О Исусес си о шеро е сбориескоро. (Ефесяни 5:23) Акана ов си цари ко небес тай водинел пе манушен ки пхув чрез о „верно тай разумно роби“. (Четине Матей 24:45.) О Исусес избирингяс е „робиес“ тай диняс лес о право те решинел десаве букя, ама „о роби“ требе те шунел е Исусес тай те служинел лескере пхраленге тай пхениенге. Кова си кавка роби? Со керел о роби за аменге?

1. Кова си о „верно тай разумно роби“?

Андо пуране диеса о Йехова винаги използвинелас йекхе манушес или цикни група манушендар, за те водинел пе народос. (Малахия 2:7; Евреи 1:1) Палал о мериба е Исусескоро, о апостоля тай о старейшиня андо Йерусалим започнинде те водинен е християниен. (Деяния 15:2) Авдиес-да водинел амен йекх цикни група старейшиниендар — о Ръководно тяло е Йеховаскере Свидетеленгоро. Он дикхен те овен амен лила тай всичко со требел аменге, за те ачшовас верна е Йеховаске, тай сикавен амен сар те проповединас. Кайка група пхралендар си о „верно тай разумно роби, колес [о Исусес] тховгяс“ те керел калка букя. (Матей 24:45а) Саворе пхрала таро Ръководно тяло, си избириме таро Йехова тай си помажиме лескере святоне духоса. Он ка овен царя ко небес е Исусеса, кана ленгоро животос ки пхув ка свършинел.

2. Со дел амен о верно роби, за те помагинел аменге те ачшовас верна е Йеховаске?

О Исусес пхенгяс, кай о верно роби ка „дел [пе пхрален] хабе навреме“. (Матей 24:45б) Сарто о хабе, ковато хас, помагинел аменге те овас састе тай зорале, о духовно хабе-да, демек о съвекя таре Девлескоро Слово, ден амен сила те ачшовас верна е Йеховаске тай те керас и задача, която диняс амен о Исусес. (1 Тимотей 4:6) Аме получинас салка съвекя таро събрания, таро конгреся тай таро библейска лила тай клиповя. Саворе калка букя помагинен аменге те ахальовас со мангел о Дел амендар тай те ачшовас са по-лачше амала леса.

 РОДЕ ПО-ХОРЕСТЕ

3. Е Йеховаскере народосте требе те овел редос

О Исусес водинел е пхрален таро Ръководно тяло, за те помагинен те ачшон редоса о букя, колато керен е Йеховаскере Свидетеля. Дикхен о КЛИПИ.

Четинен 1 Коринтяни 14:33, 40 тай хоратинен калке въпросиеске:

• Сар о стиховя сикавен, кай о Йехова мангел всичко со керен е Йеховаскере Свидетеля те ачшол редоса?

4. О верно тай разумно роби сикавел амен сар те проповединас

И най-важно бути е първоне християниенге сине те проповединен. Четинен Деяния 8:14, 25 тай хоратинен калке въпросиенге:

• Кой пхенелас е първоне християниенге сар тай кате те проповединен?

• Со керде о Петър тай о Йоан, кана окола апостоля пхенде ленге кате те жан те проповединен?

И най-важно бути, която керел о верно тай разумно роби, си те сикавел амен сар те проповединас. Дикхен о КЛИПИ.

 О Исусес сикавгяс кизом си важно те проповединас. Четинен Марко 13:10 тай хоратинен калке въпросиенге:

• Соске и проповедно служба си зомкха важно е пхраленге таро Ръководно тяло?

• Соске иси амен нужда таро „верно тай разумно роби“, за те проповединас редоса ки цело пхув?

5. O верно роби сикавел аменге о дром

О Ръководно тяло сикавел о дром е християниенге ко цело светос. Сар решинен со те пхенен аменге? Дикх сар решиненас калка букя о пхрала таро ръководно тяло презал о първо веки. Четинен Деяния 15:1, 2 тай хоратинен калке въпросиенге:

• Саво проблеми сине машкар о първа християня?

• Паш касте геле о Павел, о Варнава тай окола мануша, за те решинен о проблеми?

Четинен Деяния 15:12-18, 23-29 тай хоратинен калке въпросиеске:

• Англал те пхенел со те керен о пхрала, со кергяс о ръководно тяло презал о първо веки, за те ахальовел со мислинел о Йехова? (Дикх о 12, о 15 тай о 28 стихи.)

Четинен Деяния 15:30, 31 тай 16:4, 5 тай хоратинен калке въпросиенге:

• Со керде о първа християня, кана о ръководно тяло пхенгяс ленге со требе те керен?

• Сар о Йехова благословингяс лен, кана керде со пхенгяс ленге о ръководно тяло?

Четинен 2 Тимотей 3:16 тай Яков 1:5 тай хоратинен калке въпросиеске:

• Со керен о пхрала таро Ръководно тяло авдиес, англал те лен решение?

 СО СИКЛИЛЯМ

О Ръководно тяло си о „верно тай разумно роби“. Лес о Исусес диняс и задача те сикавел о дром е християниенге ко цело светос тай те дел лен духовно хабе.

О най-важна букя таро уроки

• Кастар си избириме „о верно тай разумно роби“?

• Со керел о Ръководно тяло за аменге?

• Верувинес ли, кай о Ръководно тяло си о „верно тай разумно роби“?