1. Ko save načinija šaj te sorabotina e Jehovaja?

KEDA o Jehova stvoringja e manušen, ov manglja ola te oven leskere sorabotnikija. Iako avdive o manuša nane sovršena, o verna sluge e Devleskere šaj ponadari da sekova dive te sorabotinen e Jehovaja. Na primer, amen siem „e Devleskere sorabotnikija“ keda propovedinaja o šukar haberi hem keda pomožinaja e manušenge te oven e Devleskere sluge (1. Kor. 3:5-9). Čače tani bari čest so o semokjno Stvoriteli biringja amen te kera jekh asavki but važno zadača! Ama, o propovedibe nane o edinstveno način sar šaj te sorabotina e Jehovaja. Ki akaja statija ka dikha sar keraja adava keda pomožinaja amare familijake hem e javerenge ko sobranie, keda siem gostoprimliva, keda čhivaja amen ko raspolaganje te pomožina ki organizacija hem keda služinaja ki pobari mera (Kol. 3:23).

2. Soske nikogaš na valjani te sporedina adava so keraja amen bašo Jehova adalea so kerena o javera?

² Džikote proučinaja akaja statija, važno tano te na bistra kaj sekova jekh amendar tano različno. Amare berša, o sastipe, o okolnostija hem o sposobnostija nane ista.  Adaleske, ma sporedin adava so tu šaj te kere bašo Jehova adalea so o javera šaj te keren. O apostol Pavle pišingja: „Sekova manuš valjani te ispitinel ple postapke hem tegani ka ovel le pričina te ovel bahtalo bašo bukja so kerela len ov, a na adaleske so sporedinela pe e javerencar“ (Gal. 6:4).

3. Soske šaj te vakera kaj sekoj so grižinela pe ple familijake sorabotinela e Devlea?

³ O Jehova adžikerela amendar te grižina amen amare familijake. Na primer, šaj kerea buti te šaj te grižine tut bašo materijalna potrebe tle familijakere. But daja ačhovena khere te šaj te arakhen pumare tikne čhaven. A keda amare roditelija našti više te grižinen pe korkori peske, šaj amen ka valjani te grižina amen lenge. Akala bukja tane but važna. I Biblija vakerela: „Ako nekoj na grižinela pe bašo ple, a posebno bašo ple kherutne, ov otkažingja pe tari vera hem pološno tano taro manuš soj bizi vera“ (1. Tim. 5:8). Ako isi tut familijarna obvrske, verojatno našti te kere ki služba bašo Jehova doborom kobor so bi mangea te kere. Ama, ma obeshrabrin tut! O Jehova tano zadovolno keda grižinea tut tle familijake (1. Kor. 10:31).

4. Sar šaj o roditelija te čhiven o Carstvo ko prvo than, hem save rezultatija šaj te oven taro adava?

⁴ O roditelija sorabotinena e Jehovaja agjaar so pomožinena pumare čhavenge te čhiven peske duhovna celija. But roditelija kergje akava. Adaleske, palo nesavo vreme lengere čhave hem čhaja odlučingje te služinen e Jehovaske ki polnovremeno služba, čak dur taro ple khera. Nesave tane misionerija, javera služinena sar pionerija kote so isi pobari potreba taro objavitelija, a nesave služinena ko Betel. Džangjola pe, keda o čhave tane dur kher­aldan, o roditelija našti te nakhen lencar doborom vreme kobor so bi mangena sine. Ama, ola nane sebična hem pottikninena pumare čhaven ponadari da te služinen e Jehovaske bilo kote te oven. Soske? Ola tane but bahtale so lengere čhave čhivena e Jehova ko prvo than ko pumaro životo (3. Jov. 4). But džene taro adala roditelija osetinena pe sar i Ana koja so vakergja kaj dengja e Jehovaske sar poklon ple čhave e Samoile. Lenge tani bari čest so šaj ko asavko način te sorabotinen e Jehovaja (1. Sam. 1:28).

