О Жак хем и Мари-Лин тане заедно ки полновремено служба таро 1988 берш. Ола тане пенџарде пало адава со шај те прилагодинен пе ко неве околностија, хем џи акана прифатинѓе те служинен ко разна тхана ко Гваделуп хем ки Француско Гвајана. О солдуј пхувја акана надглединела и подружница ки Франција. Те пуча лен некобор пучиба.

Со поттикнинѓа тумен те почминен е полновремено службаја?

Мари-Лин: Панда сар тикни, џикоте живинава сине ко Гваделуп, бут пути проповединава сине по цело диве заедно ме дајаја, која со ревно служинела сине е Јеховаске. Адалеске со мангава е манушен, само со завршинѓум е школаја ко 1985 берш, одма почминѓум е пионерско службаја.

Жак: Сар терно, сиум сине узо полновремена објавителија кола со бут мангена сине и служба. Џикоте сиум сине ко распуст, обично сиум сине помошно пионери. Ко викендија, понекогаш џаја сине автобусеа ко подрачје коте со служинена сине пионерија. Цело диве проповединаја сине, хем ко крајо џаја сине ки плажа. Адала диве чаче сине бут шуже!

Кратко откеда ме хем и Мари-Лин лелем амен ко 1988 берш, вакерѓум манге: „Акана нане амен нисаве обврске. Соске те на служина ки побари мера?“ Адалеске ме да уљум пионери. Јекх берш пало адава, откеда завршинѓа и пионерско школа, сием сине именујме сар специјална пионерија. Откеда служинѓем ко некобор тхана ко Гваделуп, сием сине замолиме те селина амен ки Француско Гвајана.

Ко са акала берша сиен сине бичхалде те служинен ко бут тхана. Со поможинѓа туменге те прилагодинен тумен ко неве околностија? 

Мари-Лин: О пхраља таро Бетел ки Француско Гвајана џанена сине кај о стихо таро Исаија 6:8 тано аменге омилено. Адалеске, кеда јавинена пе сине аменге, бут пути ки шала ка пучен амен сине: „Кова сине тумаро омилено стихо?“ Адалеске со сине аменге јасно кај аџикерела амен неви задача, одма одговоринаја сине: „Аке сием амен! Бичхален амен!“

 Никогаш на манглем те споредина о задаче со сине амен англедер е неве задаченцар соске адава шај те чхинавел амен те уживина ки неви задача. Исто аѓаар, само со ка реса сине ко нево собрание, трудинаја амен сине пошукар те пенџара е пхрален хем е пхењен.

Жак: Англедер, несаве пхраља хем пхења со мангена амен пробинена сине те убединен амен те на селина амен соске мангле те ова паше узи ленде. Ама, кеда гелем аменге таро Гваделуп, јекх пхрал сетинкерѓа амен ко е Исусескере лафија сој пишиме ко Матеј 13:38: „И нива тани о свето“. Адалеске, кеда џаја ки јавер задача, на бистраја кај, било кај те ова, служинаја ки исто нива. Хем кеда ка дикха, о подрачје хем о мануша тане најважна таро са!

Кеда ресаја ко нево подрачје, шај те дикха кај о мануша адари да живинена нормално живото. Адалеске, трудинаја амен те прилагодина амен ко ленгоро начин сар живинена. Понекогаш о хајбе тано појавер. Иако пазинаја ки хигиена, хаја адава со хана ола хем пијаја адава со ола пиена. Трудинаја амен те кера позитивно лафи баши секоја задача.

Мари-Лин: Исто аѓаар, сикљоваја бут таро пхраља адатхар. Сетинава ман со случинѓа пе кратко откеда реслем ки Француско Гвајана. Дела песке сине бут, хем адалеске мислинѓем кај мора те аџикера те ачхол о бршим па те џа ки служба. Ама, тегани јекх пхен вакерѓа манге: „Ајде, џаја?“ А ме сиум сине изненадими хем пучљум: „Сар?“ Ој одговоринѓа манге: „Ле то чадори хем ка џа точаконцар“. Хем аѓаар, сиклиљум сар те икерав чадори џикоте возинава точако. Те на сикљовав сине адава, нашти те проповединав сине ки сезона кеда дела сине бршим.

Џи акана селинѓен тумен околу 15 пути. Иси ли тумен несаве предлогија е пхраленге со размислинена те селинен пе?

