6 УРОКИ
ГИЛИ 18 Благодарна е откупиеске
Бут синям благодарна, кай о Йехова простинел аменге
„О Дел боркха бут дехингяс о светос, кай диняс пе йекхоре Чшавес.“ (ЙОАН 3:16)
О НАЙ-ВАЖНО
Мангас те овас още по-благодарна, кай о Йехова простинел аменге. Адалкхеске ка сикльовас со кергяс о Йехова, за те ащи те простинел амаре безеха.
1-2. Соске ащи те пхенас, кай аменца ачшило о също сар е терне манушеса, колеске пишинел ко 1 абзаци?
Представине туке йекхе терне мрушес, колескоро семейство си барвало. Йекх диес ачшол катастрофа тай лескери дай тай лескоро дад мерен. Леске си бут пхаро. После ахальовел също, кай он ачшиле бипаренгоро тай тховде пес баре борчя. Вместо те мукен леске наследство, он мукле леске пе борчя тай ов требе те иринел лен, а о мануша манген пе парес веднага. Ов нисар нанай те ащи те иринел ленгоро борчи.
2 Ащи те пхенас, кай аменца ачшило о също сар калке терне манушеса. Амаро дад тай амари дай, о Адам тай и Ева, сине съвършена тай бешенас бут шукаре тханесте. (Бит. 1:27; 2:7-9) Лен ащине те овел шукар животос завинаги. Ама о Адам тай и Ева керде безех. Тогава о Йехова икалгяс лен тари шукар Едемско градина тай он вече нащине те живинен вечно. Со мукле он пе чшавенге? И Библия пхенел аменге: „Йекхе манушестар [таро Адам] о безех ало андо светос, тай лестар о мериба, тай о мануша почнинде те мерен, соскето саворе ачшиле безехале.“ (Рим. 5:12) О Адам мукляс аменге о безех, ковато анел мериба. Кавка безех си сар баро борчи, ковато никхой амендар нащи те иринел. (Пс. 49:8)
3. Соске ащи те пхенас, кай о безеха си сар борчя?
3 О Исусес пхенгяс, кай о безеха си сар „борчя“. (Мат. 6:12; Лука 11:4) Кана керас безех, все едно лас парес таро Йехова тай ов ащи те мангел лен песке. Ако о борчи на иринел пес, ка овел опростиме само кана ка мерас. (Рим. 6:7, 23)
4. а) Со ка ачшол саворе безехале манушенца, ако никхой на помагинел ленге? (Псалм 49:7-9) б) Со си „безех“ анди Библия? (Дикх о блокчес „ Безех“.)
4 Аме нащи коркоре те иринас аменге саворе букя, колато о Адам тай и Ева нашалде. (Четине Псалм 49:7-9.) Ако никхой на помагинел аменге, нанай сар те овел амен вечно животос или те овас възкресиме. Тогава, сар о животна, ка мерас без те ащи те живинас пак. (Екл. 3:19; 2 Пет. 2:12)
5. Сар амаро Дад помагингяс аменге те платинас амаре безеха? (Дикх и картинка.)
5 Помислине пак е терне манушеске, колеске хоратингям. Сар ка чувствинел пес ов, ако йекх барвало мануш мангел те иринел лескере саворе борчя? Сигурна синям, кай ка овел бут благодарно тай кай ка приеминел о баро подаръки. Амаро Дад-да, о Йехова, диняс амен подаръки, колеса платинел о борчи, демек о безех, ковато мукляс аменге о Адам. О Исусес пхенгяс: „О Дел боркха бут дехингяс е светос, кай диняс пе йекхоре Чшавес, за те ащи секой, ковато верувинел лесте, те на овел унищожиме, а те живинел вечно.“ (Йоан 3:16) Ашал калке подаръкиеске ащи също те овас амала е Йеховаса.
О Исусес шунярелас и лачши новина, кай о Йехова ащи те простинел аменге, соскето ов ка делас по животос аменге. (Йоа 3:16) После ов сине готово те мерел аменге, за те платинел амаре безеха (Дикх о 5 абзаци)
6. Со ка дикхас калке урокиесте?
6 Сар кавка шукар подаръки, ашал колеске ащи амаре безеха те овен простиме, ащи те анел аменге лачшипе? За те ахальовас давкха, ка дикхас десаве букя тари Библия тай ка ахальовас со означинен он. Кана мислинас со кергяс о Йехова, за те простинел аменге, амари благодарност кариг лесте ка барьол.