5. Sar šaj te pomožine e phralenge hem e phenjenge ko tlo sobranie? (Dikh i slika ko početok tari statija.)

⁵ Ako nane tut but familijarna obvrske, šaj li te pomožine e phralenge hem e phenjenge soj tane nasvale, phure ili isi len javere potrebe? Ili, šaj li te pomožine okolenge so grižinena pe lenge? Razmislin kaske taro tlo sobranie valjani asavki pomoš. Na primer, šaj nesavi phen grižinela pe bašo plo phuro roditeli. Šaj li ponekogaš te ačhove lakere roditelea džikote oj završinela nesave javera bukja? Ili, šaj li te pomožine nekaske agjaar so ka nudine tut te ingare le ko sostanokija, ki dukjana, ili ki bolnica te posetinel nekas? Ako kerea adava, tegani šaj sorabotinea e Jehovaja te odgovorinel ki nekaskiri molitva. (Čitin 1. Korinkjanite 10:24.)

6. Sar šaj te ova gostoprimliva?

⁶ E Devleskere sorabotnikija tane pendžarde pali pli gostoprimlivost.  Ki Biblija, o grčko lafi baši „gostoprimlivost“ značinela „ljubeznost sprema o jabandžie“ (Evr. 13:2). Ko e Devleskoro Lafi šaj te arakha primerija bašo adava sar te sikava asavki ljubeznost (1. Moj. 18:1-5). Amen šaj hem valjani te pomožina e javerenge keda ka ovel amen prilika bašo adava, bizi razlika dali tane amare phralja ili na (Gal. 6:10).

7. Kola bereketija šaj te oven amen ako sikavaja gostoprimstvo e polnovremena slugenge?

⁷ Šaj li te sorabotine e Jehovaja agjaar so ka sikave gostoprimstvo e polnovremena slugenge so avena te posetinen tlo sobranie? (Čitin 3. Jovanovo 5, 8.) Keda keraja agjaar, hem len hem amen ka ovel amen korist. I Biblija vakerela kaj ko asavke prilike šaj „zaedno te ohrabrina amen“ (Rim. 1:11, 12). Razmislin bašo primer jekhe phraleskoro kova so vikinela pe Olaf. Keda sine terno, jekh pokrainsko nadgledniko so na sine prandimo alo te posetinel leskoro sobranie. Ama, nijekh taro sobranie našti sine te nudinel leske than sojbaske. O Olaf pučlja ple roditelen, kola so na sine Svedokija, dali ka šaj o pokrainsko nadgledniko te sovel ki lende khere. Ola vakergje kaj šaj, ama o Olaf valjani sine te sovel ko kaučuko. Iako na sine leske udobno te sovel ko kaučuko, o Olaf nikogaš na žalingja bašo adava. Ov nakhlja peske but šukar adava kurko e pokrainsko nadglednikoja! Ola uštena sine rano sekova sabajle hem kerena sine lafi bašo but interesna teme džikote hana sine sabaluko. O pokrainsko nadgledniko ohrabringja le doborom but so odlučingja te počminel polnovremeno službaja. Ko 40 berša so nakhle, o Olaf služingja sar misioneri ko nekobor phuvja.

8. Soske valjani te ova ljubezna čak ako o javera ko početok nane blagodarna? Vaker primer.

⁸ Isi but načinija sar šaj te sikava mangipe e jabandžienge, čak ako ko početok nane blagodarna. Na primer, jekh phen ki Španija proučinela sine i Biblija e Džesikaja, jekh džuvli taro Ekvador. Jekh dive džikote proučinena sine, i Džesika počmingja te rovel. Keda i phen pučlja la soske rovela, i Džesika vakergja lake kaj sine but čoroli angleder te avel ki Španija. Jekh dive čak na sine la so te del ple čhajake te hal. Sine la samo pani. Džikote probinela sine te sovljarel ple bebe i Džesika molingja e Devle te pomožinel la. Kratko palo adava, duj phenja posetingje la hem dengje la spisanie. Ama, oj ponašingja pe grubo lencar, pharavgja o spisanie hem vakergja lenge: „Akava li te dav me čhajake te hal?“ O phenja probingje te utešinen la, ama i Džesika na manglja te šunel. Palo adava, o phenja mukhle jekh korpa hajbaja anglo lakoro udar. Džikote proučinela sine e phenjaja ki Španija, i Džesika počmingja te rovel soske halili kaj na manglja te dikhel sar o Devel odgovoringja ki lakiri molitva. Ama akana, i Džesika sine odlučno te služinel e Jehovaske. I darežlivost e duje phenjengiri čače angja šukar rezultatija (Prop. 11:1, 6).

