1. Соске си амаре лачшипнаске те овас ко Възпоменание секо бреш?

 О ЙЕХОВА диняс амен бут баро подаръки, като бичшалгяс пе Чшес те мерел аменге! (2 Кор. 9:15) Ашал далкхеске, кай о Исусес муло аменге, аме ащи те овас амала е Йеховаса тай ка ащи те живинас вечно-да. Бут синям благодарна е Йеховаске, кай бичшалгяс пе Чшес те мерел аменге, соскето бут дехел амен! (Рим. 5:8) О Исусес пхенгяс те керас Възпоменание лескере меримнаске, за те на бистерас со керде ов тай о Йехова за аменге тай винаги те овас ленге благодарна. (Лука 22:19, 20)

2. Со ка дикхас калке урокиесте?

² Кавка бреш о Възпоменание ка овел събота, 12 април 2025 г. Саворе мангас те жас. Секоне йекхеске амендар ка овел шукар, ако презал о курке англал тай палал о Възпоменание мислинел по-бут тай по-хоресте далкхеске со керде о Йехова тай лескоро Чшо за аменге. Акана ка дикхас со сикльовас таре Исусескери жертва е Йеховаске тай е Исусеске. О следващо уроки ка помагинел аменге те ахальовас со те керас, за те овел кайка жертва амаре лачшипнаске тай сар те сикавас, кай синям благодарна за лаке.

СО СИКЛЬОВАС Е ЙЕХОВАСКЕ ТАРЕ ИСУСЕСКЕРИ ЖЕРТВА

3. Сар ащи о мануша те овен освободиме таро безех тай таро мериба само соскето йекх мануш муло? (Дикх и картинка-да.)

³ Е Исусескери жертва сикавел аменге, кай о Йехова си справедливо. (Втор. 32:4) Помислине: Кана о Адам на шунгяс е Девлес, ов ачшило безехало тай муло. Ашал далкхеске кай синям лескере чшаве, аме-да синям безехале тай мерас. (Рим. 5:12) За те освободинел амен таро безех тай таро мериба, о Йехова бичшалгяс е Исусес те дел по животос аменге. Ама сар ащи о мериба йекхе манушескоро те освободинел  буте манушен таро безех тай таро мериба? О апостол Павел пхенгяс: „Ашал далкхеске, кай йекх мануш [о Адам] на шунгяс е Девлес, бут мануша ачшиле безехале. А ашал далкхеске кай йекх мануш [о Исусес] шунгяс лес, бут ка ачшовен лачше е Девлеске андо якха.“ (Рим. 5:19; 1 Тим. 2:6) О Павлес пхенгяс, кай саворе мануша си безехале тай требе те мерен, соскето йекх съвършено мануш на шунгяс е Девлес. Тогава за те овас освободиме таро безех тай таро мериба, йекх съвършено мануш требелас те шунел е Девлес.

4. Соске о Йехова просто на мукляс е Адамиескере чшавен, колато шунен лес, те живинен вечно?

⁴ Требелас ли о Йехова те бичшалел е Исусес те мерел аменге? Нащине ли просто те мукел е Адамиескере чшавен, колато шунен лес, те живинен вечно?Аме ащи те мислинас, кай давкха си о най-шукар, ковато ащине те керел, за те решинел о проблеми. Ама о Йехова си съвършено справедливо. Аке соске ов нисар нанаяс те пхандел пе якха далкхеске, кай о Адам кергяс баро безех тай на шунгяс лес.

5. Соске ащи те овас сигурна, кай о Йехова винаги ка керел со си лачшо?

⁵ Со ка ачшолас, ако о Йехова на бичшалгясас пе Чшес те мерел аменге, а решингясас те на сикавел справедивост тай те мукел е Адамиескере безехале чшавен те живинен вечно? Тогава ка чудинасас амен дали авер-да дром о Йехова нанай те керел нещо, ковато нанай справедливо, тай дали ка керел саворе букя, колато обещингяс. Ама акана на требе те хас холи салке букиенге. Соске? Соскето о Йехова кергяс со сине справедливо, даже кана давкха ангяс леске бари дукх, соскето требелас те дел пе йекхоре Чшес. Аке соске ащи те овас сигурна, кай ов винаги ка керел со си лачшо.

