1, 2. Kote šaj te arakha zaštita?

ZAMISLIN tuke kaj phirea avri, a o vreme tano but lošno. O oblakija kaljona, počminela te grminel hem baro bršim te perel. Tegani počminea te rode than kote so šaj te garave tut. Sigurno ka ovel tuke but polokho keda ka arakhe asavko than!

² Amen siem ki slično situacija. O sveto ovela sa pološno. Šaj pučea tut: „Kote šaj te arakhav zaštita?“ Ki Biblija o psalmisti pišingja: „Ka vakerav e Jehovaske: ,Tu sian mlo than kote so šaj te garavav man hem mli tvrdina, mlo Devel, kaste so isi man doverba‘“ (Psalm 91:2). Oja, o Jehova šaj te zaštitinel amen ko akava sveto kova soj pherdo problemencar hem te del amen nadež baši idnina.

3. So valjani te kera te šaj o Jehova te zaštitinel amen?

³ Sar šaj o Jehova te zaštitinel amen? Ov šaj te pomožinel amenge te ikljova ko krajo bilo save problemea, hem ov tano but posilno taro bilo kova javer so mangela te kerel amenge lošnipe. Čak ako avdive ovela amenge nešto lošno, šaj te ova sigurna kaj o Jehova ki idnina ka meninel i situacija. I Biblija ohrabrinela amen: „Ačhoven ko e Devleskoro mangipe“ (Juda 21). Valjani te ačhova paše e Jehovaja te šaj te pomožinel amen keda ka ovel amenge pharo. Ama, sar šaj te kera adava?

4, 5. Sar o Jehova sikavgja kaj mangela amen?

⁴ Te šaj te ačhova paše e Jehovaja, mora te razmislina bašo adava kobor mangaja le. Te razmislina  bašo sa o bukja so kergja len o Jehova amenge. Dengja amen but šuži Phuv koja soj pherdi različna rastenija hem životne. Isto agjaar, dengja amen vkusna bukja hajbaske hem čisto pani pijbaske. Preku i Biblija, o Jehova vakergja amenge plo anav hem ple šuže osobine. A najbaro mangipe sikavgja keda bičhalgja ple najmangle čhave e Isuse ki Phuv te del plo životo amenge (Jovan 3:16). Adaja žrtva dela amen but šuži nadež baši idnina.

⁵ O Jehova kergja o Mesijansko Carstvo, vlada soj ko nebo koja so panda hari ka anel krajo sa e mukenge. Akava Carstvo ka kerel celo Phuv te ovel raj, kote so sarine ka živinen zasekogaš ko mir hem bahtalipe (Psalm 37:29). Javer način sar o Jehova sikavela amenge po mangipe, tano adalea so vakerela amenge sar šaj panda akana te živina ko najšukar način. Ov isto agjaar mangela te molina amen leske, hem ov sekogaš tano spremno te šunel amare molitve. O Jehova jasno sikavgja plo mangipe sarinenge.

6. Sar šaj te sikava kaj ceninaja e Jehovaskoro mangipe?

⁶ Sar šaj te sikave kaj ceninea e Jehovaskoro mangipe? Sikav leske kaj sian blagodarno bašo sa o bukja so kergja len tuke. Za žal, but manuša avdive nane blagodarna. Asavke sine o manuša da ko vreme e Isuseskoro. Ki jekh prilika, o Isus sasljargja deše leprozna manušen, ama samo jekh lendar blagodaringja leske (Luka 17:12-17). Amen mangaja te ova sar akava manuš so sine blagodarno. Sekogaš mangaja te ova blagodarna e Jehovaske.

7. Sar valjani te manga e Jehova?

⁷ Amen da valjani te sikava amaro mangipe e Jehovaske. O Isus vakergja ple učenikonge kaj valjani te mangen e Jehova celo vilea, celo dušaja hem  celo gogjaja. (Čitin Matej 22:37.) So značinela akava?

8, 9. Sar sikavaja amaro mangipe e Jehovaske?

⁸ Dali tano dovolno samo te vakera kaj mangaja e Jehova? Na. Ako mangaja e Jehova celo vilea, dušaja hem gogjaja, adava ka dikhel pe taro amare postapke (Matej 7:16-20). I Biblija but jasno vakerela kaj ako mangaja e Devle, ka šuna leskere zapovedija. Dali adava tano pharo te kerel pe? Na, adaleske so e Jehovaskere „zapovedija nane phare“. (Čitin 1. Jovanovo 5:3.)

