1. Ко со мислинаја кеда користинаја о лафи „чачипе“?

„САР дознајнѓан о чачипе?“ „Дали бариљан ко чачипе?“ „Кобор време сиан ко чачипе?“ Веројатно некој пучља тут акала пучиба или, палем ту пучљан е јаверен. Ама, ко со мислинаја кеда користинаја о лафи „чачипе“? Обично мислинаја ко амаре верувања, ко начин сар обожавинаја е Девле хем ко начин сар живинаја. Окола сој тане „ко чачипе“ џанена со сикавела и Библија хем живинена спрема о библиска начелија. Адалеске, ола тане ослободиме таро ховавне верска сикљојба хем живинена о најшукар живото со шај те живинел јекх несовршено мануш (Јован 8:32).

2. Спрема Јован 13:34, 35, со шај некас ко почеток те привлечинел ко чачипе?

² Со привлечинѓа тут ко чачипе ко почеток? Дали адава сине о шукар понашибе е Јеховаскере народоскоро? (1. Пет. 2:12). Или шај о мангипе со сикавена ле спрема о јавера? Бут џене осетинена адава кеда прво пути авена ко состанок хем памтинена адава мангипе повише него адава со сине вакердо ко состанок. Адава на изненадинела амен соске о Исус вакерѓа кај о мангипе ка овел и главно бути пали која со ка овен пенџарде лескере ученикија. (Читин Јован 13:34, 35.) Ама, те шај те овел тут зорали вера, иси панда нешто со ваљани те кере.

3. Со шај те случинел пе ако тли вера темелинела пе само ко адава со дикхеа кај е Јеховаскере слуге сикавена мангипе јекх јекхеске?

³ На ваљани те прифатине о чачипе само адалеске со дикхеа кај е Јеховаскере слуге сикавена мангипе јекх јекхеске. Соске? Адалеске со, ако тли вера темелинела пе само ко адава мангипе, локхе ка нашаве ла. На пример, со ако несаво пхрал, чак шај несаво старешина или пионери, керела несаво сериозно грево? Или со ако несаво  пхрал или пхен поврединела тут? Со ако некој овела отпаднико хем почминела те вакерел кај нане амен о чачипе? Асавке буќа шај те сопкинен тут хем те чхинавен тут те служине е Јеховаске. Значи, ако мангеа те градине туке зорали вера, ој мора те темелинел пе ко тло лично однос е Девлеа. Ако темелинела пе само ко адава сар понашинена пе о јавера мануша, тли вера нане те овел стабилно. Освен адава, на ваљани те градине тли вера само ковле материјаленцар, сар сој о чувствија хем о емоцие. Бут тано важно хор те проучине и Библија, те хаљове адава со сикљовеа, хем те истражине те шај те уверине тут кај адава со сикљовеа тано о чачипе башо Јехова (Рим. 12:2).

4. Спрема Матеј 13:3-6, 20, 21, со случинела пе несавенцар кеда ленгири вера тани испитими?

⁴ О Исус вакерѓа кај несаве ка прифатинен о чачипе „бахталипаја“, ама кеда ленгири вера ка овел испитими, ој ка слабонел хем ка сопкинен пе. (Читин Матеј 13:3-6, 20, 21.) Асавке шај на халиле кај окола со ка слединен е Исусе ка овен лен пхарипа (Мат. 16:24). Или, шај мислинѓе, кај ако овена христијања, нане те овен лен нисаве секирацие хем пхарипа, него само берекетија. Ама, ко авдисутно свето нашти те на овен амен проблемија. О околностија шај те менинен пе, хем адалеске несаво време амаро бахталипе шај те тикњол (Пс. 6:6; Проп. 9:11).

5. Сар побаро дело таро амаре пхраља хем пхења сикавена кај тане увериме кај аракхле о чачипе?

⁵ Побаро дело таро амаре пхраља хем пхења сикавена кај тане увериме кај аракхле о чачипе. Сар? Аѓаар со ленгири вера на слабонела ако несаво пхрал поврединела лен, или палем, пхаѓела о библиска начелија (Пс. 119:165). Секова пути кеда иси лен испит, ленгири вера овела посилно, а на послабо (Јак. 1:2-4). Сар шај ту да те градине асавки зорали вера?

