Бијамо сиум ки диз Квебек, која со аракхљовела ки Канадско област кола со иси ла о исто анав хем коте со керела пе француски лафи. Мо дад о Луи хем ми дај и Зелиа грижинена пе сине манге бут хем мангена ман сине бут. Мо дад сине лаџутно мануш, кова со бут мангела сине те читинел. А ме уживинава сине те пишинав хем мангава сине те овав новинари.

Кеда сине ман 12 берш, о Родолф Суси, кова со сине ме дадескоро колега, ало аменде заедно јекхе амалеа. Ола сине е Јеховаскере сведокија. На џанава сине бут башо Сведокија хем на интересинела ман сине ленгири религија. Сепак, мукхља манге силно впечаток адава со ко амаре пучиба дена сине логична одговорија тари Библија. Адава свиџинѓа пе мле родителенге, хем прифатинѓем те проучина ленцар.

Ко адава време, џава сине ки католичко школа. Понекогаш керава сине лафи ме соучениконцар башо адава со сикљовава сине тари Библија. Пало несаво време, о наставникија, кола со сине свештеникија, дознајнѓе башо адава. Наместо те користинен и Библија те сикавен манге кај адава со вакерава нане точно, јекх лендар обвининѓа ман англо цело класи кај сиум бунтовно! Иако адаја ситуација сине манге бут стресно, ко крајо сине шукар резултатија — поможинѓа манге те дикхав кај о верска сикљојба со сине ман ки школа нане спрема и Библија. Халиљум кај мо тхан нане адатхе. Адалеске пучљум мле родителен те џав ки јавер школа хем ола дозволинѓе манге адава.

Продолжинѓум те проучинав и Библија, ама на напредујнѓум сигате соске дарава сине те проповединав таро кхер ко кхер. И Католичко црква сине бут влијателно хем бут противинела пе  сине башо амаро проповедибе. О Морис Диплеси, о премиери таро Квебек, сине паше политичко сојузнико е црквакоро. Ов поддржинела сине насилна групен те малтретиринен, па чак те нападинен е Јеховаскере сведокон. Ко адава време, чаче ваљани сине бари храброст те шај те проповедина.

О Џон Реј, јекх пхрал со дипломиринѓа ко ењато класи ки Школа Гилеад, поможинѓа манге те на дарав више. Иако сине бут искусно, ов сине кротко, скромно хем шај сине локхе те керел пе леа лафи. Ретко дела ман сине директно совет, ама сиклиљум бут таро лескоро шукар пример. Ов на џанела сине шукар те керел лафи француски, адалеске џава сине леа често ки служба хем поможинава леске сине баши чхиб. Адава со дружинѓум ман акале пхралеа ко крајо поможинѓа манге те анав одлука те овав јекх таро е Јеховаскере сведокија. Крстинѓум ман ко 26 мај 1951 берш, деш берш откеда прво пути аљум ко контакт е Јеховаскере сведоконцар.

Повише пхраља хем пхења ко амаро тикно собрание ко Квебек служинена сине сар пионерија. Ленгоро шукар пример поттикнинѓа ман ме да те почминав е пионерско службаја. Ко адава време проповединаја сине таро кхер ко кхер само е Библијаја. Мора сине те сикљова пошукар те користина ла соске на сине амен литература. Адалеске, трудинава ман сине те сикљовав стихија кола со ка поможинен манге те бранинав о чачипе. Ама, бут џене на мангена сине те читинен нисаво превод тари Библија која со на сине одобрими тари Католичко црква.

Ко 1952 берш, женинѓум ман јекхе пхењаја со викинела пе сине Симона Патри, јекх верно пхен таро мло собрание. Селинѓем амен ко Монтреал, хем панда ко прво берш бијандили амари чхај и Лиза. Иако чхинавѓум те служинав сар пионери кратко англедер те кхува ко брако, ме хем и Симона трудинаја амен сине те живина скромно те шај сар фамилија те овел амен со повише време башо собраниска активностија.

