1. Ko so pottikninela amen o Jehova?

E JEHOVASKE tano but važno o verno mangipe (Osi. 6:6). Ov ohrabrinela ple slugen te dikhen ki akaja osobina isto sar leste. Preku plo proroko o Mihej, amaro Devel pottikninela amen „te manga o verno mangipe“ (Mih. 6:8, fus.). Ama, angleder te kera adava valjani te džana soj tano o verno mangipe.

2. Soj tano vklučimo ko verno mangipe?

² Soj tano o verno mangipe? Okova so isi le asavko mangipe mangela e javere doborom but so nane te čhinavel te mangel le hem ka ačhol verno tari leskiri strana. Akava izraz but puti koristinela pe bašo e Devleskoro mangipe sprema o manuša, ama isto agjaar bašo mangipe so sikavena o manuša maškar peste. O Jehova tano najbaro primer bašo sikajbe verno mangipe. Ki akaja statija, ka kera lafi bašo adava sar o Jehova sikavela verno mangipe e manušenge. Ki sledno statija ka dikha sar amen šaj te dža palo e Jehovaskoro primer agjaar so ka sikava verno mangipe jekh jekheske.

3. So otkringja o Jehova e Mojseeske baši peste?

³ Kratko otkeda o Izraelcija iklile taro Egipet, o Jehova otkringja e Mojseeske nešto bašo plo anav hem ple osobine. Ov vakergja leske: „Jehova! Jehova! Devel soj milostivo hem sočuvstvitelno, na holjanela sigate, pherdo tano verno mangipe hem čačipe, sikavela verno mangipe bute milja manušenge, prostinela greške, pogrešna postapke hem grevo“ (2. Moj. 34:6, 7). Akale but šuže lafencar o Jehova otkringja  e Mojseeske jekh posebno aspekti taro plo verno mangipe. Soj tano adava?

4-5. a) Sar opišingja pe o Jehova? b) Bašo kola pučiba ka kera lafi?

⁴ O Jehova na vakerela baši peste samo kaj isi le verno mangipe, nego kaj tano „pherdo verno mangipe“. Javera da bibliska stihija sikavena amenge kaj o Jehova tano pherdo verno mangipe. * Akala lafija sekova puti spomninena pe samo bašo Jehova, nikogaš bašo manuša. Adava so o Jehova but puti vakerela baši peske kaj tano pherdo mangipe sikavela kobor i leske važno akaja osobina. Adaleske na valjani te čudinel amen adava so o cari o David sine pottiknimo te vakerel: „O Jehova, tlo verno mangipe resela dži ko nebo. Kobor tano skapoceno tlo verno mangipe, o Devla! Ki senka taro tle paka o manuša garavena pe“ (Ps. 36:5, 7). Dali amen da isto sar o David but ceninaja e Devleskoro verno mangipe?

⁵ Te šaj pošukar te haljova so značinela verno mangipe, te kera lafi bašo duj pučiba: Kaske o Jehova sikavela verno mangipe? Hem sar šaj te ovel amen korist taro adava so o Jehova sikavela amenge verno mangipe?

6. Kaske sikavela o Jehova verno mangipe?

⁶ Kaske sikavela o Jehova verno mangipe? Ki Biblija pišinela kaj amen šaj te manga nesave bukja, sar soj „o zemjodelstvo“, „i mol hem o maslo“, „i pouka“, „o džandipe“ hem „i mudrost“ (2. Let. 26:10; Izr. 12:1; 21:17; 29:3). Ama, o verno mangipe nikogaš na sikavela pe bukjenge, nego samo manušenge. Hem o Jehova na sikavela verno mangipe bilo kaske, nego samo okolenge soj tane paše amala lea. Amaro Devel tano verno ple amalenge. Le isi le but šuži namera lencar, hem nikogaš nane te otkažinel pe lendar.