Мари-Лин: О селибе нане локхи бути. Сепак, бут тано важно те аракхе тхан коте со ка осетине тут удобно кеда ка иране тут тари служба.

Жак: Обично макхава о собе кеда ка селина амен ко нево кхер. Ако џанена кај нане бут време те ачхова, о пхраља тари подружница понекогаш вакерена: „Жак, ма мучин тут те макхе акава пути!“

И Мари-Лин тани експерти башо пакујбе. Ој пакујнела са ко кутие хем чхивела ленге лепенке, сар на пример „купатило“, „спална“ или „кујна“. Аѓаар, кеда селинаја амен ко јавер кхер, одма  шај те чхива о кутие коте со ваљани. И Мари-Лин керела списако таро буќа со иси ки секоја кутија те шај посигате те аракха адава со ваљани аменге.

Мари-Лин: Адалеске со сиклилем шукар те организирина амен, шај одма те почмина е службаја.

Сар организиринена тумаро време те шај целосно те керен тумари служба? (2. Тим. 4:5).

Мари-Лин: Понеделник одморинаја хем спреминаја амен башо состанок. Таро вторник почминаја е службаја.

Жак: Иако секова масек ваљани те накхава одредена саатија ки служба, на концентриринаја амен ко адава. И служба аменге ко прво тхан ко живото. Откеда ка икљова кхерал па са џикоте на иранаја амен, трудинаја амен те кера лафи секоле јекхеа со ка аракха ле.

Мари-Лин: На пример, кеда џаја ко излет, секогаш лава манцар трактатија. Несаве мануша авена хем родена публикацие иако на вакерѓем ленге кај сием е Јеховаскере сведокија. Адалеске секогаш пазинаја сар ка урава амен хем сар ка понашина амен. О мануша приметинена адава.

Жак: Сведочинаја исто адалеа со сием шукар комшие. Фрдава ленгоро ѓубре, кхедава о фрдимо ѓубре таро ходнико хем чистинава о листија ко дворо. О комшие дикхена адава хем понекогаш пучена: „Иси ли тумен јекх Библија манге?“

Бут пути проповединѓен ко тхана коте со пхаре ресела пе. Сетинена ли тумен ко нешто посебно таро адала патујба?

Жак: Ки Гвајана, ко несаве тхана тано пхаре те ресел пе. Понекогаш мора те накхава по 600 километре ко курко таро друмија сој бут лошна. Никогаш нане те бистра и посета ко гав Сент Ели, ки амазонско прашума. Ваљани сине аменге некобор саатија те реса џи адари хем користинаја сине џипи хем кану. Повише џене таро адала со живинена сине адари рандена сине те аракхен злато. Несаве џене сине добором благодарна башо публикацие со денѓем лен со чак денѓе амен тикне грутке злато сар доброволно прилог! И рат мукхлем ленге јекх филми тари амари организација. Бут џене але те дикхен ле.

Мари-Лин: Пало некобор берша, о Жак сине замолимо те икерел о говор баши Спомен-свеченост ко гав Камопи. Те шај ресаја џи адари, мора сине те патујна штар саатија ко кану ки река Ојапок. Адава сине интересно искуство.

Жак: Ко тхана коте со сине поплитко, о пани џала сине бут сигате хем сине опасно. Кеда ка дикхе адава чаче ачховеа бизо лафија. Окова со управинела о кану мора шукар те џанел пли бути. Сепак, адава со доживинѓем нашти бистрела пе. Иако ко гав сине само шов пхраља хем пхења, околу 50 мануша сине присутна ки Спомен-свеченост, машкар кола сине хем несаве племија таро адава тхан.

Мари-Лин: Асавке скапоцена искуствија шај те овен са е тернен кола со мангена панда повише те ден пе е Јеховаске. Кеда ка аракхљове ко асавке околностија, мора те сикаве доверба ки лесте, хем тли вера ка овел позорали. Бут често дикхаја сар о Јехова водинела о буќа.

Сиклилен некобор чхибја. Дали туменге локхо те сикљовен неве чхибја?

