1-2. Sprema Matej 5:11, sar valjani te dikha ko iskušenija?

O ISUS vetingja ple učenikonge kaj ka oven čače bahtale. Ov isto agjaar, predupredingja len kaj ka oven len nevolje (Mat. 10:22, 23; Luka 6:20-23). Amen siem bahtale so siem e Isuseskere učenikija. Ama, sar osetinaja amen keda amari familija protivinela pe amenge, keda o vlastija progoninena amen ili keda o kolege hem o součenikija terinena amen te kera nešto soj pogrešno? Keda razmislinaja bašo akala bukja, adava šaj te kerel te osetina amen sekirime.

² Obično o manuša ko progonstvo na dikhena sar pričina te oven bahtale. Ama, e Devleskoro Lafi vakerela amenge te kera baš adava. Na primer, o Jakov pišingja kaj namesto te ova but sekirime, amen valjani te ova bahtale keda isi amen iskušenija (Jak. 1:2, 12). A o Isus vakergja kaj valjani te ova bahtale čak ako siem progonime. (Čitin Matej 5:11.) Sar šaj te ova bahtale iako isi amen nevolje? Šaj but te sikljova taro adava so ka dikha taro pismo so pišingja le o Jakov e hristijanenge ko prvo veko. Prvo, te dikha save predizvikija sine adale hristijanen.

3. So slučingja pe kratko otkeda o Jakov ulo e Isuseskoro učeniko?

³ Kratko otkeda e Isuseskoro phral, o Jakov ulo učeniko, o hristijanja ko Erusalim sine progonime (Dela 1:14; 5:17, 18). A keda sine mudardo o učeniko o Stefan, but hristijanja našle tari diz hem gele ki Judeja hem ki Samarija. A nesave gele čak dži ko Kipar hem ki Antiohija  (Dela 7:58 — 8:1; 11:19). Šaj samo te zamislina amenge kobor sine pharo e učenikonge. Sepak, bilo kote so gele ola revno propovedinena sine o šukar haberi hem formiringje sobranija ki Rimsko Imperija (1. Pet. 1:1). Ama palo akava, len sine len panda but popharo periodi.

4. Save javera nevolje sine e hristijanen taro prvo veko?

⁴ E hristijanen taro prvo veko sine len različna nevolje. Na primer, okolu o 50 berš a.e., o rimsko imperatori, o Klavdij, dengja naredba sa o Evreija te džan peske taro Rim. Adaleske, o Evreija so ule hristijanja silaja sine terime te mukhen pumare khera hem te džan te selinen pe ko javera thana (Dela 18:1-3). Okolu o 61 berš a.e., o apostol Pavle pišingja kaj o manuša vredžinena sine bute hristijanen anglo javera, čhivena len sine ko zatvor hem čorena sine lengoro imot (Evr. 10:32-34). Hem isto sar o javera manuša, o hristijanja da sine čorole hem nasvale (Rim. 15:26; Fil. 2:25-27).

5. Bašo kola pučiba ka dobina odgovor?

⁵ Keda o Jakov pišingja plo pismo angleder o 62 berš a.e., ov but šukar džanela sine bašo problemija so sine leskere phralen hem phenjen. O Jehova vodingja e Jakove te pišinel akale hristijanenge hem te del len korisna sovetija kola so ka pomožinen lenge te ačhoven bahtale iako sine len problemija. Akana te razgledina o pismo taro Jakov hem te odgovorina ko akala pučiba: Soj tano o bahtalipe bašo kova so pišingja o Jakov? So šaj te kerel o hristijanja te našaven pumaro bahtalipe? Hem sar šaj i mudrost, i vera hem i hrabrost te pomožinen amenge te ačhova bahtale iako isi amen nevolje?