6. Упро со градинѓе пли вера о христијања ко прво веко?

⁶ Адава со о христијања ко прво веко пенџарена сине шукар о света списија хем о сикљојба таро Исус, јавере лафенцар „о чачипе е шукар хаберескоро“, поможинѓа ленге те градинен пли вера (Гал. 2:5). Ко акава чачипа тане вклучиме са о сикљојба коленде со верујнаја сар христијања, машкар коте сој хем адава со џанаја баши откупно жртва е Исусескири хем башо лескоро воскресение. О апостол Павле сине уверимо кај акала сикљојба тане чачутне. Соске вакераја акава? Адалеске со ов внимателно проучинела сине о списија хем користинела лен сине те шај те докажинел кај о Христос ваљанѓа „те цидел муке хем те уштел таро муле“ (Дела 17:2, 3). О ученикија таро прво веко прифатинѓе адала сикљојба хем сине лен доверба кај о свети дух ка поможинел ленге те хаљовен е Девлескоро Лафи. Ола проучинена сине те шај те уверинен пе кај акала сикљојба темелинена пе ко Писмија (Дела 17:11, 12; Евр. 5:14). На градинѓе пли вера само ко чувствија хем ко емоцие, хем на служинена сине е Јеховаске само адалеске со сине ленге шукар те дружинен пе пле е пхраленцар хем е пхењенцар. Наместо адава, сине лен зорали вера адалеске со шукар пенџарена сине е Девле (Кол. 1:9, 10).

7. Сар амари зорали вера ко библиско чачипе шај те поможинел аменге?

⁷ О чачипа таро е Девлескоро Лафи на менинена пе (Пс. 119:160). На пример, ола на менинена пе ако несаво пхрал вреџинела амен или керела сериозно грево. Исто аѓаар, на менинена пе кеда доживинаја неволје. Адалеске ваљани шукар те пенџара о библиска сикљојба хем те ова увериме кај ола тане чачутне. Аѓаар, кеда ка аракхљова ко испит, амари вера која со темелинела пе ко библиско чачипе ка овел сар зорали котва која со  икерела о броди ко јекх тхан чак кеда иси силно бура. Сар шај панда повише те уверине тут кај адава ко со верујнеа тано чаче?

8. Спрема 2. Тимотеј 3:14, 15, сар о Тимотеј уверинѓа пе кај аракхља о чачипе?

⁸ О Тимотеј сине уверимо кај аракхља о чачипе. Сар ало џи ко адава заклучок? (Читин 2. Тимотеј 3:14, 15.) Лескири дај хем лескири баба сине о прва кола со сикавѓе ле башо „света списија“. Ама, сигурно ов да коркори одвојнѓа време хем трудинѓа пе те проучинел адала лила. Адалеске, ов „уверинѓа пе“ кај адава сој тано пишимо ки ленде тано о чачипе. Покасно о Тимотеј, лескири дај хем лескири баба дознајнѓе о христијанска сикљојба. Сигурно, о мангипе со сикавена ле сине е Исусескере ученикија мукхле силно впечаток е Тимотееске. Ов бут мангела сине те дружинел пе пле духовно пхраленцар хем пхењенцар, хем те грижинел пе ленге (Фил. 2:19, 20). Сепак, ов на темелинѓа пли вера ко мангипе спрема о мануша, него ко фактија кола со поможинѓе леске те овел попаше е Јеховаја. Кеда проучинеа и Библија, ту да мора коркори логично те размислине хем те ане заклучок башо адава со сикљовеа башо Девел.

9. Ко кола трин основна чачипа ваљани те уверине тут?

⁹ Најангле, ваљани те уверине тут ко најхари трин основна чачипа. Прво, ваљани те уверине тут кај о Јехова створинѓа са (2. Мој. 3:14, 15; Евр. 3:4; Отк. 4:11). Дујто, мора те докажине туке кај и Библија тани хабери таро Девел башо мануша (2. Тим. 3:16, 17). Хем трито, ваљани те ове сигурно кај е Јехова иси ле организиримо народо кова со славинела ле аѓаар сој водимо таро Христос, хем кај адава народо тане е Јеховаскере сведокија (Иса. 43:10-12; Јован 14:6; Дела 15:14). Те шај те уверине тут ко акала трин основна чачипа на родела пе тутар те џане секова детали баши Библија. Тли цел кеда проучинеа ваљани те овел те користине тли годи те шај панда повише те уверине тут кај иси тут о чачипе (Рим. 12:1).

