Ja. Iako e Devleso Lafi nane naučno knjiga, ked vaćeri andi nauka i Biblija tani tačno. Akana ka dikha disave primerija kola mothovena so i nauka hem e Devleso Lafi slažinena pe. Isto ađahar, ka dikha disave naučna činjenice kola razlikujinđe pe but ando odova ko so verujinđe o manuša ko vreme ked e Devleso Lafi hine pisimo.

•   O svemir hine le početak (Postanak 1:1). Ki aver strana, but purane paramiza vaćerena so o svemir na hine stvorimo nego so ulo ando haos kova već postojinđa. O Vaviloncija verujinđe so o devela kola bijanđe o svemir alje ando duj okeanija. A avera paramiza phenena so o svemir ulo ando jekh baro jaro.

•   E svemireja na upravinena o devela ađahar sar so on mangena, nego postojinena prirodna zakonija kola dive palo dive upravinena oleja (Jov 38:33; Jeremija 33:25). O paramiza ko celo sveto mothovena soj tane o manuša bespomoćna hem so našti te utičinen upro devela kola tane podijekh puti nemilosrdna.

•   I phuv tani umlavdi upro nisoste (Jov 26:7). But manuša ko purano vreme verujinđe soj tani i phuv ravno ploča koja ićeri o div ja o životinje sar soj tane o bizon ja i kornjača.

•   O pani ando okeanija, reke hem jezerija isparini hem perela ki phuv sar boršim, iv ja kukudi (Jov 36:27, 28; Propovednik 1:7; Isaija 55:10; Amos 9:6). Sa đi o 18. veko, o Grkija ki purani Grčka verujinđe so o pani ko reke avela ando okeani kova tano tali phuv.

•   O planine uštena hem mukhena pe, a o planine kola avdije dikhaja angleder hine talo okeani (Psalam 104:6, 8). Ki aver strana, disave paramiza phenena so o planine kola avdije dikhaja stvorinđe o devela.

•   I higijena arakhi o sastipe. Premalo Zakon kova hine dindo e Izraelcenđe, on valjanđe te thoven pe palo odova so pipinđe e mule manuše, a ako hine len dijekh zarazno nabormipe valjanđe te oven ko karantin hem valjanđe te hanen jekh rupa hem te ućharen po izmet (Levitska 11:28; 13:1-5; Ponovljeni zakoni 23:13). A ki aver strana, ko vreme ked hine dinde odola zakonija, o Egipćanija ćhivđe ko rane leko kova ano peste hine le manušikano izmet.

 Ked pažljivo proučinaja e Devleso Lafi amen dikhaja so odova nane ađahar. Akana ka dikha disave buća ko kola o manuša verujinena soj tane pisime ko e Devleso Lafi hem ka dikha so e Devleso Lafi vaćeri odolestar.

 Paramiz: E Devleso Lafi phenela so o svemir hine stvorimo aso šov dive kola trajinđe po 24 satija.

 Ma bistri: Premalo e Devleso Lafi, na đanaja tačno kobor vreme valjanđa e Devlese te stvorini o svemir (Postanak 1:1). Isto ađahar, o stvaralačka dive ando kola vaćeri pe ko prvo poglavlje ko Postanak hine o periodija aso kola na đanaja kobor tačno trajinđe. U stvari, o period đi hine stvorimi i phuv hem o nebo isto vićini pe „dive” (Postanak 2:4).

 Paramiz: E Devleso Lafi phenela so o biljke hine stvorime angleder so ulo o kham kova šajinđa te podržini i fotosinteza (Postanak 1:11, 16).

 Ma bistri: E Devleso Lafi phenela so o kham, jekh ando ćerenja ko nebo, hine stvorimo angleder o biljke (Postanak 1:1). I svetlost ando kham alji đi i phuv ko prvo stvaralačko „dive” ja o period ando stvaranje. Sar raščistinđa pe i atmosfera ko trito stvaralačko „dive”, i svetlost hine odobor zorali so šaj hine te podržini o proces andi fotosinteza (Postanak 1:3-5, 12, 13). Tek palo odova, o kham hine ki esavki razdaljina so šaj hine te dikhel pe andi phuv (Postanak 1:16).

 Paramiz: E Devleso Lafi phenela so o kham irini pe okolo i phuv.

 Ma bistri: Ko Propovednik 1:5 pisini: „O kham ikljola, o kham perela, a palo odova sigate irini pe ko po than ando kova ikljola.“ Akala lafija mothovena so amenđe kotar i phuv dićhola so o kham irini pe okolo i phuv. Čak hem avdije, o manuš šaj te koristini o lafija sar soj tane „o kham ikljola” hem o „kham perela”, ama ov đanela so i phuv irini pe okolo o kham.

 Paramiz: E Devleso Lafi phenela soj tani i phuv ravno ploča.

 Ma bistri: Ked ko e Devleso Lafi koristinena pe o lafija đi o sa o krajija andi phuv, odova značini „đi o najdur thana ki phuv”, hem odola lafija na značinena soj tani oj ravno sar ploča ili so isi la krajo (Dela apostolska 1:8). Isto ađahar, o lafija „štar krajija andi phuv”, odnosinena pe ki celo phuv. Odolese, o manuša avdije phenena „štar strane ando sveto” (Isaija 11:2; Luka 13:29).

 Paramiz: E Devleso Lafi phenela soj tano o obim ando krugo trin putija pobaro ando oleso prečnik, a oleso prečnik valjani te množini pe e brojea pi (π) ja oko 3,1416.

 Ma bistri: Premalo mere ando ’liveno more‘ kola tane pisime ki 1. Kraljevima 7:23 hem ki 2. Letopisa 4:2, ov hine le prečnik ando 10 laktija hem te šaj hine te doljel pe, valjanđa o šelo ando 30 laktija. Šaj akala mere hine zaokružime ko cela brojija. Pana jekh mogućnost tani so o obim hem o prečnik ando liveno more mothovđe kobor hine olese dimenzije avrijal hem andral.