Jekh rat, o cari o Navuhodonosor dikhlja jekh čudno suno. Doborom darandilo so našti sine više te sovel. Vikingja ple magioničaren hem vakergja lenge: „Objasninen mange so dikhljum ko suno“. Ola pučle le: „A so dikhljan ko suno?“ O Navuhodonosor vakergja lenge: „Na! Tumen ka vakeren mange so dikhljum ko suno! Ili ka mudarav tumen!“ Ola palem pučle le: „Vaker amenge so dikhljan ko suno, hem tegani ka vakera tuke so značinela to suno“. Tegani, ov phengja lenge: „Tumen mangena te hovaven man. Vakeren mange so dikhljum ko suno!“ Ola vakergje leske: „Nane manuš ki Phuv so šaj te vakerel tuke to suno. Adava so rodea našti te kera le“.

O Navuhodonosor but holjangja hem naredingja sa o magioničarija hem o mudra manuša te oven mudarde ki celi phuv. Maškaro adala mudra manuša sine o Daniel, o Sedrah, o Misah hem o Avdenago. O Daniel rodingja taro cari te del le hari vreme. Palo adava, ov hem leskere amala molingje pe e Jehovaske hem rodingje pomoš taro Jehova. So kergja o Jehova?

Ki jekh vizija, o Jehova sikavgja e Danieleske so dikhlja o Navuhodonosor ko suno hem so značinela adava. O tajsutno dive, o Daniel gelo ko e careskoro sluga hem vakergja leske: „Ma mudar e mudro manušen. Me šaj te objasninav o suno e careske“. O sluga ingargja e Daniele ko Navuhodonosor. O Daniel vakergja e careske: „O Devel sikavgja so ka ovel tuja ki idnina. Akava tano tlo suno: Dikhljan jekh baro kipi. O šero leskoro sine taro zlato, o kolin hem o vasta taro srebro, o vogi hem o butija taro bakari, o čanga taro železo, a o pre tele sine taro sastrn mešimo glinaja. Tegani tari jekh planina otkačingja pe jekh bar hem khuvgja e kipe ko pre. O kipi sa phagilo ulo prašina koja so  ingargja la i balval. A o bar ulo bari planina, koja so širindili ki celi Phuv.

Palo adava, o Daniel vakergja: „Ake so značinela o suno: O šero taro zlato tano tlo carstvo. O srebreno delo tano o carstvo so ka avel pali tute. Palo adava, ko celo sveto ka vladinel jekh carstvo kova soj pretstavimo bakarea. Pali leste ka avel carstvo so ka ovel zoralo sar železo. A o posledno carstvo so ka vladinel ka ovel delimo — nesave delija ka oven zorale sar železo, a nesave kovle sar glina. O bar so ulo planina tano e Devleskoro Carstvo. Akava Carstvo ka uništinel sa o javera carstvija hem ov ka vladinel zasekogaš“.

Keda šungja akala lafija, o Navuhodonosor pokloningja pe e Danieleske. O Cari vakergja: „Tlo Devel sikavgja tuke so značinela o suno. Nane javer Devel sar leste“. Palo akava, o Navuhodonosor na mudargja e Daniele. Ov čhivgja le te ovel glavno nadgledniko upro sa o mudra manuša hem te ovel vladeteli ko Vavilon. Dali šaj te dikhe sar o Jehova odgovoringja e Danieleske ki molitva?