O Jehova tano o Devel so kergja amen. Ov kergja sa, kergja o bukja so šaj te dikha len hem o bukja so našti te dikha len. Angleder te kerel o bukja so šaj te dikha len, ov kergja but, but angelija. Dali džanea koj tane o angelija? Ola služinena e Jehovaske, hem tane slična sar leste. Amen našti te dikha len isto sar so našti te dikha e Jehova. O prvo angeli so kergja le o Jehova ulo leskoro pomošniko. Akava angeli pomožingja e Jehovaske keda kergja o zvezde, o planete hem sa o javera bukja. Jekh taro adala planete tani i Phuv, but šužo than kote so živinaja.

Palo adava, o Jehova spremingja i Phuv te šaj ki late te živinen manuša hem životne. Ov kergja o kham te del svetlina e Phuvjake. Isto agjaar, kergja o planine, o okeanija hem o reke.

So ulo palo adava? O Jehova vakergja: „Ka kerav čar, kašta hem javera rastenija“. Tegani, tari Phuv počmingja te bajrol različno ovošje, zelenčuk hem lulugja. Palo adava, o Jehova kergja različna životne, sar soj o životne so letinena, so živinena ko pani hem so lazinena ki phuv. Nesave tane tikne, sar o zajkija, a nesave tane bare, sar o slonija. Kova životno najviše mangea tu?

Palo adava, o Jehova vakergja e prvo angeleske: „Te kera manuš“. O manuša valjani sine te razlikujnen pe taro životne. Ov manglja ola te izmislinen različna bukja, te keren lafi, te asan hem te molinen pe leske. Isto agjaar, ov manglja ola  te grižinen pe baši Phuv hem bašo životne. Džanea li koj sine o prvo manuš? Ajde te dikha.