7. Sar o Jehova sikavgja mangipe sa e manušenge?

⁷ O Jehova sikavgja mangipe sa e manušenge. O Isus vakergja jekhe manušeske so vikinela pe sine Nikodim: „O Devel doborom but manglja e sveto so dengja ple edinstveno bijame Čhave, te šaj sekoj so ka verujnel ki leste te na ovel uništimo nego večno te živinel“ (Jovan 3:1, 16; Mat. 5:44, 45).

8-9. a) Soske o Jehova sikavela verno mangipe ple slugenge? b) Bašo so ka kera akana lafi?

⁸ Sar so spomningjem angleder, o Jehova sikavela plo verno mangipe samo ple slugenge — okolenge soj tane paše lea. Akava šaj te dikhel pe taro adava so vakergje le o cari o David hem o proroko o Daniel.  Na primer, o David vakergja: „Ponadari da sikav tlo verno mangipe okolenge so pendžarena tut“. „E Jehovaskoro verno mangipe tano večno upro okola so darana lestar“. A o Daniel vakergja: „Jehova, tu o čačutno Devel, sikavea verno mangipe okolenge so mangena tut hem so ikerena tle zapovedija“ (Ps. 36:10; 103:17; Dan. 9:4). Sprema akala lafija, o Jehova sikavela verno mangipe ple slugenge soske ola pendžarena le, darana lestar, mangena le hem ikerena leskere zapovedija. O Jehova sikavela plo verno mangipe samo okolenge so služinena leske ko ispravno način.

⁹ Angleder te počmina te služina e Jehovaske, amen dobingjem o mangipe so o Jehova sikavgja le sa e manušenge (Ps. 104:14). Ama, sar leskere sluge, amen isto agjaar isi amen korist taro leskoro verno mangipe. Ustvari, o Jehova uverinela ple slugen: „Mlo verno mangipe nane te cidel pe tutar“ (Isa. 54:10). O David lično doživingja akava keda vakergja: „O Jehova ka postapinel ko posebno način okolea soj leske verno“ (Ps. 4:3). Ko so valjani te pottikninel amen adava so o Jehova posebno grižinela pe amenge? O psalmisti vakergja: „Okola soj mudra ka razmislinen bašo sa adava. Hor ka razmislinen bašo bukja kola so o Jehova kerela len bašo plo verno mangipe“ (Ps. 107:43). Akava šukar sovet avela taro Jehova, adaleske akana ka kera lafi ko kola trin načinija o Jehova sikavela plo verno mangipe hem sar adava koristinela amenge.

10. Sar pomožinela amenge adava so džanaja kaj e Jehovaskoro verno mangipe ačhola večno? (Psalm 31:7)

¹⁰ E Devleskoro verno mangipe ačhola večno. Akava tano spomnimo 26 puti ko Psalm 136. Ko prvo stiho pišinela: „Oven blagodarna e Jehovaske, soske tano šukar — soske leskoro verno mangipe ačhola večno“ (Ps. 136:1). Ko sekova stiho taro 2 dži ko 26 povtorinena pe o lafija „soske leskoro verno mangipe ačhola večno“. Džikote čitinaja akala stihija taro Psalm, vooduševime siem taro but načinija sar o Jehova sikavela plo verno mangipe bizo te čhinavel. O lafija „soske leskoro mangipe ačhola večno“ uverinena amen kaj e Devleskoro  mangipe sprema leskoro narodo na meninela pe. Kobor tano ohrabruvačko adava so džanaja kaj o Jehova na otkažinela pe sigate taro ple sluge. Namesto adava, ov privrzinela pe okolencar so služinena leske hem ačhola lencar posebno keda isi len problemija. Savi korist isi amen? Adava so džanaja kaj o Jehova ačhola amencar, kerela amen te ova bahtale hem dela amen i sila koja so valjani amenge te šaj te ikljova ko krajo e problemencar hem ponadari te služina leske. (Čitin Psalm 31:7.)

