1. Сар о Мојсеј сикавѓа доверба ко Јехова џикоте водинѓа е Израелцон кеда иклиле таро Египет?

 КО ЛИЛ Евреија пишинела башо бут мануша колен со сине лен вера ко Јехова. Јекх лендар тано о Мојсеј, коле со сине ле бут бари вера (Евр. 3:2-5; 11:23-25). Ов сикавѓа вера џикоте водинѓа е Израелцон кеда иклиле таро Египет. О Мојсеј на дозволинѓа о фараони хем лескири војска те даравкерен ле. Адалеске со сине ле доверба ко Јехова, ов водинѓа е народо таро Црвено Море, а покасно хем ки пустина (Евр. 11:27-29). Повише Израелција нашавѓе доверба кај о Јехова ка грижинел пе ленге, ама е Мојсее понадари да сине ле доверба ко пло Девел. Лескири вера на сине џабе соске о Девел чудоја денѓа лен хајбаске хем пани ки пустина коте со скоро ништо на бајрола сине a (2. Мој. 15:22-25; Пс. 78:23-25).

2. Соске о Девел пучља е Мојсее: „Зарем е Јеховаскоро вас уло добором кратко?“ (4. Мојсеева 11:21-23).

² Ама, иако е Мојсее сине ле силно вера, околу јекх берш откеда о Израелција чудоја сине спасиме таро Египет, ов почминѓа те сумнинел пе дали о Јехова ка шај те дел мас пле народоске сар со вакерѓа. О Мојсеј нашти сине те замислинел песке сар о Јехова ка дел доволно мас милиоња Израелцонге кола со сине ки пустина. Адалеске о Јехова пучља е Мојсее: „Зарем е Јеховаскоро вас уло добором кратко?“ (Читин 4. Мојсеева 11:21-23.) Акате е лафенцар „е Јеховаскоро вас“ мислинела пе ки е Девлескири сила. Јавере лафенцар, о Јехова пучља е Мојсее: „Дали чаче мислинеа кај нашти те керав адава со вакерава кај ка керав?“

3. Соске ваљани те размислина башо адава со случинѓа пе е Мојсееа хем е Израелцонцар?

³ Шај ту да некогаш пучљан тут дали о Јехова ка грижинел пе башо тле хем тле фамилијакере материјална потребе. Ки  акаја статија ка дикха соске е Мојсееске хем е Израелцонге фалинѓа доверба кај о Јехова ка грижинел пе башо ленгере потребе. О библиска начелија со ка дикха лен, ка поможинен аменге те бајрара амари доверба кај е Јеховаскоро вас никогаш нане добором кратко.

СИКЉОВ ТАРО МОЈСЕЈ ХЕМ ТАРО ИЗРАЕЛЦИЈА

4. Соске бут Израелција почминѓе те сумнинен пе дали о Јехова шај те грижинел пе башо ленгере материјална потребе?

⁴ Соске бут Израелција почминѓе те сумнине пе дали о Јехова шај те грижинел пе ленге? Те дикха о контекст. О Израелција хем бут јавера мануша кола со на сине Израелција, несаво време сине ки бари пустина џикоте патујнена сине таро Египет џи ки Ветими пхув (2. Мој. 12:38; 5. Мој. 8:15). Адаленге со на сине Израелција досадисалило те хан мана, а о исто случинѓа пе хем буте Израелцонцар кола со почминѓе те жалинен пе заедно ленцар (4. Мој. 11:4-6). Ола почминѓе те жалинен пало хајбе со сине лен ко Египет. Адалеске со сине ле притисок таро народо, о Мојсеј мислинѓа кај ов лично ваљани те грижинел пе те овел лен хајбаске (4. Мој. 11:13, 14).

5-6. Со шај те сикљова таро адава сар о јавера мануша влијајнѓе упро бут Израелција?

