1-2. Bašo kola pučiba mangaja poviše te džana amen sar e Jehovaskere svedokija?

AMEN siem vklučime ko važna sporna pučiba — e Jehovaskoro pravo te vladinel hem te slavinel pe leskoro sveto anav. Sar e Jehovaskere svedokija, amen mangaja te džana poviše bašo akala pučiba.

² Jasno amenge kaj e Devleskoro anav mora te ovel čistimo tari ladž soj leske andi hem te dokažinel pe kaj o Jehova vladinela ko najšukar način. O solduj bukja tane but važna. Ama, dali kerela pe lafi bašo duj različna bukja? Na. E Jehovaskoro pravo te vladinel hem te slavinel pe leskoro sveto anav tane but paše povrzime.

3. Soj tano vklučimo ko anav Jehova?

³ Ko anav Jehova tano vklučimo sa soj povrzimo amare Devlea, maškar kote soj hem leskoro način sar vladinela. Adaleske, keda vakeraja kaj najvažno taro sa tano e Devleskoro anav te ovel čistimo tari sekoja ladž, amen javere lafencar vakeraja kaj mora te dokažinel pe kaj ov tano o najšukar Vladeteli. O anav Jehova hem o način ko kova so ov vladinela sar Semokjno hem Najbaro Devel tane but paše povrzime. (Dikh i ramka „ Soj tano vklučimo ko jekh but važno sporno pučibe“.)

4. So pišinela bašo e Devleskoro anav ko Psalm 135:13, hem bašo kola pučiba ka kera lafi ki akaja statija?

⁴ O anav Jehova tano posebno. (Čitin Psalm 135:13.) Soske e Devleskoro anav tano doborom važno? Sar sine kaljardo? Sar o Devel slavinela plo sveto anav? Hem sar šaj amen te branina leskoro anav? Te dikha.

5. So pučena pe nesave manuša baši e Isuseskiri molitva?

⁵ „Te slavinel pe tlo sveto anav“ (Mat. 6:9). O Isus vakergja kaj akaja tani jekh taro najvažna bukja bašo kola so valjani te molina amen. Ama, so značinena e Isuseskere lafija? Leskere lafija šaj isto agjaar te prevedinen pe sar „tlo anav neka ovel sveto“. Ama, nesave šaj te pučen pe: „Ako e Jehovaskoro anav više tano sveto, tegani soske o Isus ki pli molitva spomningja ’neka ovel sveto‘“? Te šaj te odgovorina ko akava pučibe, valjani te razmislina bašo adava so, ustvari, pretstavinela jekh anav.

6. Soske o anav tano doborom važno?

⁶ O anav nane samo lafi so šaj te pišinel pe ili te vakerel pe. I Biblija vakerela: „Pošukar tano te birine šukar anav nego baro barvalipe“ (Izr. 22:1; Prop. 7:1). Soske o anav tano doborom važno? Adaleske so ki leste tano vklučimo o ugled, javere lafencar so mislinena o javera bašo adava manuš. Znači, nane važno sar pišinela pe o anav ili sar vakerela pe, nego so mislinena hem so osetinena o javera keda ka šunen ili ka dikhen adava anav.

7. Sar o manuša anena ladž e Devleskere anaveske?

⁷ Keda vakerena hovajba bašo Jehova, o manuša probinena te ruminen leskoro ugled, hem adalea te anen ladž leskere anaveske. E Devleskoro anav hem leskoro ugled prvo puti sine napadimo ko početok tari manušikani istorija. Te dikha so šaj te sikljova taro akava.

