Бијандиљум ко 1948 берш, ки Холандија. Кеда сине ман јекх берш, ми фамилија селинѓа пе ко Сао Паоло (Бразил). Мле родителија редовно џана сине ки црква, хем исто аѓаар сар фамилија секоја рат читинаја сине и Библија. Ко 1959 берш, селинѓем амен панда јекх пути, ама акава пути ко САД, ки држава Масачусетс.

Ки амари фамилија сием сине офто џене хем адалеске мо дад керела сине бут бути те шај те грижинел пе аменге. Ов керѓа бути ко различна тхана. Патујнела сине сар продавачи, керѓа бути сар градежно работнико ко друмија хем керѓа бути ки јекх меѓународно авиокомпанија. Сарине тари фамилија сием сине бут бахтале кеда почминѓа те керел бути ки авиокомпанија, соске аѓаар шај сине бут те патујна.

Џикоте сиум сине ки средно школа, бут пути пучава ман сине: „Со ка керав мле животоја кеда ка бајровав?“ Несаве таро мле амала биринѓе те џан ко факултети, а јавера одлучинѓе те џан ки војска. Ама ме, на мангава сине те џав ки војска соске на свиџинела пе сине манге о насилство. Адалеске, одлучинѓум те џав ко факултети само те на џав ки војска. Ама мли најбари желба сине те поможинав е манушенге соске аѓаар мислинава сине кај ка овел ман смисла ко живото.

Кеда сиум сине ко факултети, бут интересинела ман сине и антропологија соске мангава сине те џанав котар авела о живото. Адатхе сикљоваја сине баши еволуција хем амендар очекујнела пе сине те верујна ки лате. Ама, несаве верувања на сине логична хем родела пе сине амендар те верујна ки ленде бизо нисаво доказ.

Ко часија коте со сиум сине присутно на сикљоваја сине начелија башо адава сој исправно а сој погрешно. Наместо адава, сикавена амен сине те кера са со шај само те ова успешна. Осетинава ман сине бахтало кеда сиум сине мле амаленцар ко забаве хем кеда пробинаја сине несаве дроге, ама адава на трајнѓа. Пучава ман сине: „Дали асавко живото иси ле смисла?“

Ко адава време селинѓум ман ко Бостон хем почминѓум адари те џав ко факултети. Те шај те платинав о факултети, керава сине бути кеда сине ман одмор тари школа. Хем адатхе ки бути прво пути аљум ко контакт јекхе Јеховаскере сведокоја. Мло колега кова со сине е Јеховаскоро сведоко објаснинела манге сине о пророштво таро Даниел 4 поглавје башо „ефта времија“ хем вакерѓа манге кај живинаја ко последна диве (Даниел 4:13-17). Тегани, ме халиљум кај ако продолжинава те керав леа лафи баши Библија ка почминав те верујнав ко адава хем ка ваљани те керав баре промене ко мло живото. Адалеске, керава сине са со шај те избегинав ле.

Ко факултети џава сине ко курсија кола со ваљани сине те спреминен ман баши доброволно бути ки Јужно Америка. Мислинѓум кај ако поможинава е јаверенге ко хуманитарно начин адава ка дел смисла ко мло живото. Ама пало адава халиљум кај чак адава на денѓа ман смисла ко мло живото. Сиум сине разочаримо хем адалеске чхинавѓум те џав ко факултети.

Ко мај 1970 берш селинѓум ман ко Амстердам (Холандија) хем адари керѓум бути ки исто авиокомпанија коте со мо дад керѓа бути. Акаја бути денѓа ман прилика те патујнав бут хем те џав чак ки Африка, ки Америка, ки Европа хем ки Азија. Сигате халиљум кај бизи разлика ки која пхув џава сине, ки секоја лендар сине лен баре проблемија хем изглединела сине кај никој нашти те решинел лен. Ме понадари да мангава сине те керав нешто важно ко мло живото, адалеске одлучинѓум те иранав ман ко САД хем те продолжинав е факултетеа ко Бостон.