⁵ Најверојатно упро Израелција влијајнѓа о неблагодарно стави со сине е манушен кола со на сине Израелција. Упри аменде да шај те влијајнел о неблагодарно стави е јаверенгоро хем те почмина те на ова задоволна адалеа со о Јехова дела амен. Адава шај те случинел пе ако жалинаја пало адава со некогаш сине амен или ако оваја љубоморна е јаверенге башо адава со иси лен. Ама, ка ова посреќна ако сикљоваја те ова задоволна адалеа со иси амен.

⁶ О Израелција на ваљанѓе те бистрен кај о Девел ветинѓа ленге кај ка овен лен бут материјална буќа кеда ка ресен ко пумаро нево тхан живибаске. Адава ветување ваљани сине те исполнинел пе ки Ветими пхув, а на џикоте патујнена сине ки пустина. Слично, наместо те концентририна амен ко адава со нане амен акана, шукар тано те размислина башо адава со о Јехова ветинѓа кај ка дел амен ко нево свето. Исто аѓаар, шај те размислина башо несаве библиска стихија кола со ка поможинен амен те бајрара амари доверба ко Јехова.

7. Соске шај те ова сигурна кај е Јеховаскоро вас нане добором кратко?

⁷ Сепак, шај пучеа тут соске о Девел пучља е Мојсее: „Зарем е Јеховаскоро вас уло добором кратко?“ О Јехова шај мангља те поможинел е Мојсееске те размислинел на само башо адава кобор силно тано лескоро моќно вас, него хем башо адава џи кај шај те ресел. О Девел шај сине те дел бут мас е Израелцонге иако ола сине ки пустина. Ко крајо о Израелција шај сине пумаре јакхенцар те дикхен кај тано чаче адава со о Давид пишинѓа ле веконцар покасно: „Ка пружине тло вас, хем тло десно вас ка спасинел ман“ (Пс. 138:6, 7). Адалеске, кеда сием ки пхари ситуација на ваљани те сумнина амен кај о Јехова ка поможинел секоле јекхеске амендар, бизи разлика кај аракхљоваја.

8. Со ка поможинел аменге те на кера и исто грешка сар со керѓе бут џене таро адала со сине ки пустина? (Дикх хем и слика.)

⁸ Пало кратко време, о Јехова керѓа адава со ветинѓа, денѓа е народоске бут потполошке. Ама, о Израелција на сикавѓе благодарност е Девлеске башо акава чудо. Наместо адава, бут лендар уле алчна. Ола диве текваш, бизо те чхинавен, кхедена сине кобор со шај повише потполошке. О Јехова хољанѓа адаленге кола со себично мангена сине о  хајбе хем казнинѓа лен (4. Мој. 11:31-34). Шај бут те сикљова таро акава пример. Мора те пазина те на пера ки стапица те ова алчна. Бизи разлика дали сием барвале или чороле, ваљани најважно те овел аменге те кхеда „барвалипе ко небо“ адалеа со ка кера аменге паше амалипе е Јеховаја хем е Исусеа (Мат. 6:19, 20; Лука 16:9). Ако кераја адава, шај те ова сигурна кај о Јехова ка грижинел пе башо амаре материјална потребе.

9. Ко со шај те ова целосно увериме?

⁹ О Јехова тано спремно авдиве да те поможинел пле народоске. Сепак, адава на значинела кај никогаш нане те нашава нешто ко материјално поглед или кај никогаш нане те ачхова бизо хајбе. b Ама никогаш на ваљани те мислина кај о Јехова мукхља амен. Ов ка поможинел амен бизи разлика саво проблеми ка овел амен. Сар шај те сикава доверба кај о Јехова ка грижинел пе аменге? Те дикха дуј ситуацие: 1) кеда иси амен финансиска проблемија хем 2) кеда размислинаја дали ка овен амен доволно паре кеда ка пхујрова.

КЕДА ИСИ АМЕН ФИНАНСИСКА ПРОБЛЕМИЈА

10. Саве финансиска проблемија шај те овен амен?

