1. Со шај те поможинел аменге те сикљова те уживина ко проучибе о библиска пророштвија?

 „БУТ мангава те проучинав о библиска пророштвија“ вакерела јекх терно пхрал со викинела пе Бен. Дали ту да уживинеа ко адава? Или мислинеа кај о библиска пророштвија тане бут пхаре хаљојбаске? Или шај чак мислинеа кај адава шај те овел досадно? Ама, ако дознајнеа нешто повише башо адава соске о Јехова вклучинѓа лен ко пло Лафи шај ту да ка почмине те уживине ко проучибе.

2. Башо со ка кера лафи ки акаја статија?

² Ки акаја статија ка дикха соске ваљани те сикљова нешто повише башо библиска пророштвија хем сар шај те проучина лен. Исто аѓаар ка кера лафи башо дуј пророштвија таро лил Даниел те шај те дикха сар адава со хаљоваја лен шај те поможинел аменге панда акана.

3. Со ваљани те кера те шај те хаљова о библиска пророштвија?

³ Ако мангаја те хаљова о библиска пророштвија ваљани те рода помош. Те вакера јекх споредба. Замислин туке кај џаја ко јекх тхан со на џанеа ле ама тло амал сој туја бут шукар џанела адава тхан. Ов точно џанела кај сиен хем коте ингарела секова друмо. Сигурно туке бут мило со тло амал ало туја. О Јехова тано сар акава амал. Ов точно џанела ко саво време живинаја хем со ка случинел пе ки иднина. Значи, те шај те хаљова о библиска пророштвија мора понизно те рода помош таро Јехова (Дан. 2:28; 2. Пет. 1:19, 20).

4. Соске о Јехова мукхља те овен пишиме пророштвија ко лескоро Лафи? (Еремија 29:11). (Дикх хем и слика).

⁴ Исто сар секова родители о Јехова да мангела лескере чхавен те овел лен шукар иднина. (Читин Еремија 29:11.)  Ама о манушикане родителија нашти те вакерен со ка случинел пе ки иднина, а о Јехова шај хем ов никогаш на грешинела. Ов мукхља те овен пишиме пророштвија ко лескоро Лафи те шај те џана кола важна настанија ка случинен пе ки иднина (Иса. 46:10). Значи, о библиска пророштвија тане скапоцена поклонија таро амаро небесно Дад. Ама котар шај те ове сигурно кај адава со и Библија пророкујнела чаче ка исполнинел пе?

5. Со шај о терне те сикљовен таро Макс?

⁵ Амаре терне ки школа тане опколиме буте манушенцар со на поштујнена и Библија. Понекогаш, ленгере лафија хем постапке шај те керен амаре терне те сумнинен пе ко чачипе. Те дикха о пример јекхе пхралескоро со викинела пе Макс. Ов вакерела: „Кеда џава сине ки школа почминѓум те сумнинав ман дали мле родителија сикавена ман о чачипе хем дали и Библија чаче тани таро Девел“. Сар реагиринѓе лескере родителија? Ов вакерела: „Ола ачхиле смириме иако џанава кај на сине ленге са јекх“. Лескере родителија користинѓе и Библија те шај те одговоринен ко лескере пучиба. Ама о Макс да керѓа нешто. Ов вакерела: „Почминѓум коркори те проучинав о библиска пророштвија хем керава сине лафи јавере терненцар башо адава со сикљовава “. Саво сине о резултати? О Макс вакерела: „Пало адава сиум сине уверимо кај и Библија тани таро Девел“.

6. Со ваљани те кере ако иси тут сумње, хем соске?

⁶ Ако ту да, исто сар о Макс, почминеа те сумнине тут дали адава со пишинела ки Библија тано чаче, на ваљани те осетине тут криво. Ама бут тано важно сигате те кере нешто башо адава. И сумња тани сар рѓа. Ако на цидаја ла сигате шај те уништинел нешто сој вредно. Те шај те циде било сави „рѓа“ која со шај те уништинел тли вера, ваљани те пуче тут: „Дали верујнава ко адава со и Библија вакерела баши иднина?“ Ако на сиан сигурно, тегани ваљани те проучине о библиска пророштвија кола со више исполнинѓе пе. Сар шај те кере адава?

7. Саво пример мукхља аменге о Даниел башо адава сар те проучина о пророштвија? (Даниел 12:10). (Дикх хем и слика).

⁷ О Даниел денѓа амен шукар пример башо адава сар те проучина о библиска пророштвија. Ов проучинѓа о пророштвија таро исправно мотиви — мангља те џанел о чачипе. Исто аѓаар, о Даниел сине понизно. Ов џанља кај о Јехова ка поможинел ле те хаљовел о пророштвија ако живинела спрема лескере мерилија хем ачховела леа паше. (Дан. 2:27, 28; читин Даниел 12:10). О Даниел сикавѓа понизност аѓаар со родинѓа помош таро Јехова (Дан. 2:18). Исто аѓаар, о Даниел хор проучинела сине. Ов проучинела сине о света списија кола со сине ле (Ерем. 25:11, 12; Дан. 9:2). Сар шај те џа пало пример е Даниелескоро?

