1-2. a) Sprema i zapoved e Isuseskiri soj pišimi ko Matej 28:18-20, koja tani i glavno zadača e hristijansko sobranieskiri? b) Bašo kola pučiba ka dobina odgovor ki akaja statija?

O APOSTOLIJA sigurno sine but vozbudime keda gele ki planina kote so valjani sine te arakhen pe e Isusea otkeda voskresningja (Mat. 28:16). Šaj ki akaja prilika o Isus pojavingja pe poviše taro 500 phralenge (1. Kor. 15:6). Soske o Isus rodingja ple učenikondar te kheden pe adari? Te šaj te del lenge jekh važno zapoved: „Džan hem keren učenikija taro manuša taro sa o narodija“. (Čitin Matej 28:18-20.)

² O učenikija kola so šungje adava so vakergja o Isus pokasno ule delo taro hristijanska sobranija ko prvo veko. I glavno zadača adale sobraniengiri sine te pomožinen e javere manušenge te oven e Hristoseskere učenikija. * Avdive isi poviše taro 100.000 sobranija e čačutne hristijanengere ko celo sveto, hem lengiri glavno zadača tani panda isto. Ki akaja statija ka dobina odgovor bašo štar pučiba: Soske tano važno te kera učenikija? Soj tano vklučimo ko adava? Dali sekova hristijani šaj te pomožinel ko keribe učenikija? Hem soske valjani amenge strplivost te šaj te kera učenikija?

3. Sprema Jovan 14:6 hem 17:3, soske tano but važno te pomožina e manušenge te oven e Hristoseskere učenikija?

³ Soske tano but važno te pomožina e manušenge te oven e Hristoseskere učenikija? Adaleske so samo tegani  šaj te oven e Devleskere amala. Osven adava, okola so džana palo e Hristoseskoro primer isi len pošukar životo panda avdive hem isi len nadež bašo večno životo ki idnina. (Čitin Jovan 14:6; 17:3.) Čače, o Isus dengja amenge jekh but važno zadača, ama ki akaja zadača na siem korkori. O apostol Pavle pišingja: „Amen siem e Devleskere sorabotnikija“ (1. Kor. 3:9). Kobor bari čest sikavgje o Jehova hem o Hristos e nesovršena manušenge!

4. So sikljovaja taro iskustvo so sine e Ivane hem e Matilda?

⁴ Adava so pomožinaja e manušenge te oven e Hristoseskere učenikija kerela amen but bahtale. Razmislin bašo iskustvo so sine e Ivane hem e Matilda, jekh bračno pari tari Kolumbija. Ola svedočingje jekhe terne manušeske so vikinela pe Davier, kova so vakergja lenge: „Mangava te kerav promene ko mlo životo, ama našti“. O Davier sine bokseri, koristinela sine droga, piela sine but hem živinela sine ple džuvljaja e Erikaja. O Ivan objasninela: „Počmingjem te proučina lea i Biblija. Ov živinela sine ko jekh gav so sine but dur, hem te šaj te resa adari valjani sine saatencar te vozina točakoncar hem adava ko čhikale droma. Otkeda dikhlja kaj o Davier meninela pe ko pošukar, i Erika da počmingja te proučinel i Biblija“. Sar so nakhela sine o vreme, o Davier čhinavgja te koristinel droga, te piel hem te boksujnel. Isto agjaar, ov venčingja pe e Erikaja. I Matilde vakerela: „Keda o Davier hem i Erika krstingje pe ko 2016 berš, setingjem amen ko adava so vakerela sine ov: ’Mangava te kerav promene ko mlo životo, ama našti‘. Siem sine doborom but bahtale so čak rovgjem“. Keda pomožinaja e manušenge te oven e Hristoseskere učenikija, čače siem but bahtale.

5. Koja tani i prvo buti so valjani te kera te šaj te pomožina e manušenge te oven učenikija?

⁵ I prvo buti so valjani te kera te šaj te pomožina e manušenge te oven učenikija tani te roda okolen so mangena te sikljoven bašo Jehova (Mat. 10:11). Sikavaja kaj siem čače e Jehovaskere svedokija keda trudinaja amen te svedočina sa e manušenge so arakhaja len. Isto agjaar, sikavaja kaj siem čačutne hristijanja keda šunaja e Isuseskiri zapoved te propovedina.

6. So šaj te pomožinel amenge šukar te kera amari služba?

⁶ Ponekogaš arakhaja manušen kola so mangena te džanen o čačipa tari Biblija. Ama, isto agjaar isi but džene so ko početok šaj na interesinela len o čačipe. Ko asavke manuša, važno tano te pottiknina o interes bašo čačipe. Te šaj šukar te kera amari služba, valjani šukar te spremina amen. Najangle razmislin save bukja verojatno ka interesinen e manušen ko tlo podračje. Palo adava, razmislin savo uvod ka kere te šaj te počmine razgovor baši tema kolake so mangea te kere lafi.