9, 10. a) Kola prilike sine e Izraelcon te čhiven pe ko raspolaganje te pomožinen? b) Sar šaj o phralja avdive te pomožinen ko sobranie?

⁹ Ko purano vreme, e Izraelcon sine len but prilike te čhiven pe ko raspolaganje te pomožinen (2. Moj. 36:2; 1. Let. 29:5; Neem. 11:2). Avdive, tute da isi tut prilike te koristine tlo vreme, tle sredstvija hem tle sposobnostija te šaj te pomožine e phralenge hem e phenjenge. Ako kerea adava, ka ove but bahtalo hem o Jehova ka del tut bereketija.

¹⁰ E Devleskoro Lafi pottikninela e phralen ko sobranie te sorabotinen e Jehovaja agjaar so ka služinen e javerenge sar sluga-pomošnikija hem starešine (1. Tim. 3:1, 8, 9; 1. Pet. 5:2, 3). Asavke phralja pomožinena e javerenge ki služba bašo Jehova hem ko javera načinija (Dela 6:1-4). Dali o starešine zamolingje tut te služine sar redari ili te pomožine ki literatura, ko podračja, te održinel pe i dvorana ili nešto javer? O phralja kola so pomožinena ko asavke načinija vakerena kaj adava kerela len but bahtale.

11. Save bereketija dobingja jekh phen koja so pomožinela ko gradežna proektija?

¹¹ Okola soj dobrovolcija ko gradežna proektija ovena len neve amala. Jekh phen so vikinela pe Mardži 18 berš više pomožinela te gradinen pe dvorane. Džikote trajnena adala proektija, oj posebno trudinela pe te sikavel vnimanie e terne phenjenge hem te pomožinel len te oven obučime. Oj vakerela kaj akala proektija tane but šukar prilika o dobrovolcija te ohrabrinen pe jekh jekhea (Rim. 1:12). Ustvari, keda sine la phare momentija ko životo, o amala so sine la taro asavke proektija but ohrabringje la. Dali nekogaš sian sine dobrovolco ko nesavo gradežno proekti? Šaj te pomožine ko  nesavo proekti čak ako nane tut posebna veštine.

12. Sar šaj te pomožine okolenge so sine pogodime tari nesavi katastrofa?

¹² Isto agjaar šaj te sorabotina e Jehovaja keda pomožinaja amare phralenge pali nesavi prirodno katastrofa. Na primer, šaj te da pare (Jovan 13:34, 35; Dela 11:27-30). Javer način sar šaj te pomožina tano agjaar so ka čistina ili ka popravina o objektija. I Gabriela, jekh phen tari Polska kolakoro kher sine but oštetimo tari jekh poplava, sine bahtali keda ale te pomožinen la o phralja taro sobranija so sine paše. Keda razmislinela bašo adava so ulo, oj vakerela kaj na sekirinela pe bašo materijalna bukja so našavgja, nego mislinela ko adava so dobingja. Oj vakerela: „Akava iskustvo panda poviše uveringja man kaj tani but bari čest te ovel pe delo taro hristijansko sobranie hem adava anela mange baro bahtalipe hem zadovolstvo“. But džene so dobingje pomoš pali nesavi katastrofa osetinena pe isto sar akaja phen. A okola so sorabotinena e Jehovaja agjaar so pomožinena adale phralenge tane but bahtale hem zadovolna. (Čitin Dela 20:35; 2. Korinkjanite 9:6, 7.)

