1-2. Soske valjani o hristijanja te interesinen pe bašo adava so pišinela ko lil 3. Mojseeva?

O APOSTOL Pavle setinkergja ple terne amale e Timotee kaj „celo Lil avela taro Devel hem korisno tano“ (2. Tim. 3:16). Ki leste tano vklučimo hem o lil 3. Mojseeva. So mislinea tu bašo akava lil? Nesave mislinena kaj tano samo lil pherdo praviloncar kola na so važinena bašo amaro vreme. Ama, o čačutne hristijanja džanena kaj nane agjaar.

² Iako o lil 3. Mojseeva sine pišimo angleder okolu 3.500 berš, o Jehova na dozvolingja te ovel uništimo te šaj amen avdive te sikljova lestar (Rim. 15:4). Adaleske so akava lil pomožinela amenge te haljova sar razmislinela o Jehova, šukar tano te istražina le hari pohor. Ustvari, akava lil kova so avela taro Devel, isi le but pouke. Te dikha štar lendar.

3. Soske o prvosvešteniko sekova berš dela sine žrtve ko dive prostibaske o grevija?

³ Prvo pouka: Ako mangaja o Jehova te prifatinel amare žrtve, mora te živina agjaar sar so mangela ov. Sekova berš, ko dive prostibaske o grevija, o izraelsko narodo khedela pe sine hem o prvosvešteniko dela sine žrtve. Adala žrtve setinkerena sine e Izraelcon kaj valjani sine te oven čistime taro grevo. Ama, angleder te ingarel o rat taro žrtve ki Najsveto svetinja, o prvosvešteniko mora sine te kerel nešto javer — nešto so sine but považno taro prostibe o grevija e narodoskere.

4. Sprema 3. Mojseeva 16:12, 13, so kerela sine o prvosvešteniko ko dive prostibaske o grevija keda khuvela sine prvo puti ki Najsveto svetinja? (Dikh i slika tari naslovno strana.)

 ⁴ Čitin 3. Mojseeva 16:12, 13. Ko dive prostibaske o grevija, o prvosvešteniko valjani sine te khuvel trin puti ki Najsveto svetinja. Zamislin tuke sar khuvela ko sveto šatori o prvo puti. Ko jekh vas ikerela o čaro koleste so isi mirislivo temjani, a ko javer vas phiravela zlatno lopata pherdo tate žaroncar. Angleder te khuvel ki Najsveto svetinja, kratko ov ačhola angli zavesa. Ki leste isi baro poštovanje sprema o Jehova. Palo adava, khuvela andre hem ačhovela anglo kovčeg e sojuzeskoro. Ki simbolično smisla, ov tergjola anglo Jehova! O prvosvešteniko pohari čhorela o sveto temjani upro tate žarija, hem i soba phergjola šužo miris. * Palo adava, ov khuvela panda duj puti ki Najsveto svetinja te šaj te del o rat taro žrtve bašo grevo. Ama primetin kaj o Jehova rodela sine te tharel pe temjani angleder te del pe o rat taro žrtve bašo grevo.

5. Sar khuvela sine o prvosvešteniko ki Najsveto svetinja e temjanea, hem so šaj te sikljova taro adava?

⁵ So sikljovaja taro adava so ko dive prostibaske o grevija koristinela pe sine temjani? I Biblija sikavela kaj o molitve e Jehovaskere verna slugengere tane sar temjani (Ps. 141:2; Otk. 5:8). E prvosvešteniko sine le baro poštovanje keda khuvela sine te tergjol anglo Jehova thare temjanea. Slično, amen da isi amen baro poštovanje keda molinaja amen e Jehovaske. But siem blagodarna so o Stvoriteli e vselenakoro dozvolinela amenge te molina amen leske hem te ova lea paše sar jekh čhavo soj paše ple dadea (Jak. 4:8). Ov prifatinela amen sar ple amala! (Ps. 25:14). Doborom but ceninaja akaja čest so na mangaja te kera nešto kolea so ka razočarina le.

