O manuša but puti polokhe prifatinena o haberi bašo Carstvo keda šunena le ki pli čhib. Adaleske šaj ki Pedesetnica 33 berš a.e. o Jehova kergja „o Evreija so darana sine taro Devel taro sa o narodija ki celi phuv“ te šunen o šukar haberi ki „pumari čhib“, iako šaj ola džanena sine hebrejski hem grčki (De 2:5, 8). Avdive, ko thana kote so živinena manuša so kerena lafi ko različna čhibja, o sobranija so ikerena sostanokija ko različna čhibja šaj obrabotinena ista podračja. Sar šaj o objavitelija taro adala sobranija te sorabotinen te šaj te vakeren sarinenge o šukar haberi, hem te pazinen te na propovedinen ko isto udar hem adalea te holjankeren e stanaren?

• Keren lafi e javerencar (Iz 15:22): O nadglednikija baši služba valjani te keren lafi hem te dogovorinen pe kova tano o najšukar način te propovedinen o šukar haberi. Ako nane len but baro podračje, o sobranija so propovedinena ko javera čhibja šaj nane te mangen tumen te džan hem te propovedinen ko khera kote so o manuša kerena lafi ki lengiri čhib. Sepak, ako ola našti redovno te obrabotinen pumaro podračje soske tano but baro, šaj ka mangen tumen te na mukhen ni jekh kher hem te vakeren lenge ako nekoj sikavela interes taro lengoro podračje (od-MC 93 str., 37 pas.). Ili šaj ka zamolinen tumaro sobranie te pomožinel lenge te arakhen manuša so kerena lafi ki lengiri čhib hem lengere adrese šaj te prefrlinen pe ko lengoro podračje. Neka ovel tumen ki godi kaj ko nesave khera kerela pe lafi ko poviše čhibja. O način sar obrabotinela pe o podračje valjani te ovel ko sklad e zakonencar baši zaštita o lična podatokija.

• Sorabotinen e javerencar (Ef 4:16): Šukar sledin o upatstvija so dobinea len taro tlo nadgledniko baši služba. Dali proučinea nekasaja so poviše bi mangela te proučinel ki javer čhib namesto ki čhib so kerela pe lafi ko tlo sobranie? O interesenti šaj posigate ka napredujnel ako dea le te proučinel objavitelea kova soj taro paše sobranie ili grupa so kerena lafi ki leskiri čhib.

• Spreminen tumen (Iz 15:28; 16:1): Ako o stanari kerela lafi ki javer čhib, de tutar sa te vakere leske o šukar haberi. Šaj te spremine tut agjaar so ka doznajne ko save čhibja kerela pe lafi ko tlo podračje. Palo adava, šaj angleder ko tlo elektronsko ured te perave prevod tari Biblija hem videoklipija ko adala čhibja. Isto agjaar, preku i aplikacija JW Lan­guage šaj te sikljove te pozdravine e manušen ki lengiri čhib.