8. Соске несаве на мангена те верујнен кај о библиска пророштвија исполнинѓе пе, ама со ваљани те кера амен?

⁸ Испитин тле мотивија. Дали проучинеа  о библиска пророштвија адалеске со бут мангеа те џане о чачипе? Ако оја, о Јехова ка поможинел туке (Јован 4:23, 24; 14:16, 17). Ама, несаве мануша проучинена и Библија таро јавера причине. Ола мислинена песке кај ако аракхена доказија кај и Библија нане таро Девел тегани коркори шај те одлучинен песке сој тано исправно, а сој погрешно. Ама амен ваљани те проучина таро исправно мотиви. Освен адава, те шај те хаљова о библиска пророштвија ваљани аменге јекх важно особина.

9. Сави особина ваљани аменге те шај те хаљова о библиска пророштвија? Објаснин.

⁹ Ов понизно. О Јехова ветинела кај ка поможинел околенге сој понизна (Јак. 4:6). Адалеске ваљани те молина амен леске те поможинел амен те хаљова о библиска пророштвија. Исто аѓаар, мора те признајна кај ваљани аменге помош таро Верно хем мудро робо коле со о Јехова користинела те дел амен духовно храна ко право време (Лука 12:42). О Јехова тано Девел е редоскоро, адалеске тано логично те верујна кај ов користинела само јекх извор те шај те поможинел амен те хаљова о чачипе таро лескоро Лафи (1. Кор. 14:33; Еф. 4:4-6).

10. Со сикљовеа тари Естер?

¹⁰ Хор проучин. Проучин несаво пророштво кова со тут лично интересинела тут. Баш адава керѓа јекх пхен со викинела пе Естер. Ој мангља те џанел нешто повише башо пророштвија кола со керена лафи башо адава сар ка авел о Месија. Ој вакерела: „Кеда сине ман 15 берш родава сине доказија кола со сикавена кај акала пророштвија чаче сине пишиме англедер те авел о Исус“. Хем ој уверинѓа пе ко адава кеда читинѓа башо свитокија таро Мртво море. Ој вакерела: „Несаве сине пишиме англедер те авел о Христос. Адалеске, о пророштвија со сине атхе мора те овен таро Девел“. И Естер признајнела: „Несаве буќа мора сине те читинав повише пути те шај те хаљовав лен“. Ама о трудо со вложинѓа, врединѓа. Откеда хор проучинѓа некобор библиска пророштвија, ој вакерѓа: „Шај сине коркори те уверинав ман кај адава со пишинела ки Библија тано чаче!“

11. Соске тано шукар те ова увериме кај адава со вакерела и Библија тано точно?

¹¹ Кеда ка хаљова сар несаве пророштвија таро е Девлескоро Лафи више исполнинѓе пе, ка бајрол амари доверба ко Јехова хем ко лескоро водство. Освен адава, о библиска пророштвија поможинена аменге те овел амен позитивно стави баши иднина, бизи разлика саве предизвиконцар соочинаја амен панда акана. Акана, кратко те разгледина дуј пророштвија кола со пишинѓа лен о Даниел хем исполнинена пе ко амаро време. Адава со ка хаљова лен ка поможинел амен те ана мудра одлуке.

12. Со претставинена о пре таро „састрн мешиме влажно глинаја“? (Даниел 2:41-43).

¹² Читин Даниел 2:41-43. Ко суно со дикхља ле о цари о Навуходоносор а о Даниел  објаснинѓа ле леске, о пре таро адава кипи сине таро „састрн мешимо влажно глинаја“. Ако спорединаја акава пророштво јавере пророштвонцар таро лила Даниел хем Откровение, шај те хаљова кај о пре претставинена е Англо-Американско светско сила која сој тани и најмоќно сила ко амаро време. Баши акаја сила о Даниел вакерела: „О царство ко исто време ка овел хем зорало хем слабо“. Соске акава царство ка овел асавко? Адалеске со о обична мануша сој претставиме глинаја керена пхаро акале светско силаке те овел силно сар састрн. b

13. Кола важна чачипа шај те открина адалеске со хаљоваја акава пророштво?

¹³ Таро објаснување со денѓа ле о Даниел башо кипи откринаја важна чачипа, посебно башо лескере пре. Прво, и Англо-Американско светско сила ко некобор начинија сикавѓа пли моќ. На пример, и Америка хем и Британија сине машкар о пхувја кола со побединѓе ки Прво хем ки Дујто светско војна. Ама акаја светско сила слабонѓа хем понадари да ка слабонел соске иси конфликтија машкар лакере граѓанија. Дујто, и Англо-Америка ка овел и последно светско сила која со ка владинел англедер е Девлескоро Царство те анел крајо башо са о манушикане царствија. Иако несаве нацие шај ка противинен пе е Англо-Америкаке, сепак ола ка нашти те лен лакоро тхан. Акава џанаја ле адалеске со „о бар“ кова со претставинела е Девлескере Царство ка пхагел е кипескере пре кола со претставинена е Англо-Америка (Дан. 2:34, 35, 44, 45).

14. Сар адава со хаљоваја о пророштво башо пре таро састрн хем глина ка поможинел аменге те ана мудра одлуке?