11. Sprema Psalm 86:5, so pottikninela e Jehova te prostinel?

¹¹ E Devleskoro verno mangipe pottikninela le te prostinel. Keda o Jehova dikhela kaj jekh grešniko kainela pe hem kaj čhinavela e lošna postapkencar, leskoro verno mangipe pottikninela le te prostinel leske. O psalmisti o David bašo Jehova vakergja: „Na postapinela amencar spored amare grevija hem na iranela amenge adava so zaslužinaja bašo amare greške“ (Ps. 103:8-11). O David taro lično iskustvo džanlja kobor pharo tovar šaj te ovel i lošno sovest. Ama ov isto agjaar dikhlja kaj o Jehova tano „spremno te prostinel“. So pottikninela e Jehova te prostinel? O odgovor arakhljovela ko Psalm 86:5. (Čitin.) Oja baš sar so vakergja o David ki molitva, o Jehova prostinela soske tano pherdo verno mangipe sprema okola so rodena lestar te prostinel lenge.

12-13. So šaj te pomožinel amenge ako preterano osetinaja amen kriva bašo grevija so kergjem len angleder,?

¹² Keda grešinaja, ispravno tano — čak šukar tano — te osetina amen kriva bašo adava so kergjem. Adava šaj te pomožinel amenge te kaina amen hem te isprajna amare lošna postapke. Ama, nesave sluge e Devleskere preterano osetinena pe kriva bašo greške so kergje len angleder. Lengoro vilo so osudinela len vakerela lenge kaj o Jehova nikogaš našti te prostinel lenge — bizi razlika kobor kainena pe. Ako borinea tut asavke čuvstvoncar, ka pomožinel tuke adava so ka haljove kaj o Jehova tano spremno te sikavel verno mangipe ple slugenge.

¹³ Savi korist isi amen? Iako siem nesovršena, šaj te ovel amen čisto sovest hem  bahtale te služina e Jehovaske soske o „rat e Isuseskoro, leskere Čhaveskoro, čistinela amen taro sekova grevo“ (1. Jov. 1:7). Ako sian obeshrabrimo baši nesavi nesovršenost, setin tut kaj o Jehova tano spremno hem edvaj adžikerela te prostinel e grešnikoske so kainela pe. Primetin sar o David povrzingja o verno mangipe e prostibaja: „Sar soj o nebo poučo tari phuv agjaar tano baro leskoro verno mangipe sprema okola so darana lestar. Kobor soj dur o istok taro zapad doborom dur ov cidela amendar amare greške“ (Ps. 103:11, 12). Čače, o Jehova tano spremno darežlivo te prostinel (Isa. 55:7).

14. So vakergja o David bašo način sar e Devleskoro verno mangipe zaštitinela amen?

¹⁴ E Devleskoro verno mangipe zaštitinela amen ko duhovno pogled. O David ki pli molitva e Jehovaske vakergja: „Tu sian mlo than garajbaske, tu ka arakhe man taro nevolje. Ka opkoline man bahtale giljaja bašo mlo spasenie... a okole so isi le doverba ko Jehova tano opkolimo taro leskoro verno mangipe“ (Ps. 32:7, 10). Ko biblisko vreme, o dizja sine opkolime zidoncar kola so zaštitinena sine e manušen taro dušmanja. Slično agjaar, e Jehovaskoro verno mangipe tano sar jekh zido okolu amende kova so dela amen duhovno zaštita taro opasnostija kola so šaj te ruminen amaro amalipe lea. Osven adava, o Jehova privlekujnela amen ki peste adaleske so isi le verno mangipe (Erem. 31:3).