Жак: Ни хари на. Сиклиљум адала чхибја те шај те проповединав хем те поможинав ко собрание. Мора сине те водинав о Проучибе и Стражарско кула ки сранантонго * панда англедер те овел ман читибе е Библијакоро! Пучљум јекхе пхрале дали сине шукар. А ов вакерѓа манге: „На халилем баш са со вакерѓан, ама на сине лошно“. О чхаве бут поможинѓе манге. Ола на сине сар о возрасна, ола на лаџана сине те вакерен манге кеда ка керав сине грешка. Сиклиљум бут лендар.

Мари-Лин: Ко јекх подрачје, сине ман библиска курсија ки француско, португалско хем сранантонго чхиб. Кеда ваљани сине ко јекх диве те водинав некобор библиска курсија, јекх пхен денѓа ман предлог прво те почминав е чхибјаја со сине манге најпхари, хем те завршинав е чхибјаја со сине манге најлокхи. Башо кратко време халиљум кобор мудро сине лакоро совет.

Јекх диве водинѓум библиско курси ко сранантонго, а пало адава ко португалско. Кеда гелем ко  дујто библиско курси, и пхен со сине манцар вакерѓа манге: „Мари-Лин, мислинава кај ка овел амен проблеми!“ Халиљум кај акале џувљаја, која со сине Бразилка, почминѓум те керав лафи ки сранантонго наместо ки португалско чхиб!

О пхраља хем о пхења таро тхана коте со служинѓен бут мангена тумен. Со поможинѓа туменге те овен ленцар паше?

Жак: Ко Изреки 11:25 пишинела кај окова со дарежливо дела ка овел успешно. Амен спремно мангаја те накхава време е јаверенцар хем те кера шукар буќа башо јавера. Кеда ваљани те керел пе нешто ки дворана, несаве вакерена манге: „Мукх, адава ваљани те керен о објавителија“. Тегани вакерава ленге: „Ме да сиум објавители. Адалеске, ако нешто ваљани те керел пе, мангава ме да те поможинав“. Иако секаске амендар понекогаш ваљани аменге време баши аменде, трудинаја амен адава те на чхинавел амен те кера шукарипе е јаверенге.

Мари-Лин: Трудинаја амен те сикава искрено интерес спрема о пхраља хем о пхења. Аѓаар џанаја кеда ка ваљани некој те поможинел ленге те аракхел е чхавен или те лел лен тари школа. Тегани шај кераја промене ко амаро плани те шај те поможина ленге. Аѓаар оваја попаше е јаверенцар, хем ола џанена кај шај те роден амендар помош ко секова време.

Саве берекетија добинѓен башо адава со служинена адари коте со иси побари потреба таро објавителија?

Жак: И полновремено служба керѓа пошужо амаро живото. Адалеске со често проповединаја ки природа, иси амен прилика те уживина ко буќа со створинѓа о Јехова. Иако нане секогаш локхо, иси амен андруно мир адалеске со џанаја кај, коте било те ова, е Девлескоро народо ка поможинел аменге.

Кеда сиум сине терно, сиум сине ко затвор ки Француско Гвајана адалеске со одбинѓум те служинав војска. Никогаш на мислинѓум кај јекх диве ка иранав ман адари сар мисионери хем кај ка посетинав адален сој пханле ко затвор те шај те проповединав ленге. О Јехова чаче спремно дела амен берекетија!

Мари-Лин: Најбахтали сиум кеда шај те керав нешто е јаверенге. Бут сием бахтале со служинаја е Јеховаске. Адава поможинела аменге да те ова попаше сар ром хем ромни. Понекогаш, кеда о Жак ка пучел ман дали шај те викина ко гости несаве брачно паре со накхела таро пхаро периоди, вакерава леске: „Само со мислинѓум о исто!“ Бут често случинела пе те мислина ко иста буќа.

Жак: Англедер некобор берша, аракхле манге рако ки простата. Иако и Мари-Лин на мангела те шунел акава, вакерѓум лаке: „Душо, ме на сиум панда пхуро, ама ако башо кратко време мерава, џанава кај користинѓум мло живото те керав нешто со чаче иси ле вредност — те служинав е Јеховаске“ (1. Мој. 25:8).

Мари-Лин: О Јехова пхравѓа аменге бут удара хем дозволинѓа аменге те служина ко начинија со нашти сине ни те замислина лен аменге. Амаро живото сине пхердо шуже буќенцар. Баре довербаја ко Девел, ка џа сегде коте со ка бичхалел амен лескири организација!