STATIJA PROUČIBASKE 23
GILI 2 Jehova tlo anav
Kobor valjani te ovel amenge važno e Jehovaskoro anav?
„Tumen siem mle svedokija“, vakerela o Jehova (ISA. 43:10)
SO KA SIKLJOVA
Ka dikha so šaj amen te kera te šaj te sikava kaj e Jehovaskoro anav tano sveto hem sar šaj te čistina le tari ladž so sine leske andi.
1-2. Kotar džanaja kaj e Isuseske tano važno e Jehovaskoro anav?
E ISUSESKE ništo nane považno taro e Jehovaskoro anav. Nijekh na kergja doborom but te šaj te vakerel bašo e Jehovaskoro anav sar so kergja ov. Sar so dikhlem ki angluni statija, o Isus sine spremno te merel te šaj te dokažinel kaj o Jehova tano sveto hem kaj sa so kerela tano pravedno (Mar. 14:36; Evr. 10:7-9). A otkeda ka završinen o milja berša kote so ka vladinel o Isus, ov spremno ka iranel ple Dadeske sa pli vlast soske mangela sa i slava te pripadinel e Jehovaske (1. Kor. 15:26-28). Osven adava, e Isuseskoro mangipe sprema e Devleskoro anav, sikavela kobor but paše sine ov ple Dadea. Ni hari na sumninaja amen kaj o Isus but mangela e Jehova.
2 O Isus alo ki phuv ple Dadeske ko anav (Jovan 5:43; 12:13). Ov vakergja adava anav ple sledbenikonge (Jovan 17:6, 26). Ov sikavgja e javeren ko e Jehovaskoro anav hem kergja čudija ko adava anav (Jovan 10:25). Ustvari, o Isus molingja e Jehova te arakhel leskere učenikon „bašo [plo] anav“ (Jovan 17:11). Sprema adava, ako e Isuseske sine doborom važno e Jehovaskoro anav, tegani sar šaj nekoj te vakerel kaj tano čačutno sledbeniko e Hristoseskoro, a te na džanel hem te na koristinel o anav leskere Dadeskoro?
3. So ka dikha ki akaja statija?
3 Sar čačutne hristijanja, amen džaja palo e Isuseskoro primer agjaar so sikavaja mangipe hem poštovanje sprema e Jehovaskoro anav (1. Pet. 2:21). Ki akaja statija ka dikha soske o Jehova dengja plo anav okolenge so propovedinena o „šukar haberi bašo Carstvo“ (Mat. 24:14). Isto agjaar, ka dikha kobor važno valjani te ovel e Jehovaskoro anav sekole jekheske amendar lično.
„NARODO SO KA PHIRAVEL LESKORO ANAV“
4. a) Savi zadača dengja o Isus ple učenikonge angleder te iranel pe ko nebo? b) Kova pučibe ka dikha ki akaja statija?
4 Kratko angleder te iranel pe ko nebo o Isus vakergja ple učenikonge: „Keda e Devleskiri sila ka avel upri tumende, ka dobinen sila hem ka svedočinen baši mande ko Erusalim, ki celo Judeja, ki Samarija hem dži ko najdur thana ki phuv“ (Apo. 1:8). Znači, o učenikija valjani sine te propovedinen o šukar haberi segde, a na samo ko Izrael. Sar so ka nakhel sine o vreme e manušen taro sa o narodija ka ovel len sine prilika te oven e Isuseskere sledbenikija (Mat. 28:19, 20). Ama, o Isus vakergja: „Ka svedočinen baši mande“. Dali akala neve učenikija valjani sine te džanen e Jehovaskoro anav, ili samo ka oven sine e Isuseskere svedokija? O bukja kola soj opišime ko Apostolija poglavje 15 ka pomožinen amenge te doznajna o odgovor ko akava pučibe.
5. Sar o apostolija hem o starešine ko Erusalim sikavgje kaj sa o manuša valjani te džanen e Jehovaskoro anav? (Dikh hem i slika.)
5 Ko 49 berš tari a.e., o apostolija hem o starešine ko Erusalim khedingje pe te keren lafi bašo adava so valjani te keren okola so na sine Evreija hem so na sine suneti te šaj te oven prifatime sar hristijanja. Ko krajo tari adaja diskusija o Jakov, e Isuseskoro phral, vakergja akava: „[O Petar] detalno objasningja sar o Devel akana prifatingja e manušen taro javera narodija, te šaj lendar te kerel narodo so ka phiravel leskoro anav“. Ko kova anav mislingja o Jakov? Keda citiringja taro proroko o Amos, ov isto agjaar vakergja: „Te šaj o manuša so ka ačhon, iskreno te roden e Jehova, zaedno e manušencar taro sa o narodija, okolencar so phiravena mlo anav, vakerela o Jehova“ (Apo. 15:14-18). O neve učenikija na samo so ka sikljoven sine bašo Jehova nego hem ka phiraven sine leskoro anav. Adava značinela sine kaj ola ka vakeren bašo e Devleskoro anav e javerenge hem kaj o manuša ka pendžaren len palo adava kaj ola pretstavinena adava anav.