6. Sprema Luka 6:22, 23, soske jekh hristijani šaj te ovel bahtalo keda isi le iskušenija?

⁶ O manuša šaj mislinena kaj nekoj šaj te ovel bahtalo samo ako isi le šukar sastipe, but pare hem sloga ki familija. Ama, o bahtalipe bašo kova so pišingja o Jakov tano jekh taro osobine so avena taro sveti duh hem na zavisinela taro okolnostija so isi jekhe manuše (Gal. 5:22). Jekh hristijani tano bahtalo keda džanela kaj kerela e Jehovaskiri volja hem kaj džala palo e Isuseskoro primer. (Čitin Luka 6:22, 23; Kol. 1:10, 11.) Amaro bahtalipe šaj te sporedinel pe jekhe jagaja ki jekh lampa. Adaleske so i jag tani zaštitimi tari bavlal hem taro bršim oj šaj ponadari da te thabljol. Slično agjaar, amen da šaj ponadari da te ova bahtale bizi razlika so slučinela pe ko amaro životo. Amen nane te našava amaro bahtalipe keda siem nasvale ili keda nane amen pare. Čak ka ova bahtale keda o manuša asana amenge ili keda amari familija ili o javera protivinena pe amenge. Ustvari, tegani amaro bahtalipe ka ovel panda pobaro, soske džanaja kaj o iskušenija so isi amen baši amari vera dokažine kaj amen siem čačutne učenikija e Hristoseskere (Matej 10:22; 24:9; Jovan 15:20). Adaleske o Jakov šaj sine te pišinel: „Phraljalen, keda ka oven tumen različna iskušenija, dikhen ko adava sar pričina te oven bahtale“ (Jak. 1:2).

7-8. So ovela amare veraja keda isi amen iskušenija?

⁷ O Jakov spomningja panda jekh pričina soske o hristijanja tane spremna te izdržinen čak pophare nevolje. Ov vakergja: „Adava so tumari vera tani iskušimi, kerela te oven istrajna“ (Jak. 1:3). O nevolje šaj te sporedinen pe jagaja koja so koristinela pe te šaj te oblikujnel pe jekh mači. Keda o mači takjarela pe hem šudrarela pe, ov ovela pocvrsto. Slično agjaar, keda trpinaja nevolje, amari vera ovela pozorali. Adaleske o Jakov pišingja: „I istrajnost neka završinel pli buti, te šaj te oven sovršena hem celosna bizi nisavi mana“ (Jak. 1:4). Keda dikhaja kaj o iskušenija kerena amari vera te ovel pozorali, amen šaj te ova bahtale džikote istrajnaja.

⁸ Ko akava pismo, o Jakov spomningja nesave bukja so šaj te keren te našava amaro bahtalipe. Kola tane adala predizvikija, hem sar šaj te nakhava len?

9. Soske valjani amenge mudrost?

⁹ Predizvik: Keda na džanaja so te kera. Keda isi amen problemija, amen mangaja o Jehova te pomožinel amenge te ana odluke so falinena le, pomožinena amare phralenge hem phenjenge, hem pomožinena amenge  te ačhova verna e Jehovaske (Erem. 10:23). Valjani amenge mudrost te džana so te kera hem so te vakera adalenge so protivinena pe amenge. Šaj te osetina amen obeshrabrime keda na džanaja so te kera, hem adava šaj sigate te lel amaro bahtalipe.

10. Sprema Jakov 1:5, so valjani te kera te šaj te dobina mudrost?

¹⁰ Rešenie: Rode e Jehovastar mudrost. Ako mangaja te izdržina ko iskušenija hem te ova bahtale, mora prvo e Jehovastar te roda ki molitva te del amen mudrost te šaj te ana šukar odluke. (Čitin Jakov 1:5.) So valjani te kera ako mislinaja kaj o Jehova na odgovorinela odma ko amare molitve? Valjani ponadari da te molina amen e Devleske. Amen na dosadinaja e Jehova keda rodaja lestar mudrost hem ov nane te holjanel amenge. Amaro nebesno Dad dela darežlivo keda molinaja le baši mudrost te izdržina ko iskušenija (Ps. 25:12, 13). Ov dikhela amare nevolje, sikavela amenge sočuvstvo hem spremno tano te pomožinel amenge. Sigurno akava kerela amen te ova pobahtale! Ama, sar o Jehova dela amen mudrost?