Палем халиљум кај о часија ко факултети на поможинена манге сине те аракхав о одговорија ко мле пучиба башо живото. На џанава сине со те керав, адалеске пучљум јекхе таро мле професорија башо совет. Ов изненадинѓа ман кеда вакерѓа манге: „Соске продолжинеа те студирине? Чхинав е факултетеа!“ На ваљани сине те вакерел манге дуј пути. Адалеске, мукхљум о факултети хем никогаш на иранѓум ман више.

Адалеске со ме понадари да на аракхљум и смисла ко мло живото, одлучинѓум те кхував ки јекх група која со сине против о државно систем хем изглединела сине кај боринела пе башо мир хем мангипе. Несаве амала хем ме, патујнѓем о државе ко САД, џи теле ко Акапулко (Мексико). Ко адава време сине бут хипи-групе хем амен сием сине машкар ленде. Изглединена сине кај нане лен проблемија хем секирацие. Ама, халиљум кај ленгоро начин сар живинена на анела сине нисави смисла хем бахталипе. Уствари, дикхљум кај бут џене лендар на сине поштена хем верна.

Ко адава време палем почминѓум те размислинав башо нешто со мангава сине панда сар чхаво.  Мангава сине те патујнав бродеа ко море, ама на сар морнари него сар капетани. Ама адава шај те керав ле сине само ако иси ман мло броди. Адалеске со ме амале е Томе сине ле исто желба, одлучинѓем заедно те патујна бродеа цело свето. Мангљум те аракхав јекх рајско остров коте со ка овав сине слободно таро систем е светоскоро.

О Том хем ме гелем ко Аренис де Мар, паше узи Барселона (Шпанија). Адари кинѓем јекх броди кова со сине скоро ења текваш метре дугачко хем викинела пе сине Лигра. Почминѓем те средина ле те шај те овел безбедно кеда ка патујна леа. Адалеске со нигде на сиѓараја сине, амен икалѓем о мотори таро броди хем адава тхан користинѓем ле те шај те чхива повише пани пијбаске. Те шај полокхе те кхува е бродеа ко тикно пристаниште, кинѓем дуј веслија со сине дугачка по панџ метре. Пало адава, почминѓем те патујна хем амари цел сине о Сејшелска островија, ко Индиско океани. Амаро плани сине те патујна узо западно брего тари Африка хем околу о ’Рт на Добрата Надеж (Јужно Африка). Користинаја сине о ѕвезде, несаве мапе, лила хем едноставна инструментија кола со поможинѓе аменге те патујна ко исправно правцо. Сиум сине воодушевимо кобор прецизно шај сине те одредина адале инструментенцар коте аракхљоваја ко моменти.

Сигате халилем кај амаро пурано броди таро каш нашти те издржинел ко океани. Секова саати по 22 литре пани кхувела сине ки лесте. Сар со спомнинѓум ко почеток, кеда сине јекх бура бут дарандиљум хем тегани пало бут берша прво пути молинѓум ман хем ветинѓум е Девлеске кај ако ачховава џивдо, ка трудинав ман те запознајнав ле. И бура ачхили хем ме ачхиљум ко мло лафи.

Почминѓум те читинав и Библија џикоте патујнаја сине ко море. Замислинен само кобор уживинава сине те бешав ко мло броди, дур таро копно, ко Средоземно море. Шај сине те дикхав различна шуже мачхе, делфинија хем о море кова со на сине ле крајо. Раќате сиум сине воодушевимо таро бут ѕвезде со дикхава лен сине хем адава керѓа ман панда поуверимо кај иси Девел кова со интересинела пе башо мануша.

Пало некобор курке ко море, реслем ко пристаниште ко Аликанте (Шпанија), коте со пробинѓем те бикина амаро броди те шај те кина јавер пошужо. Ама сар со претпоставинѓем, на сине локхо те аракха мануше со ка мангел те кинел јекх броди сој пурано, бизо мотори хем со приминела пани. Ама адава сине манге бут шукар време те читинав и Библија.