6. So sikljovaja bašo Isus taro adava so o prvosvešteniko tharela sine o temjani angleder te del o žrtve?

⁶ Setin tut kaj o prvosvešteniko mora sine te tharel o temjani angleder te del o rat taro žrtve. Ov mora sine te kerel adava te šaj o Jehova te ovel lestar zadovolno hem te prifatinel o žrtve. So šaj te sikljova taro akava? Angleder te del plo životo, o Isus valjani sine te kerel nešto but považno taro adava te spasinel e manušen. So sine adava? Mora sine te ačhovel verno hem poslušno celo plo životo ki Phuv te šaj o Jehova te prifatinel leskiri žrtva. Adalea, o Isus dokažingja kaj edinstveno ispravno način sar te živinel pe tano te živina sprema e Jehovaskiri volja. Ov sikavgja kaj samo e Devle isi le pravo te vladinel soske leskoro način sar vladinela tano ispravno hem pravedno.

7. Soske o Jehova sine bahtalo taro način sar živinela sine o Isus džikote sine ki Phuv?

⁷ Džikote sine ki Phuv, o Isus celo plo životo sine sovršeno poslušno ko e Jehovaskere pravedna merilija. Iako nakhlja taro but iskušenija hem pharipa hem džanlja kaj ka merel ko jekh but mučno način, ov sine odlučno te dokažinel kaj leskoro Dad vladinela ko najšukar način (Fil. 2:8). Keda nakhela sine taro phare situacie, o Isus molinela pe sine „glasno hem asvencar“ (Evr. 5:7). Leskere iskrena molitve sikavgje kaj sine verno e Jehovaske hem kergje le panda poodlučno te ačhovel poslušno dži ko krajo. E Jehovaske, o molitve leskere  Čhaveskere sine sar šužo miris taro temjani. Celo ple životoja, o Isus kergja but bahtalo ple Dade hem dokažingja kaj ov tano o najšukar Vladeteli.

8. Sar šaj te dža palo e Isuseskoro primer?

⁸ Šaj te dža palo e Isuseskoro primer agjaar so ka da amendar sa te ačhova verna e Jehovaske hem ka šuna leskere zakonija hem načelija. Keda isi amen ispitija, taro vilo molinaja e Jehova te pomožinel amenge soske mangaja te postapina sar so mangela ov hem te kera le bahtalo. Agjaar sikavaja kaj amenge da o način sar vladinela ov tano najšukar. Džanaja kaj o Jehova nane te šunel amare molitve ako keraja bukja kola so ov osudinela len. Sepak, ako živinaja sprema leskere merilija, šaj te ova sigurna kaj amare iskrena molitve ka oven e Jehovaske šuže sar mirislivo temjani. Osven adava, šaj te ova sigurna kaj amari besprekornost, vernost hem poslušnost kerena but bahtalo amare Dade soj ko nebo (Izr. 27:11).

9. Soske o Izraelcija dena sine žrtve bašo zaedništvo?

⁹ Dujto pouka: Služinaja e Jehovaske tari blagodarnost. Te šaj te haljova kobor tano važno akava, te dikha o žrtve bašo zaedništvo so dena pe sine ko purano Izrael. * Taro lil 3. Mojseeva dikhaja kaj jekh Izraelco šaj sine te del žrtva bašo zaedništvo te šaj te sikavel pli blagodarnost (3. Moj. 7:11-13, 16-18). Ov dela sine asavki žrtva na so mora sine, nego soske mangela  sine. Znači, adaja sine dobrovolno žrtva koja so spremno dela la sine soske mangela ple Devle, e Jehova. Okova so dela sine i žrtva, leskiri familija hem o sveštenikija, hana sine o mas taro životno so žrtvujngje le. Ama, nesave delija tari adaja žrtva na smejnena sine te han pe — ola dena pe sine samo e Jehovaske. Kola sine adala delija?

