СОСКЕ ТАНО ВАЖНО: Адалеске со напредујнѓа и технологија хем со иси са повише криминал, бут мануша почминѓе ко пумаре кхера те чхивен камере хем домофонија. Шај иси амен трема кеда ваљани те сведочина некаске со шај дикхела амен, а амен нашти дикхаја ле. О буќа со ка дикха лен потеле ка поможинен амен те овел амен побари доверба ки аменде кеда сведочинаја преку камера или домофони.

САР ТЕ КЕРА АДАВА:

• Ов позитивно. Бут станарија со иси лен камере или домофонија тане спремна те керен аменцар лафи.

• Ма бистре кај несаве камере почминена те сниминен тут панда англедер те ѕвонине, хем кај о станари шај дикхела тут хем шунела тут англедер те аве џи ко удар.

• Кеда о станари ка одговоринел туке, кер леа лафи преку камера или домофони сар те пхене кереа леа лично лафи. Ов природно хем аса. Вакер леске о иста буќа со планиринѓан те вакере леске кеда би пхравела сине туке о удар. Ако иси камера, ма ава бут паше узи лате. Ако о станари нане кхере, ма мукх леске гласовно порака ако иси асавки опција ко домофони.

• Исто аѓаар, ма бистре кај откеда ка завршинен о разговор, о станари шај панда те дикхел тут или те шунел тут.