6. Сар е Исусескери жертва сикавел е Йеховаскери любов? (1 Йоан 4:9, 10)

⁶ Е Исусескери жертва на сикавел аменге само, кай о Йехова си справедливо, ама най-бут помагинел аменге те дикхас кибор бари си лескери любов. (Йоан 3:16; Четине 1 Йоан 4:9, 10.) О Йехова бичшалгяс пе Чшес те мерел аменге, ма само соскето мангел те живинас вечно, а соскето мангел-да те овас част лескере семействостар. Помислине: Кана о Адам кергяс безех, ов вече нащине те ачшол анде Йеховаскоро семейство. Аке соске, кана бияндилям, аме-да на синямас част таре Девлескоро семейство. Ама ашал далкхеске, кай о Исусес муло аменге, саворе мануша, колато верувинен ко Дел тай шунен лес, йекх диес ка ащи те ачшон лескере чшаве. Още акана о Йехова ащи те простинел амаре безеха тай аме ащи те овас  амала леса тай калкенца, колато служинен леске. Верно си, о Йехова бут дехел амен! (Рим. 5:10, 11)

7. Сар давкха, кай о Исусес мъчингяс пес, помагинел аменге те ахальовас кибор бут дехел амен о Йехова?

⁷ Ащи те ахальовас по-шукар кибор бут дехел амен о Йехова, ако мислинас кибор бут дукханило лес, кана дикхелас сар лескоро Чшо мъчинел пес. О Бенг пхенел, кай никхой нанай те ачшол верно е Йеховаске, кана си леске пхаро. За те сикавел, кай о Бенг си хохавно, о Йехова мукляс о Исусес те мъчинел пес англал те мерел. (Йов 2:1-5; 1 Пет. 2:21) О Йехова дикхляс сар о душманя асанас е Исусеске, сар маренас лес, сар ковинде лес каштесте тай даже сар лескоро Чшо, колес бут дехел, мерел баре дукхенца. (Мат. 27:28-31, 39) О Йехова ащине те спиринел саворе калка букя, кана-да те мангелас. Например кана о душманя пхенде: „Акана, ако о Дел мангел те помагинел леске, те спасинел лес“, о Йехова ащине те спасинел лес. (Мат. 27:42, 43) Ама ако о Йехова керелас давкха, о Исусес нанаяс те ащи те дел по животос аменге тай амен нанаяс те овел надежда. Аке соске о Йехова мукляс лескоро Чшо те мъчинел пес, жикай на мерел.

8. Соске ащи те овас сигурна, кай е Йеховас дукханило, кана дикхелас сар лескоро Чшо мъчинел пес? (Дикх и картинка-да.)

⁸ На требе те мислинас, кай щом о Дел си о най-зорало, лес нанай чувства! Ов кергяс е манушен те овел лен чувства тай щом синям керде те препас упрал лесте, значи е Йеховас-да иси чувства. И Библия пхенел, кай подекхана дукхал лес. (Пс. 78:40, 41) Помислине също со ачшило е Авраамиеса тай е Исаакеса. О Йехова пхенгяс е Авраамиеске те дел пе йекхоре чшес сар жертва. (Бит. 22:9-12; Евр. 11:17-19) Нащи представинас аменге кибор сине леске пхаро тай кибор бут дукхалас лес, жикай подготвинелас пес те мударел пе чшес. Още по-бари дукх сине е Йеховас, кана дикхелас сар кханиле мануша мъчиненас лескере Чшес, жикай ов на муло. (Дикх о клипи „Подражавай на вярата им: Авраам (2 част)“ ко jw.org.)

9. Со ащи те сикльовас таро Римляни 8:32, 38, 39 далкхеске кибор бут дехел амен о Йехова?