7. a) Sar šaj te počmina razgovor nekasaja? b) Soske tano važno šukar te šune e manušen hem te sikave kaj poštujnea len?

⁷ Na primer, šaj te puče e stanare: „O manuša ko celo sveto isi len ista problemija — so mislinea, dali adala problemija ka rešinen pe ako isi jekh vlada sa e manušenge?“ Palo adava šaj te kere lafi bašo Daniel 2:44. Ili, šaj te puče: „So mislinea, sar šaj o roditelija šukar te vospitinen pumare čhaven?“ Palo adava ker lafi baši 5. Mojseeva 6:6, 7. Bizi razlika baši savi tema ka kere lafi, mislin ko manuša so šunena tut. Razmislin sar šaj te koristinen lenge o pouke tari Biblija.  Isto agjaar, važno tano šukar te šune len hem te sikave kaj poštujnea lengoro mislenje. Agjaar, šaj pošukar te haljove len, a ola ka oven pospremna te šunen tut.

8. Soske valjani ponadari da te trudina amen te kera povtorna posete?

⁸ Angleder te odlučinel nekoj te proučinel i Biblija, verojatno ka valjanel te trudine tut hem te nakhave vreme te šaj redovno te posetine le. Soske? Adaleske so šaj nane te ovel khere keda ka dža leste palem te posetine le. Osven adava, šaj ka valjanel te posetine le poviše puti angleder te mangel te prifatinel biblisko kursi. Ma bistre, te šaj te bajrol jekh luludi, valjani redovno te čhive lake pani. Slično agjaar, ako redovno keraja lafi nekasaja so interesinela pe bašo e Devleskoro Lafi, pobare tane o šanse ko leskoro vilo te bajrol mangipe sprema o Jehova hem o Hristos.

9-10. Soske šaj te vakera kaj sekova objaviteli pomožinela te arakhen pe o iskrena manuša?

⁹ Sekova objaviteli tano vklučimo ko adava te arakhen pe o iskrena manuša. Akava šaj te sporedina le sar keda nekoj rodela nesave tikne čhave so našavdilo. Ki savi smisla? Te dikha jekh situacija so čače slučingja pe. Otkeda našavdilo jekh trine beršengoro čhavo, okolu 500 manuša počmingje te roden le. Ko krajo, palo 20 satija, jekh taro adala manuša arakhlja e čhave ki jekh niva čenkaja. Ama, adava manuš na manglja o javera te falinen le kaj ov arakhlja e čhave. Ov vakergja: „But džene rodingjem le — adaleske arakhlem le“.

¹⁰ But manuša osetinena pe sar adava tikno čhavo so našavdilo. Nane len nadež, ama mangena pomoš (Ef. 2:12). Poviše taro ofto milionija Jehovaskere svedokija  trudinena pe te arakhen akale manušen. Šaj tu lično nane te arakhe nekas kasaja so ka proučine i Biblija. Sepak, šaj javera objavitelija kola so propovedinena ko isto podračje ka arakhen nekas so mangela te džanel o čačipe taro e Devleskoro Lafi. Keda jekh phral ili phen ka arakhen nekas so mangela te ovel učeniko e Hristoseskoro, sarine so pomožingje ko rodibe valjani te oven bahtale.

11. Iako šaj na vodinea biblisko kursi, ko save javera načinija šaj te pomožine e manušenge te oven e Hristoseskere učenikija?

¹¹ Iako šaj ko momenti na vodinea biblisko kursi, tu ponadari da šaj ko javera načinija te pomožine e manušenge te oven e Hristoseskere učenikija. Na primer, šaj iskreno te pozdravine len keda ka aven ko sostanok. Keda ka dikhen kaj sikavaja mangipe, adava šaj te pomožinel lenge te uverinen pe kaj siem čačutne hristijanja (Jovan 13:34, 35). A preku tle kratka komentarija ko sostanok, o neve šaj te sikljoven sar te vakeren ko so verujnena ko jekh iskreno način kova ka sikavel kaj poštujnena e javeren. Osven adava, šaj te dža ki služba nesave neve objavitelea hem te pomožine leske te sikljol sar te koristinel i Biblija te šaj te sikavel e manušen. Ako kerea agjaar, ka pomožine leske te džal palo e Hristoseskoro primer (Luka 10:25-28).

12. Dali valjani te oven amen posebna veštine te šaj te sikava e javeren? Objasnin.

¹² Nikoj amendar na valjani te mislinel kaj valjanena leske posebna veštine te šaj te sikavel e manušen te oven e Isuseskere učenikija. Soske? Razmislin baši Faustina, koja so živinela ki Bolivija. Keda prvo puti dikhlja pe e Jehovaskere svedokoncar, oj na džanela sine te čitinel. Akana šaj te čitinel, iako na doborom šukar. I Faustina krstingja pe, hem but mangela te sikavel e javeren. Obično sekova kurko vodinela pandž bibliska kursija. Iako poviše džene taro adala kasaja so proučinela i Biblija čitinena pošukar latar, oj pomožingja šove manušenge te krstinen pe (Luka 10:21).

