22 УРОКИ
ГИЛИ 15 Слава е Чшавеске
Кибор си важно е Йеховаскоро алав е Исусеске?
„Пхенгьом ленге то алав тай ка продължинав те пхенав лес.“ (ЙОАН 17:26)
О НАЙ-ВАЖНО
Ка дикхас со означинел, кай о Исусес пхенгяс е Йеховаскоро алав тай сар сикавгяс, кай о Йехова си свято тай кай всичко со пхенгяс о Бенг за леске си хохайбе.
1-2. a) Со кергяс о Исусес и рат англал те мерел? б) Со ка дикхас калке урокиесте?
Сине четвъртък и рат 14 нисан 33 бреш. О Исусес тай лескере ученикя керде и Господно вечеря. Сиго ка преденас е Исусес, ка съдиненас лес, ка маренас лес тай ка мударенас лес. Аке соске кана свършинде и вечеря, ов пхенгяс ленге десаве букя, за те насърчинел лен. Кана ало о време те жан песке, о Исусес пхенгяс йекх бут важно молитва. О апостол Йоан пишингяс кайка молитва тай аме ащи те четинас ла ко 17 шеро таро лил Йоан.
2 Калке урокиесте ка дикхас саве букя ащи те сикльовас таре Исусескери молитва. Ка дикхас също за соске халас холи о Исусес англал те мерел тай сар кайка молитва сикавел саве букя сине леске важна, жикай сине ки пхув.
„ПХЕНГЬОМ ЛЕНГЕ ТО АЛАВ“
3. Со пхенгяс о Исусес е Йеховаскере алавеске тай со означинелас давкха? (Йоан 17:6, 26)
3 О Исусес пхенгяс пе молитвате: „Пхенгьом ленге то алав.“ Ахальовас, кай давкха сине важно е Исусеске, соскето пхенгяс лес дувар. (Четине Йоан 17:6, 26.) Ама со означинел давкха? Требелас ли те пхенел пе ученикиенге, кай е Девлескоро алав си Йехова? Он сине юдея тай вече жаненас е Девлескоро алав. Кавка алав сине пишиме бут дром ко Еврейска писания. О Исусес на сикавелас лен, саво си е Девлескоро алав, а сикавелас лен саво Дел си о Йехова. О Исусес помагингяс ленге те пенжарен лес по-лачшес тай те жанен со мангел о Йехова е манушенге, со кергяс ов тай со ка керел. Само о Исусес пенжарелас е Йеховас боркха шукар.
4-5. a) Сар йекх алав ащи те ачшол туке по-важно? Пхен йекх примери. б) Сар е Исусескере ученикя ахалиле по-бут е Йеховаске?
4 Представине туке, кай тере сбориесте иси йекх старейшина, колескоро алав си Петър тай си бут лачшо лекари. Пенжарес лес бут бреша. Ама йекх диес ачшол катастрофа тай ингален тут ки болница, колате керел бути о Петрес. Ов спасинел то животос. Акана, кана шунес лескоро алав, за соске дес тут годи? За туке ов вече нанай само йекх таро старейшиня ко сбори, а си о мануш, ковато спасингяс то животос.