8. So džanena sine o Adam hem i Eva, hem kola pučiba šaj te puča amen?

⁸ O Adam hem i Eva džanena sine kaj o Devel vikinela pe Jehova hem džanena sine nesave važna bukja baši leste. Džanena sine kaj ov tano o Stvoriteli, kova so dengja len životo, but šužo than živibaske hem sovršeno bračno partneri (1. Moj. 1:26-28; 2:18). Ama, dali ponadari da koristingje pli sovršeno godi te šaj te razmislinen bašo sa adava so o Jehova kergja lenge? Dali bajrargje plo mangipe hem plo cenenje bašo Jehova? O odgovor ko akala pučiba ulo jasno keda jekh Devleskoro dušmani čhivgja len ko ispit.

9. Sprema 1. Mojseeva 2:16, 17 hem 3:1-5, so vakergja o Jehova e prvo bračno pareske, hem sar o Satana prevrtingja o čačipe?

 ⁹ Čitin 1. Mojseeva 2:16, 17 hem 3:1-5. O Satana koristingja jekhe sape te šaj te kerel lafi e Evaja hem pučlja la: „Čače li o Devel vakergja tumenge kaj na smejnena te han taro sekova kaš ki gradina?“ Ko akava pučibe sine jekh opasno hovajbe kova so sine sar jekh garavdo otrov. So ustvari, vakergja o Devel? Ov vakergja kaj šaj te han taro sekova kaš, osven taro jekh. O Adam hem i Eva šaj sine te uživinen džikote hana o plodija taro najrazlična vrste kašta (1. Moj. 2:9). O Jehova čače tano darežlivo Devel. Sepak, ov vakergja lenge kaj taro jekh kaš na smejnena te han. Sprema adava, ple pučibaja o Satana prevrtingja o čačipe agjaar so čhivgja e Eva te mislinel peske kaj o Devel nane darežlivo. Oj šaj počmingja te pučel pe: „Dali o Devel čhinavela amendar nešto šukar?“

10. Sar o Satana direktno vakergja hovajba bašo Devel, hem save sine o posledice?

¹⁰ Ko adava momenti, i Eva panda dikhela sine ko Jehova sar plo Vladeteli. Oj odgovoringja e Satanaske agjaar so povtoringja o jasno upatstvo kova so dengja o Devel, hem vakergja kaj na smejnena ni te pipinen o kaš. I Eva šukar džanela sine kola ka oven o posledice ako na šunena le — o Jehova predupredingja len kaj ka meren. Ama, o Satana vakergja lake: „Na, tumen nane te meren“ (1. Moj. 3:2-4). Ov akava puti na sine više indirektno e Evaja, nego ov direktno počmingja te vakerel hovajba bašo Devel. Keda vakergja e Evake kaj nane te meren, ov, ustvari vakergja lake kaj o Jehova tano hovavno. Agjaar o Satana ulo klevetniko, ili Beng. I Eva sine hovavdi (1. Tim. 2:14). Poviše verujngja e Satana nego e Jehova. Tari adaja pričina angja i najlošno odluka so postojnela. Oj odlučingja te na šunel e Jehova, hem halja taro plodi so sine lenge zabranimo. A palo adava dengja e Adameske da te hal taro plodi (1. Moj. 3:6).

11. So propuštingje te keren amare prva roditelija?

¹¹ Razmislin samo hari ko savo javer način šaj sine te postapinel i Eva. Oj šaj sine te vakerel e Satanaske: „Na džanava koj sian tu, ama but šukar džanava koj tano mlo Dad, o Jehova. Me but mangava le hem isi man doverba ki leste. Ov dengja amen sa so isi amen. Sar na ladžaja te kere lošno lafi baši leste?! Cide tut akatar!“ Kobor ka ovel sine bahtalo o Jehova te šaj sine te šunel sar leskiri mangli čhaj verno braninela le! (Izreki 27:11). Ama, e Eva na sine la čačutno hem hor mangipe sprema o Jehova, a ni e Adame. Adaleske so na sine len asavko mangipe sprema plo Dad, ola na braningje leskoro anav keda o dušmani vakergja hovajba baši leste.

