10.) O mangipe kova o Devel mothovdža čhivela amen hem amen te manga olje (Rimlj. 5:8). Kobor amen valjani te manga e Devlje? O Isus odgovorindža ko akava pučibe ked phendža jekhe farisejese: „Mang e Jehova, teklje Devlje, sa te viljeja, sa te dušaja hem sa te godžaja“ (Mat. 22:36, 37). Amen na mangaja amaro vilo te ovel podelimo, već svako dive te manga lje sa pobuter. O Pavle phendža e phraljendže ko Filipi so oljengo mangipe valjani te „ovel sa pobaro hem pobaro“. So amen valjani te čera te šaj te zorjačera amaro mangipe premalo Devel?

5. Sar šaj amaro mangipe te ovel pozoralo?

⁵ Te šaj te manga e Devlje, amen valjani te pendžara lje. Ki Biblija pisini: „Ko na mangela, na pendžardža e Devlje, sose o Devel tano mangipe“ (1. Jov. 4:8). O apostol Pavle phendža so amaro mangipe premalo Devel ka ovel pozoralo ked pošukar ka pendžara hem ked ka haljova sar ov dikhela ko buča (Fil. 1:9). Ked amen počmindžam te proučina i Biblija, amen počmindžam te manga e Jehova, iako na džandžam sa oljestar. Palo odova, so pobuter sikljiljam oljestar amaro mangipe hine sa pozoralo. Odoljese tano važno redovno te proučina i Biblija hem hor te razmislina odoljestar so čitinaja (Fil. 2:16).

6. Premalo 1. Jovanova 4:11, 20, 21, sar šaj te ovel amen pobaro mangipe?

⁶ E Devljeso baro mangipe podstaknini amen te manga amare phraljen. (Čitinen 1. Jovanova 4:11, 20, 21.) Šaj mislinaja so ka ovel lokho te manga amare phraljen hem phenjen, sose sare služinaja e Jehovase hem trudinaja amen te ova sar oljeste. Amen džaja palo e Isuseso primer, kaso mangipe hine odobor baro so dindža poklo dživdipe amendže. Ama, disavo puti šaj te ovel pharo te šuna i zapovest koja phenela te manga jekh jekhe. Te dikha so ulo ki skupština ko Filipi.

7. So šaj te sikljova kotar e Pavleso savet kova dindža e Evodijače hem e Sintihijače?

⁷ I Evodija hem i Sintihija hine revna phenja kola služindže zajedno e Pavleja. Ama, šaj sebepi so averčhane dikhlje ko buča, on dozvolindže odova te rumini oljengo amaljipe. Ko ljil kova pisindža e skupštinače, a ki koja služindže akala phenja, o Pavle posebno pomindža e Evodija hem e Sintihija hem savetujindža ljen „te ovel ljen ista mislija“ (Fil. 4:2, 3). O Pavle morandilo te del savet celone skupštinače: „Čeren sa bizo te žalinen tumen ja te svađinen tumen“ (Fil. 2:14). Akava savet sigurno pomožindža akalje verno phenjendže. Isto adžahar, pomožindža hem avere  phraljendže hem phenjendže pobuter te mangen jekh jekhe.

8. Sose šaj te ovel amendže pharo te manga amare phraljen hem so šaj te pomožini amen ko odova?

⁸ Disavo puti hem amendže šaj te ovel pharo te manga amare phraljen. Sar i Evodija hem i Sintihija, šaj hem amen dikhaja oljenge mane. Svako dive sare amen grešinaja. Ako amen dikhaja samo amare phraljenge greške, amaro mangipe premalo ljende ka šudrol. Na primer, ako jekh phral bistrela te pomožini amen te čistina i dvorana, amen šaj te holjana. Ako tegani razmislinaja kotar oljese avera greške, šaj pana pobuter te holjana hem na ka manga lje odobor. Ako hem tu isi tut asavko problemi nekasa ki skupština, tegani šukar bi ovela te razmisline akaljestar: O Jehova dikhela hem amare hem amare phraljese greške, ama ov pana mangela hem tut hem teklje phralje. Odoljese, amen valjani te oponašina e Jehovaso mangipe hem te dikha odova soj tano šukar koro ljende. Ked amen daja sa amendar te manga amare phraljen, tegani amen ovaja oljencar pana popaše (Fil. 2:1, 2).