Ko jekh taro lengoro sostanok, o členija taro vodečko telo ko prvo veko halile kaj o hristijanja mora te oven narodo bašo e Devleskoro anav (Dikh ko pasus 5)
6-7. a) Soske o Isus alo ki phuv? b) Koja sine javer považno pričina soske o Isus alo ki phuv?
6 O anav Isus značinela „o Jehova tano spasenie“ hem o Jehova preku o Isus spasinela sa okole manušen so sikavena vera. O Isus alo ki phuv te šaj te del plo životo sa e manušenge (Mat. 20:28). Adalea so platingja i otkupnina ov dengja prilika e manušenge te oven spasime hem te dobinen večno životo (Jovan 3:16).
7 Ama, soske e manušenge valjani otkupnina? Bašo adava so slučingja pe ki edensko gradina. Sar so spomningjem ki angluni statija, amare pararoditelija o Adam hem i Eva buningje pe protiv o Jehova hem adaleske našavgje i prilika te živinen večno (1. Moj. 3:6, 24). Ama, o Isus alo ki phuv te šaj te kerel nešto panda považno taro adava te spasinel e grešna manušen. Bašo Jehova sine vakerde hovajba hem agjaar leskoro anav sine kaljardo (1. Moj. 3:4, 5). Znači, o spasenie e Adameskere hem e Evakere čhavengoro sine povrzimo neštolea soj but považno — te dikhel pe ko e Jehovaskoro anav sar sveto. Adaleske so o Isus pretstavinela sine e Jehova hem phiravela sine leskoro anav, le sine le i glavno uloga ko adava te sikavel pe kaj e Jehovaskoro anav tano sveto.
Sar šaj nekoj te vakerel kaj tano čačutno sledbeniko e Hristoseskoro, a te na džanel hem te na koristinel o anav leskere Dadeskoro?
8. So valjani sine te haljoven sa okola so ka sikaven sine vera ko Isus?
8 Sa okola so ka sikaven sine vera ko Isus, hem o Evreija hem okola so na sine Evreija, valjani sine te haljoven kaj lengoro spasenie ustvari avela taro e Isuseskoro Dad, o Jehova o Devel (Jovan 17:3). Osven adava, isto sar e Isuse, e javeren da ka pendžaren sine palo e Jehovaskoro anav. Isto agjaar, ola valjani sine te haljoven kobor tano važno te dikhel pe ko e Jehovaskoro anav sar sveto. Lengoro spasenie zavisinela sine taro adava (Apo. 2:21, 22). Znači, sa o verna sledbenikija e Isuseskere valjani sine te sikljoven bašo Jehova hem bašo Isus. Na čudinela amen adava so pli molitva, koja soj pišimi ko Jovan 17 poglavje, o Isus završinela la akale lafencar: „Vakergjum lenge tlo anav hem ponadari da ka vakerav le, te šaj te sikaven mangipe savo so tu sikavgjan mange hem te šaj te ovav ko jekhipe lencar“ (Jovan 17:26).
„TUMEN SIEN MLE SVEDOKIJA“
9. Sar sledbenikija e Isuseskere, so valjani te ovel amenge najvažno?
9 Taro adava so dikhlem dži akana jasno tano kaj te dikhel pe ko e Jehovaskoro anav sar sveto valjani te ovel važno sa e Isuseskere čačutne sledbenikonge (Mat. 6:9, 10). Ustvari, amare postapkencar valjani te sikava kaj e Jehovaskoro anav amenge najvažno. Tegani so šaj te kera te šaj te sikava kaj e Jehovaskoro anav tano sveto, javere lafencar, te dokažina kaj adava so vakergja o Satana bašo Jehova tano hovajbe?
10. Savo simbolično sudsko slučaj tano opišimo ko 42 dži ko 44 poglavje taro lil Isaija? (Isaija 43:9; 44:7-9; dikh hem i slika.)
