1–3. Состе синям осъдиме саворе тай сар ка освободинел амен о Йехова?

ПРЕДСТАВИНЕ туке, кай синян осъдиме те овес андо пханлибе, бискай синян живдо, варесоске, ковато на кергян. Дикхьол, кай нисар нанай те икльос отхар. Нанай тут нисави надежда тай нащи те керес нищо далкхеске. Ама точно кана мислинес, кай всичко свършингяс, ахальовес, кай иси декхой, ковато ащи те икалел тут таро пханлибе тай ов обещингяс те помагинел туке! Сар ка чувствинес тут?

² Саворе синям осъдиме те мерас. Со–да те керас, нащи те нашас таро мериба. Ама о Йехова ащи те освободинел амен таро мериба. Ов обещингяс, кай „о последно душмани, ковато ка овел унищожиме, си о мериба“. (1 Коринтяни 15:26)

³ Представине туке сар ка чувствинес тут, кана нанай те дарас таро мериба. Направо ка локьол туке! Ама о Йехова ма само ка махнинел о мериба. Ов ка иринел е мулен ко животос. Помислине со ка означинел давкха туке. О Йехова обещинел, кай о муле ка живинен пак. (Исаия 26:19) Анди Библия далкхеске пхенел пес възкресение.

4. а) Со ащи те утешинел амен, кана декхой таро семейство или близко амал мерел? б) Кола уле десаве таре Исусескере лачше амала?

⁴ Кана декхой таро семейство или близко амал мерел, си аменге бут пхаро. Чувствинас амен  безпомощна. Нащи те керас нищо, за те иринас ко животос далкхе манушес. Ама и Библия дел амен истинско утеха. (Четине 2 Коринтяни 1:3, 4.) Нека те дикхас йекх примери, ковато сикавел кизом бут манген о Йехова тай о Исусес те иринен ко животос амаре близконен, колато муле. Кана о Исусес уло ки пхув, бут дром жалас паш о Лазарес тай лескере пхениенде, и Марта тай и Мария. О трин–да уле лачше амала е Исусескере. И Библия пхенел: „О Исусес дехелас е Марта, лакере пхеня тай е Лазариес.“ (Йоан 11:3–5)

5, 6. а) Со кергяс о Исусес, кана дикхляс кизом сине пхаро е Лазариескере енданиенге тай амаленге? б) Соске си насърчително аменге те жанас со мислинелас о Исусес е меримнаске?

⁵ Йекх диес о Лазарес муло. О Исусес гело те утешинел е Марта тай е Мария. Кана и Марта шунгяс, кай авелас о Исусес, иклили тари диз те ресел лес. Ой лошангяс, кана дикхляс е Исусес, ама пхенгяс леске: „Ако ту синянас атхе, моро пхрал нанаяс те мерел.“ И Марта мислинелас, кай вече сине късно. Палал далкхесте о Исусес дикхляс лакере пхеня, е Мария, те ровел. Кана дикхляс кизом сине ленге пхаро, лескоро воги чшиндило тай заруно. (Йоан 11:21, 33, 35) Ов чувствингяс и бари дукх, която иси амен, кана мерел декхой, колес дехас.

⁶ Давкха, кай е Исусеске ачшило зомкха мъчно, си бут насърчително аменге, соскето сикавел аменге, кай о Исусес тай лескоро Дад, о Йехова, мразинен о мериба. (Йоан 14:9) Е Йеховас иси и сила те махнинел о мериба завинаги тай ка керел давкха бут сиго.

7, 8. Соске и Марта на мангелас те циден о бар таре Лазариескоро мимори, ама со кергяс о Исусес?

⁷ Кана о Исусес гело отхе, кате уло пароме о Лазарес, о мимори сине пханло йекхе баре бареса. О Исусес  пхенгяс: „Циден о бар.“ Ама и Марта на мангелас те керен давкха, соскето е Лазариескоро телос уло андо мимори щаре диесендар. (Йоан 11:39) Ой на жанелас со ка керелас о Исусес, за те помагинел лакере пхралеске.