Кобор повише читинава сине и Библија, добором повише почминава сине те хаљовав кај ој тани лил со шај те поможинел аменге те ова бахтале ко живото. Воодушевимо сиум сине таро адава кобор јасно и Библија керела лафи башо адава кај ваљани те живина јекх чисто хем морално живото. Хем пучава ман сине соске бут мануша, машкар кола сиум сине ме да, дикхена пе сине сар христијања а сепак на керена адава со пишинела ки Библија.

Сиум сине одлучно те керав баре промене ко мло живото хем адалеске чхинавѓум те лав дрога. Мислинава сине манге кај мора те овен мануша кола со живинена спрема о библиска мерилија хем мангава сине те запознајнав лен. Тегани, дујто пути молинѓум ман е Девлеске те поможинел манге те аракхав лен.

Манге сине логично те испитинав секоја јекх религија, јекх пало јекх, џикоте на аракхава сине и чачутни. Кеда пхирава сине о улице ко Аликанте, дикхљум бут религиозна објектија. Ама адалеске со повише лендар сине лен идолија, џанљум кај ола нашти те овен дело тари чачутни религија.

 Јекх недела палоручко сиум сине узи јекх планина котар со дикхела пе сине о пристаниште хем читинава сине Јаков 2:1-5, кова со керела сине лафи башо адава кај на ваљани те сикава повише внимание околенге сој барвале. Џикоте иранава ман сине ко броди, накхљум таро јекх тхан кова со дикхјола сине манге сар религиозно објекти хем упро удар таро адава објекти сине јекх знако коте со пишинела сине: „Е Јеховаскере сведоконгири дворана“.

Мислинѓум манге: „Ај те испитинав акале манушен хем те дикхав сар ка понашинен пе манцар“. Адалеске кхувѓум ки дворана пернанго, брадаја хем пхаравде фармеркенцар. О редари чхивѓа ман те бешав узи јекх попхури ромни која со љубезно поможинѓа манге те аракхав о стихија ки Библија кола со вакерела лен сине о говорнико. Пало состанок, сиум сине бут изненадимо адалеске со сарине сине бут љубезна манцар хем поздравинѓе пе манцар. Јекх џено лендар канинѓа ман ко пло кхер те шај те кера лафи баши Библија. Ама адалеске со ме панда на завршинѓум читибаја и Библија вакерѓум леске: „Ка вакерав туке кеда ка овав спремно“. Ама таро адава време ме почминѓум редовно те џав ко состанокија.

Пало некобор курке, гељум ко мануш кова со канинѓа ман хем ов одговоринѓа манге ко мле библиска пучиба. Јекх курко пало адава, денѓа ман јекх торба која со сине пхерди шуже шеенцар. Ов пхенѓа манге кај англедер акала шеја пхиравела лен сине јекх мануш кова со сине ко затвор соске сине послушно ки заповед те манга амен јекх јекхеа хем те на учествујна ко војне (Иса. 2:4; Јован 13:34, 35). Акана сиум сине сигурно кај аракхљум адава со родава сине — мануша кола со применинена о јасна библиска мерилија башо чисто морално живото. Мли цел на сине више те аракхав рајско остров, него акана пошукар те хаљовав и Библија. Адалеске иранѓум ман ки Холандија.

Ваљанѓе манге штар диве те ресав ко Гронинген (Холандија). Адари, ваљани сине те почминав те керав бути те шај те овел ман котар те живинав. Гељум ки јекх столарско дуќана хем денѓе ман те пхерав молба коте со јекх таро пучиба сине: „Ки сави религија сиан?“ Пишинѓум: „Јеховаскере сведокија“. Кеда о газда читинѓа адава, приметинѓум кај на свиџинѓа пе леске. Ов вакерѓа: „Ка јавинав ман туке“. Ама ов никогаш на јавинѓа пе манге.