⁹ Е Исусескери жертва сикавел аменге, кай никхой на дехел амен боркха бут, кибор о Йехова, нито амаре енданя, нито амаре най-баре амала. (Четине Римляни 8:32, 38, 39.) Ащи те овес сигурно, кай ту на дехес тут боркха бут, кибор дехел тут о Йехова. Мангес ли те живинес вечно? О Йехова мангел давкха по-бут тутар. Мангес ли те безеха те овен простиме? О Йехова мангел по-бут тутар те простинел туке. Ов мангел амендар само те сикавас, кай синям благодарна далкхеске, кай диняс пе Чшес аменге, те верувинас  лесте тай те шунас лес. Е Исусескери жертва си баро подаръки, ковато сикавел кибор бут о Йехова дехел амен. Тай ко нево светос ка сикльовас още саве букя кергяс о Йехова за аменге, соскето дехел амен. (Екл. 3:11)

СО СИКЛЬОВАС Е ИСУСЕСКЕ ТАРИ ЖЕРТВА, КОЯТО КЕРГЯС ОВ

10. а) Соске о Исусес халас холи далкхеске сар ка мударенас лес? б) Сар о Исусес сикавгяс, кай о Йехова си право? (Дикх о блокчес-да „ Като ачшило верно, о Исусес сикавгяс, кай о Йехова си право“.)

¹⁰ О Исусес бут хал холи далкхеске со мислинен о мануша лескере Дадеске. (Йоан 14:31) Е Исусес бут дукхалас, кай о мануша ащи те мислинен кханиле букя лескере Дадеске, ашал далкхеске кай ов ка овелас мудардо сар мануш, ковато мелярел е Девлескоро алав, тай сар престъпники. Аке соске ов молисайло: „Мо Дад, ако ащи, ле кайка чаша мандар.“ (Мат. 26:39) Ама като ачшило верно е Йеховаске, жикай на муло, о Исусес сикавгяс, кай о букя, колато пхенел о Бенг за лескере дадеске, си хохавне.

11. Сар о Исусес сикавгяс пи бари любов кариг о мануша? (Йоан 13:1)

¹¹ Като диняс по животос аменге, о Исусес сикавгяс, кай бут хал холи е манушенге, тай най-бут калкенге, колато пхирен палал лесте. (Пр. 8:31; четине Йоан 13:1.) Например о Исусес жанелас, кай десаве букя, колато ка требелас те керел, жикай си ки пхув, особено давкха кай требелас те мерел баре дукхенца, ка овенас леске бут пхаре. Ама о Исусес кергяс саворе калка пхаре букя, ма само соскето о Йехова пхенгяс леске, ама соскето дехелас е манушен-да. О Исусес сикавгяс кибор бут дехел е манушен, като проповединелас ленге, сикавелас лен тай помагинелас ленге. Даже и рат англал те мерел, ов изтховгяс пе апостоленгере пире,  сикавгяс лен тай пе думенца диняс лен силес тай утеха. (Йоан 13:12-15) После, въпреки кай циделас баре дукха, жикай сине ко каш, ов диняс надежда е престъпникиес, ковато ка мерелас жи лесте, като пхенгяс леске, кай ка овел ко рай. Сикавгяс също, кай хал холи пе даяке, като пхенгяс е Йоанеске те дикхел лаке. (Лука 23:42, 43; Йоан 19:26, 27) О Исусес сикавгяс пи бари любов кариг о мануша, ма само като муло ленге, а също като икерелас пес ленца лачшипнаса.

12. Саве букя продължинел те керел о Исусес за аменге?

¹² О Исусес муло, за те махнинел о безех, ама ов продължинел те керел бут букя за аменге. (Рим. 6:10) Ов дел всичко пестар, за те ащи те овен амен саворе шукар букя, колато анел аменге лескери жертва. Помислине кибор бут бути иси лес, соскето си амаро Цари, Първосвещеники тай о шеро андо сбори. (1 Кор. 15:25; Еф. 5:23; Евр. 2:17) Лес иси и задача те кидел е помажиме християниен тай о баро множество a тай ка спиринел те керел давкха чак англал те свършинел о баро бедствие. (Мат. 25:32; Мар. 13:27) Ов помагинел о верно роби те продължинел те дел амен всичко со требел аменге, за те служинас верно е Йеховаске презал о последна диеса. (Мат. 24:45) Тай кана ка управлинел 1000 бреша, ов ка продължинел те дикхел амаре лачшипнаске. О Йехова диняс пе Чшес, ма само за те мерел аменге, ама за те керел бут авер-да букя за аменге!