⁸ О Исусес пхенгяс е Лазариеске: „Икли!“ Давкха со дикхле и Марта тай и Мария сине варесо невероятно! „О мануш, ковато сине муло, иклило, а лескере васта тай лескере пире уле пакярде которенца.“ (Йоан 11:43, 44) О Лазарес уло ириме ко животос тай ащине те овел пак пе енданиенца тай пе амаленца. Он ащине те долен лес, те ден лес ангали тай те хоратинен леса. Саво баро чудо! О Исусес възкресингяс е Лазариес.

9, 10. а) Кой диняс е Исусес и сила те възкресинел е манушен? б) Сави полза иси амен, кана четинас далкхенге, колато уле възкресиме?

⁹ Дали о Исусес възкресинелас е манушен пере силаса? На–а. Англал те възкресинел е Лазариес, о Исусес молисайло е Йеховаске тай о Йехова диняс лес и сила те възкресинел е Лазариес. (Четине Йоан 11:41, 42.) На уло възкресиме само о Лазарес. Анди Библия пишинел йекхе 12 брешенгере чшаяке, която ули бут насвали. Лакоро дад, о Яир, уло отчаиме тай молингяс е Исусес те саскярел ла. Лес на сине авер чшаве. Бискай хоратинелас е Исусеса, десаве мануша але тай пхенде леске: „Ти чшай мули! Соске те притеснинес панда е учителес?“ Ама о Исусес пхенгяс е Яиреске: „Ма дара, само верувине тай ти чшай ка овел спасиме.“ Палал далкхесте гело е Яиреса лескере кхересте. Кана ресле  отхе, о Исусес дикхляс тай шунгяс е манушен, колато ровенас. О Исусес пхенгяс ленге: „Ма ровен, соскето ой на мули, само совел.“ Лакоро дад тай лакери дай сигурно пученас пес со мангелас те пхенел о Исусес. О Исусес пхенгяс те икльон саворе освен е чшаякоро дад тай лакери дай, тай ленца диняс анди стая, кате ули и чшай. О Исусес долгяс лакоро вас тай пхенгяс лаке: „Чшайорие, пхенав туке, ухти!“ Представине туке кизом лошанде лакере родителя, кана ой веднага ухтинили тай започнингяс те пхирел! О Исусес възкресингяс ленгере чшая. (Марко 5:22–24, 35–42; Лука 8:49–56) Далкхе диесестар, кана ка дикхенас пе чшая, ка денас пес годи далкхеске со кергяс о Йехова ленге чрез о Исусес. *

¹⁰ Далкха, колен ирингяс ко животос о Исусес, пак муле. Дали давкха означинел, кай възкресингяс лен залудо? На–а! Далкха разказя тари Библия ден амен истинско надежда тай уверинен амен, кай о Йехова мангел те възкресинел е манушен тай ка керел давкха.

11. Со ахальовас таро Еклисиаст 9:5 е Лазариеске?

¹¹ И Библия пхенел ясно, кай „о муле нищо на жанен“. Чука сине е Лазариеса–да. (Еклисиаст 9:5) Сарто пхенгяс о Исусес, о Лазарес все едно совелас. (Йоан 11:11) Бискай уло андо мимори, о Лазарес на жанелас нищо.

12. Катар жанас, кай е Лазариескоро възкресение наистина ачшило?

 ¹² Кана о Исусес възкресингяс е Лазариес, бут мануша дикхле давкха. Даже е Исусескере душманя жаненас, кай ов кергяс давкха чудо. О Лазарес уло живдо тай давкха сикавелас, кай о възкресение наистина ачшило. (Йоан 11:47) Освен далкхесте бут мануша геле те дикхен е Лазариес тай ашал далкхеске верувинде, кай о Исусес уло бичшалдо таро Дел. Е Исусескере душманя на дехинде давкха, адалкхеске мангенас те мударен сарто е Исусес, ачука е Лазариес–да. (Йоан 11:53; 12:9–11)

13. Соске ащи те овас сигурна, кай о Йехова ка възкресинел е мулен?

