KO BIBLISKO vreme, jekhe upravitele sine le zadača te grižinel pe bašo domakjinstvo ili imot javere manušeskoro. O hebrejsko hem o grčko lafi soj prevedimo sar „upraviteli“ ponekogaš koristinela pe bašo nadgledniko da.

Džikote sine robo ko Egipet, o Josif, o čhavo e Jakoveskoro, ulo upraviteli upro imot ple gospodareskoro. Ustvari, ov mukhlja sa e Josifeske ko vasta (1. Moj. 39:2-6). Pokasno, keda o Josif ulo mokjno vladeteli ko Egipet, ov da čhivgja upraviteli ko plo kher (1. Moj. 44:4).

Ko e Isuseskoro vreme normalno sine okola so sine len nive te živinen ko dizja, dur taro pumare nive. Adaleske, ola čhivena sine upravitelija so nadgledinena sine e rabotnikon kola so kerena sine buti ko lengoro imot.

Koj šaj sine te služinel sar upraviteli? Jekh rimsko pisateli taro prvo veko so vikinela pe sine Kolumela pišingja kaj, te šaj te ovel nadgledniko, ili upraviteli, jekh robo valjani „šukar te pendžarel i buti ko imot“. Ov valjani te dikhel „o rabotnikija šukar te keren pli buti“, ama isto agjaar valjani sine te na ponašinel pe lencar grubo. O Kolumela isto agjaar pišingja: „Najvažno uslov te šaj nekoj te ovel upraviteli tano te na mislinel kaj džanela sa, hem sekogaš te ovel spremno te sikljovel neve bukja“.

Ko e Devleskoro Lafi, o primer jekhe upraviteleskoro hem leskiri buti koristinela pe te objasninen pe nesave taro aktivnostija so kerena pe ko jekh sobranie. Na primer, o apostol Petar pottikningja e hristijanen te koristinen ple sposobnostija kola so dobingje len taro Devel te šaj te služinen jekh jekheske „sar šukar upravitelija kola so dobingje e Devleskere šukaripaske so na zaslužinaja le“ (1. Pet. 4:10).

O Isus da koristingja primer jekhe upraviteleskoro ki sporedba soj pišimi ko Luka 16:1-8. Isto agjaar, ko jekh proroštvo bašo znako tari pli prisutnost sar Cari, o Isus uveringja ple sledbenikon kaj ka čhivel „verno hem razborito robo“, javere lafencar „verno upraviteli“. I glavno zadača adale upraviteleskiri ka ovel sekogaš te del hrana e Hristoseskere sledbenikonge džikote trajnena o posledna dive (Mat. 24:45-47; Luka 12:42). Sarinenge amenge ko celo sveto o verno upraviteli spreminela publikacie kola so kerena pozorali amari vera. Amen siem but blagodarna baši adaja duhovno hrana!