О грчко лафи ана̀стасис кова со ки Библија тано преведимо сар „воскресение“ дословно значинела „те ваздел пе“ или „палем те уштел пе“. Окола со ка овен воскресниме ка иранен пе ко живото сар исто личност со сине англедер (1. Коринќаните 15:12, 13).

 Иако о лафи „воскресение“ на појавинела пе ко Хебрејска списија, кола сој тане пенџарде хем сар Пурано завет, акава дело тари Библија поддржинела о сикајбе башо воскресение. На пример, преку о пророко Осија, о Девел ветинѓа: „Тари сила е гробоскири ка откупинав ле, таро мерибе ка спасинав ле“ (Осија 13:14; Јов 14:13-15; Исаија 26:19; Даниел 12:2, 13).

 Коте ка воскреснинен о мануша? Некобор мануша ка воскреснинен ко небо коте со ка владинен сар царија е Исусеа (2. Коринќаните 5:1; Откровение 5:9, 10). Башо акава воскресение и Библија вакерела кај тано о „прво воскресение“ хем о „порано воскресение“, акала дуј изразија сикавена кај иси хем јавер воскресение (Откровение 20:6; Филипјаните 3:11). О дујто воскресение ка овел ки Пхув хем о побаро дело таро мануша со муле ка воскреснинен акате ки Пхув (Псалм 37:29).

 Сар ка воскреснинен о муле? О Девел денѓа е Исусеске моќ те ваздел е мулен (Јован 11:25). О Исус ка воскреснинел са околен „сој тане ко гробо“. Секова мануш ка воскреснинел сар исто личност хем иста особиненцар (Јован 5:28, 29). Окола со ка воскреснинен те живинен ко небо ка добинен духовно тело, а окола со ка воскреснинен те живине ки Пхув ка добинен састо физичко тело (Исаија 33:24; 35:5, 6; 1. Коринќаните 15:42-44, 50).

 Кој ка воскреснинел? И Библија вакерела кај „о Девел ка воскреснинел околен сој праведна хем околен со нане праведна“ (Дела 24:15). О праведна тане е Девлескере слуге, сар со сине о Ное, и Сара хем о Авраам (1. Мојсеева 6:9; Евреите 11:11; Јаков 2:21). А о неправедна тане окола со на сине лен прилика ко пло живото те запознајнен е Девле хем те икерен лескере заповедија.

 Ама, окола со керена лошнипе хем со на мангена те променинен пе нане те воскреснинен. Кеда јекх асавко мануш ка мерел, леске нане нисави надеж те живинел палем (Матеј 23:33; Евреите 10:26, 27).

 Кеда ка воскреснинен о муле? И Библија пророкујнѓа кај о воскресение ко небо ка овел џикоте трајнела е Христосескири присутност која со почминѓа ко 1914 берш (1. Коринќаните 15:21-23). О воскресение ки Пхув ка овел џикоте трајнена о милја берша кеда ка владинел о Исус Христос, кеда и Пхув ка овел рај (Лука 23:43; Откровение 20:6, 12, 13).

 Соске шај те верујна кај ка овел воскресение? Ки Библија тане пишиме детална извештаија башо ења мануша кола со воскреснинѓе англо јавера кола со сине присутна хем дикхле адава (1. Царевите 17:17-24; 2. Царевите 4:32-37; 13:20, 21; Лука 7:11-17; 8:40-56; Јован 11:38-44; Дела 9:36-42; 20:7-12; 1. Коринќаните 15:3-6). Посебно интересно тано о воскресение е Исусескере амалескоро, о Лазар, соске ов воскреснинѓа ле англо јавера мануша хем адава откеда штар диве сине ко гробо (Јован 11:39, 42). Чак е Исусескере душмања нашти сине те ховавен кај на случинѓа пе адава, хем адалеске керѓе плани те мударен хем е Исусе хем е Лазаре (Јован 11:47, 53; 12:9-11).

 И Библија сикавела кај е Девле иси ле моќ хем мангела те воскреснинел е мулен. О Семоќно Девел шај те сетинел пе ко секова детали башо секова мануш кова со мангела те воскреснинел ле (Јов 37:23; Матеј 10:30; Лука 20:37, 38). О Девел едвај аџикерела те воскреснинел е мулен. О следна лафија таро Јов сикавена адава: „Ка овел тут бари желба те дикхе адава со керѓан тле вастенцар“ (Јов 14:15).

Погрешно хаљојбе башо воскресение

 Погрешно хаљојбе: О воскресение значинела кај и душа хем о тело спојнена пе.

 Чачипе: И Библија сикавела кај душа тани и цело личност, а на само дело таро мануш кова со живинела пало лескоро мерибе (1. Мојсеева 2:7; Езекиел 18:4). Спрема адава, о воскресение на значинела кај и душа хем о тело е манушескоро со муло спојнена пе, него кај о мануш иранела пе ко живото.

 Погрешно хаљојбе: Несаве мануша со ка воскреснинен ка овен одма уништиме.

 Чачипе: И Библија вакерела кај ’окола со керѓе лошнипе ка воскреснинен баши осуда‘ (Јован 5:29). Ама, башо со ка овен судиме адала мануша? Башо адава со ка керен откеда ка воскреснинен, а на башо адава со керѓе англедер. О Исус вакерѓа: „О муле со ка шунен е Девлескере Чхавескоро гласо, хем окола со ка овен послушна, ка живинен“ (Јован 5:25). Сарине со ка живинен спрема адава со ка сикљовен откеда ка воскреснинен ка овен запишиме ко „свиток е животоскоро“ (Откровение 20:12, 13).

 Погрешно хаљојбе: О муле ка воскреснинен ко исто тело сар со сине кратко англедер те мерен.

 Чачипе: Пало мерибе, о тело е мулескоро распадинела пе хем иранела пе ко право (Проповедник 3:19, 20).