12. Sar o Satana sejngja sumnje ki godi e Evakiri, hem so na kergje o Adam hem i Eva?

¹² Sar so dikhlem, o Satana sejngja sumnje  ki godi e Evakiri. Ov čhivgja la te počminel te pučel pe dali o Jehova čače tano šukar Dad. O Adam hem i Eva na braningje e Jehovaskoro anav hem leskoro ugled. Ola mukhle o Satana te vlijajnel upri lende hem buningje pe protiv plo Dad. O Satana avdive da koristinela slična taktike. Ov napadinela e Jehova agjaar so kaljarela leskoro anav. O manuša so verujnena ko leskere hovajba but lokhe otfrlinena e Jehovaskoro pravedno vladibe.

13. Sar tano istaknimo o glavno haberi e Biblijakoro ko Ezekiel 36:23?

¹³ Dali o Jehova trpinela asavke hovajba bizo te braninel pe? Na! Ki celo Biblija kerela pe lafi bašo adava so kergja hem so kerela te šaj te čistinel plo anav tari ladž so sine leske andi ki rajsko gradina (1. Moj. 3:15). Ustvari, šaj te vakerel pe kaj o glavno haberi e Biblijakoro tano: o Jehova ka slavinel plo sveto anav hem ka anel pravda hem mir ki Phuv preku o Carstvo kolea so vladinela leskoro Čhavo. E Devleskoro Lafi pomožinela amenge te haljova so kerela o Jehova te šaj te slavinel plo sveto anav. (Čitin Ezekiel 36:23.)

14. Sar o Jehova slavingja plo sveto anav adalea sar iklilo ko krajo e Satanaskere pobunaja?

¹⁴ Panda taro početok, o Satana kerela sine sa so šaj te čhinavel e Jehova te ispolninel pli namera. Ama, nikogaš na uspejnela sine ko adava. I Biblija otkrinela amenge sar postapingja o Jehova, hem dokažinela kaj ov tano Dad so grižinela pe hem o najšukar Vladeteli. Točno tano adava kaj i pobuna e Satanaskiri hem okolengiri so ule tari leskiri strana angja e Jehovaske bari dukh (Ps. 78:40). Ama, ov iklilo ko krajo akale pobunaja agjaar so postapingja mudro, strplivo hem pravedno. Osven adava, sikavgja kaj tano Semokjno ko but načinija. Hem, najvažno taro sa, nikogaš na čhinavgja te sikavel mangipe (1. Jov. 4:8). O Jehova ponadari da kerela sa te šaj te slavinel plo sveto anav.

15. Sar o Satana kaljarela e Devleskoro anav avdive, hem save tane o posledice taro adava?

 ¹⁵ O Satana ponadari da kaljarela e Devleskoro anav. Ov čhivela e manušen te sumninen pe dali o Devel tano mokjno, pravedno hem mudro, hem dali mangela len. Na primer, o Satana probinela te ubedinel e manušen kaj o Jehova nane o Stvoriteli. A ako nesave verujnena kaj o Devel postojnela, o Satana probinela te čhivel len te mislinen kaj nane pravedno hem kaj čhivela amenge merilija kolencar so ograničinela amen. Čak širinela hovajba kaj o Jehova nane milostivo hem kaj tano surovo Devel kova so tharela e manušen ko pekol. Keda nekoj ka verujnel ko asavke strašna hovajba, but polokhe ka otfrlinel e Jehovaskoro pravedno vladibe. Sa džikote na ovela uništimo, o Satana ponadari da ka vakerel hovajba bašo Jehova, hem ka probinel te čhivel tute da te irane leske dumo. Ka uspejnel li ko adava?

