„Amari čhaj sine la šov berš keda prvo puti kergjem laja lafi bašo alkohol. Iznenadingja amen adava so oj džanela sine but poviše taro adava so očekujngjem“ (Aleksandar).

•  So valjani te džane

•  So šaj te kere

•  So vakerela i Biblija bašo alkohol

 But tano važno te kere tle čhavencar lafi bašo alkohol. Ma adžiker tlo čhavo te bajrol te šaj te kere lea lafi baši akaja tema. O Hamiti tari Rusija vakerela: „Valjani sine but porano te kera lafi amare čhavea bašo adava kaj o alkohol valjani te koristinel pe umereno. Akava haliljum otkeda doznajngjum kaj ov redovno piela panda taro 13 berš. Adava sine phari lekcija mange“.

 Soske akava tano važno tuke da?

•   O čhave ki škola, o reklame hem i televizija šaj te vlijajnen upro adava savo stavi ka ovel tle čhave sprema o alkohol.

•   Sprema jekh ponevo istražuvanje koleste sine vklučime 4.219 učenikija ki Makedonija, 18 otsto taro čhave hem 9 otsto taro čhaja so isi len 15 berš koristinena alkohol najhari jekh puti ko kurko.

 Adaleske, na čudinaja amen adava so o ekspertija ko zdravstvo sovetinena e roditelen te sikaven pumare čhaven bašo posledice taro alkohol panda džikote tane tikne. Sar šaj tu da te kere adava?

 Angleder razmislin bašo adava so šaj te pučel tut tlo čhavo. O tikne čhave mangena te džanen but, a o pobare čhave mangena te džanen panda poviše. Adaleske tano šukar panda angleder te spremine tut te šaj te džane sar te odgovorine lenge. Na primer:

•   Ako tlo čhavo mangela te džanel savo vkus isi le o alkohol, šaj te vakere leske kaj i mol tani slično sar šutalo ovošno soko hem kaj o pivo tano kjerko.

•   Ako tlo čhavo mangela te probinel alkohol, šaj te vakere leske kaj o alkohol nane čhavenge adaleske soj but jako, hem kaj leskoro telo našti te izdržinel adava. Vaker leske nesave posledice. Iako okova so piela osetinela pe poopušteno, ako piela poviše, šaj te ovel le vrtoglavica, te ponašinel pe nerazumno hem te vakerel bukja kolenge pokasno ka kainel pe (Izreki 23:29-35).

 Sikljov nešto poviše. I Biblija vakerela: „O gogjaver manuš postapinela sprema adava so džanela“ (Izreki 13:16). Doznajn poviše bašo koristibe alkohol, bašo zakonija hem o zakonska ograničuvanja so isi ki tli phuv. Agjaar ka ove šukar spremimo te šaj te pomožine tle čhaveske.

 Počmin razgovor baši akaja tema. O Mark tari Britanija, kova soj roditeli, vakerela: „O čhave nane sigurna soj šukar, a so na keda kerela pe lafi bašo alkohol. Jekh puti pučljum mle čhave kole so isi le ofto berš so mislinela — dali tano ispravno ili pogrešno te piel pe alkohol. Pučljum le akava pučibe ko jekh šukar hem prijatno razgovor. Adava pomožingja leske slobodno te vakerel so mislinela“.

 Ker lafi tle čhavea poviše puti bašo alkohol te šaj te haljovel kobor tano adava seriozno. Ko sklad leskere beršencar, ker lafi baši akaja tema keda sikavea le hem bašo javera važna bukja sar, na primer, bašo intimna odnosija ili bašo adava sar te pazinel ko soobrakjaj.

 Ov šukar primer. O čhave tane sar sungjeri — priminena sa so slučinela pe okolu lende. A o istražuvanja sikavena kaj o roditelija šaj te ovel len najbaro vlijanie upri lende. Akava značinela kaj, ako piea alkohol te šaj te smirine tut ili te cide tutar o stres, tlo čhavo ka mislinel peske kaj o alkohol tano rešenie bašo problemija ko životo. Adaleske, de šukar primer tle čhavenge agjaar so ka postapine odgovorno keda kerela pe lafi bašo pijbe alkohol.