1-2. So šaj te puča amen bašo amare molitve?

 PUČLJAN tut li nekogaš dali o Jehova odgovorinela ko tle molitve? Ako oja, na sian korkori. But phralja hem phenja vakergje kaj pučena pe o isto, posebno keda nakhena taro phare vremija. Ako isi amen nesavo problemi šaj amenge da te ovel pharo te dikha sar o Jehova odgovorinela ko amare molitve.

² Te dikha soske šaj te ova uverime kaj o Jehova odgovorinela ko molitve ple slugengere (1. Jov. 5:15). Isto agjaar ka dikha akala pučiba: Soske ponekogaš izgledinela sar te phene o Jehova na odgovorinela ko amare molitve? Ko save načinija o Jehova avdive odgovorinela ko amare molitve?

3. Soske o Jehova mangela te molina amen leske?

³ I Biblija uverinela amen kaj o Jehova but mangela amen hem kaj siem leske skapocena (Agej 2:7; 1. Jov. 4:10). Adaleske ov pottikninela amen te roda lestar pomoš ki molitva (1. Pet. 5:6, 7). Ov mangela te pomožinel amenge te ačhova lea paše hem te ikljova ko krajo e problemencar so isi amen.

4. Kotar džanaja kaj o Jehova odgovorinela ko molitve ple slugengere? (Dikh hem i slika.)

⁴ Ki Biblija but puti čitinaja kaj o Jehova odgovoringja ko molitve ple slugengere. Dali avela tuke ki godi jekh asavko primer? Šaj mislinea ko cari o David. Le sine le but opasna dušmanja, adaleske ov but puti molinela sine e Jehova baši pomoš. Ki jekh prilika hor taro vilo vakergja: „Jehova, šun mli molitva, šun sar molinava tut baši  pomoš. Hem odgovorin mange adaleske so sian verno hem pravedno“ (Ps. 143:1). O Jehova odgovoringja ko e Davideskere molitve (1. Sam. 19:10, 18-20; 2. Sam. 5:17-25). Adaleske o David šaj sine te vakerel: „O Jehova tano paše uzi sarinende so rodena le“. Amen da šaj te ova uverime ko adava (Ps. 145:18).

5. Dali o Jehova sekogaš odgovoringja ple slugenge ko način sar so ola očekujngje? Vaker primer. (Dikh hem i slika.)

⁵ O Jehova šaj nane te odgovorinel ko amare molitve agjaar sar so amen očekujnaja. Asavko nešto doživingja o apostol Pavle. Ov molingja e Devle te cidel lestar o karo taro telo. O Pavle ko trin prilike molingja pe konkretno bašo akava pharo problemi. Dali o Jehova odgovoringja ko leskere molitve? Oja, ama na agjaar sar so očekujngja o Pavle. Namesto te cidel lestar o problemi, o Jehova dengja le i sila so valjangja leske te šaj ponadari da verno te služinel leske (2. Kor. 12:7-10).

6. Soske ponekogaš šaj te izgledinel sar te phene o Jehova na odgovorinela ko amare molitve?

⁶ Ponekogaš amen da šaj te dobina odgovor ko način so na očekujngjem. Ama šaj te ova sigurna kaj o Jehova najšukar džanela sar te pomožinel amenge. Ov šaj čak „te kerel but poviše taro sa o bukja so rodaja lestar ili so zamislinaja amenge“ (Ef. 3:20). Adaleske ko amare molitve šaj te odgovorinel ko vreme ili ko način so amen na očekujnaja.

7. Soske šaj ka valjani te molina amen bašo nešto javer? Vaker primer.

⁷ Otkeda pojasno ka haljova e Jehovaskiri volja šaj ka dikha kaj valjani te molina amen bašo nešto javer. Te dikha o primer jekhe phraleskoro so vikinela pe Martin Pecinger. Kratko otkeda ženingja pe, o phral Pecinger sine phanlo ko nacističko koncentraciono logori. Ko početok ov molingja e Jehova te ikljol adathar te šaj te grižinel pe ple romnjake hem te prodolžinel ple službaja. Ama palo duj kurke ov na dikhlja nisavo znako kaj o Jehova ka kerel nešto te šaj te ikljol. Adaleske ki molitva vakergja: „Jehova, molinava tut sikav mange so mangea te kerav“. Tegani počmingja te razmislinel taro so nakhena javera da phralja soj tane ko logori. But lendar isto agjaar sekirinena pe sine bašo pumare romnja hem čhave. Adaleske o phral Pecinger ki molitva vakergja: „Jehova, fala baši mli nevi zadača.  Molinava tut pomožin mange te zajakninav hem te ohrabrinav mle phralen“. Ko sledna 9 berš kergja baš adava.