5 Е Исусескере ученикя-да вече жаненас е Йеховаскоро алав. Ама кавка алав ачшило по-важно за ленге, кана о Исусес помагингяс ленге те пенжарен е Йеховас по-лачшес. Соске ащи те пхенас давкха? Соскето всичконаса со пхенелас тай керелас о Исусес сикавгяс, кай си сар пе Дадесте. Аке соске о ученикя ахалиле бут е Йеховаске, като шуненас со сикавел о Исусес тай като дикхенас сар икерел пес е манушенца. (Йоан 14:9; 17:3)
„АШАЛ О АЛАВ, КОВАТО ДИНЯН МАН“
6. Соске о Исусес ащине те пхенел, кай о Йехова диняс лес по алав? (Йоан 17:11, 12)
6 Кана молингяс пес о Йехова те помагинел лескере ученикиенге, о Исусес пхенгяс: „Пазине лен ашал тере алавеске, ашал о алав, ковато динян ман.“ (Четине Йоан 17:11, 12.) Означинел ли давкха, кай е Исусескоро алав вече ка овелас Йехова? На-а. Кана о Исусес хоратингяс е Йеховаскере алавеске, ов пхенгяс „ашал тере алавеске“. О Исусес на лиляс пе Дадескоро алав. Тогава со мангелас те пхенел, кана пхенгяс, кай о Йехова диняс лес по алав? О Йехова бичшалгяс е Исусес ки пхув, за те хоратинел лескере алавестар. О чудеса-да, колато керелас о Исусес сине лескере Дадескере алавесте. (Йоан 5:43; 10:25) Авере ригатар е Исусескоро алав означинел „о Йехова си спасение“. Демек е Йеховаскоро алав си част таре Исусескоро алав.
7. Соске о Исусес ащине те хоратинел таре Йеховаскоро алав? Пхен йекх примери.
7 За те ахальовас соске о Исусес хоратинелас е Йеховаскере алавестар, ащи те пхенас йекх примери. Йекх президенти ащи те бичшалел декхас те хоратинел лескере алавестар. Кана кавка мануш ка хоратинел, ка овел все едно о президенти хоратинел. О Исусес-да сине бичшалдо таро Йехова тай ащине те хоратинел лескере алавестар. (Мат. 21:9; Лука 13:35)
8. Соске о Йехова пхенгяс, кай о Исусес „ало лескере алавестар“? (Изход 23:20, 21)
8 И Библия пхенел, кай о Исусес си „о Слово“, соскето кана о Йехова мангелас те пхенел десаве букя е ангеленге тай е манушенге, ов бичшалелас лес те хоратинел ленца. (Йоан 1:1-3) Сигурно о Исусес сине о ангели, колес о Йехова бичшалгяс те дикхел е израилтяниенге, кана он сине ки пустиня. О Йехова пхенгяс ленге те шунен калке ангелес, соскето „ов авел лескере алавестар“. a (Четине Изход 23:20, 21.) Калка думес сикавен, кай о Исусес хоратинел е Йеховаскере алавестар тай ов най-бут защитинел лес тай помагинел кавка алав те ачшол свято.
„МО ДАД, АН СЛАВА ТЕ АЛАВЕСКЕ“
9. Пхен кибор важно сине е Йеховаскоро алав е Исусеске.
9 Сарто дикхлям е Йеховаскоро алав сине бут важно е Исусеске още англал те авел ки пхув. Кана сине ки пхув-да, ов сикавгяс всичконаса со керелас кибор важно си леске кавка алав. Хари англал те мерел ов пхенгяс: „Мо дад, ан слава те алавеске.“ Тогава лескоро дад пхенгяс таро небес: „Ангьом леске слава тай пак ка анав леске.“ (Йоан 12:28)
10-11. а) Сар о Исусес ангяс слава е Йеховаскере алавеске? (Дикх и картинка-да.) б) Соске о Йехова требе те керел по алав свято?
10 О Исусес-да ангяс слава пе Дадескере алавеске. Сар? Например като хоратинелас околенге кибор лачшо си о Йехова тай саве букя керел. Ама о Исусес требелас също те помагинел лескоро алав те овел свято. Ов сикавгяс кибор важно си давкха ки молитва, колатар ахальовас сар те молинас амен. Лате ов пхенгяс: „Амаро Дад, ковато синян ко небес, молинас амен те овел свято торо алав.“ (Мат. 6:9)
11 Соске о Йехова требелас те керел по алав свято? Соскето анди Едемско градина о Бенг пхенгяс хохавне букя е Йеховаске. Ов пхенгяс, кай о Йехова си хохавно тай кай гаравел шукар букя таро Адам тай тари Ева. (Бит. 3:1-5) О Бенг също пхенгяс, кай о Йехова на керел о букя, сарто требе. Ашал калке букиенге о мануша ащи те мислинен, кай о Йехова си кханило Дел. По-късно, ке Йовескере диеса, о Бенг пхенгяс, кай о мануша служинен е Йеховаске само ашал о букя, колато ов ка дел лен. Демек ов мангелас те пхенел, кай нанай мануш, ковато те дехел е Йеховас боркха бут, кай те продължинел те служинел леске даже кана си леске пхаро. (Йов 1:9-11; 2:4) Требелас време, за те —дикхьол кой хохавел — о Йехова или о Бенг.