10. Sar o žrtve bašo zaedništvo soj pišime ki 3. Moj. 3:6, 12, 14-16 pomožinena amenge te haljova taro kova motivi o Isus kerela sine ple Dadeskiri volja?

¹⁰ Trito pouka: Daja e Jehova amaro najšukar adaleske so mangaja le. E Devleske, o khil sine o najšukar delo taro životno. Osven adava, ov jasno vakergja kaj nesave andrune organija, maškar kola so sine o bubrekija, leske sine posebno važna. (Čitin 3. Mojseeva 3:6, 12, 14-16.) Adaleske sine but zadovolno keda nesavo Izraelco dobrovolno ka del le sine adala organija hem o khil taro životno. Okova so kerela sine adava sikavela kaj mangela te del o najšukar e Devleske. Slično, o Isus spremno dengja plo najšukar e Jehovaske agjaar so taro mangipe služingja leske celo dušaja (Jovan 14:31). Leske sine zadovolstvo te kerel e Devleskiri volja hem ov but mangela sine e Devleskoro zakoni (Ps. 40:8). O Jehova sigurno sine but bahtalo keda dikhela sine kaj o Isus dobrovolno služinela leske!

11. Sar amari služba tani slično e žrtvencar bašo zaedništvo hem soske adava utešinela amen?

¹¹ Amari služba tani slično sar o žrtve bašo zaedništvo soske agjaar sikavaja save čuvstvija isi amen sprema o Jehova. Amen daja leske amaro najšukar, hem adava keraja soske mangaja le celo vilea. O Jehova sigurno tano but bahtalo keda dikhela sar milionja leskere verna sluge služinena leske adaleske so mangena le hem leskere merilija! Utešinela amen adava so džanaja kaj o Jehova dikhela hem ceninela na samo adava so keraja nego hem soske keraja adava. Na primer, ako sian pophuro hem našti više te kere bašo Devel doborom kobor so bi mangea, šaj te ove sigurno kaj o Jehova haljovela tut. Šaj mislinea kaj na kerea but bašo Jehova, ama ov dikhela tlo iskreno mangipe kova so pottikninela tut te kere adava so šaj. Ov spremno prifatinela tlo najšukar.

12. Sar dikhela sine o Jehova ko žrtve bašo zaedništvo, hem sar adava ohrabrinela amen?

¹² So šaj te sikljova tari žrtva bašo zaedništvo? Džikote thabljovena sine ko žrtveniko o najšukar delija taro životno, lendar ikljola sine šužo miris kolestar so o Jehova sine zadovolno. Ov sigurno kaj o Jehova tano zadovolno tutar da keda spremno dea tlo najšukar te služine leske (Kol. 3:23). Zamislin kobor tano bahtalo keda dikhela sar služinea leske! E Jehovaske tano skapoceno celo tlo trudo so mangipaja dea le, bizi razlika dali kerea but ili hari. Ov nikogaš nane te bistrel adava hem ka ceninel le večno (Mat. 6:20; Evr. 6:10).

13. Sprema 3. Mojseeva 9:23, 24, sar sikavgja o Jehova kaj odobrinela e sveštenikon?

¹³ Štarto pouka: O Jehova dela bereketi ple organizacijake. Te dikha so slučingja pe ko 1512 berš a.a.e., keda sine kerdo o sveto šatori ko teluno delo tari planina Sinaj (2. Moj. 40:17). Ko dive keda o Mojsej valjangja te čhivel e Arone hem leskere čhaven sar sveštenikija, o Izraelcija khedingje pe te dikhen sar ola dena sine ple prva životinska žrtve (3. Moj. 9:1-5). Sar sikavgja o Jehova kaj odobrinela e neve sveštenikon? Džikote o Aron hem o Mojsej dena sine bereketi e narodoske, o Jehova mukhlja jag  taro nebo koja so thargja celo žrtva so sine dendi ko žrtveniko. (Čitin 3. Mojseeva 9:23, 24.)

