О мануша мислинен бут различна букя е пиймнаске. Десаве манушенге харешинел те пиен по йекх чаша, кана киден пес пе амаленца. Авер избиринен изобщо те на пиен. Ама иси мануша-да, колато пиен зомкха бут, кай макярен пес. Со пхенел и Библия е пиймнаске?

1. Безех ли си те пияс?

И Библия на пхенел, кай си безех те пияс. Ой пхенел, кай йекх таро шукар букя, колато диняс амен о Дел, си „и мол, която анел радост е манушеске“. (Псалм 104:14, 15) Анди Библия четинас, кай десаве верна мруша тай жувля пиенас по хари. (1 Тимотей 5:23)

2. Саво съвети дел и Библия калкенге, колато решинен те пиен?

О Йехова пхенел, кай си безех, ако мануш макярел пес или ако пиел бут, даже те на дикхьол, кай си мато. (Галатяни 5:21) Лескоро Слово пхенел: „Ма киде тут калкенца, колато пиен бут мол.“ (Притчи 23:20) Ако решинас те пияс, даже те овас коркоре, на требе те пияс зомкха бут, кай те на жанас со керас тай со пхенас. Също на требе те пияс бут, за те пазинас амаро састипе. Ако нащи те внимавинас кизом пияс, по-шукар ка овел изобщо те на пияс.

3. Сар те сикавас уважение, кана декхой решинел те пиел или те на пиел?

Секой коркоро требе те решинел дали те пиел хари или изобщо те на пиел. На требе те дикхас бангесте манушес, ковато решингяс те пиел хари тай на требе те дас декхас зори те пиел, ако ов на мангел. (Римляни 14:10) Ка овел по-шукар те на пияс, ако жанас, кай ка ачшол неудобно е манушенге, колато си аменца, като дикхен амен те пияс. (Четине Римляни 14:21.) Аме на мангас те овел само аменге лачшес, а те овел лачшес околенге-да. (Четине 1 Коринтяни 10:23, 24.)

 РОДЕ ПО-ХОРЕСТЕ

4. Решине дали те пиес или те на пиес

Со мислинелас о Исусес е пиймнаске? Ка ахальовас, ако дикхас саво сине о първо чудо, ковато кергяс. Четинен Йоан 2:1-11 тай хоратинен калке въпросиенге:

• Со ахальовас, кай мислинел о Исусес е пиймнаске тай е манушенге, колато пиен хари, таро чудо, ковато кергяс?

• Щом о Исусес на пхенгяс, кай си безех мануш те пиел хари, со требе те мислинас калкенге, колато решинен те пиен?

Въпреки кай нанай безех те пияс, нанай винаги те овел мъдро йекх християни те пиел. Четинен Притчи 22:3 тай хоратинен дали ка пиес или нанай те пиес ако:

• Ка традес и лека кола или ка керес бути машинаса.

• Синян кхамни.

• О лекари пхенгяс туке, кай на требе те пиес.

• Си трудно си туке те внимавинес кизом пиес.

• На синян достатъчно баро, за те ащи те пиес.

• Туса иси мануш, ковато решингяс, кай изобщо нанай те пиел, соскето преди сине леске пхаро те спиринел о пийба.

Требе ли те тховес ракия, кана керес бияв или кана кидес тут околенца? Со ка помагинел туке те решинес? Дикхен о КЛИПИ.

Четинен Римляни 13:13 тай 1 Коринтяни 10:31, 32 тай палал секоне стихиесте хоратинен калке въпросиеске:

• Сар ка помагинел туке кавка съвети те лес шукар решение тай те анес радост е Йеховаске?

 5. Решине кизом ка пиес

Ако решинес, кай ка пиес, ма бистер: въпреки кай о Йехова на пхенел, кай на требе те пияс, лескере якхенде си безех, ако пияс бут. Соске? Четинен Осия 4:11, 18 тай хоратинен калке въпросиеске:

• Со ащи те ачшол, ако декхой пиел бут?

Со ащи те помагинел аменге те на пияс бут? Требе те овас скромна, демек те жанас кана требе те спиринас. Четинен Притчи 11:2 тай хоратинен калке въпросиеске:

• Соске ка овел шукар те решинес кизом ка пиес?

6. Со ка помагинел туке, ако си туке пхаро те спиринес о пийба

 СО СИКЛИЛЯМ

О Йехова мангел те овел аменге шукар, кана пияс хари, ама на мангел те прекалинас тай те макярас амен.

О най-важна букя таро уроки

• Со пхенел и Библия е пиймнаске?

• Саве кханиле букя ащи те ачшон, ако пияс бут?

• Сар ащи те сикавас уважение, кана декхой решинел те пиел или те на пиел?