О Исусес сикавел пе ученикиен кибор важно си те помагинен е Йеховаскоро алав те овел свято (Дикх о 10 абзаци)
„ДАВ МО ЖИВОТОС“
12. Со сине готово те керел о Исусес, ашал далкхеске кай дехел е Йеховаскоро алав?
12 О Исусес боркха бут дехелас пе Дадес, кай сине готово те керел всичко тай даже те мерел, за те помагинел лескоро алав те овел свято. Ов пхенгяс: „Дав мо животос.“ b (Йоан 10:17, 18) Въпреки кай сине съвършена о Адам тай и Ева иринде думо е Йеховаске тай шунде е Бенгес. Ама о Исусес сине готово те авел ки пхув тай те сикавел, кай дехел е Йеховас, като шунелас лес. (Евр. 4:15; 5:7-10) Ов ачшило верно е Йеховаске жикай на муло. (Евр. 12:2) Калке букиенца о Исусес сикавгяс, кай дехел е Йеховас тай лескоро алав.
13. Соске най-лачшес о Исусес ащине те сикавел, кай о Бенг си хохавно? (Дикх и картинка-да.)
13 Всичконаса со кергяс о Исусес сикавгяс, кай о Бенг си хохавно, а ма о Йехова. (Йоан 8:44) Никхой на пенжарел по-лачшес е Йеховас таро Исусес. Ако даже йекх таро букя, колато о Бенг пхенгяс е Йеховаске, сине верно, о Исусес ка жанелас. Ама ов мангелас те защитинел е Йеховаскоро алав. Даже кана дикхьолас, кай о Йехова муклясас лес, о Исусес сине готово те мерел, вместо те иринел думо пе Дадеске. (Мат. 27:46) c
Всичко со кергяс о Исусес сикавел, кай о Бенг си хохавно, а ма о Йехова! (Дикх о 13 абзаци)
„КЕРГЬОМ И БУТИ, КОЯТО ДИНЯН МАН“
14. Со диняс о Йехова е Исусес, ашал далкхеске кай ачшило леске верно?
14 Ки молитва, която о Исусес пхенгяс ки рат англал те мерел, ов ащине те пхенел: „Кергьом и бути, която динян ман.“ (Йоан 17:4, 5) О Исусес мукелас пес пе дадеске андо васта тай на ачшило пишмани. О Йехова на мукляс лес ко мимори. (Деян. 2:23, 24) Ов възкресингяс лес тай диняс лес бари власт ко небес. (Флп. 2:8, 9) Хари по-късно о Исусес ачшило Цари анде Девлескоро Царство. Со ка керел кавка Царство? О Исусес пхенгяс аменге давкха ки молитва, колатар сикльовас сар те молинас амен: „Те авел торо Царство. Те ачшол давкха со ту мангес ки пхув, сарто ачшол ко небес.“ (Мат. 6:10)
15. Со авер ка керел о Исусес?
15 Сиго о Исусес ка марел пес е Йеховаскере душманиенца тай ка побединел лен ки война Армагедон. (Откр. 16:14, 16; 19:11-16) Хари палал далкхесте, ов ка чшиел е Бенгес „йекхе баре хевяте“, демек ка пхандел лес тай ов нанай те ащи те керел нищо. (Откр. 20:1-3) После о Исусес ка управлинел 1000 бреша, ка анел мири ки пхув тай ка помагинел е манушенге те ачшон съвършена. Ов ка възкресинел е мулен тай ка керел и цело пхув рай. Давкха со мангел о Йехова е пхувяке ка ачшол! (Откр. 21:1-4)
16. Саво ка овел о животос палал о 1000 бреша, коленде о Исусес ка управлинел?