10. Освен со пенџараја о чачипе, со јавер ваљани те кера?

¹⁰ Откеда коркори ка уверине тут ко акала трин основна чачипа башо Девел, баши Библија хем башо е Девлескоро народо, ваљани те сикљове те користине е Јеховаскоро Лафи те шај те докажине акала чачипа е јаверенге. Соске? Адалеске со, сар христијања, иси амен одговорност те вакера о чачипа со дознајнѓем лен околенге сој тане спремна те шунен * (1. Тим. 4:16). Џикоте трудинаја амен те уверина е јаверен ко библиска чачипа, амен да панда повише уверинаја амен ки ленде.

11. Саво пример денѓа о апостол Павле кеда сикавела сине е јаверен, хем сар шај те џа пали лесте?

¹¹ Кеда сикавела сине е манушен, о апостол Павле вакерела сине ленге „уверлива доказија башо Исус таро е Мојсеескоро закони хем таро Пророкија“ (Дела 28:23). Сар шај те џа пало лескоро пример кеда сикаваја е јаверен башо чачипе? Нане доволно само те вакера ленге фактија. Мора те сикава е интересентен коркори те проучинен хем шукар те размислинен башо адава со сикљовена тари Библија те шај те овен паше е Јеховаја. Мангаја те прифатинен о чачипе на адалеске со ценинена амен, него адалеске со коркори уверинѓе пе кај адава со сикљовена тано о чачипе башо амаро Девел кова со грижинела пе аменге.

12-13. Сар шај о родителија те поможинен пумаре чхавенге те ачховен ко чачипе?

¹² Тумен о родителија сигурно мангена тумаре чхаве те ачховен ко чачипе. Шај мислинена туменге кај, ако иси лен шукар амала ко собрание, ка напредујнен шукар ко духовно поглед. Ама, те шај те уверинен пе кај иси лен о чачипе, нане доволно само те овен лен шукар амала. Ваљани те овел лен лично амалипе е Девлеа хем те овен сигурна кај адава со сикавела и Библија тано чаче.

¹³ Ако мангена те сикавен пумаре чхавен о чачипе башо Девел, о родителија мора те ден лен шукар пример аѓаар со коркори ола внимателно ка истражинен и Библија хем ка одвојнен време хор те размислинен баши лате. Тегани ка шај те сикавен е чхавен да те керен о исто. Слично сар со сикавена е интересентен, о родителија ваљани те сикавен пумаре чхавен да те истражинен аѓаар со ка користинен са адава со дела амен и организација башо истражибе. Аѓаар ка поможинен ленге те заманген е Јехова хем те овел лен доверба ко „верно хем разборито робо“ касте со ов користинела те шај те дел амен духовно храна (Мат. 24:45-47). Нане доволно те сикавен тумаре чхавен само башо основна библиска чачипа. Ваљани те поможинен ленге те градинен зорали вера аѓаар со ка сикавен лен башо „е Девлескере хор буќа“ спрема  ленгири возраст хем способностија (1. Кор. 2:10).

14. Соске ваљани те проучина о библиска пророштвија? (Дикх хем и рамка „ Шај ли те објаснине акала пророштвија?“)

¹⁴ О библиска пророштвија тане важно дело таро е Девлескоро Лафи хем поможинена аменге те градина зорали вера ко Јехова. Кола пророштвија керѓе позорали тли вера? Шај о пророштвија башо „последна диве“ (2. Тим. 3:1-5; Мат. 24:3, 7). Ама, кола јавера пророштвија со исполнинѓе пе шај панда повише те уверинен тут ко чачипе е Библијакоро? На пример, шај ли те објаснине сар исполнинѓе пе хем сар панда исполнинена пе о пророштвија таро Даниел 2 поглавје или таро Даниел 11 поглавје? * Ако тли вера тани цврсто темелими ки Библија, ништо ка нашти те рушинел ла. Те дикха амаре пхраленгоро пример кола со трпинѓе сурово прогонство ки Германија џикоте трајнела сине и Дујто светско војна. Иако на хаљовена сине целосно о библиска пророштвија башо последна диве, сине лен силно вера ко е Девлескоро Лафи.

