О Йехова мангел амендар те ценинас и лоялност. (Псалм 18:25) Давкха си особено важно тумаре бракиеске, соскето ако нанай лоялност, нанай доверие. Тай о доверие си необходимо за те барьол и любов.

Авдиес и лоялност андо браки си атакувиме. За те защитинес то браки, требинел те овес решиме те керес дуй букя.

СО ПХЕНЕЛ И БИБЛИЯ: „Уверинен тумен далкхесте кола си о по–важна букя.“ (Филипяни 1:10) То браки си йекх таро най–важна букя тере животосте. Ов заслужинел те овел ко първо тхан.

О Йехова мангел те иринес то цело внимание те партньориеске тай те лошанен е животоске заедно. (Еклисиаст 9:9) О Дел ясно сикавел, кай нисар на требинел те пренебрегвинес те партньориес, а требинел те родес начиня те керес лес щастливо. (1 Коринтяни 10:24) Сикав те партньориеске, кай си нужно тай ценно туке.

СО АЩИ ТЕ КЕРЕС:

• Редовно отделине време за те овен заедно, тай ирине то цело внимание те партньориеске.

• Мислине „аме“ вместо „ме“.

СО ПХЕНЕЛ И БИБЛИЯ: „Секой ковато продължинел те дикхел йекхе жувля чука, кай те мангел ла, вече кергяс прелюбодейство пе сърцесте.“ (Матей 5:28) Ако декхой продължинел те мислинел неморалноне букиенге, ащи те пхенас, кай нанай наистина верно пе партньориеске.

О Йехова предупрединел: „Пазине то сърцес.“ (Притчи 4:23; Йеремия 17:9) За те керес давкха требинел те пазинес те якха. (Матей 5:29, 30) Следвине о примери ковато диняс о Йов, като кергяс договори пе якхенца, нисар те на дикхел авере жувля чука, кай те мангел ла. (Йов 31:1) Ов решиме нисар те на дикхес порнография. Също ов решиме те на позволинес те овел тут нисаве романтична чувства авереске освен те партньориеске.

СО АЩИ ТЕ КЕРЕС:

• Сикав ясно е аверенге, кай синян напълно обвържиме те партньориеса.

• Ле предвид те партньориескере чувства тай чшинав секакво отношение ковато ащи те традел лес те чувствинел пес неудобно.