16 Саво ка овел о животос палал о 1000 бреша, коленде о Исусес ка управлинел? Нанай те овел безех тай о мануша ка ачшон съвършена. Вече нанай те молинас амен анде Исусескоро алав о Дел те простинел амаре безеха тай нанай те требе декхой те помагинел аменге те овас амала е Йеховаса. „О последно душмани“-да, демек о мериба, ковато ало таро Адам, ка овел унищожиме. О муле ка овен възкресиме тай саворе ки пхув ка овен съвършена. (1 Кор. 15:25, 26)
17-18. а) Со ка ачшол ко крайос ко 1000 бреша, коленде о Исусес ка управлинел? б) Со ка керел о Исусес, кана накхен калка 1000 бреша? (1 Коринтяни 15:24, 28) (Дикх и снимка-да.)
17 Ко крайос ко 1000 бреша, коленде о Исусес ка управлинел, ка ачшол нещо бут важно. Вече никхой нанай те чудинел пес дали о Йехова си свято тай лачшо Дел. Соске? Ки Едемско градина о Бенг пхенгяс, кай о Йехова хохавел тай кай на управлинел е манушен дехимнаса. Презал о бреша палал далкхесте е Йеховаскере служителя бут дром сикавде, кай е Девлескоро управление си о най-лачшо. Аке соске ко крайос ко 1000 бреша, коленде о Исусес ка управлинел, е Йеховаскоро алав ка овел шужо тай вече ка жанел пес, кай о Йехова си амаро небесно Дад, ковато бут дехел амен.
18 Кана свършинен о 1000 бреша, коленде о Исусес ка управлинел, саворе ка жанен, кай о букя, колато о Бенг пхенгяс е Йеховаске, сине хохавне. А со ка керел о Исусес, кана накхен калка 1000 бреша? Ка ухкьел ли мамуй о Йехова, сарто кергяс о Бенг? На-а. (Четине 1 Коринтяни 15:24, 28.) О Исусес ка иринел о Царство пе Дадеске тай ка овел готово те шунел лес. О Исусес нанай сар о Бенг. Ов си готово те дел пи цело власт е Йеховаске, соскето дехел лес.
О Исусес иринел о Царство е Йеховаске, кана свършинен о 1000 бреша, коленде сине цари (Дикх о 18 абзаци)
19. Кибор си важно е Йеховаскоро алав е Исусеске?
19 Ахальовас соске о Йехова дел по алав е Исусеске! О Исусес най-лачшес ащине те сикавел саво си лескоро Дад. Тогава кибор си важно е Йеховаскоро алав е Исусеске? Кавка алав си леске по-важно всичконастар. Ов сине готово те мерел ашал калке алавеске тай ка овел готово те иринел всичко е Йеховаске, кана о 1000 бреша, коленде ка управлинел, ка свършинен. Ко следващо уроки ка дикхас сар ащи те овас сар о Исусес.
ГИЛИ 16 Хвалинен е Йеховас тай амаре Цариес
a Авер-да ангеля хоратинде е Йеховаскере алавестар. Аке соске подекхана ки Библия пишинел, кай о Йехова хоратинел, нищо кай декх ангели хоратинел лескере алавестар. (Бит. 18:1-33) Например въпреки кай и Библия пхенел, кай о Йехова диняс е Моисейес о Закони, авере стиховиендар ахальовас, кай ов бичшалгяс ангелен те керен давкха. (Лев. 27:34; Деян. 7:38, 53; Гал. 3:19; Евр. 2:2-4)
b О Исусес муло също за те ащи те овел е манушен вечно животос.
c Дикх „Въпроси на читатели“ ки „Стражево кула“, април 2021 г., стр. 30-31.