15-17. Сар о проучибе е Библијакоро керѓа позорале амаре пхрален кола со сине прогониме таро нацистија?

¹⁵ Џикоте трајнѓа о нацистичко режим ки Германија, некобор милје пхраља хем пхења сине бичхалде ко концентрациона логорија. О Хитлер хем о Хајнрих Химлер, кова со сине истакнимо заповеднико, мрзинена сине е Јеховаскере сведокон. Спрема јекхе пхењакири изјава, о Химлер јекхе група пхењенге ко јекх логори вакерѓа: „Шај тумаро Јехова владинела ко небо, ама акате ки Пхув владинаја амен! Ка сикава туменге кој ка ачховел повише, тумен или амен!“ Со поможинѓа е Јеховаскере слугенге те ачховен верна?

¹⁶ Акала Истражувачија е Библијакере џанле кај е Девлескоро Царство почминѓа те владинел ко 1914 берш. Ола на сине изненадиме  таро баро противење колеа со соочинѓе пе. Сепак, е Јеховаскоро народо сине уверимо кај нијекх манушикани влада нашти те чхинавел е Девле те керел пли намера. Џанена сине кај о Хитлер ка нашти те уништинел и чачутни религија, а ни те анел влада која ка овел посилно таро е Девлескоро Царство. Амаре пхраља сине сигурна кај јекх диве ка авел крајо башо лескоро владибе.

¹⁷ Адава ко со силно верујнѓе амаре пхраља хем пхења сине чаче. Пало несаво време, о нацистичко режим пело, а о Хајнрих Химлер — о мануш со вакерѓа: „Акате ки Пхув владинаја амен“ — мора сине те нашел те шај те спасинел пе. Џикоте нашела сине, аракхља пе е пхралеа Либке, пурано затворенико коле со пенџарѓа ле. Бут разочаримо, о Химлер пучља ле: „Хем, ту со истражинеа и Библија, со ка овел акана?“ О пхрал Либке објаснинѓа леске кај е Јеховаскере сведокија цело време џанле кај о нацистичко режим ка перел хем кај ола ка овен спасиме. О Химлер, кова со англедер вакерѓа бут лошна буќа башо е Јеховаскере сведокија, ко адава моменти на џанља со те вакерел. Кратко пало адава мударѓа пе. Која тани и поука таро акава? Ако проучинаја и Библија хем о пророштвија сој пишиме ки лате, шај те градина силно вера ко Девел која со ка поможинел амен те ачхова леске верна кеда ка ова прогониме (2. Пет. 1:19-21).

18. Сар со дикхјола таро Јован 6:67, 68, соске ваљани шукар те хаљова о буќа?

¹⁸ Секова јекх амендар ваљани те сикавел мангипе соске адава тано и главно бути пали која сој пенџарде о чачутне христијања. Ама, исто аѓаар, о Павле вакерѓа: „Молинава ман... са повише те џанен хем са потемелно те хаљовен о буќа“ (Фил. 1:9, Радосна Вест). Ако на кераја аѓаар, упри аменде локхе шај те влијајнен о сикљојба со ширинена лен о „мануша со ховавена“, машкар коленде сој хем о отпадникија (Еф. 4:14). Кеда бут таро ученикија ко прво веко чхинавѓе те џан пало Исус, о Петар ачхило цврсто уверимо кај ко Исус тане „о лафија башо вечно живото“. (Читин Јован 6:67, 68.) Иако ко адава време на халило са адава со вакерела сине лескоро Господари, о Петар ачхило верно соске сине леске јасно кој тано о Христос. Ту да шај те ове поуверимо кај адава со сикавела и Библија тано чаче. Ако кереа адава, тли вера ка ачховел зорали бизи разлика со ка случинел пе, хем ка шај те поможине е јаверенгири да вера те овел позорали (2. Јов. 1, 2).