9. Kotar kola važna buča o Pavle pisindža e phraljendže ko Filipi?

⁹ O Jehova dindža e Pavlese te pisini e phraljendže ko Filipi te „prosudinen soj tano najvažno“. Hem amen avdije valjani te čera odova (Fil. 1:10). Odola važna buča tane: te posvetini pe e Jehovaso nav, te ispunini pe oljesi namera hem te ovel mir hem jekhipe ki skupština (Mat. 6:9, 10; Jov. 13:35). Ked akala buča tane najvažna ko amaro dživdipe, tegani amen mothovaja so mangaja e Jehova.

10. So šaj te čera te šaj o Jehova te dikhel amen so hijam bizi mana?

¹⁰ Isto adžahar, o Pavle phendža so amen valjani te ova „bizi mana“. Akava na značini so amen valjani te ova savršena. Amen našti te ova savršena sar o Jehova. Ama, ko e Jehovase jačha amen ka ova bizi mana, ako daja sa amendar te barjačera amaro mangipe hem ako džanaja kola tane o najvažna buča ko amaro dživdipe. Jekh način sar mothovaja amaro mangipe tano ked trudinaja amen te na spotaknina averen.

11. Sose na valjani te spotaknina nekas?

¹¹ O savet te na spotaknina averen tano but ozbiljno. Sar šaj amen te spotaknina nekas? Amari zabava, odova so uravaja hem kuri čeraja buti šaj te spotaknini averen. Šaj odova so čeraja nane pogrešno. Ama, ako odoljeja so čeraja povredinaja averesi savest hem ov spotaknini pe, tegani odova tano diso but ozbiljno. O Isus phendža so ako sebepi amaro, o phral rumini poklo odnos e Jehovaja, tegani pošukar ka ovel te čhivel pe amendže o mlinsko bar ki men hem oljeja te tasljova ko more (Mat. 18:6).

12. So sikljovaja kotar akalje pionirengo primer?

¹² Sar jekh rom hem jekh romni, kola hine pionirija mothovdže so šunena akava savet? On služindže ki skupština kuri hine jekh bračno par kova tek krstindža pe. Akava nevo par barilo ki porodica kuri but buča na hine dozvolime. On mislindže so o hrišćanja na valjani te džan ko bioskop, čak iako dikhena filmija kola tane moralno čista. But uvredindže pe ked šundže so odola pionirija dželje ko bioskop. Ked odola pionija šundže odova, on na dželje ko  bioskop, sa dži akava bračno par na oblikujindža pi savest hem na haljiljo soj tano šukar, a soj tano lošno (Jevr. 5:14). Ko akava način, akala pionirija, mothovdže so mangena peklje neve phralje hem phenja, na samo lafencar nego hem odoljeja so čerdže (Rimlj. 14:19-21; 1. Jov. 3:18).

13. Sar šaj te čhiva nekas te čerel greh?

¹³ Jekh aver način sar šaj te spotaknina nekas tano te čhiva lje te čerel greh. Sar šaj te čera odova? Razmislin kotar akija situacija. Palji bari hem phari borba, jekh manuš kova proučini konačno šajindža te kontrolišini pe hem te na pijel alkohol. Ov andža odluka niked te na pijel. Sig napredujindža hem krstindža pe. Palo odova, jekh phral vičindža lje ko druženje, nudindža ljese alkohol hem phendža: „Tu akana krstisaljan, isi tut e Jehovaso duho. Jekh plod ando sveti duh tani i samokontrola. Ako isi tut samokontrola, šaj te pije hari alkohol.“ Šaj samo te zamislina so bi ovela ked bi akava phral šunela akava pogrešno savet!