О ЙЕХОВА МАНГЕЛ ТЕ ОВАС АМАЛА ЛЕСА
7. а) Со авер нашалде о Адам тай и Ева? б) Со требел аменге, ашал далкхеске кай синям ленгере чшаве? (Римляни 5:10, 11)
7 Кана о Адам тай и Ева керде безех, на нашалде само о вечно животос, а по амалипе е Йеховаса-да тай даже ачшиле лескере душманя. Англал те керен безех, он сине част таре Девлескоро семейство. (Лука 3:38) Ама кана на шунде е Йеховас, ов гонингяс лен тай вече нащине те овен част лескере семействостар. Давкха ачшило англал е Адамиес тай е Ева те овен чшаве. (Бит. 3:23, 24; 4:1) Никхой ленгере чшавендар, демек аме-да, нащи те овел част таре Йеховаскоро семейство. Аке соске требелас аменге помощ, за те ачшовас лачше амала леса. (Четине Римляни 5:10, 11.) Требелас вече те на овас лескере душманя тай те ачшовас амала леса. О Йехова сине о първо, ковато кергяс со требе, за те ачшол давкха. Со кергяс ов?
О ДЕЛ КЕРГЯС СО ТРЕБЕ, ЗА ТЕ АЩИ ТЕ ОВАС АМАЛА ЛЕСА
8. Со кергяс о Йехова, за те ащи те овас амала леса?
8 O Йехова кергяс со требе, за те ащи о безехале мануша те ачшон амала леса. За те иринел аменге давкха со нашалгяс о Адам, ов диняс о също — йекх съвършено животос. Ко Нево завети пишинел со кергяс о Йехова, за те ащи е манушен те овел мири леса тай те ащи те ачшон лескере амала. (Рим. 3:25)
9. Со кергяс о Йехова, за те ащи те простинел е израилтяниенге?
9 О Йехова кергяс нещо, за те ащи те простинел е израилтяниенгере безеха тай те ащи он те овен амала леса. О израилтяня требелас те керен йекх празники йекхвар андо бреш, ковато пхенелас пес О диес на изкупление. Калке диесесте о първосвещеники делас жертва е целоне народоске. О животна, колато денас сар жертва, на ресенас, за те ащи ленгере безеха те овен простиме, соскето о животна нанай боркха ценна сар о мануша. Ама жикай о израилтяня керенас о жертвес, колато мангелас о Йехова, ов вогиестар простинелас ленге. (Евр. 10:1-4) О жертвес, колато керелас о народос ко Диес на изкупление тай околе диесенде, помагинелас ленге те ахальовен, кай си безехале тай кай требел ленге нещо по-баро, за те ащи те овен напълно простиме ленгере безеха.
10. Со кергяс о Йехова, за те ащи е манушенгере безеха те овен простиме?
10 Со кергяс о Йехова, за те ащи е манушенгере безеха те овен простиме? Ов бичшалгяс пе Чшес те дел по животос „веднъж завинаги, за те овен простиме буте манушенгере безеха“. (Евр. 9:28) О Исусес платингяс пе животоса, за те освободинел буте женен. (Мат. 20:28) Сар ащине ов те платинел за аменге?
О ИСУСЕС ПЛАТИНГЯС ЗА АМЕНГЕ ПЕ ЖИВОТОСА
11. а) За соске пхенел и Библия, кай требелас те платинел пес? б) Саво мануш ащине те платинел за аменге?
11 И Библия пхенел, кай о Йехова решингяс кай требе те дел жертва, коласа ка платинелас, за те овен простиме амаре безеха тай те ащи те овас амала леса. Со требелас те дел пес, за те овел е манушен давкха со нашалгяс о Адам? О Адам тай и Ева нашалде по съвършено животос тай нащине те живинен вечно. Аке соске требелас те платинел пес боркха, кибор он нашалде. (1 Тим. 2:6) Требелас те платинел пес манушестар, ковато 1) сине съвършено, 2) ащине те живинел вечно ки пхув тай 3) сине готово те откажинел пес калке животостар аменге. Само савка мануш ащине те дел по животос, за те платинел далкхеске со сине нашалдо.
12. Соске о Исусес ащине те платинел за аменге?
12 Дикх соске о Исусес ащине те платинел за аменге. 1) Ов сине съвършено — „на кергяс нисаво безех“. (1 Пет. 2:22) 2) Ашал далкхеске ащине те живинел вечно ки пхув. 3) Ов сине готово те откажинел пес салке животостар тай те мерел аменге. (Евр. 10:9, 10) О Исусес сине съвършено мануш, точно сар о първо мануш, о Адам, англал те керел о безех. (1 Кор. 15:45) Аке соске, като муло аменге, о Исусес ащине те платинел точно кибор требелас, за те иринел аменге давкха со нашалгяс о Адам. (Рим. 5:19) О Исусес ачшило „о последно Адам“. Нанай соске авер съвършено мануш те авел тай те платинел далкхеске со нашалгяс о Адам. О Исусес муло „веднъж завинаги“. (Евр. 7:27; 10:12)
13. Сар ащи те овас амала е Йеховаса?