Накхле деш берш англедер те почминав сериозно те размислинав те бајрарав мли служба. Ко 1962 берш џикоте јекх масек сиум сине ки Школа башо именујме пхраља ко Бетел ки Канада, сиум сине ки исто соба јекхе пхралеа со викинела пе Камил Волет. Лескири ревност ки служба мукхља манге баро впечаток — посебно адалеске со сине женимо хем сине ле чхаве. Ко адава време, пхаро сине те замислинел пе некас со сине ле тикне чхаве ко исто време те овел пионери, а баш адава  мангела сине о Камил те керел. Џикоте сием сине заедно, ов поттикнинѓа ман те размислинав башо мле околностија. Пало само некобор масекија, халиљум кај палем шај те служинав сар општо пионери. Несаве мислинѓе кај адаја одлука нане баш мудро, ама ме одлучинѓум те почминав акале службаја, соске сиум сине уверимо кај о Јехова ка дел ман берекети адалеске со мангава сине те керав повише леске ки служба.

Ко 1964 берш, ме хем и Симона сием сине бичхалде сар специјална пионерија ко Квебек, и диз коте со бијандилем хем адатхе служинѓем о следна некобор берша. Тегани о противибе на сине више силно сар англедер, ама несаве мануша панда керена сине проблемија.

Јекх сабота палоручко астарѓе ман ко Сент Мари, јекх тикни диз паше узо Квебек. Јекх полицајцо ингарѓа ман ки станица хем чхивѓа ман ко затвор адалеске со проповединава сине таро кхер ко кхер бизи дозвола. Покасно ингарѓе ман англо јекх судија кова со викинела пе сине Бијаржон хем изглединела сине страшно. Ов пучља ман кој ка овел мло адвокати. Кеда вакерѓум кај о Глен Хау ка овел мло адвокати, * кова сине пенџардо адвокати, а сине амаро пхрал, ов вознемиримо викинѓа: „О, на! Само ов на!“ Џи тегани, о Глен Хау више бут пути успешно бранинѓа е Јеховаскере сведокон ко разна судија. Сигате пало адава, о судо информиринѓа ман кај о обвиненија со сине против манде сине цидиме.

Адалеске со противинена пе аменге сине ко Квебек, сине аменге пхаро те аракха киријаја соодветна тхана коте со шај те икера амаре состанокија. Амаро тикно собрание успејнѓа те аракхел само јекх пурани гаража коте со сине бут шудро евендаске. Те шај те таќол барем хари, о пхраља користинена сине јекх тикни печка ки нафта. Бут пути кхедаја амен сине околу лате некобор саатија англедер те почминел о состанок хем вакераја аменге сине охрабрувачка искуствија.

Бут сиум бахтало кеда размислинава сар напредујнѓа о проповедибе ко адала берша. Ко 1960-та берша, ки област Квебек, ко Кот Нор хем ко полуостров Гаспе сине само некобор тикне собранија. Авдиве ко акава подрачје иси дуј покраине, а о пхраља икерена о состанокија ко бут шуже дворане.

Ме хем и Симона сием сине каниме те служина ки покраинско служба ко 1970 берш. Пало адава, ко 1973 берш, добинѓум задача те служинав сар областно надгледнико. Ко адала берша сиклиљум бут таро несаве способна пхраља сар на пример, о Лорије Сомур * хем о Дејвид Сплејн *‚ кола со исто аѓаар сине патувачка надгледникија. Пало секова конгрес, ме хем о Дејвид вакераја аменге сине предлогија сар шај те ова пошукар ко сикајбе. Сетинава ман кај ов јекх пути вакерѓа манге: „Леонс, бут сине шужо тло последно говор. Ама, ме ка керав сине трин таро цело адава материјали!“  Обично користинава сине превише информацие ко мле говорија. Мора сине те сикљовав те користинав похари материјали.

О обласна надгледникија сине лен задача те охрабринен е покраинска надгледникон. Ама, бут објавителија ко Квебек џанена ман сине шукар. Кеда посетинава сине о покраине, мангена сине те џав ленцар ки служба. Иако уживинава сине ко адава, на одвојнава сине доволно време е покраинско надгледникоске. Ки јекх прилика, јекх покраинско надгледнико љубезно вакерѓа манге: „Шукар тано со накхавеа време е пхраленцар, ама ма бистре кај акава курко аљан манге. Манге да ваљани охрабрување!“ Акава совет поможинѓа манге те овав поурамнотежено.