¹³ О Исусес пхенгяс, кай „саворе, колато си андо миморя“, ка овен възкресиме. (Йоан 5:28) Давкха означинел, кай саворе, колен помнинел о Йехова, ка овен ириме ко животос. Ама за те възкресинел декхас, о Йехова требе те помнинел всичко далкхе манушеске. Възможно ли си давкха? Ко небес иси милиаргя черхеня. И Библия пхенел, кай о Йехова жанел о алав секоне черхенякоро. (Четине Псалм 147:4, 5.) Щом о Йехова дел пес годи сар пхенел пес секо йекх черхен, леске си локо те помнинел всичко е манушенге, колен ка иринел ко животос. Даже о Йехова кергяс всичко, адалкхеске жанас, кай лес иси и сила те иринел е манушен ко животос.

14, 15. Со сикльовас далкхестар со пхенгяс о Йов е възкресениеске?

¹⁴ Йекх верно мануш, о Йов, верувинелас, кай ка овел възкресение. Ов пучляс: „Ако мануш мерел, ка живинел ли пак?“ Палал далкхесте пхенгяс е Йеховаске: „Ка викинес ман тай ме ка отговоринав туке. Бут ка мангес те дикхес давкха со кергян те вастенца.“ О Йов жанелас, кай о Йехова бут мангел  те авел о диес, кана ка възкресинел е мулен. (Йов 14:13–15)

¹⁵ Сар чувствинес тут, кана мислинес далкхеске кай ка овел възкресение? Ащи те пучес тут: „Со ка ачшол ме енданиенца тай ме амаленца, колато муле? Дали он–да ка овен възкресиме?“ Бут си утешително аменге те жанас, кай о Йехова бут мангел те иринел е мулен ко животос. Нека те дикхас со пхенел и Библия далкхеске кола ка овен възкресиме тай кате ка живинен он.

16. Сар ка овел о животос далкхенге, колато ка овен възкресиме ки пхув?

¹⁶ Андо минало далкха, колато уле възкресиме, живиненас пак пе енданиенца тай пе амаленца атхе ки пхув. Чука ка овел андо бъдеще–да, ама панда по–шукар. Соске? Соскето далкхен, колато ка овен ириме ко животос атхе ки пхув, ка овел лен и възможност те живинен вечно тай нисар те на мерен. Он ка живинен йекхе светосте, ковато ка овел бут различно таро светос авдиес. Лесте нанай те овел войни, престъпления тай насвалипе.

17. Кой ка овел възкресиме?

¹⁷ Кой ка овел възкресиме? О Исусес пхенгяс, кай „саворе, колато си андо миморя, ка шунен лескоро гласос тай ка икльон“. (Йоан 5:28, 29) Андо Откровение 20:13 пхенел пес: „О морес диняс е мулен, колато уле лесте, тай о мериба тай о мимори дине е мулен, колато уле ленде.“ Ва, милиаргя мануша ка живинен пак. О апостол Павел–да пхенгяс, кай „ка овен възкресиме сарто о праведна, ачука о неправедна–да“. (Четине Деяния 24:15.) Со означинел давкха?

18. Кола си „о праведна“, колато ка овен възкресиме?

 ¹⁸ Машкар „о праведна“ си о верна служителя е Йеховаскере, колато живинде англал те авел ки пхув о Исусес. О Ной, о Авраам, и Сара, о Моисей, и Рут тай и Естир си десаве таро мануша, колато ка овен възкресиме те живинен атхе ки пхув. Ащи те четинес десавенге лендар андо Евреи 11 шеро. Со ка ачшол е Йеховаскере верноне служителенца, колато мерен  амаре диесенде? Он–да си „праведна“, адалкхеске ка овен възкресиме.