8. Koja važno buti na valjani te bistra keda molinaja amen?

⁸ Na valjani te bistra kaj e Jehova isi le namera hem ov ka ispolninel la ko vreme kova so odredingja. Ki adaja namera tano vklučimo celosno hem zasekogaš te cidel sa o problemija so anena amenge bare muke, sar soj o prirodna katastrofe, nasvalipe hem meribe. O Jehova ka ispolninel pli namera preku plo Carstvo (Dan. 2:44; Otk. 21:3, 4). Ama džikote na avela adava vreme, o Jehova mukhela o Satana te vladinel upro akava sveto b (Jovan 12:31; Otk. 12:9). Ako o Jehova panda akana rešinela sa o problemija, adava šaj te izgledinel sar te phene o Satana šukar vladinela. Ama, iako mora te adžikera o Jehova te ispolninel ple vetuvanja, adava na značinela kaj ov mukhela amen bizi pomoš. Te dikha ko save načinija o Jehova kerela adava.

9. Sar šaj o Jehova te pomožinel amenge keda valjani te ana mudra odluke? Vaker primer.

⁹ Ov dela amen mudrost. O Jehova vetinela kaj ka del amen mudrost koja so valjani amenge te šaj te ana šukar odluke. Posebno valjani amenge mudrost keda anaja odluke kola so vlijajnena upro celo amaro životo sar soj dali te ženina amen ili na (Jak. 1:5). Te dikha o primer jekhe phenjakoro so vikinela pe Marija. c Džikote služinela sine sar opšto pionerka zapoznajngja jekhe phrale. Oj vakerela: „So popaše amala ovaja sine, doborom poviše svidžinaja amen sine jekh jekheske, adaleske mora sine te odlučinav so te kerav. But molingjum man e Jehovaske baši akaja buti. Valjangja mange leskoro vodstvo, ama isto agjaar džanljum kaj o Jehova nane mange ko than te anel odluka“. Oj dikhlja kaj o Jehova odgovoringja ko lakere molitve baši mudrost. Sar? Džikote istražinela sine ko amare publikacie, oj arakhlja konkretna statie so odgovoringje ko lakere pučiba. Isto agjaar šungja o mudro sovet so dobingja le tari pli verno daj. Adava sovet pomožingja e Marijake te ispitinel ple čuvstvija. Ko krajo oj šaj sine te anel mudro odluka.

10. Sprema Filipjanite 4:13, so ka kerel o Jehova te šaj te pomožinel ple slugenge? Vaker primer. (Dikh hem i slika.)

¹⁰ Ov dela amen sila te šaj te istrajna. O Jehova ka del amen sila koja so valjani amenge te šaj te istrajna keda isi amen nevolje, isto sar so kergja adava e apostol Pavleske. (Čitin Filipjanite 4:13.) Te dikha  sar o Jehova pomožingja jekhe phraleske so vikinela pe Benjamin te istrajnel ko phare okolnostija. Pobaro delo taro plo tiknipe o Benjamini hem leskiri familija živingje ko izbeglička kampija ki Afrika. O Benjamini vakerela: „Na čhinavgjum te molinav man e Jehovaske te del man sila te šaj te kerav adava soj šukar anglo leskere jakhja. O Jehova odgovoringja ko mle molitve agjaar so dengja man andruno mir, hrabrost ponadari da te propovedinav hem o publikacie te šaj te ačhovav duhovno zoralo“. Ov ponadari vakerela: „Adava so čitingjum e phralengere iskustvija hem sar o Jehova pomožingja lenge te istrajnen, bajrargja mli odlučnost te ačhovav verno e Jehovaske“.

11-12. Sar šaj o Jehova te koristinel amare duhovno familija te šaj te odgovorinel ko amare molitve? (Dikh hem i slika.)

¹¹ Ov koristinela amare duhovno familija. I rat angleder te merel, o Isus but molingja pe. Ov molingja e Jehova, ako šaj, o javera te na dikhen ki leste sar nekoj so kerela lošno lafi bašo Devel. Namesto te kerel adava, o Jehova pomožingja leske agjaar so bičhalgja jekh taro leskere nebesna phralen — jekhe angele te zajakninel le (Luka 22:42, 43). O Jehova šaj amenge da te pomožinel agjaar so ka pottikninel nekas taro amare phralja ili phenja te javinen pe amenge ili te posetinen amen. Sarine amen šaj te roda prilike te vakera „jekh šukar lafi“ amare phralenge hem phenjenge (Izr. 12:25).

¹² Te dikha o iskustvo jekhe phenjakoro so vikinela pe Miriam. Nekobor kurke otkeda mulo lakoro rom, i Miriam sine korkori khere hem na sine la sila ništoske soske sine phagji tari dukh. Oj non-stop rovela sine hem valjangja lake nekoj kasaja so šaj te kerel lafi. Oj vakerela: „Na sine man sila te javinav man nekaske, adaleske molingjum man e Jehovaske. Džikote panda rovava sine hem molinava man sine, zvoningja mlo telefoni. Javingja pe mange jekh starešina, jekh šukar amal“. Akava starešina hem leskiri romni but utešingje e Miriama. Oj tani uverimi kaj o Jehova pottikningja akale phrale te javinel pe lake.