Ко 1976 берш, случинѓа пе нешто бут тажно со на аџикерѓем. Мли мангли ромни, и Симона, бут насвалили хем мули. Ој сине бут шукар ромни соске на сине себично хем мангела сине бут е Јехова. Адава со џава сине бут ки служба поможинѓа манге те издржинав и дукх. Благодарно сиум е Јеховаске баши поддршка која со мангипаја дела ла сине манге ко адава пхаро време. Покасно женинѓум ман јекхе ревно пионеркаја, и Керолин Елиот, која со керела сине англиски лафи хем али те служинел ко Квебек, коте со сине потреба таро повише објавителија. И Керолин тани личност касаја со шај локхе те керел пе лафи хем искрено интересинела пе е јаверенге, посебно околенге со лаџана или осетинена пе коркори. Ој бут поможинѓа манге откеда почминѓа манцар ки покраинско служба.

Јануари 1978 берш, сиум сине замолимо те овав инструктори ки прво Школа башо пионерија ко Квебек. Сине ман бари трема соске и програма сине манге неви, исто сар со сине е учениконге. Шукар со ко прво класи сине бут искусна пионерија. Иако ме сиум сине о инструктори, сиклиљум бут лендар!

Покасно о исто берш, ко Олимписко стадиони ко Монтреал икерѓа пе о меѓународно конгрес „Победничко вера“. Сине повише таро 80.000 присутна, адава сине о најбаро конгрес со икерѓа пе ко Квебек. Добинѓум задача те служинав ки  конгресно Служба башо контакт е медиуменцар. Сине ман прилика те керав лафи буте новинаренцар хем сиум сине бут бахтало со денѓе позитивна извештаија. Ко радио хем ки телевизија сине мукхле вкупно повише таро 20 саатија о интервјуа со сине лен аменцар, а ко новине иклиле пхердо статие поврзиме е конгресеа. Са адава керѓа те дел пе баро сведоштво!

Ко 1996 берш, али јекх бут бари промена. Откеда пало мло крстибе служинѓум ко Квебек, коте со повише керела пе сине француски лафи, сиум сине бичхалдо те служинав сар областно надгледнико ко англиско подрачје ко Торонто хем ки адаја околина. На осетинава ман сине доволно способно баши адаја задача, хем дарава сине кеда мислинава кај ваљани те икерав говорија ко англиски, соске на керава сине шукар лафи. Мора сине те молинав ман почесто хем панда повише те овел ман доверба ко Јехова.

Акана кеда размислинава башо адава, шај те вакерав кај адари накхљум дуј бут шуже берша тари мли служба. И Керолин стрпливо поможинела сине манге е чхибјаја, а о пхраља поддржинена ман сине хем охрабринена ман сине. Сигате уле амен бут неве амала.

Мора сине те керав бут буќа те шај те спреминав ман башо конгресија со икерена пе сине ко викендија. Освен адава, петок раќате, бут пути џава сине ки служба околу јекх саати таро кхер ко кхер. Несаве шај мислинена сине песке: „Соске некој би џала ки служба англедер јекх напорно викенд колесте со ка икерел пе конгрес?“ Ама, о шукар разговорија со сине ман ки служба сине манге чачутно охрабрување. Авдиве да осетинава ман пошукар откеда ка џав ки служба.

Ко 1998 берш, ме хем и Керолин сием сине бичхалде те служина сар специјална пионерија ко Монтреал. Бершенцар сине ман задаче те организиринав посебна акцие башо сведочибе ко прометна тхана. Освен адава, контактиринава сине е медиуменцар те шај те цида о предрасуде е манушенгере со сине лен спрема е Јеховаскере сведокија. Акана ме хем и Керолин уживинаја џикоте проповединаја е странцонге кола со сигенде але ки Канада хем кола со мангена те џанен нешто повише баши Библија.

Кеда размислинава башо последна 68 берш сар крстимо слуга е Јеховаскоро, хаљовава кај ов чаче денѓа ман берекети. Бут сиум бахтало со замангљум и служба хем со сине ман прилика те поможинав буте манушенге те пенџарен о чачипе. Мли чхај и Лиза хем лакоро ром почминѓе те служинен сар општа пионерија откеда бариле ленгере чхаве. Бут сиум бахтало кеда дикхава кај ој понадари да ревносно керела пли служба. Посебно сиум благодарно е пхраленге хем е пхењенге коленгоро шукар пример хем мудра советија поможинѓе манге духовно те напредујнав хем те грижинав ман башо разна теократска одговорностија. Уверинѓум ман кај шај верно те кера секоја задача само ако иси амен доверба ко е Јеховаскоро моќно свети дух (Пс. 51:11). Благодарно сиум е Јеховаске со денѓа ман бари чест те фалинав лескоро анав! (Пс. 54:6).