¹⁴ Дали сиан уверимо кај е Даниелескоро пророштво башо пре таро састрн хем глина тано точно? Ако оја, адава ка влијајнел упро цело тло живото. На пример, нане те роде сигурност ко материјална буќа таро акава свето кова со панда хари ка овел уништимо (Лука 12:16-21; 1. Јов. 2:15-17). Исто аѓаар, адава со ка хаљове акава пророштво ка поможинел туке те дикхе кобор тано важно о проповедибе хем о керибе ученикија (Мат. 6:33; 28:18-20). Откеда ка проучине акава пророштво шај те пуче тут: „Дали мле одлуке сикавена кај сиум уверимо кај е Девлескоро Царство панда хари ка анел крајо са е манушикане владенге?“

15. Кој тане о северно хем о јужно цари авдиве? (Даниел 11:40).

¹⁵ Читин Даниел 11:40. О Даниел 11-то поглавје керела лафи башо дуј царија или политичка силе кола со боринена пе машкар песте баши светско власт. Ако спорединаја акава пророштво јавере пророштвонцар тари Библија, шај те открина кај о „северно цари“ тано и Русија пле сојузниконцар, а о „јужно цари“ тано и Англо-американско светско сила. c

16. Сар постапинела о „северно цари“ е Девлескере народоја?

¹⁶ Е Девлескоро народо кова со живинела ко тхана коте со о „северно цари“ владинела доживинена директно прогонство таро акава цари. Несаве сведокија сине марде хем пханле баши пумари вера. Ама адалеа наместо те даравкерел амаре пхрален, о „северно цари“ керѓа ленгири вера панда позорали. Соске? Адалеске со амаре пхраља џанена кај е прогонствоја упро е Девлескоро народо исполнинела пе о пророштво таро  лил Даниел d (Дан. 11:41). Адава со џанаја акаја бути шај исто аѓаар те поможинел аменге те овел амен зорали надеж хем те ачхова верна е Јеховаске.

17. Кола предизвикија сине е Девлескере народо ко тхана коте со владинѓа о „јужно цари“?

¹⁷ Англедер, о „јужно цари“ исто аѓаар прогонинѓа е Девлескере народо. На пример, џикоте трајнела сине и Прво хем и Дујто светско војна бут таро амаре пхраља сине пханле адалеске со ачхиле неутрална, а несаве Сведоконгере чхаве сине палдиме тари школа баши исто причина. Ама ко последна берша амаре пхраленгири вера со живинена ко тхан коте со владинела о „јужно цари“ тани чхивди ко испит ко јавера начинија. На пример, кеда авела време гласибаске јекх христијани шај те овел ко искушение те поддржинел јекхе политичко партија или несаве кандидате. Ов шај нане те џал те гласинел ама ки пли годи хем ко пло вило шај те поддржинел јекхе страна. Акава сикавела кобор  тано важно те ачхова неутрална на само амаре постапкенцар него хем амаре мисленцар хем чувствонцар (Јован 15:18, 19; 18:36).

18. Сар ваљани те реагирина ко пророштво башо северно хем јужно цари? (Дикх хем и слика.)

¹⁸ Окола со нане лен вера ко библиско пророштво шај те овен бут вознемириме кеда ка дикхен кај о „јужно цари“ боринела пе е „северно цареа“ (Дан. 11:40). Е солдује царен иси лен добором нуклеарно оружје со шај те уништинен са сој џивдо ки пхув. Ама амен џанаја кај о Јехова нане те дозволинел те случинел пе адава (Иса. 45:18). Адалеске о пророштво башо северно хем јужно цари на ваљани те даравкерел амен, наместо адава ваљани те бајрарел амари вера. Акава сикавела кај о крајо акале светоскоро тано паше.

19. Со ваљани те џана башо библиска пророштвија?

¹⁹ Амен на џанаја сар несаве библиска пророштвија ка исполнинен пе. Чак о пророко о Даниел на халило со значинена са о буќа со пишинѓа лен (Дан. 12:8, 9). Ама само адалеске со на џанаја целосно сар несаво пророштво ка исполнинел пе на значинела кај нане те исполнинел пе. Шај те ова сигурна кај о Јехова ко право време ка откринел аменге адава со мора те џана сар со керѓа адава ко пурано време (Амос 3:7).

20. Саве важна библиска пророштвија ка исполнинен пе панда хари, хем со ваљани понадари да те кера?

²⁰ Панда хари ка објавинел пе „мир хем сигурност“ (1. Сол. 5:3). Одма пало адава о политичка силе ка нападинен е ховавне религија хем ка уништинен ла (Отк. 17:16, 17). Тегани ка нападинен е Девлескере народо (Езек. 38:18, 19). Акала настанија директно ка ингарен џи ки војна Армагедон (Отк. 16:14, 16). Шај те ова сигурна кај акала настанија ка случинен пе панда хари. Џи тегани, понадари да те сикава ценење амаре небесно Дадеске аѓаар со внимателно ка дикха сар исполнинена пе о библиска пророштвија хем ка поможина е јаверенге те керен о исто.