10 Ko Isaija taro 42 dži ko 44 poglavje tano istaknimo kobor tani važno amari uloga ko adava te sikavel pe kaj e Jehovaskoro anav tano sveto. Ko adala poglavja tano opišimo jekh simbolično sudsko slučaj koleste so o Jehova vikinela e manušen kola so na obožavinena le, te dokažinen kaj lengere devela tane čačutne. Isto agjaar, ov pučela dali isi svedokija kola so šaj te dokažinen adava. Ama nane nijekh asavko svedoko! (Čitin Isaija 43:9; 44:7-9.)
Amen ko but načinija siem vklučime ko jekh simbolično sudsko slučaj (Dikh ko pasusija 10-11)
11. Sprema Isaija 43:10-12, so vakerela o Jehova okolenge so služinena leske?
11 Čitin Isaija 43:10-12. Adalenge so služinena e Jehovaske ov vakergja: „Tumen sien mle svedokija... a me sium o Devel“. O Jehova pottikninela len te odgovorinen ko akava pučibe: „Isi li Devel osven mande?“ (Isa. 44:8). Sprema adava, amen isi amen čest te odgovorina ko akava pučibe. Amare lafencar hem postapkencar amen svedočinaja kaj samo o Jehova tano čačutno Devel. Leskoro anav tano najvažno taro sa o anava. Adalea sar živinaja, dokažinaja kaj iskreno mangaja e Jehova hem kaj siem leske verna bizi razlika savo pritisok kerela o Satana upri amende. Agjaar, amen isi amen prilika te sikava kaj e Jehovaskoro anav tano sveto.
12. Sar ispolningja pe o proroštvo taro Isaija 40:3, 5?
12 Keda braninaja e Jehovaskoro anav, javere lafencar leskoro ugled, amen džaja palo primer e Isus Hristoseskoro. O Isaija prorokujngja kaj nekoj ka ramnonel, javere lafencar ka spreminel o drumo e Jehovaske (Isa. 40:3). Sar ispolningja pe adava? O Jovan Krstitel spremingja o drumo e Isuseske, kova so alo hem kergja lafi ko e Jehovaskoro anav (Mat. 3:3; Mar. 1:2-4; Luka 3:3-6). Ko isto proroštvo pišinela: „Ka otkrinel pe e Jehovaskiri slava“ (Isa. 40:5). Sar ispolningja pe adava? Keda alo ki phuv o Isus doborom sovršeno pretstavingja e Jehova so adava sine sar te phene lično o Jehova alo ki phuv (Jovan 12:45).
13. Sar šaj te dža palo e Isuseskoro primer?
13 Isto sar o Isus, amen siem e Jehovaskere svedokija. Amen phiravaja e Jehovaskoro anav hem sarinenge vakeraja kobor šuže bukja kergja ov. Ama te šaj šukar te svedočina bašo Jehova amen mora isto agjaar te vakera e manušenge so sa kergja o Isus te šaj te dikhel pe ko e Jehovaskoro anav sar sveto (Apo. 1:8). Nikoj na svedočingja bašo Jehova pošukar taro Isus hem adaleske amen džaja palo leskoro primer (Otk. 1:5). Ama ko save javera načinija sikavaja kaj e Jehovaskoro anav tano važno amenge?
JAVERA NAČINIJA SAR SIKAVAJA KAJ E JEHOVASKORO ANAV TANO AMENGE VAŽNO
14. Sprema Psalm 105:3, so osetinaja bašo e Jehovaskoro anav?
14 Amen dičinaja amen e Jehovaskere anavea. (Čitin Psalm 105:3.) O Jehova but radujnela pe keda falinaja amen leskere anavea (Erem. 9:23, 24; 1. Kor. 1:31; 2. Kor. 10:17). „Te falina amen e Jehovaja“ značinela te dičina amen adalea so o Jehova tano amaro Devel. Amenge tano čest te vakera kaj o Jehova tano sveto hem kaj sa leskere postapke tane pravedna. Nikogaš na valjani te ladža te vakera amare kolegenge, součenikonge, komšienge hem e javere manušenge kaj siem e Jehovaskere svedokija! O Beng mangela te čhinava te vakera e javerenge bašo e Jehovaskoro anav (Erem. 11:21; Otk. 12:17). Ustvari, o Satana hem leskere hovavne prorokija mangena o manuša te bistren e Jehovaskoro anav (Erem. 23:26, 27). Ama, adaleske so isi amen mangipe sprema e Jehovaskoro anav mangaja te slavina le ki sekoja prilika (Ps. 5:11; 89:16).