13. Sar bajrola amaro mangipe bašo Jehova keda čhivaja amen ko raspolaganje te pomožina? Vaker primer.

¹³ Jekh phen so vikinela pe Stefani hem javera objavitelija sorabotingje e Devlea agjaar so pomožingje e Svedokonge kola so našle ki Amerika adaleske so sine vojna ki lengiri phuv. Ola pomožingje adale izbeglicenge te arakhen than živibaske hem te ovel len mebel. Oj vakerela: „But siem sine pogodime keda dikhlem kobor sine bahtale hem blagodarna bašo mangipe so sine lenge sikavdo taro phralja ko celo sveto. Adala familie mislinena kaj amen pomožingjem lenge, ama ustvari ola but poviše pomožingje amenge. Lengoro mangipe, jekhipe, vera hem doverba ko Jehova čače kerena zoralo amaro mangipe bašo Jehova, hem pottiknina amen panda poviše te cenina sa adava so dobinaja le preku amari organizacija“.

14, 15. a) Savo stavi sine e proroko e Isaija? b) Sar šaj e Devleskere sluge avdive te sikaven isto stavi sar o Isaija?

¹⁴ Mangea li panda poviše te sorabotine e Jehovaja? Sian li spremno te seline tut ko thana kote so valjanena poviše objavitelija? Džangjola pe, te šaj te ova darežliva na valjani te selina amen ko javer than. Ama o okolnostija nesave phralengere hem phenjengere dozvolinena lenge te služinen dur kher­aldan. Len isi len isto stavi sar o proroko o Isaija. Keda o Jehova pučlja:  „Kas te bičhalav? Koj ka džal baši amende?“, o Isaija vakergja: „Ake sium me! Bičhal man!“ (Isa. 6:8). Dali sian spremno hem dali isi tut možnost te pomožine ki e Jehovaskiri organizacija? Kola tane nesave načinija sar šaj te pomožine?

¹⁵ Bašo propovedibe hem keribe učenikija o Isus vakergja: „I žetva tani bari, a rabotnikija isi hari. Adaleske, molinen e Gospodare e žetvakoro te bičhalel rabotnikija ki pli žetva“ (Mat. 9:37, 38). Šaj li te služine sar pioneri kote so isi potreba taro poviše objavitelija? Ili, šaj li te pomožine javereske te kerel adava? But phralja hem phenja mislinena kaj najšukar način sar te sikaven mangipe e Devleske hem e pašutnenge tano agjaar so ka služinen sar pionerija ko thana kote so isi potreba taro poviše objavitelija. Šaj li te setine tut ko javera da načinija sar šaj te služine ki pobari mera? Ov uverimo kaj adava ka anel tuke but bereketija.

16, 17. Ko save javera načinija šaj te služine e Jehovaske ki pobari mera?

¹⁶ Dali sian spremno te služine ko Betel ili te pomožine ki izgradba, šaj sar privremeno dobrovolco ili agjaar so ka pomožine jekh ili poviše dive ko kurko? Ki e Jehovaskiri organizacija sekogaš valjanena manuša kola soj spremna te služinen segde kote so isi potreba hem kola soj spremna te keren bilo so te rodel pe lendar, čak keda isi len veštine ili iskustvo baši javer buti. O Jehova ceninela sekas soj spremno te kerel žrtve hem te služinel adari kote so isi potreba (Ps. 110:3).

¹⁷ Mangea li te dobine poviše obuka te šaj te služine e Jehovaske ki pobari mera? Ako tano agjaar, šaj te de molba baši Škola bašo polnovremena objavitelija. Ki akaja škola duhovno zrela phralja hem phenja kola so više tane ki polnovremeno služba dobinena obuka te šaj e Jehovaskiri organizacija te koristinel len ki panda pobari mera. Okola so džana ki akaja škola valjani te oven spremna te služinen segde kote so ka oven bičhalde. Dali sian spremno ko akava način te kere poviše e Jehovaske? (1. Kor. 9:23).

18. Save bereketija isi amen adaleske so sekova dive sorabotinaja e Jehovaja?

¹⁸ Sar sluge e Jehovaskere, amen siem pottiknime sekova dive te ova darežliva, šukar hem ljubezna e javerencar. Akava anela amenge bahtalipe, mir hem zadovolstvo (Gal. 5:22, 23). Bizi razlika save tane tle okolnostija, ka ove bahtalo sa džikote trudinea tut te ove darežlivo sar o Jehova hem sian leskoro skapoceno sorabotniko! (Izr. 3:9, 10).