О свети дух тано и сила со користинела ла о Девел (Михеј 3:8; Лука 1:35). О Девел користинела пло духо аѓаар со дела пли енергија адари коте со ваљани те шај те керел адава со мангела (Псалм 104:30; 139:7).

 Ки Библија о хебрејско лафи башо „духо“ тано руах, а о грчко пневма. Најчесто акале лафенцар мислинела пе ки е Девлескири сила, јавере лафенцар ко свети дух (1. Мојсеева 1:2). Сепак, ки Библија акале лафен иси лен јавер да значење:

•   здив (Авакум 2:19; Откровение 13:15)

•   бавлал (1. Мојсеева 8:1; Јован 3:8)

•   животно сила (Јов 34:14, 15)

•   некаскоро нарав или стави (4. Мојсеева 14:24)

•   духовна суштествија сар, на пример, о Девел хем о ангелија (1. Царевите 22:21; Јован 4:24)

 Са акала значења сикавена ко нешто со мануш нашти те дикхел ле, ама о резултатија лендар дикхена пе. Јекх речнико спорединела е Девлескоро духо „бавлалаја соске на дикхела пе, нане материјално хем тани моќно“ (An Expository Dictionary of New Testament Words, таро W. E. Vine).

 Исто аѓаар, и Библија башо е Девлескоро духо вакерела кај тано лескере „васта“ или „наја“ (Псалм 8:3; 19:1; Лука 11:20; споредин хем Матеј 12:28). Исто сар јекх мајстори со користинела пе васта хем пе наја џикоте керела бути, аѓаар о Девел користинѓа пло духо башо буќа сар сој:

•   те створинел о универзум (Псалм 33.6; Исаија 66:1, 2)

•   те пишинел пе и Библија (2. Петрово 1:20, 21)

•   те поможинел пле слугенге таро пурано време те керен чудија хем те проповединен (Лука 4:18; Дела 1:8 1. Коринќаните 12:4-11)

•   те поможинел околенге со шунена ле те овен лен шукар особине (Галатите 5:22, 23)

О свети дух нане личност

 Адалеа со и Библија башо е Девлескоро духо вакерела кај тано сар „васта“, „наја“ или „здив“, сикавела кај о свети дух нане личност (2. Мојсеева 15:8, 10). Е мајсторескере васта нашти коркори пестар те функциониринен, бизи лескири годи хем тело. Слично, е Девлескоро свети дух влијајнела само кеда тано водимо таро Девел (Лука 11:13). Исто аѓаар, и Библија спорединела е Девлескоро духо пањеа хем поврзинела ле вераја хем пенџарибаја. Асавке споредбе сикавена кај о свети дух нане личност (Исаија 44:3; Дела 6:5; 2. Коринќаните 6:6).

 Ки Библија тано пишимо е Девлескоро анав — Јехова, хем лескере Чхавескоро — Исус Христос; ама нигде на пишинела кај о свети дух иси ле анав (Исаија 42:8; Лука 1:31). Англедер те овел мудардо баши пли вера, о христијани о Стефан добинѓа визија таро небо коте со дикхља само дује џенен, а на тринен. И Библија вакерела: „А ов, пхердо свети духоја, дикхља ко небо хем дикхља е Девлескири слава хем е Исусе сар терѓола тари е Девлескири десно страна“ (Дела 7:55). О Стефан дикхља акаја визија преку о свети дух, јавере лафенцар е Девлескири сила.

 Погрешно хаљојбе: О свети дух тано личност хем дело таро Тројство, сар со пишинела ко 1. Јованово 5:7, 8 ко Превод таро МПЦ.

 Чачипе: Ко 1. Јованово 5:7, 8 ко Превод таро МПЦ тане чхивде хем о лафија: ко небо о Дад, о Лафи хем о Свети Дух, сотрин тане јекх. Хем трин тане со сведочинена ки пхув. Ама о истражувачија откринѓе кај о апостол Јован на пишинѓа акала лафија хем спрема адава нане дело тари Библија. О професори Брус Мецгер пишинѓа: „Акала лафија тане додајме хем на ваљани те овен дело таро Нево Завет“ (A Textual Commentary on the Greek New Testament).

 Погрешно хаљојбе: И Библија дела манушикане карактеристике е свети духоске, а адава сикавела кај тано личност.

 Чачипе: Несаве библиска стихија дена манушикане карактеристике е свети духоске. На пример, о Исус башо свети дух вакерѓа кај тано „помошнико“ кова со ваљани сине те сикавел сој о грево, те водинел, те керел лафи, те шунел, те објавинел, те славинел хем те приминел (Јован 16:7-15). Ама адава на значинела кај о свети дух тано личност. Ки Библија исто аѓаар дена пе асавке карактеристике баши мудрост, о мерибе хем о грево (Изреки 1:20; Римјаните 5:17, 21). На пример, баши мудрост вакерела пе кај иси ла „постапке“ хем „чхаве“, а башо грево вакерела пе кај ховавела, мударела хем керела погрешна желбе (Матеј 11:19; Лука 7:35; Римјаните 7:8, 11).

 Погрешно хаљојбе: Адава со крстинаја амен ко анав е свети духоскоро сикавела кај тано личност.

 Чачипе: Понекогаш ки Библија користинела пе о лафи „анав“ те шај те истакнинел пе некаскири моќ хем авторитети (5. Мојсеева 18:5, 19-22; Естира 8:10). На пример, кеда вакерела пе „ко анав е законескоро“ на значинела кај о закони тано личност. Окова со крстинѓа пе „ко анав“ е свети духоскоро признајнела и моќ хем и улога со иси е свети духо ки е Девлескири намера (Матеј 28:19).

 Погрешно хаљојбе: Е Исусескере апостолија хем о јавера прва христијања верујнена сине кај о свети дух тано личност.

 Чачипе: Ни и Библија ни и историја на потврдинена акава. Ки Encyclopædia Britannica пишинела: „О свети дух сине дефиниримо сар Девел ... ко Вселенско собор ко Константинопол ко 381 берш“. Акава случинѓа пе повише таро 250 берш пало мерибе е последно апостолескоро.