¹⁰ Сар аваја попаше ко крајо акале светоскоро, добором повише шај те очекујна кај и економско ситуација ка овел са полошно. О политичка немирија, о војне, о природна катастрофе или неве пандемие шај те керен таро јекх пути те овен баре трошакија или палем шај те нашава амари бути, адава со иси амен или амаро кхер. Шај ка ваљани те аракха  неви бути ко тхан коте со живинаја, или ка ваљани амаре фамилијаја те селина амен ко јавер тхан те шај те грижина амен лаке. Со ка поможинел амен те ана одлуке кола со ка сикавен кај иси амен доверба ко Јехова?

11. Со ка поможинел туке те икљове ко крајо е финансиска проблеменцар? (Лука 12:29-31).

¹¹ Бут тано важно те вакере е Јеховаске со секиринела тут. Адава бут ка поможинел туке (Изр. 16:3). Молин е Јехова те дел тут и мудрост со ваљани туке те шај те ане шукар одлуке хем те поможинел тут те ачхове смиримо те шај те на секирине тут превише баши тли ситуација. (Читин Лука 12:29-31.) Ма чхинав те молине ле те поможинел туке те ове задоволно е основна буќенцар ко живото (1. Тим. 6:7, 8). Истражин ко амаре публикацие башо адава сар успешно те икљове ко крајо е финансиска проблеменцар. Буте џененге поможинѓе о статие хем о видеоклипија ки jw.org коленде со иси советија башо економска проблемија.

12. Кола пучиба шај те поможинен јекхе христијанеске те анел и најшукар одлука баши пли фамилија?

¹² Несаве прифатинѓе бути баши која со ваљани сине те селинен пе дур тари пли фамилија, ама покасно бут џене халиле кај адаја на сине мудро одлука. Англедер те прифатине несави неви бути, размислин на само со ка добине ко финансиско поглед него хем со ка нашаве ко духовно поглед (Лука 14:28). Пуч тут: „Сар ка влијајнел упро мло брако адава со ка овав дур таро мло брачно партнери? Дали ка шај те присуствујнав ко са о состанокија, те џав ки служба хем те дружинав ман е пхраленцар хем е пхењенцар?“ Ако иси тут чхаве, ваљани те пуче тут акава важно пучибе: „Сар ка воспитинав мле чхавен хем ка испрајнав лен ’сар со вакерела о Јехова‘ хем сар ка поможинав ленге ’те размислинен сар лесте‘ ако на сиум ленцар?“ (Еф. 6:4). Кеда ваљани те ане одлука, мукх те водинел тут е Јеховаскоро начин сар размислинела, а на адава со ка вакерен тли фамилија или о амала кола со на поштујнена о библиска начелија. c Е Тони, кова со живинела ки Западно Азија, сине ле некобор привлечна понуде баши бути ко странство. Ама откеда молинѓа пе башо адава хем керѓа лафи пле ромњаја, ов одлучинѓа те одбинел адала понуде хем те размислинел сар шај те трошинен похари. Авдиве о Тони вакерела: „Сине ман прилика те поможинав некобор манушенге те запознајнен е Јехова, а амаре чхаве бут мангена о чачипе хем мангена те служинен е Девлеске. Амари фамилија сиклили кај, са џикоте живинаја спрема о лафија таро Матеј 6:33, о Јехова ка грижинел пе аменге“.

КЕДА РАЗМИСЛИНАЈА ДАЛИ КА ОВЕН АМЕН ДОВОЛНО ПАРЕ КЕДА КА ПХУЈРОВА

13. Кола тане несаве буќа со шај те кера те шај те овен амен доволно паре кеда ка пхујрова?

¹³ Амари доверба ко Јехова шај те овел испитими исто аѓаар кеда размислинаја ки сави финансиско ситуација шај ка ова кеда ка пхујрова. И Библија поттикнинела амен вредно те кера бути те шај ки иднина те овел амен доволно ко финансиско поглед (Изр. 6:6-11). Разумно тано, кобор со мукхена амаре околностија, те чхива нешто ки страна баши иднина. Точно тано кај о паре џи негде заштитинена (Проп. 7:12). Ама никогаш на ваљани о паре те овен аменге о најважно нешто ко живото.