15. So značinela te vikinel pe e Jehovaskoro anav?
15 Amen vikinaja e Jehovaskoro anav (Joil 2:32; Rim. 10:13, 14). Te vikinel pe e Jehovaskoro anav značinela but poviše nego samo te džanel pe hem te koristinel pe adava anav. Amen pendžaraja e Devle sar ličnost, isi amen doverba ki leste hem rodaja lestar pomoš hem vodstvo (Ps. 20:7; 99:6; 116:4; 145:18). Vakeraja e javerenge bašo leskoro anav hem osobine, pottikininaja len te kainen pe hem te keren nešto te šaj o Jehova te dikhel šukar ki lende (Isa. 12:4; Apo. 2:21, 38).
16. Sar šaj te dokažina kaj o Satana tano hovavno?
16 Amen siem spremna te cida muke bašo e Jehovaskoro anav (Jak. 5:10, 11). Adalea so ačhovaja verna e Jehovaske, čak keda cidaja muke bašo adava, dokažinaja kaj o Satana tano hovavno. Ko vreme keda živinela sine o Jov, o Satana vakergja akala lafija te šaj te krivinel okolen so služinena e Jehovaske: „O manuš ka del sa so isi le bašo plo životo“ (Jov 2:4). O Satana vakergja kaj o manuša ka služinen e Jehovaske samo keda ka ovel lenge sa šukar ko životo hem kaj ka otkažinen pe lestar keda ka oven len pharipa. O verno Jov dokažingja kaj adala lafija sine hovajbe. Amen da isi amen čest te dokažina kaj nane te čhinava te služina e Jehovaske bizi razlika so ka kerel o Satana te šaj te obeshrabrinel amen. Šaj te ova celosno uverime kaj o Jehova ponadari da ka zaštitinel amen bašo plo anav (Jovan 17:11).
17. Sprema 1. Petareskoro 2:12, ko savo javer način šaj te falina e Jehovaskoro anav?
17 Amen sikavaja kaj isi amen poštovanje sprema e Jehovaskoro anav (Izr. 30:9; Erem. 7:8-11). Adaleske so pretstavinaja e Jehova hem phiravaja leskoro anav, amen šaj ili te falina le ili te ladžakera le. (Čitin 1. Petareskoro 2:12.) Adaleske, amen mangaja te kera sa so šaj te falina e Jehova amare lafencar hem postapkencar. Agjaar, iako siem nesovršena, amen ka falina e Jehovaskoro anav.
18. Ko savo javer način šaj te dokažina kaj e Jehovaskoro anav tano amenge važno? (Dikh hem i fusnota.)
18 Amenge tano považno e Jehovaskoro anav taro amaro ugled (Ps. 138:2). Soske akava tano doborom važno? Adaleske so keda keraja o bukja so svidžinena pe e Jehovaske, adava but puti na svidžinela pe e manušenge hem adaleske kerena lošno lafi baši amende. a O Isus sine spremno te merel sar zlostorniko hem te ovel ladžakerdo te šaj te falinel e Jehovaskoro anav. Ov na mislingja ki ladž, javere lafencar na sine previše sekirimo ili voznemirimo bašo adava so ka mislinen o javera baši leste (Evr. 12:2-4). Leske sine najvažno te kerel e Devleskiri volja (Mat. 26:39).
19. So osetinea bašo e Jehovaskoro anav, hem soske?
19 Amen dičinaja amen e Jehovaskere anavea hem dikhaja sar čest ko adava te ova vikime e Jehovaskere svedokija. Adaleske, amen siem spremna te trpina bilo savi ladž. E Jehovaskoro anav amenge tano but považno čak taro amaro ugled. Adaleske, te ova odlučna ponadari da te falina e Jehovaskoro anav bizi razlika so ka kerel o Satana te šaj te čhinavel amen ko adava. Agjaar, ka dokažina kaj e Jehovaskoro anav tano amenge najvažno isto sar so sine e Isus Hristoseske.
GILI 10 Falin tu e Jehova, amare Devle!
a Čak o verno sluga e Devleskoro o Jov počmingja previše te mislinel ko adava sar o javera ka dikhen ki leste keda o trin amala vakergje leske kaj verojatno kergja nešto pogrešno. Ko početok, keda leskere čhave mule hem našavgja sa so sine le, „o Jov na grešingja hem na vakergja ništo lošno bašo Devel“ (Jov 1:22; 2:10). Ama pokasno, keda sine krivimo kaj kergja nešto pogrešno, ov počmingja te opravdinel pe hem te kerel lafi bizo te razmislinel. Považno sine leske leskoro ugled, nego te del čest e Devleskere sveto anaveske (Jov 6:3; 13:4, 5; 32:2; 34:5).
