O sledno berš, o phralja ko Betel izvestingje kaj ki Južnoafrikansko podružnica valjanena dobrovolcija soske dobingje nevi mašina pečatibaske. Me prijavingjum man sar dobrovolco hem but sium sine bahtalo so biringje man. Isto agjaar, javera da trin phralja taro Betel ki Kanada sine birime, o Denis Lič, o Bil Meklelan hem o Ken Nordin. Vakergje amenge kaj ka ačhova ki Južno Afrika but vreme.

Javingjum man me dajake hem vakergjum lake: „Isi man te vakerav tuke nešto. Ka džav ki Južno Afrika!“ Na vakergja but, ama džanljum kaj poddržinela man. Mi daj na sine džuvli koja so kerela sine but lafi, ama sine la zorali vera hem but mangela sine e Jehova. Iako mo dad hem mi daj sine tažna so ka džav doborom dur, sepak ola nikogaš na žalingje pe baši mli odluka.

Prvo gelem ko Betel ko Bruklin kote so dobingjem trin masek obuka baši jekh posebno mašina pečatibaske. Palo adava, brodea gelem dži ko Kejptaun, Južno Afrika. Tegani sine man samo 20 berš. Hem keda reslem athe astargjem rakjate o vozi te dža dži ko Johanesburg. Rano sabajle, ačhilem te odmorina amen ki jekh tikni diz, ko Karu, kova so sine pustinsko podračje. Čače sine but tato hem but prašina. Soštar džene dikhlem taro džami hem pučaja amen sine: „Kaj alem? So ka kera akate buti?“ Ama, palo but berša halilem kaj akava podračje sine but šužo hem mirno than.

Nekobor berš kerava sine ki linotip mašina koja so spreminela sine te pečatinen pe o spisanija Stražarsko kula hem Džangavgjoven! I podružnica pečatinela sine spisanija ko but afrička čhibja, na samo baši Južno Afrika, nego isto agjaar bašo but javera phuvja ki Afrika. Siem sine but bahtale so akaja mašina pečatibaske, baši kolake so alem čak tari Kanada, sine but korisno!

Pokasno, kerava sine buti ki kancelarija koja so grižinela pe sine bašo pečatibe, transport hem prevod. Sium sine but zafatimo hem zadovolno ko životo!

Ko 1968 berš, ženingjum man jekhe pionerkaja, i Lora Bouen, koja so živinela sine paše uzo Betel. Oj isto agjaar kucinela sine bašo preveduvačko oddelenie. Ko adava vreme, o neve bračna parija obično našti ačhovena sine ko Betel. Adaleske i podružnica dengja amen nevi zadača sar specijalna pionerija. Sium sine hari sekirimo. Palo deš berš ko Betel, kote so sine mange obezbedimo hajbe hem than živibaske, sar akana ka uspejna te grižina amen bašo sa adava e hari parencar so dobinaja len sine sar specijalna pionerija? Sekova masek dobinaja sine po 25 randija, (kola so tegani vredinena sine 35 dolarija), samo ako pheraja sine o saatija so rodena pe amendar, keraja sine povtorna posete hem daja sine dovolno literatura. Adale parencar mora sine te platina i kirija, hajbaske, prevoz, o doktorija hem javera trošakija.

Siem sine dodelime te služina ki jekh grupa paše uzi diz Durban, uzo Indisko Okeani. Ko adava than živinena sine but Indicija, soske lengere predcija ko 19 veko ale ki Južno Afrika te keren buti ko plantaže baši šekerno repka. Akana len isi len javer buti, ama ponadari da ikergje pli kultura hem plo način sar hraninena pe, sar soj o vkusno kari. Hem adaleske so kerena sine ki anglisko čhib lafi, ki služba sine amenge but polokhe.

Ko adava vreme, o specijalna pionerija valjani sine te keren 150 saatija ko masek. Adaleske i Lora hem me planiringjem o prvo dive te dža šov saatija ki služba. Sine but tato hem vlažno. Na sine amen posete, a ni bibliska kursija, valjani sine te propovedina šov saatija samo taro kher ko kher. Palo nesavo vreme otkeda počmingjem e službaja dikhljum ko mlo saati hem samo 40 minutija nakhle! Pučava man sine, dali ka izdržina ki akaja specijalno pionersko služba?