13 Сар ащи те овас амала е Йеховаса? О Йехова кергяс со требе, за те ащи те простинел амаре безеха. О Исусес диняс по съвършено животос, за те платинел точно кибор требелас, за те овен простиме амаре безеха. (Еф. 1:7; Евр. 9:14)
О ЙЕХОВА ОСВОБОДИНЕЛ АМЕН ТАРО БЕЗЕХ ТАЙ ТАРО МЕРИБА ТАЙ АЧШОВАС ЛАЧШЕ ЛЕСКЕРЕ ЯКХЕНДЕ
14. Со ка дикхас акана тай соске?
14 Саве благословиес анен аменге о букя, колато кергяс о Йехова за аменге? Ка дикхас дуй букя, коленге хоратинел и Библия, за те ахальовас саве благословиес анел аменге е Йеховаскери прошка.
15-16. а) Со означинел, кана анди Библия пишинел, кай декхой платинел за туке? б) Сар чувствинас амен, ашал далкхеске, кай синям освободиме таро безех тай таро мериба?
15 И Библия пхенел, кай кана о Исусес диняс по животос, ов все едно платингяс за аменге, демек освободингяс амен. О апостол Павел пхенгяс: „Жанен, кай на синьенас осовдиме букиенца, колато нанай вечна — среброса или златоса, таро животос, колесте сикавде тумен тумаре дада тай ковато на анел нищо шукар. Ама туменге сине платиме е Исусескере скъпоне ратеса, ковато си сар о рат йекхе бакрескоро, ковато си шужо тай колес нанай кусуря.“ (1 Пет. 1:18, 19)
16 Е Исусескери жертва освободинел амен таро безех тай таро мериба, колато керен амаро животос бут пхаро. (Рим. 5:21) Аме синям бут благодарна е Йеховаске тай е Исусеске, кай платинде за аменге е Исусескере ратеса. (1 Кор. 15:22)
17-18. а) Со означинел, кай декхой ачшовел лачшо е Девлеске андо якха? б) Саве благословиес анел аменге давкха?
17 И Библия пхенел, кай е Йеховаскере служителя ачшон лачше лескере якхенде. Аке соске ов на мангел амендар те платинас е безехенге, колато керас. О Йехова ащи те керел давкха тай пак те овел справедливо. Аме нащи те керас нещо, за те заслужинас те овас лачше е Девлеске андо якха, тай ов-да на пхандел пе якха амаре безехенге. Ама си готово те простинел аменге, соскето сикавас вяра андо букя, колато ов тай о Исусес керде, за те платинен амаре безеха. (Рим. 3:24; Гал. 2:16)
18 Саве благословиес иси амен далкхестар, кай ачшовас лачше е Йеховаске андо якха? Десаве си избириме те овен царя ко небес заедно е Исусеса тай ачшиле е Девлескере чшаве. (Тит 3:7; 1 Йоан 3:1) Ов простингяс ленгере безеха, все едно нисар на керде лен. Аке соске он ащи те ачшон царя. (Рим. 8:1, 2, 30) Авер калкендар, колато ачшовен лачше е Йеховаске андо якха, ка живинен вечно ки пхув. Ленгере безеха сине простиме тай он ачшиле е Девлескере амала. (Як. 2:21-23) Калка, колато ка ачшон живде презал о Армагедон, ащи нисар те на мерен. (Йоан 11:26) О муле, колато сине верна е Йеховаске тай калка-да, колато на керенас со мангел ов, ка овен възкресиме. (Деян. 24:15; Йоан 5:28, 29) Саворе верна служителя е Йеховаскере ки пхув „ка овен свободна сар е Девлескере чшаве“. (Рим. 8:21) Аме жарас те авел о време, кана ка овас бут близка амаре Дадеса, е Йеховаса!
19. Сар о букя променисайле амаре лачшипнаске? (Дикх о блокчес-да „ О Йехова простинел аменге“.)
19 Верно си, кай на сине амен надежда, сар о терно мануш, ковато нашалгяс всичко тай мукле леске баре борчя, колато нисар нанаяс те ащи те иринел. Ама о Йехова помагингяс аменге. О букя променисайле, соскето о Йехова кергяс со требе, за те ащи амаре безеха те овен простиме, тай соскето о Исусес диняс по животос аменге. Ашал далкхеске кай верувинас ко Исусес, амаре безеха си платиме тай синям освободиме таро безех тай таро мериба. Кана о Йехова простинел амаре безеха, си все едно нисар на кергям лен. Ама о най-важно си, кай акана ащи те овас амала амаре небесноне Дадеса, е Йеховаса, ковато бут дехел амен.
20. Со ка дикхас ко следващо уроки?
20 Кана мислинас саворе букиенге, колато керде за аменге о Йехова тай о Исусес, аме синям ленге бут благодарна. (2Ко 5:15) Ако он на помагиненас аменге, нанаяс те овел амен нисави надежда. Ко следващо уроки ка дикхас десаве примеря тари Библия, колато ка помагинен аменге те ахальовас, кай кана о Йехова простинел аменге, вече нанай соске те овас пишмани е безехенге, колато кергям.
ГИЛИ 10 Е Девлес те славинес ту!
