LEKCIJA 24
So vakerela i Biblija bašo angelija?
O Jehova mangela te zapoznajna leskere familija soj ko nebo. Ki adaja familija vklučime tane o angelija kolenge so i Biblija vakerela kaj tane „e Devleskere čhave“ (Jov 38:7). So vakerela i Biblija panda bašo angelija? Sar vlijajnena o angelija upro manuša? Hem dali tane sa o angelija delo tari e Devleskiri familija?
1. Koj tane o angelija?
O Jehova stvoringja e angelen angleder te kerel i Phuv. Isto sar o Jehova, ola da tane nevidliva hem živinena ko nebo (Evreite 1:14). Isi but milionja angelija hem sekova jekh lendar tano posebno ličnost (Otkrovenie 5:11). Ola „kerena adava so [o Jehova] vakerela hem šunena leskere zapovedija“ (Psalm 103:20). Ponekogaš o Jehova ko purano vreme bičhalela sine ple angelen te vakeren nesavo haberi, te pomožinen hem te spasinen leskere narodo. Avdive, o angelija vodinena e hristijanen ko manuša so mangena te sikljoven poviše bašo Devel.
2. Koj tane o Satana hem leskere demonija?
Nesave angelija na ačhile verna e Jehovaske hem buningje pe. O prvo angeli so kergja adava tano okova „so vikinela pe Beng hem Satana, kova so zavedinela celo sveto“ (Otkrovenie 12:9). O Satana manglja te vladinel upro javera. Adaleske ov vlijajngja upro Adam hem i Eva hem upro javera angelija ola da te buninen pe protiv o Jehova. Adala buntovna angelija vikinena pe demonija. O Jehova frdingja len taro nebo tele ki Phuv hem ola ka oven uništime. (Čitin Otkrovenie 12:9, 12.)
3. Sar o Satana hem o demonija mangena te hovaven amen?
O Satana hem o demonija hovavena bute manušen preku o demonizam ili spiritizam, so značinela te rodel pe kontakt e lošna duhoncar. Na primer, nesave manuša kerena adava agjaar so džana ko astrolozija, ko okola so dikhena ko fali hem ko manuša so kerena magie. Ili palem javera, te šaj te sasljoven taro nesavo nasvalipe, džana ko bajačija ili rodena javera medicinska tretmanija kolende so isi spiritizam. Isto agjaar, o Satana hem o demonija hovavena e manušen agjaar so kerena te verujnen kaj o manuša šaj te keren lafi e mulencar. Ama, o Jehova predupredinela amen: „Ma džan okolende so vakerena kaj kerena lafi e duhoncar hem ma roden sovet okolendar so vakerena so ka ovel ki idnina“ (3. Mojseeva 19:31). Ov dela amen akava predupreduvanje te šaj te zaštitinel amen taro Satana hem o demonija. Ola tane e Devleskere dušmanja hem mangena te keren amenge šteta.
DOZNAJN POVIŠE
Sikljov poviše bašo šukar bukja so kerena o angelija, bašo adava kobor tano opasno o spiritizam hem sar šaj te zaštitina amen taro Satana hem taro demonija.
4. O angelija pomožinena e manušenge te zapoznajnen e Jehova
E Devleskere angelija na propovedinena lično e manušenge. Namesto adava, ola pomožinena amenge te resa dži ko manuša kola so mangena te zapoznajnen e Devle. Čitin Otkrovenie 14:6, 7, a palo adava keren lafi bašo akala pučiba:
-
Soske valjani amenge pomoš taro angelija te propovedina?
-
Sar osetinea tut adaleske so džanea kaj o angelija vodinena tut ko manuša so mangena te sikljoven baši Biblija?
5. Naš taro spiritizam!
O Satana hem o demonija tane e Jehovaskere dušmanja. Ola tane hem amare da dušmanja. Čitin Luka 9:38-42, a palo adava keren lafi bašo akava pučibe:
-
So kerena o demonija e manušenge?
Amen na mangaja o demonija te vlijajnen upri amende. Čitin 5. Mojseeva 18:10-12, a palo adava keren lafi bašo akala pučiba:
-
Ko kola načinija o demonija mangena te aven amencar ko kontakt? Kola taro akala bukja tane voobičaena ko than kote so živinea?
-
So mislinea, dali tano šukar adava so o Jehova zabraninela o spiritizam hem soske?
Dikh o VIDEOKLIPI, a palo adava keren lafi bašo akala pučiba:
-
So mislinea, dali i amajlija so čhivgja i Palesa ple čhajake sine opasno hem soske?
-
So valjani sine te kerel i Palesa te šaj te zaštitinel pe taro demonija?
O čačutne hristijanja sekogaš protivinena pe sine e demonenge. Čitin Dela 19:19 hem 1. Korinkjanite 10:21, a palo adava keren lafi bašo akava pučibe:
-
Ako isi tut nesave bukja soj povrzime e demonencar, soske tano važno te uništine len?
6. Pobedin ki borba protiv o Satana hem leskere demonija
O demonija tane vodime taro Satana, ama o verna angelija tane vodime taro arhangel o Mihael, kova soj tano javer anav bašo Isus. Kobor mokjno tano o Mihael? Čitin Otkrovenie 12:7-9, a palo adava keren lafi bašo akala pučiba:
-
Koj tano pomokjno, o Mihael hem leskere angelija ili o Satana hem leskere demonija?
-
So mislinea, dali e Isuseskere sledbenikija valjani te daran taro Satana hem leskere demonija?
Tu šaj te pobedine ki borba protiv o Satana hem leskere demonija. Čitin Jakov 4:7, a palo adava keren lafi bašo akava pučibe:
-
Sar šaj te zaštitine tut taro Satana hem leskere demonija?
NESAVE ŠAJ VAKERENA: „Nane ništo pogrešno ko adava te khele video-igre ili te dikhe filmija kote so isi spiritizam. Adava tano samo baši zabava“.
-
Soske asavko stavi tano opasno?
SO SIKLILEM
O verna angelija pomožinena amenge. O Satana hem o demonija tane e Jehovaskere dušmanja hem ola koristinena o spiritizam te hovaven e manušen.
Sar ka odgovorine?
-
Sar e Jehovaskere angelija pomožinena e manušenge te zapoznajnen le?
-
Koj tane o Satana hem leskere demonija?
-
Soske valjani te cide tut taro spiritizam?
ISTRAŽIN
Čitin bašo dokazija so sikavena kaj o Isus tano o arhangel Mihael.
Doznajn kotar džanaja kaj o Beng tano čačutni ličnost.
Čitin sar jekh manušni oslobodingja pe taro e demonengoro vlijanie.
„Taa ja pronašla smislata na životot“ (Stražarska kula taro 1 juli 1993)
Šaj isto ka interesinel tut
NAJČESTA PUČIBA
Sar izgledinela o biblisko kursi so nudinena e Jehovaskere svedokija?
Džikote ikerela pe o besplatno biblisko kursi, šaj te koristine bilo kova prevod tari Biblija. Ko kursi šaj te kanine nekas tari tli familija ili nesave amale.