Ama, sigate uspejngjem te organizirina amen. Sekova dive spreminaja sine amenge sendvičija, hem čhivaja sine amenge supa ili kafa ko termos. Keda valjani sine amenge pauza, ka parkirina sine amaro tikno vrda ki senka telo jekh kaš. Ponekogaš okolu amende khedena pe sine pherdo čhave kola so dikhena amen sine soske siem sine porazlično lendar. Hem nekobore divenge halilem kaj palo duj, trin saatija, o dive nakhela sine but sigate.

Siem sine but bahtale so šaj sine te vakera o čačipe tari Biblija e manušenge taro adava podračje. Dikhlem kaj o Indicija poštujnena e javeren, kaj tane ljubezna hem kaj darana taro Devel. But hindusija prifatingje o šukar haberi. Ola mangle te sikljoven baši Biblija, bašo Jehova, bašo Isus, bašo nevo sveto hem baši nadež e mulenge. Palo jekh berš sine amen 20 bibliska kursija. Sekova dive haja sine ručko različno familijaja kasaja so proučinaja sine. But siem sine bahtale!

Ama, sigate palo adava dobingjem nevi zadača — siem sine bičhalde te služina ki pokrainsko služba uzo but šužo Indisko Okeani. Sekova kurko siem sine gostija ko različna familie, džikote posetinaja sine o sobranija hem sorabotinaja sine lencar te šaj te ohrabrina len. Ulem delo taro lengere familie hem uživinaja sine lengere čhavencar. Agjaar, sigate nakhle duj but šuže berša. Tegani javingje pe mange tari podružnica. O phral vakergja mange: „Mangaja te iranen tumen ko Betel“. Me odgovoringjum leske: „But šukar amenge akate kote so siem“. Ama džangjola pe, siem sine spremna te prifatina sekoja zadača so ka dobina la sine.

Keda palem irangjum man ko Betel, počmingjum te kerav buti ko Oddelenie baši služba, kote so sine man čest te sorabotinav bute zrela hem iskusna phralencar. Ko adava vreme, otkeda o pokrainsko nadgledniko ka posetinel sine o sobranie, pali pli poseta ov bičhalela sine izveštaj dži ki podružnica. Palo adava, i podružnica bičhalela sine jekh pismo dži ko sobranie so temelinela pe sine ko adava izveštaj. I cel akale pismongiri sine te ohrabrinen hem te den nesave upatstvija ako valjani sine. E sekretaren sine len but buti soske valjani  sine te prevedinen o izveštaj taro pokrainsko nadgledniko tari čhib kosa, zulu hem javera čhibja ko angliski. A palo adava, o pismija tari podružnica dži ko sobranija, valjani sine te prevedinen pe taro angliski ko adala čhibja. But sium sine blagodarno adale vredna preveduvačenge, kola so isto agjaar pomožingje mange te haljovav kola pharipa sine amare phralen hem phenjen tari kali rasa.

Ko adava vreme, ki Južno Afrika sekoja rasa sine la plo delo kote so valjani sine te živinel. Adaleske, ni jekh rasa na smejnela sine te družinel pe javere rasaja. Amare phralja so sine kale, kerena sine lafi, propovedinena sine hem džana sine ko sostanokija ki pumari čhib.

Na džanava sine bute phralen tari kali rasa, soske mlo sobranie sine ko podračje kote so kerela pe angliski lafi. Ama, ko Betel sine man prilika poviše te sikljovav baši lengiri kultura hem običaija. Dikhljum kola problemija isi amare phralen bašo tradicie hem o religiozna veruvanja so isi adari. Iako sine len protivibe tari familija hem taro celo gav, ola sine hrabra soske otkažingje pe taro tradicie so na sine bibliska hem taro spiritizam! Ko adala izolirime thana sine baro čorolipe. But džene lendar na gele ki škola, ama sepak poštujnena sine i Biblija.

Sine man prilika te kerav buti ko nekobor pravna slučaija kote so sine vklučimi amare phralengiri versko sloboda hem i neutralnost. But ohrabringja man i vernost hem i hrabrost e čhavengiri kola so sine brkime taro škole soske odbingje te učestvujnen ko lengere religiozna molitve.

Amare phralja soočingje pe panda jekhe phare situacijaja ki jekh tikni afričko phuv koja so tegani vikinela pe sine Svazilend. Keda mulo o cari Sobuza II, taro sa o gragjanija rodela pe sine te žalinen ko jekh odredeno tradicionalno način. O murša mora sine te keren pe gerale, a o džuvlja te čhinen ple bala kratko. But phralja hem phenja sine progonime soske na mangle te učestvujnen ko asavke običaija so sine povrzime e mulencar. Lengiri vernost sprema o Jehova kergja amen but bahtale! Siklilem but baši vernost hem baši strplivost taro amare phralja ki Afrika hem adava kergja amari vera pozorali.