ПРОДЪЛЖИНЕ ТЕ СИКЛЬОВЕС НЕВЕ БУКЯ

13. Сар ащи продължинес те сикльовес кибор бут дехен амен о Йехова тай о Исусес?

¹³ Ащи те продължинес те сикльовес кибор бут дехен амен о Йехова тай о Исусес, ако продължинес те мислинес хоресте е букиенге, колато керде он за туке. Презал о курке англал тай палал о Възпоменание, ащи те четинес шукар йекх или по-бут таро евангелия. Ма дикх те четинес бут шере, а те четинес хари по-бавно тай те родес саве авер букя иси, ашал коленге требе те дехас е Йеховас тай е Исусес. Тай пхен околенге-да со сиклилян.

14. Сар ако родас по-хоресте, ка продължинас те сикльовас е Исусескере жертваке тай авере букиенге, колато сикавел и Библия? (Псалм 119:97) (Дикх и снимка-да.)

¹⁴ Ако брешендар синян покръстиме, ащи  те мислинес дали иси още неве букя те сикльовес далкхеске кибор справедливо си о Дел, кибор бари си лескери любов тай е Исусескере жертваке. Винаги ка овен неве букя те сикльовас калке букиенге. Тогава со те керес? Амаре лила си пхерде шукаре букиенца, колато ащи те сикльовес. Четине лен шукар. Кана четинес нещо тари Библия тай на ахальовес лес лачшес, роде хари по-хоресте. После, презал о диес, мислине е букиенге, колато ахалилян тай далкхеске со сиклилян е Йеховаске, лескере Чшеске тай далкхеске кибор бут дехен тут он. (Четине Псалм 119:97.)

15. Соске требе те продължинас те родас те сикльовас неве букя тари Библия?

¹⁵ Нанай соске те хас холи, ако на аракхес нещо нево или интересно секо дром, кана бешес те четинес тай те родес по-хоресте. Давкха си все едно те родес златос. За те ащи мануш те аракхел даже хари златос, ащи те накхен десаве сахакя или диеса. Адалкхеске требе те овел търпеливо. Ама о мануш на откажинел пес тай продължинел те родел, соскето даже хари златос си леске важно. Секо йекх нево нещо, ковато сикльовас тари Библия, си бут по-важно таро златос! (Пс. 119:127; Пр. 8:10) Аке соске требе те продължинес те четинес и Библия тай те родес, за те сикльовес неве букя. (Пс. 1:2)

16. Сар ащи те овас сар о Йехова тай сар о Исусес?

¹⁶ Кана четинес, дикх сар ащи те керес те животосте о букя, колато сикльовес. Например дикх сар ащи те овес сар о Йехова, ковато си справедливо, като ту-да синян честно околенца. Ов сар о Исусес тай дехе е Йеховас тай околен, като синян готово те керес со мангел о Йехова тай те помагинес околенге даже ако подекхана нанай те овел туке лесно те керес давкха. Ов сар о Исусес, като пхенес околенге, кай он-да ащи те ахальовен саве шукар букя кергяс о Йехова за е манушенге тай кай ащи те верувинен ке Исусескери жертва.

17. Со ка дикхас ко следващо уроки?

¹⁷ Кибор по-бут букя ахальовас е Исусескере жертваке, боркха по-бут ка дехас е Йеховас тай е Исусес. Тай он-да ка дехен амен са по-бут. (Йоан 14:21; Як. 4:8) Тогава четине шукар саворе букя, колато дел амен о Йехова, за те продължинес те сикльовес е Исусескере жертваке. Ко следващо уроки ка сикльовас още е шукаре букиенге, колато иси амен, ашал далкхеске, кай о Исусес муло аменге, тай сар ащи те сикавас, кай синям благодарна, кай о Йехова дехел амен.