⁹ Keda šunaja e Jehova, tegani siem bahtale hem zadovolna (Isaija 48:17, 18). Ama, so ka pomožinel amen te ačhova paše e Jehovaja? Akana ka kera lafi bašo adava.

10. Soske valjani ponadari da te sikljove bašo Jehova?

¹⁰ Sar uljan e Jehovaskoro amal? Džikote proučingjan i Biblija, sikliljan poviše bukja bašo Jehova hem uljan leskoro amal. Akava amalipe šaj te sporedina le jekhe jagaja. Te šaj jekh jag ponadari da te thabljovel hem te ovel bari, valjani te čhiven pe kašta. Sar o kašta so kerena i jag te ovel bari, agjaar tu da valjani ponadari te sikljove bašo Jehova te šaj tlo amalipe lea te bajrovel (Izreki 2:1-5).

11. Sar ka vlijajnen upri tute o bukja so sikljovea len tari Biblija?

¹¹ Džikote ponadari proučinea tari Biblija, ka sikljove bukja kola so ka khuven tuke andre ko vilo. Dikh sar osetingje pe duj učenikija e Isuseskere keda objasningja lenge o proroštvija tari Biblija. Ola vakergje: „Na pherdile li amare vile džikote ov kerela sine amencar lafi ko drumo, džikote objasninela sine amenge o sveta lila?“ (Luka 24:32).

12, 13. a) Ako na pazinaja, so šaj te ovel amare mangipaja kon o Devel? b) Sar šaj tlo amalipe e Jehovaja te ačhol zoralo?

 ¹² Isto sar so pherdile o vile e Isuseskere učenikongere keda halile e Devleskoro Lafi, agjaar šaj tu da osetingjan tu keda počmingjan te haljove i Biblija. Akava pomožingja tuke te pendžare e Jehova hem te mange le. Ama, ako na pazinea, akava mangipe šaj te šudrol (Matej 24:12).

¹³ Keda ka ove e Devleskoro amal, tu valjani but te trudine tu tlo amalipe lea te ačhol zoralo. Mora ponadari da te sikljove baši leste hem bašo Isus. Isto agjaar, valjani te razmisline bašo adava so sikljovea hem sar šaj adava te kere le ko tlo životo (Jovan 17:3). Keda čitinea ili proučinea i Biblija, puč tut: „So sikavela man akava bašo Jehova? Soske valjani te mangav le celo vilea hem dušaja?“ (1. Timotej 4:15).

14. Sar i molitva pomožinela amaro mangipe kon o Jehova te ovel zoralo?

 ¹⁴ Keda duj amala često kerena lafi, adava anela lengoro amalipe te ovel pozoralo. Isto agjaar, keda amen da često keraja lafi e Jehovaja ki molitva, adava kerela amaro mangipe baši leste te ovel pozoralo. (Čitin 1. Solunjanite 5:17.) I molitva tani but šužo poklon taro amaro Dad kova soj ko nebo. Adaleske, valjani sekogaš te kera lea lafi taro vilo (Psalm 62:8). Na valjani ki molitva te povtorina sa jekh ista lafija, nego valjani te vakera adava so čače mislinaja. Ako ponadari da proučinaja i Biblija hem molinaja amen taro vilo, amaro mangipe kon o Jehova ka ovel zoralo.

15, 16. Sar tu dikhea ko propovedibe?

¹⁵ Ako mangaja te ačhova paše e Jehovaja, amen valjani te vakera e javerenge baši leste. But bari prednost isi amen adaleske so šaj te vakera e javerenge bašo Jehova. Adaja odgovornost dengja la o Isus sa e čačutne hristijanenge. Sekova jekh amendar valjani te vakerel o šukar haberi bašo e Devleskoro Carstvo. Dali tu kerea akava? (Matej 24:14; 28:19, 20).

¹⁶ O apostol Pavle ko propovedibe dikhela sine sar nešto but skapoceno; ov baši leste vakergja kaj tano „barvalipe“ (2. Korinkjanite 4:7). Te vakere e javerenge bašo Jehova hem baši leskiri namera, tani i najvažno buti so šaj te kere la. Adalea služinea e Jehovaske, hem ov ceninela sa so kerea baši leste (Evreite 6:10). E propovedibaja pomožinea tuke hem e javerenge te ačhoven paše uzo Jehova hem te dobinen večno životo. (Čitin 1. Korinkjanite 15:58.) Isi li nešto javer so šaj te kerel tut pobahtalo?