Ko 1981 berš, palem irangjum man te kerav buti ki pečatnica, te šaj te pomožinav te koristinen pe kompjuterija ki pečatarsko buti. Akava sine but interesno vreme! O pečatarska metode but meningje pe. O pretstavniko tari jekh firma dengja e phralenge nevi mašina pečatibaske koja so šaj sine te koristina la bizo pare. Hem adaleske zameningjem o enja purane linotip mašine, pandže neve mašinencar pečatibaske. Isto agjaar, lelem jekh nevi pečatarsko presa. Pečatinaja sine literatura sar nikogaš angleder!

O kompjuterija pomožingje amenge te izmislina neve metode baši kompozicija, sar soj i programa MEPS (Sistem kova so elektronski prevedinela ko poviše čhibja o fotoslog). I tehnologija but napredujngja otkeda amen o štar betelitija tari Kanada alem te kera buti ki Južno Afrika (Isa. 60:17). Ko adava vreme, o soštar siem sine više ženime duhovno zrela phenjencar. Me hem o Bil panda služinaja ko Betel. A o Ken hem o Denis, isi len akana familie.

I buti ki podružnica bajrola sine. Sa poviše literatura sine pečatimi, prevedimi hem ingardi ko javera podružnice. Adaleske, valjani sine nevo betelsko objekti. Hem o phralja gradingje jekh but šužo nevo Betel ko zapadno delo taro Johanesburg so sine posvetimo ko 1987 berš. Sine man bari čest te ovav delo taro adava napredok hem but berša te služinav ko odbor tari podružnica ki Južno Afrika.

Ko 2001 berš, siem sine but iznenadime keda vikingje amen te služina ko Odbor e podružnicakoro ko SAD, kova so sigende sine kerdo. Iako sine amenge žal so valjangjem te mukha amari buti hem amalen ki Južno Afrika, siem sine but bahtale so šaj sine te počmina nevo životo sar delo taro tari betelsko familija ki Amerika.

Siem sine hari sekirime, soske ka ova sine dur tari e Lorakiri daj. Amen našti sine but te kera taro Njujork, ama e Lorakere phenja nudingje pe te pomožinen la fizički, emocionalno hem finansiski. Ola vakergje: „Amen našti te ova ki polnovremeno služba, ama ako grižinaja amen amare dajake, adava tumenge ka pomožinel te prodolžinen ki polnovremeno služba“. But siem lenge blagodarna.

Isto agjaar, mo phral hem leskiri romni, kola so tegani živinena sine ko Toronto (Kanada), grižinena pe sine me dajake. Oj više 20 berš živinela sine lencar. Hem but siem blagodarna baši griža hem o mangipe so sikavgje lake dži ko lakoro meribe. Baro bereketi tano keda o javera členija tari familija tane spremna te keren promene ko plo životo te šaj te grižinen pe e pophure roditelenge, a adava ponekogaš šaj te ovel pharo!

Mli nevi zadača ko Betel ki Amerika sine ki pečatnica, kola so sine la panda ponevi hem poednostavno tehnologija. A akana kerava buti ko Oddelenie baši nabavka. Baro bereketi sine mange so o posledna 20 berš, šaj sine te ovav delo tari akaja bari podružnica, kote so akana otprilika isi 5.000 betelitija hem okolu 2.000 betelska sorabotnikija!

Angleder 60 berš, nikogaš na bi avela mange sine ki godi kaj ka ovav akate. Sa akala berša i Lora spremno poddržingja man. Sine man čače šužo životo! But ceninaja sekoja zadača so sine amen hem sa e manušen kolencar so sine amen prilika te sorabotina, maškar kolende soj but džene taro podružnice so posetingjem len ko but delija taro sveto. Adaleske so akana isi man poviše taro 80 berš, kerava pohari buti soske akana isi but terne phralja kola soj tane obučime te završinen adala zadače.

O psalmisti pišingja: „Bahtalo tano o narodo kaskoro Devel tano o  Jehova“ (Ps. 33:12). Akava tano čače agjaar! But sium blagodarno so sine man prilika te služinav e Jehovaskere bahtale narodoja.