O Jehova dengja i Phuv e manušenge. Amen dživdinaja ki late. Znači, o prva manuša, o Adam hem i Eva, na sine kerde te dživdinen ko nebo — o Devel kergja e angelen te dživdinen adathe (Jov 38:4, 7). Adaleske o Devel čhivgja e prvo manuše te dživdinel ko jekh but šužo raj — i edensko gradina (1. Mojseeva 2:15-17). Ko adava raj o manuša hem lengere čhave šaj sine večno te dživdinen ki Phuv. Čitin Psalm 37:29; 115:16.

Ko početok, samo i edensko gradina sine raj. O prvo manuša valjani sine te ovel len čhave kola so ka dživdinen ki celo Phuv. Hari po hari ola valjani sine te keren celo Phuv te ovel raj (1. Mojseeva 1:28). I Phuv niked nane te ovel uništimi. O manuša sekogaš ka dživdinen ki late. Čitin Psalm 104:5.

Dikh o videoklipi Soske o Devel kergja i Phuv?

O Adam hem i Eva na šunge e Devle hem adaleske o Jehova paldingja len taro raj. Tegani o raj tari Phuv našavdilo, hem nijekh manuš našti sine palem te kerel le. I Biblija vakerela kaj i ,Phuv sine dendi ko vasta e lošna manušenge‘ (Jov 9:24). Čitin 1. Mojseeva 3:23, 24.

Dali o Jehova otkažingja pe tari pli namera so sine le panda taro početok? Na! Ov tano Semokjno hem nikogaš na otkažinela pe (Isaija 45:18). Ka kerel o manuša te dživdinen ko šukar uslovija, sar so manglja panda taro početok. Čitin Psalm 37:11, 34.

I Phuv palem ka ovel raj džikote o Isus ka vladinel upri late sar Cari čhivdo taro Devel. Ko Armagedon, o Isus ka vodinel e Devleskere angelen hem ka uništinel sa okolen so protivinena pe e Devleske. Tegani ov ka phandel e Benge 1.000 berša. E Devleskoro narodo ka  ačhovel dživdo adaleske so o Isus ka vodinel le hem ka zaštitinel le hem ka šaj te dživdinel večno ko raj ki Phuv. Čitin Otkrovenie 20:1-3; 21:3, 4.

Keda o Devel ka cidel o lošnipe tari Phuv? O Isus dengja jekh ,znako‘ te sikavel kaj o krajo tano paše. O avdisutne lošna uslovija so isi ki Phuv šaj te uništinen sa e manušen hem sikavena kaj dživdinaja ko krajo akale sumnaleskoro. Čitin Matej 24:3, 7-14, 21, 22.

Ko adala 1.000 berša, keda ka vladinel o Isus taro nebo ki Phuv, ov ka čhivel krajo sa e mukenge (Isaija 9:6, 7; 11:9). Na samo so ka ovel Cari, o Isus ka ovel Prvosvešteniko hem ka kosel sa o grevija okolengere kola so mangena e Devle. Agjaar, preku o Isus, o Devel ka cidel o nasvalipe, o phuripe hem o meribe. Čitin Isaija 25:8; 33:24.

Ko raj ka dživdinen okola so šunena e Devle (1. Jovanovo 2:17). O Isus bičhalgja ple učenikon te roden e krotko manušen hem te sikaven len sar te keren e Devleskiri volja. Avdive, o Jehova spreminela milionija manušen te šaj te dživdinen ko raj ki Phuv (Sofonija 2:3). Ko dvorane kote so khedena pe e Jehovaskere svedokija, but manuša sikljovena te oven pošukar roma hem dada, te oven pošukar romnja hem daja. O čhave hem o roditelija zaedno slavinena e Devle hem sikljovena sar o šukar haberi šaj te kerel lengoro dživdipe pošukar. Čitin Mihej 4:1-4.