16. Sar šaj te kere adava so propuštingje te keren o Adam hem i Eva?

¹⁶ O Jehova dozvolinela amenge da sar nesovršena manuša te slavina leskoro sveto anav. Ustvari, tu šaj te kere adava so na uspejngje te keren o Adam hem i Eva. Iako živinaja ko sveto kova soj pherdo manušencar so kaljarena hem meljarena e Jehovaskoro anav, tut isi tu prilika hrabro te branine e Jehovaskoro anav hem te vakere e javerenge kaj tano sveto, pravedno, šukar hem pherdo mangipaja (Isa. 29:23). Šaj te sikave kaj poddržinea le sar tlo Vladeteli. Osven adava, šaj te pomožine e manušenge te haljoven kaj samo e Jehovaskoro vladibe tano pravedno, hem kaj samo ov ka anel čačutno mir hem bahtalipe sa e bukjenge so stvoringja (Ps. 37:9, 37; 146:5, 6, 10).

17. Sar o Isus objavingja e Jehovaskoro anav?

¹⁷ Keda braninaja e Jehovaskoro anav, amen džaja palo e Isuseskoro primer (Jovan 17:26). O Isus objavingja e javerenge ple Dadeskoro anav. Sar? Osven so koristingja o anav Jehova, o Isus sikavgja e manušen savo tano čače o Jehova. Na primer, ov sikavgja kaj tano hovajbe adava so vakergje o fariseija, kola pretstavinena sine e Jehova sar surovo, šudro hem Devel bizi milost kova so but rodela e javerendar. O Isus pomožingja e manušenge te haljoven kaj leskoro Dad tano strplivo, razumno, pherdo mangipaja  hem spremno te prostinel. Osven adava, ov pomožingja lenge te zapoznajnen e Jehova agjaar so sovršeno sikavgja leskere osobine ko sa so kerela sine (Jovan 14:9).

18. Sar šaj te sikava kaj o iftire hem o hovajba so širinena len o dušmanja bašo Jehova nane čače?

¹⁸ Isto sar o Isus, amen da šaj te vakera e javerenge adava so džanaja bašo Jehova, hem agjaar te pomožina lenge te ovel len hor poštovanje sprema leskoro anav. Šaj te vakera lenge kobor šukar Devel tano ov hem kobor but mangela amen. Agjaar ka sikava kaj o iftire kola so o dušmanja širinena len baši leste tane hovajba. Osven adava, amen da šaj te sikava e Jehovaskere osobine. Šaj te kera akava iako siem nesovršena (Ef. 5:1, 2). Keda amare lafencar hem postapkencar sikavaja e javerenge savo čače tano o Jehova, amen pomožinaja te slavinel pe leskoro sveto anav. Amen slavinaja adava anav agjaar so pomožinaja e manušenge te otfrlinen o hovajba bašo Devel. Isto agjaar, sikavaja kaj o nesovršena manuša šaj te ačhoven verna e Jehovaske (Jov 27:5).

19. Sar o Isaija 63:7 pomožinela amenge te haljova so valjani te ovel amari glavno cel keda sikavaja e javeren?

¹⁹ Šaj te slavina e Jehovaskoro sveto anav panda ko jekh način. Keda sikavaja e javeren bašo bibliska čačipa, but puti istakninaja kaj e Jehova isi le pravo te vladinel upro sa. Ama, iako tano važno te sikava len bašo e Devleskere zakonija, amari glavno cel tani te pomožina lenge te zamangen amare Dade, e Jehova, hem te oven leske verna. Adaleske, valjani te istaknina leskere but šuže osobine, javere lafencar te pomožina lenge te dikhen i ličnost koja so bešela palo anav Jehova. (Čitin Isaija 63:7.) Ako sikavaja e javeren ko asavko način, ka pomožina lenge te zamangen e Jehova hem te oven leske poslušna adaleske so mangena te ačhoven leske verna.

20. So ka dikha ki sledno statija?

²⁰ So valjani te kera te šaj amare sikajbaja hem ponašibaja te pomožina e javerenge te ovel len šukar mislenje bašo Jehova hem te mangen te oven lea paše? Akava pučibe ka dikha ki sledno statija.