19. Кола си „о неправедна“? Сави възможност ка дел лен о Йехова?

¹⁹ Машкар „о неправедна“ си о милиаргя мануша, колен на сине и възможност те пенжарен е Йеховас. Въпреки кай он муле, о Йехова на бистергяс лен. Ов ка възкресинел лен тай ка овел лен и възможност те сикльовен тай те служинен леске.

20. Кола нанай те овен възкресиме?

²⁰ Дали давкха означинел, кай саворе, колато муле, ка овен възкресиме? На–а. О Исусес пхенгяс, кай десаве мануша нанай те овен ириме ко животос. (Лука 12:5) Кой ка решинел дали йекх мануш ка овел възкресиме или на–а? О Йехова си о най–баро Съдияс, адалкхеске ов ка лел о крайно решение, ама диняс е Исусес–да и власт те овел „съдияс е живденге тай е муленге“. (Деяния 10:42) Саворе, колато си осъдиме сар кханиле тай на манген те променингьон, нанай те овен възкресиме. (Дикх и 19 бележка ко крайос далкхе лилесте.)

21, 22. а) Саво телос иси далкхен, колато си възкресиме ко небес? б) Кова уло о първо мануш, ковато сине възкресиме ко небес?

²¹ И Библия пхенел аменге, кай десаве мануша ка живинен ко небес. Кана декхой си възкресиме ко небес, нанай лес манушикано телос. Ов си възкресиме те живинел ко небес духовноне телоса.

²² О Исусес уло о първо мануш, ковато уло възкресиме ко небес. (Йоан 3:13) Трин диеса палал о мериба е Исусескоро, о Йехова възкресингяс лес. (Псалм 16:10; Деяния 13:34, 35) О Исусес на уло възкресиме манушикане телоса. О апостол Петър пишингяс, кай о Исусес „уло мудардо сар мануш, ама уло ириме ко  животос сар духос“. (1 Петър 3:18) О Исусес уло възкресиме сар зорали духовно личност! (1 Коринтяни 15:3–6) Ама и Библия пхенел, кай нанаяс само ов те овел възкресиме ачука.

23, 24. Кова си о „цикно стадо“, колеске хоратингяс о Исусес тай кизом жене ка овен лесте?

²³ Хари англал те мерел, о Исусес пхенгяс пе верноне ученикиенге: „Жав те приготвинав туменге тхан.“ (Йоан 14:2) Давкха означинел, кай десаве лескере ученикиендар ка овенас възкресиме, за те живинен леса ко небес. Кизом ка овенас он? О Исусес пхенгяс, кай ка овенас хари, йекх „цикно стадо“. (Лука 12:32) О апостол Йоан пхенгяс точно кизом ка овенас он, кана дикхляс е Исусес те тергьол „ки планина Сион [ко небес] тай леса сине 144 000“. (Откровение 14:1)

²⁴ Кана ка овенас възкресиме о 144 000 християня? И Библия пхенел аменге, кай давкха ка ачшолас, кана о Исусес ка започнинелас те управлинел ко небес. (1 Коринтяни 15:23) Аме живинас точно далкхе диесенде тай по–бут таро 144 000 вече си възкресиме ко небес. Далкха, колато панда си ки пхув тай мерен амаре диесенде, веднага възкресингьон, за те живинен ко небес. Ама по–бут таро мануша ка овен възкресиме андо бъдеще, за те живинен андо рай атхе ки пхув.

25. Со ка ахальовас таро следващо шеро?

²⁵ Бут сиго о Йехова ка освободинел саворе манушен таро мериба тай никхой нанай те мерел нисар по–бут! (Четине Исаия 25:8.) Ама со ка керен ко небес далкха, колато жан отхе? И Библия пхенел, кай ка управлинен е Исусеса андо небесно Тхагарипе. Ка ахальовас по–бут далкхе тхагарипнаске таро следващо шеро.