13. Vaker primer bašo adava sar o Jehova šaj te koristinel okolen so na služinena leske te šaj te odgovorinel ko amare molitve.

 ¹³ Ov šaj te koristinel manušen kola so na služinena leske (Izr. 21:1). Ponekogaš o Jehova koristinela e manušen so na služinena leske te šaj te odgovorinel ko molitve ple slugengere. Na primer, ov kergja o cari o Artakserks te mukhel e Neemija te iranel pe ko Erusalim te šaj te pomožinel palem te gradinel pe i diz (Neem. 2:3-6). Avdive da o Jehova šaj te pottikninel čak okolen so na služinena leske te pomožinen amen.

14. Sar ohrabrinela tut o iskustvo tari Su Hing? (Dikh hem i slika.)

¹⁴ Jekh phen so vikinela pe Su Hing osetingja e Jehovaskiri pomoš preku plo doktori. Lakere čhave sine le nekobor psihička nasvalipa. Palo nesavo vreme pelo taro jekh but učo than hem but povredingja pe. Te šaj te grižinen pe leske i Su hem lakoro rom mukhle pumari buti. Adaleske sine len finansiska problemija. I Su vakergja kaj našti sine više te izdržinel o pharipe so sine la. Adaleske oj taro vilo molingja e Jehova te pomožinel lake. O doktori manglja nesar te pomožinel celo familijake. Adaleske so pomožingja lenge ola dobingje pomoš tari država hem than živibaske so na sine doborom skupo. Palo adava i Su vakergja: „Osetingjem e Jehovaskoro vas. Ov čače tano adava so šunela o molitve“ (Ps. 65:2).

15. So pomožingja jekhe phenjake te haljovel kaj o Jehova odgovoringja ko lakere molitve?

¹⁵ Najčesto o Jehova na odgovorinela ko amare molitve ko jekh posebno način. Ama o odgovorija so dobinaja len tane baš adala so valjani amenge te šaj te ačhova verna amare nebesno Dadeske. Adaleske šukar primetin sar o Jehova odgovorinela ko tle molitve. Jekh phen so vikinela pe Joko mislinela sine kaj o Jehova na odgovorinela ko lakere molitve, ama tegani počmingja te pišinel peske o bukja baši kolende so molingja e Jehova. Otkeda nakhlja nesavo vreme oj dikhlja ple beleške hem primetingja kaj o Jehova odgovoringja ko pobaro delo taro lakere molitve, čak ko molitve so bistergja len. Ponekogaš amen da valjani te odvojna amenge vreme hem te razmislina bašo adava sar o Jehova odgovorinela ko amare molitve (Ps. 66:19, 20).

16. Sar šaj te sikava vera keda kerela pe lafi baši molitva? (Evreite 11:6).

 ¹⁶ Amen na sikavaja vera samo keda molinaja amen nego isto agjaar keda prifatinaja e Jehovaskoro odgovor ko amare molitve bizi razlika ko savo način odgovorinela amenge. (Čitin Evreite 11:6.) Te dikha o primer taro Majk hem leskiri romni i Krisi. Len sine len cel te služinen ko Betel. O Majk vakerela: „Beršencar daja sine molba hem često molinaja amen sine e Jehovaske baši amari cel, ama nikogaš na vikingje amen“. O Majk hem i Krisi sine uverime kaj o Jehova najšukar džanela sar te koristinel len. Adaleske ola ponadari da dengje pestar sa agjaar so služingje sar opšta pionerija ko than kote so sine potreba hem pomožingje te gradinen pe teokratska objektija. Akana tane ki pokrainsko služba. O Majk ponadari vakerela: „O Jehova na odgovoringja sekogaš ko amare molitve sar amen so očekujngjem, ama odgovoringja, čak ko način so nikogaš na zamislingjem amenge“.

17-18. Sprema Psalm 86:6, 7, ko so šaj te ova uverime?

¹⁷ Čitin Psalm 86:6, 7. O psalmisti o David sine sigurno kaj o Jehova šungja leskere molitve hem odgovoringja ki lende. Tu da šaj te ove uverimo ko adava. O iskustvija baši kolende so kergjem lafi ki akaja statija uverinena amen kaj o Jehova šaj te del amen i mudrost hem i sila so valjani amenge te šaj te istrajna. Ov šaj te koristinel amare duhovno familija ili ponekogaš čak okolen so na služinena leske te šaj te pomožinen amenge.

¹⁸ Iako o Jehova šaj nane sekogaš te odgovorinel ko amare molitve sar amen so očekujnaja, sepak uverime siem kaj ov ka odgovorinel ki lende. Ov ka del amen baš adava so valjani amenge hem ko vreme keda valjani. Adaleske ponadari da molin tut hem neka ovel tut doverba kaj o Jehova ka šunel tut hem ov uverimo kaj ov ka grižinel pe tuke akana hem kaj ko nevo sveto ka del sarinenge adava so mangena (Ps. 145:16).