11 Уроки

Изчшив и хохавани религия!

О Сатана тай лескере демоня манген ту–да те на акандес е Девлес. Он манген те иринен саворен таро Дел. Сар дикхен те керен давкха? Екх варесо си и хохавани религия. (2 Коринтяни 11:13–15) Екх религия си хохавани кана на сикавел о чачипе е Библияке. И хохавани религия си сар е хохаване лове — дикхльон сар чачуне, ама нащи те овел лачшипе лендар. Ка анен аменге проблемя.

О чачуно Дел — Йехова, нисар нанай те мангел е религиозне хохайбя. Кана о Исус уло ки пхув, о мануша тар екх религия мангле те мударен лес. Мислинде кай сар он ден коч, си ем–лачше. Он пхенде: „Иси амен екх Дад, о Дел.“ Дали о Исус мислингяс ачука? Нанай! Ов вакергяс ленге: „Тумаро дад си о Бенг.“ (Йоан 8:41, 44) Авдиес бут мануша мислинен кай ден коч е Девлес, ама он ден коч е Сатанес тай лескере демониен. (1 Коринтяни 10:20)

 Сарто екх керно каш дел керне емишя, ачука и хохавани религия керел е манушен билачше. О дуйнас си пхердо проблеменца ашол е билачше букя кай керен о мануша. Марен пес, чорен, керен неморалност, потисничество, мударипе тай изнасилване. Бут мануша колато керен билачше букя ден коч, ама ленгоро апакипе на керел лен лачше. Те на чшинавена те керен калка кханиле букя, нащи те овен Девлескере амала. (Матей 7:17, 18)

И хохавани религия сикавел е манушен те молинен пес ко идоля. О Дел пхенгяс те на молинас амен ко идоля. Давкха си гогявер. Ка мангес ли декхой те керел пхеряс само тере снимкаса тай нисар те на керел пхеряс туса? Кавка мануш то амал ли си? Нанай. О Йехова мангел те керас пхеряс леса, нанай е иконенца или е картиненца, колато нанай живде. (Изход 20:4, 5)

И хохавани религия сикавел кай андо марибе ащи те мударас. О Исус вакергяс кай е Девлескере амала ка дехен пес. Амен на мударас е манушен, амен дехас лен. (Йоан 13:35) Безех си те мударас е билачшен–да. Кана е Исусескере душманя але те астарен лес, ов на мукляс е апостолен те марен пес та те ухтен лес. (Матей 26:51, 52)

И хохавани религия сикавел кай е кханиле ка тхабльовен андо адос. Ама и Библия сикавел кай о безех анел джи ко мериба. (Римляни 6:23) О Йехова си о дехунук Дел. Ащи ли о дехунук Дел те мъчинел е манушен са? Джанел пес, нащи! Андо девлети ка овел само екх религия — кайка ковато о Йехова дехел. (Откровение 15:4) Саворе религие таро Сатана ка овен чшивде.