14. Sar o sastankija pomožinena amen te primenina o savetija kotar Filipljanima 1:10?

¹⁴ Amare sastankija šaj ko nekobor načinja te pomožinen amen te primenina o savetija ando Filipljanima 1:10. Sar jekhto, odova so sikljovaja ko sastankija setinčeri amen ko odova soj tano e Jehovase najvažno. Sar dujto, ko sastankija sikljovaja sar te primenina odova so šunaja te šaj te ova bizi mana.  Hem trito, o sastankija podstakninena amen te manga jekh jekhe hem te čera šukaripe (Jevr. 10:24, 25). So pobuter amare phralja ohrabrinena amen, sa pobaro ka ovel amaro mangipe premalo Devel hem premalo ljende. Ked amen mangaja e Devlje hem amare phraljen celone amare viljeja, tegani amen ka da sa amendar te na spotaknina amare phraljen.

15. So značini te ova „pherde plodoja andi pravednost“?

¹⁵ O Pavle celone viljeja molindža pe o Filipljanija te oven „pherde plodoja andi pravednost“ (Fil. 1:11). Ko akava plod andi pravednost hine uključimo te mangen e Jehova hem e manušen. Isto adžahar, valjandže te vačeren averendže andi oljengi vera ko Isus hem andi oljengi nada. Ko Filipljanima 2:15 e hrišćanendže phenela pe so svetlinena sar svetlo ko akava sveto. Akava setinčeri amen ko e Isusese lafija kola phendža peklje učenikonendže soj tane on „o svetlo e svetoso“ (Mat. 5:14-16). Isto adžahar, ov phendža pe sledbenikonendže te „čeren učenikonen“ hem phendža so on ka oven „svedokija [...] sa dži o krajo e phuvjako“ (Mat. 28:18-20; Dela 1:8). Amen anaja plod andi pravednost ked čeraja sa so šaj ko akava najvažno zadatak.

16. Sar o Filipljanima 1:12-14, mothovena so amen šaj te svetlina sar svetlo čak ked isi amen pharipa? (Dikh i slika ko početko ando akava časopis.)

¹⁶ So god te ovel ko amaro dživdipe, amen šaj te svetlina sar svetlo. Disavo puti, odova so možda čhinavi amen te vačera o šukar haberi šaj te ovel  amendže prilika te propovedina. Na primer, ked o apostol Pavle pisindža o ljil e Filipljanendže ov hine phanlo ko Rim, ko jekh čher. Ama, iako o Pavle hine phanlo, ov hem tegani propovedindža e stražarendže hem e manušendže kola alje te dikhen lje. Ov revno propovedindža ko akala okolnostija hem odova barjačerdža e phraljengo poverenje hem ohrabrindža ljen te vačeren e Devljeso lafi „bizi dar“. (Čitinen Filipljanima 1:12-14; 4:22.)

17. Sar disave phralja hem phenja propovedinena iako tano pharo?

¹⁷ But phralja hem phenja tane hrabra sar o Pavle. On živinena ko thana kuri našti javno te džan kotar čher ko čher, ama on arakhlje avera načinja sar te propovedinen (Mat. 10:16-20). Ki jekh asavki phuv, jekh pokrajinski nadglednik predložindža svako objavitelj te čerel poklo „tereni“. On valjandže te propovedinen pe familijače, pe komšijendže, pe amaljendže ki škola, ki buti hem okoljendže kas pendžarena. Palo duj berš, ki odija pokrajina ulje but skupštine. Amen šaj na živinaja ki phuv kuri našti te propovedina, ama jekh buti šaj te sikljova kotar akala phralja: Ako daja sa amendar te propovedina averendže, o Jehova sigurno ka del amen snaga te nastavina te propovedina, čak ked tano pharo (Fil. 2:13).

18. So valjani te ova odlučna te čera?

¹⁸ Akana pobuter nego li angljeder, valjani te ova odlučna te primenina o savet kova o Pavle dindža e Filipljanendže. Akana valjani te prosudina soj tane o najvažna buča, te ova bizi mana, te na spotaknina averen hem te ana plod andi pravednost. Samo tegani ka ovel amen pobaro mangipe hem ka ana čast amare manglje Dadese, e Jehovase.