Na, i phuv niked na ka ovel uništimi, thardi jagaja ja zamenimi. I Biblija mothovi so o Devel ćerđa i phuv o manuša zauvek te živinen upro late.

•   „O pravednikija ka nasledinen i phuv, hem zauvek ka živinen upro late“ (Psalam 37:29).

•   „[O Devel] ćhivđa i phuv ko olake temeljija, oj na ka cidel pe kotar po than ki celo večnost“ (Psalam 104:5).

•   „I phuv aćhola zauvek“ (Propovednik 1:4).

•   „Okova kova ćerđa i phuv. . . kova zorjaćerđa la hem na stvorinđa la bizo razlog, već ćerđa la ađahar te šaj o manuša te živinen upro late“ (Isaija 45:18).

 O Devel na ka mukhel o manuša te uništinen i phuv maribaja, ađahar so zagadinena la, ja ko disave avera načinija. Ov ka uništini okolen „so uništinena i phuv“ (Otkrivenje 11:18). Sar o Devel ka ćerel odova?

 O Devel ka ćhivel te vladini e Devleso Kraljevstvo ando nebo hem ka cidel sa e manušenge vladavine kola našti te arakhen i phuv (Danilo 2:44; Matej 6:9, 10). O Kralj ko odova Kraljevstvo ka ovel o Isus Hrist, e Devleso Ćhavo (Isaija 9:6, 7). Ked hine ki phuv, o Isus mothovđa so isi le moć te kontrolišini o prirodna sile (Marko 4:35-41). Sar Kralj ando Devleso Kraljevstvo, o Isus ka ovel le potpuno kontrola upro prirodna sile. Ov ka ćerel o uslovija ki phuv te oven slična sar ko početko ko edensko vrt (Matej 19:28; Luka 23:43).

 Na. Asavko mišljenje isi sose disave pogrešno haljilje o lafija andi 2. Petrova 3:7, kuri pisini: „O avdisutno nebo hem i phuv tane odredime aso uništenje e jagaja.“ Te dikha duj buća kola ka pomožinen amen te haljova so značinena akala lafija:

1.   Ki Biblija o lafija „nebo“, „phuv“ hem „jag“ odnosinena pe ko nekobor buća. Na primer, ko Postanak 11:1 pisini: „Celi phuv hine la isto ćhib hem ista lafija“ (dikh i fusnota). O lafi „phuv“ akate odnosini pe ko manuša.

2.   Nekobor stihija angleder i 2. Petrova 3:7 mothovena ko so odnosinena pe o lafija o nebo, i phuv hem i jag kola pominena pe ko odova stih. O stihija 5 hem 6 vaćerena ando Potop kova hine ko Nojese dive. Tegani, o purano sveto hine uništimo, ama na hem amari planeta. Ko Potop hine uništime samo o lošna manuša ili „i phuv“ (Postanak 6:11). Isto ađahar, hem „o nebo“ hine uništimo, ili o manuša kola tegani vladinđe. Sar so dikhljam, hine uništime o lošna manuša, a na amari planeta. O Noje hem olesi porodica preživinđe o Potop hem nastavinđe te živinen ki phuv (Postanak 8:15-18).

 Sar ko Potop, „e jagaja“ andi koja vaćeri pe ki 2. Petrova 3:7 ka oven uništime o lošna manuša, a na i phuv. O Devel obećini „o nevo nebo hem i nevi phuv kuri i pravednost ka vladini“ (2. Petrova 3:13). Upri „nevi phuv“ ja upro pravedna manuša ka vladini „o nevo nebo“ ja e Devleso Kraljevstvo. Ked ka vladini e Devleso Kraljevstvo ki phuv ka ovel raj kuri ka ovel baro mir (Otkrivenje 21:1-4).