15. Sar e Jehovaskoro verno mangipe tano sar jekh than garajbaske hem tvrdina?

¹⁵ O David koristinela isto agjaar javer sporedba te šaj te sikavel sar o Devel zaštitinela ple narodo. Ov pišingja: „O Devel tano mlo sigurno than garajbaske, o Devel kova so sikavela mange verno mangipe“. Ov isto agjaar bašo Jehova vakerela: „Ov tano mlo verno mangipe hem mli tvrdina, mlo sigurno than garajbaske hem mlo spasiteli, mlo štiti hem okova kaste so garavava man“ (Ps. 59:17; 144:2). Soske o David sporedingja e Jehovaskoro verno mangipe sar than garajbaske hem sar tvrdina? Bizi razlika kote živinaja, sa džikote siem leskere sluge, o Jehova ka zaštitinel amen taro sa so valjani te šaj te arakha amaro skapoceno amalipe lea. O 91 Psalm uverinela amen ki isto buti. O pisateli taro akava Psalm vakergja: „Ka vakerav e Jehovaske: ’Tu sian mlo than kote so šaj te garavav man, mli tvrdina‘“ (Ps. 91:1-3, 9, 14). O Mojsej koristingja jekh slično sporedba te šaj te sikavel kaj o Jehova zaštitinela amen sar jekh than garajbaske. Ov pišingja: „O Devel tano than garajbaske panda taro purane vremija, leskere večna vasta tane teli tute“ (5. Moj. 33:27). So sikavena amenge bašo Jehova o lafija „leskere večna vasta tane teli tute“?

16. Ko kola duj načinija dela amen o Jehova bereketi? (Psalm 136:23)

¹⁶ Keda o Jehova tano amaro than garajbaske, osetinaja amen sigurna. Ama, ponekogaš isi dive keda siem obeshrabrime hem nane amen sila te tergjova ko pre. So ka kerel o Jehova ko asavke dive? (Čitin Psalm 136:23.) Ov ka čhivel ple vasta teli amende, ljubezno ka vazdel amen hem ka pomožinel amenge palem te ušta ko pre (Ps. 28:9; 94:18). Savi korist isi amen? Adava so džanaja kaj o Jehova sekogaš poddržinela amen, pomožinela amenge te na bistra kaj ov dela amen bereketi ko duj načinija. Prvo, bizi razlika kote živinaja džanaja kaj o Jehova sekogaš ka zaštitinel amen. Dujto, amaro manglo nebesno Dad but grižinela pe amenge.

17. Ko so šaj te ova sigurna adaleske so e Devle isi le verno mangipe? (Psalm 33:18-22)

¹⁷ Sar so dikhlem angleder, keda isi amen nevolje, šaj te ova sigurna kaj o Jehova ka poddržinel amen te šaj te ačhova leske verna (2. Kor. 4:7-9). O proroko o Eremija vakergja: „Bašo e Jehovaskoro verno mangipe na mulem, soske leskiri milost nikogaš na završinela“ (Plač 3:22). Šaj te ova sigurna kaj o Jehova sekogaš ka sikavel amenge plo verno mangipe, soske i Biblija vakerela: „E Jehovaskiri jakh tani upro okola so darana lestar, upro okola so adžikerena leskoro verno mangipe“. (Čitin Psalm 33:18-22.)

18-19. a) So na valjani te bistra? b) So ka dikha ki sledno statija?

¹⁸ So na valjani te bistra? Angleder te počmina te služina e Jehovaske, o Devel sikavgja amenge mangipe sar sa e manušenge ko celo sveto. Ama sar leskere sluge, amen isto agjaar isi amen korist taro leskoro verno mangipe. Adava mangipe pottikninela le te zaštitinel amen ple vastencar. Ov sekogaš ka ikerel amen paše uzi peste hem ka ispolninel pli but šuži namera amencar. Ov mangela večno te ova leskere amala (Ps. 46:1, 2, 7). Adaleske, bizi razlika save nevolje isi amen, o Jehova ka del amen i sila so valjani amenge te šaj te ačhova leske verna.

¹⁹ Ki akaja statija dikhlem sar o Jehova sikavela verno mangipe ple slugenge, ama ov isto agjaar amendar da očekujnela te sikava verno mangipe jekh jekheske. Sar šaj te kera adava? I sledno statija ka kerel lafi baši akaja važno tema.