Гељум ко јекх јавер столари хем пучљум ле дали ваљани леске работнико. Ов пучља ман дали иси ман завршимо школа башо акава занати хем со бути керѓум англедер. Објаснинѓум леске кај иси ман искуство те керав бути каштеа соске поправинава сине мло броди. Изненадинѓум ман кеда  вакерѓа манге: „Шај те почмине таро авдиве те кере бути, ама иси јекх услов, ма те кере манге проблемија ки бути соске ме сиум јекх таро е Јеховаскере сведокија хем живинава спрема о библиска мерилија“. Сиум сине бут изненадимо хем пхенѓум леске: „Па ме да сиум исто“. Џанѓола пе, башо мле баре бала хем и брада ов џанља кај ме на сиум хем адалеске вакерѓа: „Тегани ме ка проучинав туја и Библија“. Ме одма прифатинѓум адава. Акана уло манге јасно соске о јавер мануш никогаш на јавинѓа пе манге баши адаја бути. О Јехова денѓа ман адава со родинѓум (Пс. 37:4). Керѓум бути ко пхрал јекх берш. Ко адава време ов проучинѓа и Библија манцар хем пало адава крстинѓум ман ко јануари 1974 берш.

Пало јекх масек, почминѓум е пионерско службаја која со керѓа ман бут бахтало. О следно масек, селинѓум ман ко Амстердам те шај те поможинав ки неви шпанско група. Сиум сине бут бахтало со шај сине те водинав библиска курсија ки шпанско хем португалско чхиб. Ко мај 1975 берш сине ман и чест те почминав те служинав сар специјално пионери.

Јекх диве и пхен и Инеке, која со сине специјално пионерка, али ко амаро состанок те шај лакири интересентка, која со сине тари Боливија, те запознајнел пхрален хем пхењен кола со керена лафи ки шпанско чхиб. И Инеке хем ме одлучинѓем те запознајна амен преку писмија, хем аѓаар дознајнѓем кај иси амен иста целија. Лелем амен ко 1976 берш хем продолжинѓем те служина сар специјална пионерија џи ко 1982 берш кеда сием сине каниме те џа ко 73 класи ки школа Гилеад. Сием сине бут изненадиме хем бахтале кеда бичхалѓе амен те џа те служина ки источно Африка, коте со сием сине панџ берш ки Момбаса (Кенија). Ко 1987 берш, добинѓем јавер доделба ки Танзанија, коте со амаре активностија на сине више забраниме. Адатхе ачхилем 26 берш хем пало адава иранѓем амен ки Кенија.

Адава со поможинаја сине понизна манушенге те сикљовен баши Библија, денѓа амен чачутни смисла ко живото. На пример, мло прво библиско курси ки Момбаса сине јекхе манушеа со аракхљум ле џикоте сиум сине ки служба. Откеда нудинѓум леске дуј списанија, ов вакерѓа: „Кеда ка завршинав читибаја акала, пало адава со ваљани те керав?“ О следно курко почминѓем те проучина и Библија е лилеа Ти можеш засекогаш да живееш во рајот на Земјата кова со сигенде сине преведимо ки чхиб свахили. Ов крстинѓа пе јекх берш пало адава хем почминѓа е општо пионерско службаја. Таро адава време, ов хем лескири ромни поможинѓе скоро шеле манушенге те ден завет е Јеховаске хем те крстинен пе.

Кеда прво пути халиљум и смисла е животоскири, осетинѓум ман сар о трговцо со аракхља скапоцено бисери хем на мангља те нашавел ле (Мат. 13:45, 46). Мангљум те користинав мло живото, аѓаар со ка поможинав е јаверенге те аракхен и чачутни смисла ко живото. Ме хем мли ромни лично дикхлем сар о Јехова поможинела пле народоске те живинен смисловно живото.