O Isus vakergja kaj valjani te krstina amen ako mangaja te ova hristijanja. (Čitin Matej 28:19, 20.) Ama, soj tano o krstibe? Hem so valjani nekoj te kerel te šaj te resel dži ko krstibe?

1. Sar valjani nekoj te krstinel pe?

O grčko lafi soj tano prevedimo sar „krstibe“ značinela „te potopinel pe“ telo pani. Keda o Isus krstingja pe, ov sine potopimo ko pani ki reka Jordan hem palo adava „iklilo taro pani“ (Marko 1:9, 10). Isto sar o Isus, o čačutne da hristijanja krstinena pe agjaar so ovena celosno potopime telo pani.

2. So sikavela o krstibe?

Keda nekoj krstinela pe, ov sikavela kaj dengja lafi e Jehovaske kaj ka služinel leske. Angleder o krstibe, ki jekh lično molitva ov vakerela e Jehovaske kaj mangela te služinel leske zasekogaš. Ov vetinela kaj ka služinel samo e Jehovaske hem kaj najvažno buti ko životo ka ovel leske te kerel e Devleskiri volja. Ov odlučingja te otkažinel pe pestar hem te džal palo Isus, agjaar so ka ikerel leskere sikljojba hem ka džal palo leskoro primer (Matej 16:24). Adalea so dela lafi kaj ka služinel e Jehovaske hem so krstinela pe ovela paše amal e Jehovaja hem leskere narodoja.

3. So valjani te kerel nekoj te šaj te krstinel pe?

Angleder te krstine tut, but tano važno te sikljove bašo Jehova hem te gradine vera ki leste. (Čitin Evreite 11:6.) Kobor poviše sikljovea baši leste hem kobor poviše bajrovela tli vera ki leste, doborom poviše ka bajrovel tlo mangipe sprema o Jehova. Tegani ka mange te propovedine baši leste hem te živine sprema leskere merilija (2. Timotej 4:2; 1. Jovanovo 5:3). Keda nekoj živinela životo soj dostojno e Jehovaske hem agjaar celosno ugodinela leske, ov šaj te odlučinel te del lafi e Devleske kaj ka služinel leske hem te krstinel pe (Kološanite 1:9, 10). a

 DOZNAJN POVIŠE

4. So sikljovaja taro adava sar sine krstimo o Isus?

Čitin Matej 3:13-17 te šaj te dikhe poviše detalija bašo e Isuseskoro krstibe, a palo adava keren lafi bašo akala pučiba:

• Dali o Isus sine bebe keda krstingja pe?

• Sar sine krstimo o Isus? Dali sine samo prskimo panjea?

Otkeda sine krstimo, o Isus počmingja te kerel i posebno zadača koja so sine leske dendi taro Devel. Čitin Luka 3:21-23 hem Jovan 6:38, a palo adava keren lafi bašo akava pučibe:

• Koja zadača sine e Isuseske najvažno palo leskoro krstibe?

5. Tu šaj te rese i cel te krstine tut

Šaj mislinea tuke kaj nikogaš ka našti te uspejne te de lafi e Jehovaske kaj ka služine leske hem te krstine tut. Ama, ako ponadari da sikljovea bašo Jehova hem zapoznajnea le pošukar, tegani ka ove posigurno te ane asavki važno odluka. Te šaj te dikhe sar nesave manuša uspejngje ko adava dikh o VIDEOKLIPI.

Čitin Jovan 17:3 hem Jakov 1:5, a palo adava keren lafi bašo akava pučibe:

• So ka pomožinel nekaske te ovel spremno bašo krstibe?

1. 1. Angleder te krstina amen, ki molitva daja lafi e Jehovaske kaj ka služina leske celo životo

2. 2. Keda krstinaja amen, sikavaja e javerenge kaj dengjem lafi e Jehovaske kaj ka služina leske celo životo

 6. Keda krstinaja amen ovaja delo tari e Jehovaskiri familija

Keda krstinaja amen, ovaja delo tari jekh but bari familija soj tani ko celo sveto. Iako živinaja ko različna thana hem avaja taro različna kulture, amen siem ko jekhipe adaleske so isi amen ista veruvanja hem živinaja sprema o ista moralna merilija. Čitin Psalm 25:14; 133:1, a palo adava keren lafi bašo akava pučibe:

• Savo ka ovel amaro odnos e Jehovaja hem okolencar so služinena leske otkeda ka krstina amen?

 SO SIKLILEM

O Isus vakergja kaj o hristijanja valjani te krstinen pe. Angleder nekoj te krstinel pe, valjani te gradinel zorali vera ko Jehova, te živinel sprema leskere merilija hem te del lafi kaj ka služinel leske celo životo.

Sar ka odgovorine?

• Sar valjani nekoj te krstinel pe hem soske o krstibe tano važno?

• Koja tani i razlika maškar adava te da lafi e Jehovaske kaj ka služina leske celo životo hem o krstibe?

• So valjani te kere angleder te de lafi e Jehovaske kaj ka služine leske celo životo hem te krstine tut?