14. Soske tano amenge važno adava so odobringja o Jehova e Arone hem leskere čhaven sar sveštenikija?

¹⁴ So sikavgja o Jehova adalea so mukhlja jag taro nebo keda o Aron sine čhivdo te služinel sar prvosvešteniko? Adava sine znako kaj o Jehova odobrinela hem kaj celosno poddržinela e Arone hem leskere čhaven ki adaja nevi služba. Keda o Izraelcija dikhle akava jasno dokaz, halile kaj ola da valjani celosno te poddržinen e sveštenikon. Dali akava isi le nesavo značenje amenge? Oja. O sveštenstvo ko Izrael sine samo senka bašo jekh but pošukar sveštenstvo. O Hristos tano o pobaro Prvosvešteniko kova so ka služinel taro nebo zaedno 144.000 sveštenikoncar hem carencar (Evr. 4:14; 8:3-5; 10:1).

15-16. Sar o Jehova sikavgja kaj odobrinela e „verno hem razborito robo“?

¹⁵ Ko 1919 berš, o Isus čhivgja jekh tikni grupa pomazime phralja te služinen sar „verno hem razborito robo“. Akava „robo“ predvodinela ko propovedibe hem dela e Hristoseskere sledbenikonge „hrana ko pravo vreme“ (Mat. 24:45). Dali dikhaja jasna dokazija kaj o Jehova odobrinela e „verno hem razborito robo“?

¹⁶ O Satana hem leskoro sveto probinena ko sekova način te čhinaven e „verno robo“ te kerel pli zadača. Ako o Jehova na poddržinela akale robo, ov našti te kerel pli zadača. Iako sine duj svetska vojne, baro progonstvo, finansiska problemija ko celo sveto hem e Devleskoro narodo doživinela sine nepravde, sepak „o verno hem razborito robo“ ponadari da dela sine hrana e Hristoseskere sledbenikonge ki Phuv.  Razmislin kobor but publikacie isi amen avdive kola tane bizo pare ko poviše taro 900 čhibja! Akava tano jasno dokaz kaj o Jehova poddržinela e „robo“. O propovedibe tano panda jekh dokaz bašo e Jehovaskoro bereketi. O šukar haberi čače propovedinela pe „ko celo sveto“ (Mat. 24:14). Jasno šaj te dikha kaj avdive o Jehova vodinela ple organizacija hem dela la baro bereketi.

17. Sar šaj te poddržina e Jehovaskere organizacija?

¹⁷ Šukar tano te puča amen: „Dali sium blagodarno so sium delo tari e Jehovaskiri organizacija?“ O Jehova dela amen doborom jasna dokazija isto sar so sine i doslovno jag taro nebo ko vreme e Mojseeskoro hem e Aroneskoro. Čače valjani te ova blagodarna bašo but bukja (1. Sol. 5:18). Sar šaj te poddržina e Jehovaskere organizacija? Agjaar so ka šuna o bibliska upatstvija kola so dobinaja len preku amare publikacie, sostanokija hem kongresija. Osven adava, poddržinaja la agjaar so daja amendar sa te šaj te propovedina hem te sikava e javeren (1. Kor. 15:58).

18. So sian odlučno te kere?

¹⁸ Te ova odlučna te primenina o pouke taro lil 3. Mojseeva so dikhlem len ki akaja statija. Te kera sa so valjani te šaj amare žrtve te oven prifatliva e Jehovaske. Te služina e Jehovaske tari blagodarnost hem ponadari da te da leske amaro najšukar soske mangaja le taro vilo. Hem te kera sa so šaj te poddržina e organizacija kolake so dela plo bereketi avdive. Agjaar ka sikava e Jehovaske kaj siem but bahtale so isi amen čest te služina leske sar leskere Svedokija!