13. Čak ako siem but zafatime, kola bereketija šaj te oven amen ako pomožinaja e manušenge te oven e Hristoseskere učenikija?

¹³ But hristijanja tane but zafatime adaleske so isi len važna obvrske. Ama, ola odvojnena vreme te vodinen bibliska kursija hem adava kerela len but bahtale. Šukar primer tani i Melani tari Aljaska. Oj korkori grižinela pe sine ple čhajake kola so sine la ofto berš. Osven adava, oj kerela sine buti celo rabotno vreme hem grižinela pe sine ple dadeske kova so sine nasvalo taro rako. Samo oj sine e Jehovaskoro svedoko ki jekh diz koja so  sine but dur taro o javera dizja. I Melani redovno molinela pe sine e Jehovaske te del la sila te džal ki služba iako sine but šudro, soske mangela sine te arakhel nekas kasaja so ka šaj te proučinel i Biblija. Hem agjaar arakhlja e Sara, koja so sine vooduševimi keda šungja kaj e Devle isi le anav. Palo nesavo vreme i Sara prifatingja te proučinel i Biblija. I Melani vakerela: „O petokija rakjate obično sium sine but umorno, ama mi čhaj hem me redovno džaja sine ki Sara te proučina i Biblija. Adava but koristingja amenge da. Uživinaja sine džikote istražinaja sine te šaj te arakha o odgovorija ko lakere pučiba hem siem sine but bahtale keda oj da uli e Jehovaskoro amal“. I Sara hrabro istrajngja keda sine la pritisok tari familija hem taro amala, mukhlja pli crkva hem krstingja pe.

14. a) Soske i služba šaj te sporedinel pe astaribaja mačhe? b) Ko so pottikninena tut o lafija taro 2. Timotej 4:1, 2?

¹⁴ Čak ako panda na arakhljan nekas so mangela te ovel učeniko, ma otkažin tut. O Isus vakergja kaj okola so pomožinena e manušenge te oven leskere učenikija tane sar ribarija. O ribarija šaj saatencar te trudinen pe te astaren mačhe. Ola but puti astarena mačhe kasno rakjate ili rano sabajle, a ponekogaš mora but saatija te putujnen čamcoja (Luka 5:5). Slično agjaar, nesave objavitelija saatencar strplivo propovedinena ko različno vreme taro dive hem ko različna thana. Soske? Te šaj te arakhen so šaj poviše manušen. Okola so but trudinena pe često uspejnena te arakhen manušen so mangena te šunen o haberi  bašo Carstvo. Dali šaj te probine te propovedine ko vreme ili ko than kote so isi pobare šanse te arakhe e manušen? (Čitin 2. Timotej 4:1, 2.)

15. Soske mora te ova strpliva džikote vodinaja bibliska kursija?

¹⁵ Soske valjani te ova strpliva džikote vodinaja bibliska kursija? Jekh pričina tani adaja so amari zadača nane samo te pomožina e interesenteske te džanel hem te mangel o bibliska sikljojba. Valjani isto agjaar te pomožina leske te pendžarel hem te mangel e Biblijakere Avtore, e Jehova. Osven so mangaja te pomožina e interesenteske te džanel so zapovedingja o Isus ple učenikonge, valjani isto agjaar te sikava le sar te primeninel adala zapovedija ko plo životo. Mora strplivo te pomožina leske džikote trudinela pe te primeninel o bibliska načelija. Nesave uspejnena te meninen plo način sar razmislinena hem ple navike samo bašo nekobor masekija. Ama, javerenge valjani poviše vreme.

16. So sikliljan taro adava so slučingja pe e Raulea?

¹⁶ Jekh misioneri ko Peru sine le šukar rezultatija adaleske so sine strplivo. Ov vakergja: „Proučinava sine jekhe interesentea so vikinela pe Raul. Proučingjem duj lila, ama ponadari da sine le but problemija. Leskoro brako sine haos, but akošela sine hem leskere čhave na poštujnena le sine adaleske so ponašinela pe sine lošno. Ama, redovno avela sine ko sostanokija, adaleske ponadari da džava sine ki leste te šaj te pomožinav leske hem leskere familijake. Palo trin berš otkeda zapoznajngjem amen, ov krstingja pe“.

17. So ka dikha ki naredno statija?

¹⁷ O Isus dengja amenge zapoved te dža hem te kera „učenikija taro manuša taro sa o narodija“. Te šaj te kera akaja zadača, but puti valjani te kera lafi manušencar kola so but pojaver dikhena ko bukja amendar. Nesave nane ki nijekh religija ili palem na verujnena kaj isi Devel. Ki naredno statija ka dikha sar šaj te vakera o šukar haberi adale manušenge.