11. So valjani javer te kera te šaj te dobina mudrost?

¹¹ O Jehova dela amen mudrost preku plo Lafi (Izr. 2:6). Te šaj te dobina adaja mudrost, mora te proučina i Biblija hem amare publikacie. Ama, nane dovolno samo te proučina, nego mora hem te živina sprema e Devleskere mudra sovetija. O Jakov pišingja: „Ma šunen samo o lafi, nego živinen sprema leste“ (Jak. 1:22). Keda primeninaja e Devleskere sovetija, tegani panda poviše ka trudina amen te kera mir, ka ova porazumna hem pomilostiva (Jak. 3:17). Akala osobine pomožinena amenge te ova bahtale džikote istrajnaja ko iskušenie.

12. Soske tano važno te džana šukar i Biblija?

¹² E Devleskoro Lafi tano sar ajna. Ov  pomožinela amenge te dikha so valjani te kera pošukar hem sar valjani te kera adava (Jak. 1:23-25). Na primer, otkeda proučinaja e Devleskoro Lafi, amen haljovaja kaj valjani te kera promene ko amaro karakter. Adalea so pomožinela amenge o Jehova, amen sikljovaja te ova krotka keda o manuša ili nesavo problemi nervirinela amen. Adaleske so na holjanaja sigate, pošukar reagirinaja keda isi amen problemija. Šaj pošukar te razmislina hem te ana pošukar odluke (Jak. 3:13). But tano važno te džana šukar i Biblija!

13. Soske valjani te proučina o primerija soj tane dende ki Biblija?

¹³ Ponekogaš sikljovaja so na valjani te kera, odkeda kergjem jekh greška. Ama, adava tano pharo način te sikljovel pe. Pošukar način te dobina mudrost tano te sikljova taro e javerengere šukar postapke hem taro lengere greške. Adaleske o Jakov ohrabrinela amen te dikha o primerija taro manuša soj pišime ki Biblija, sar soj o Avraam, i Raav, o Jov hem o Ilija (Jak. 2:21-26; 5:10, 11, 17, 18). Adala verna sluge e Jehovaskere šaj sine te oven bahtale iako trpingje nevolje. Akala primerija baši istrajnost sikavena amenge kaj amen da šaj te kera adava ako o Jehova pomožinela amen.

14-15. Soske valjani te rasčistina amare sumnje?

¹⁴ Predizvik: Keda isi amen sumnje. Ponekogaš šaj te ovel amenge pharo te haljova nešto so vakerela i Biblija ili šaj o Jehova na odgovorinela ko amare molitve ko način sar so očekujngjem amen. Adava šaj te kerel te sumnina amen. Ako na keraja nešto protiv adava, o sumnje ka slabonkeren amari vera hem ka ruminen amaro amalipe e Jehovaja (Jak. 1:7, 8). Hem adava šaj te kerel čak te našava amari nadež baši idnina.

¹⁵ O apostol Pavle sporedingja amari nadež baši idnina sar jekh kotva (Evr. 6:19). Jekh kotva ikerela o brodi ko jekh than čak keda isi silno bura hem agjaar na mukhela o brodi te khuvel ko bare bara. I kotva tani zakačimi ko brodi jekhe sindžirea. Ama, ako o sindžiri čhingjola tegani i kotva nane korisno. Sar i ’rgja so oštetinela o sindžiri, agjaar o sumnje so nane rasčistime slabonkerena amari vera. Keda isi le protivibe, jekh manuš so sumninela pe šaj te našavel pli vera kaj e Jehovaskere vetuvanja nane te ispolninen pe. Ako našavaja amari vera, amen našavaja amari nadež. Sar so pišingja o Jakov, o manuš so sumninela pe „tano sar morsko brani kaste so i bavlal ingarela le adari akari“ (Jak. 1:6). Asavko manuš šaj nikogaš nane te ovel bahtalo!

