Ko amare sobranija isi phralja hem phenja kola so beršencar služinena e Jehovaske. Ko berša so nakhle ola sikavgje bari doverba ko Jehova. Lendar šaj but te sikljova. Šaj te puča len baši istorija e Jehovaskere organizacijakiri hem sar o Jehova pomožingja lenge keda sine len pharipa. Šaj te kanina len ki amari Familijarno rat hem te zamolina len te vakeren amenge nesave iskustvija.

Ako tu da beršencar služinea e Jehovaske, vaker e poternenge sar o Jehova pomožingja tuke. O Jakov hem o Josif vakerena sine pumare čhavenge hem unukonge bašo sa so kergja lenge o Jehova (1Mo 48:21, 22; 50:24, 25). Palo adava o Jehova dengja zapoved e poglavarenge te vakeren pumare čhavenge bašo čudija so kergja len (5Mo 4:9, 10; Ps 78:4-7). Ko amaro da vreme, o roditelija hem o javera ko sobranie šaj te vakeren e poternenge bašo but šuže bukja so kergja len o Jehova preku pli organizacija.

DIKH O VIDEOKLIPI O JEHOVA POMOŽINELA AMEN TE AČHOVA KO JEKHIPE, A PALO ADAVA PUČ:

• Sar i podružnica ki Avstrija pomožingja amare phralenge ko phuvja kote so amare aktivnostija sine zabranime?

• Soske e phralen ko adala phuvja sine len zorali vera?

• Soske but objavitelija ki Romanija odvojngje pe tari e Jehovaskiri organizacija, hem sar pokasno palem irangje pe?

• Sar akava klipi kergja tli vera pozorali?