14. Сар шај те поможинел амен о стихо таро Евреија 13:5 кеда размислинаја дали ка овен амен доволно паре кеда ка пхујрова?

¹⁴ О Исус вакерѓа јекх парамис колатар со  шај те сикљол пе хем те дикхел пе кај нане мудро некој те кхедел барвалипе бизо те овел барвало англо Девел (Лука 12:16-21). Никој на џанела со ка анел о тајсутно диве (Изр. 23:4, 5; Јак. 4:13-15). Освен адава, сар следбеникија е Христосескере, мора те ова спремна те откажина амен таро са со иси амен те шај те ова лескере ученикија (Лука 14:33). Ко прво веко, о христијања тари Јудеја спремно откажинѓе пе таро са со сине лен (Евр. 10:34). Ко амаро време, бут пхраља хем пхења сине спремна те нашавен нешто ко финансиско поглед адалеске со на гласинѓе баши нијекх политичко партија (Отк. 13:16, 17). Со поможинѓа ленге те керен адава? Лен сине лен целосно доверба ко ветување е Јеховаскоро: „Никогаш нане те мукхав тут хем никогаш нане те иранав туке мо думо“. (Читин Евреија 13:5.) Адалеске, тари јекх страна кераја са со шај те овен амен доволно паре кеда ка пхујрова, а тари јавер страна иси амен целосно доверба кај о Јехова ка грижинел пе аменге ако случинела пе нешто со на очекујнаја.

15. Сар ваљани о родителија те дикхен ко пумаре чхаве? (Дикх хем и слика.)

¹⁵ Ко несаве културе, е брачна парен иси лен чхаве главно те шај те грижинен пе ленге финансиско кеда ола ка пхујровен. Ки несави смисла, ола ко пумаре чхаве дикхена сар некој со ка осигуринел лен ко материјално поглед. Ама и Библија вакерела кај о родителија  ваљани те грижинен пе башо потребе пумаре чхавенгере (2. Кор. 12:14). Џанѓола пе, кеда ка пхујрон, е родителенге шај ка ваљани несави практично помош хем бут чхаве радосно ка керен адава (1. Тим. 5:4). Ама е родителен колен со иси лен доверба ко Јехова хаљона кај и среќа на авела таро адава дали ка бајрарен пумаре чхавен те шај ола финансиски те грижинен пе ленге, него таро адава дали ка поможинен ленге те овен е Јеховаскере слуге (3. Јов. 4).

16. Сар шај о родителија те сикавен пумаре чхавен те шај коркори те грижинен пе башо пумаре потребе? (Ефешања 4:28).

¹⁶ Тумен о родителија, тумаре примереа сикавен тумаре чхавен те овел лен доверба ко Јехова џикоте поможинена лен те сикљон коркори те грижинен пе башо пумаре потребе ки иднина. Џикоте панда тане тикне, сикавен лен кобор тано корисно те овен буќарне (Изр. 29:21; читин Ефешања 4:28.) Џикоте бајрона, поможинен ленге те ден пумаро најшукар ки школа. Шукар тано о родителија те истражинен те шај те аракхен библиска начелија, а пало адава те користинен адала начелија те шај те поможинен пумаре чхавенге те анен мудра одлуке башо адава сави школа ка биринен. Адава ка поможинел е чхавенге те овен способна те грижинен пе башо пумаре потребе, ама исто аѓаар кобор со шај повише те учествујнен ки служба.

17. Ко со шај те ова сигурна?

¹⁷ Околен со иси лен доверба ко Јехова, шај те овен сигурна кај ов шај хем мангела те грижинел пе башо ленгере материјална потребе. Сар со аваја попаше џи ко крајо акале светоскоро, шај те очекујна кај амари доверба ко Јехова ка овел испитими. Ама бизи разлика со ка случинел пе, те овел амен доверба кај о Јехова ка користинел пли моќ те шај те грижинел пе аменге ко материјално поглед. Шај те ова сигурна кај е Јеховаскоро моќно вас никогаш нане те овел добором кратко хем кај ов секогаш ка поможинел аменге било коте те ова.