16. So valjani te kera ako isi amen sumnje?

¹⁶ Rešenie: Rasčistin tle sumnje; ker pozorali tli vera. Sigate ker nešto te rasčistine tle sumnje. Ko vreme keda živinela sine o proroko o Ilija, e Jehovaskoro narodo sumninela pe sine ko bukja ko kola so verujnela sine. O Ilija vakergja lenge: „Dži keda ka oven neodlučna? Ako o Jehova tano čačutno Devel služinen leske, a ako tano o Vaal, služinen leske“ (1. Car. 18:21). Isto tano avdive da. Amen valjani te ispitina hem te uverina amen kaj o Jehova tano čačutno Devel, kaj i Biblija tani leskoro Lafi hem kaj e Jehovaskere svedokija tane leskoro narodo (1. Sol. 5:21). Ako keraja adava, ka rasčistina amare sumnje hem ka kera amari vera pozorali. Ako valjani amenge pomoš bašo adava šaj te roda taro starešine. Mora sigate te rasčistina amare sumnje ako mangaja te ačhova bahtale džikote služinaja e Jehovaske!

17. So ka slučinel pe ako našavaja amari hrabrost?

¹⁷ Predizvik: Obeshrabruvanje. E Devleskoro Lafi vakerela: „Ako obeshrabrinea tut ko dive keda isi tut nevolja, tli sila ka  slabonel“ (Izr. 24:10). O hebrejsko lafi soj akate prevedimo sar „obeshrabrinea tut“ šaj te značinel „te našave tli hrabrost“. Ako našavea tli hrabrost, sigate ka našave tlo bahtalipe.

18. So značinela te ova istrajna?

¹⁸ Rešenie: Neka ovel tut doverba ko Jehova kaj ka del tut hrabrost te istrajne. Valjani amenge hrabrost te šaj te izdržina ko nevolje (Jak. 5:11). O lafi so koristingja o Jakov akate baši „istrajnost“ prenesinela i misla baši nekaste kova so tergjola odlučno ko plo than. Šaj mislinaja ko jekh vojniko kova so hrabro tergjola ko plo than hem na našela keda napadinena le o dušmanja.

19. So šaj te sikljova taro e Pavleskoro primer?

¹⁹ O Pavle dengja amen but šužo primer baši hrabrost hem baši istrajnost. Ponekogaš ov osetingja pe slabo. Ama, ov šaj sine te istrajnel adaleske so sine le doverba ko Jehova kaj ov ka del le i sila soj leske potrebno (2. Kor. 12:8-10; Fil. 4:13). Amen da šaj te ovel amen asavki sila hem hrabrost ako ponizno priznajnaja kaj valjani amenge e Jehovaskiri pomoš (Jak. 4:10).

20-21. Ko so šaj te ova uverime?

²⁰ Šaj te ova sigurna kaj o nevolje so doživinaja len nane kazna taro Jehova. O Jakov uverinela amen: „Nijekh, keda ka ovel ko iskušenie te na vakerel: ’O Devel iskušinela man‘. Soske, nijekh našti iskušinela e Devle lošnipaja, a ov da na iskušinela nikas lošnipaja“ (Jak. 1:13). Keda siem uverime ko akava, amen ovaja popaše amare mangle nebesno Dadea (Jak. 4:8).

²¹ O Jehova „na meninela pe“ (Jak. 1:17). Ov pomožingja e hristijanenge taro prvo veko keda sine len nevolje, a isto agjaar ka pomožinel amenge da avdive. Iskreno molin e Jehova te pomožinel tuke te dobine mudrost, vera hem hrabrost. Ov ka odgovorinel ko tle molitve. Tegani ka uverine tut kaj ov ka pomožinel tuke te ačhove bahtalo keda isi tut nevolje!