17. Soske o propovedibe tano itno?

 ¹⁷ O propovedibe tano but itno. Amen valjani itno te „propovedina e Devleskoro lafi“ (2. Timotej 4:2). O manuša valjani te šunen bašo e Devleskoro Carstvo. Ki Biblija pišinela: „Paše tano o baro dive e Jehovaskoro! Paše tano hem avela but sigate!“ O krajo „nane te kasninel“ (Sofonija 1:14; Avakum 2:3). Oja, panda hari, o Jehova ka uništinel e Satanaskoro lošno sveto. Ama, angleder te ovel adava, valjani te vakera e manušenge te šaj te birinen te služinen e Jehovaske.

18. Soske valjani te služina e Jehovaske zaedno e javere čačutne hristijanencar?

¹⁸ O Jehova mangela te služina leske zaedno e javere čačutne hristijanencar. I Biblija vakerela: „Te razmislina jekh jekheske te šaj te pottiknina amen te sikava mangipe hem te kera šukaripe, hem ma te mukha amare sostanokija sar nesave so kerena, nego te ohrabrina amen jekh jekhea, sa poviše kobor so dikhena kaj avela popaše o dive“ (Evreite 10:24, 25). Valjani but te trudina amen te ova prisutna ko sa amare sostanokija. Ko sostanokija isi amen prilika te ohrabrina amen jekh jekhea hem te kera amari vera pozorali.

19. So ka pomožinel amenge te manga amare phralen hem phenjen?

¹⁹ Keda ka dža ko sostanokija, tegani ka arakhe šukar amala kola so ka pomožinen tuke te služine e Jehovaske. Ka zapoznajne različna phralen hem phenjen, kola so isto sar tute, trudinena pe te služinen leske najšukar so šaj. Hem isto sar tute, ola tane nesovršena hem grešinena. Keda ka grešinen, ov spremno te prostine lenge. (Čitin Kološanite 3:13.) Sekogaš trudin tut te dikhe o šukar osobine so isi e phralen hem e phenjen, soske adava ka  pomožinel tut te mange len hem ka ove panda popaše e Jehovaja.

20, 21. Soj tano „o čačutno životo“?

²⁰ O Jehova mangela leskere amala te živinen o najšukar životo. I Biblija vakerela amenge kaj amaro životo ki idnina ka ovel but pojaver taro akava životo so živinaja le avdive.

²¹ Ki idnina, ka živina večno, a na samo 70 ili 80 berša. Ka uživina ko „večno životo“ hem ka ovel amen sovršeno sastipe, mir, bahtalipe hem ka živina ko but šužo raj. Adaleske, i Biblija bašo asavko životo vakerela kaj tano „o čačutno životo“. O Jehova dengja lafi kaj ka del amen o čačutno životo, ama amen valjani panda akana te da amendar sa te šaj te dobina le (1. Timotej 6:12, 19).

22. a) Sar šaj te dobina o čačutno životo? b) Dali amen šaj te zaslužina o večno životo?

²² Sar šaj te dobina o čačutno životo? Amen mora „te kera šukaripe“ (1. Timotej 6:18). Valjani te kera adava so sikljovaja tari Biblija. Ama, ma te bistra kaj adava so ka trudina amen te kera o bukja so sikljovaja len, na značinela kaj adaleske zaslužinaja o večno životo. Ov tano poklon kova so o Jehova dela le ple verna slugenge, jekh „šukaripe so na zaslužinaja le“ (Rimjanite 5:15). Amaro Dad soj ko nebo čače mangela te del akava poklon ple slugenge soj leske verna.

23. Soske valjani panda akana te ane ispravna odluke?

²³ Puč tut: „Dali služinava e Devleske sar so mangela ov?“ Ako dikhea kaj valjani te kere nesave promene, tegani ker len odma. Keda isi amen doverba ko Jehova hem trudinaja amen te ova leske poslušna, tegani ov ka zaštitinel amen. Ov ka zaštitinel ple  verna slugen ko posledna dive taro e Satanaskoro lošno sveto. Palo adava, o Jehova ka kerel te živina večno ko raj, sar so vetingja. Oja, šaj te ovel tut o čačutno životo ako anea ispravna odluke panda akana!