1. Спрема 1. Солуњаните 5:11, ки сави бути сарине амен учествујнаја?

 ДАЛИ некогаш тло собрание градинѓа или реновиринѓа јекх дворана? Ако оја, сигурно сетинеа тут ко прво состанок со икерѓен ки адаја дворана. Сиан сине бут благодарно е Јеховаске, хем шај сиан сине добором бахтало со пхердиле те јакхја хем едвај гиљаѓан и прво гили. Амаре шукар градиме дворане анена фалба е Јеховаске. Ама амен анаја побари фалба е Јеховаске кеда учествујнаја ки јавер градежно бути. Ки адаја бути тано вклучимо нешто бут повредно таро дословна градбе, а адава тано те изградина е манушен со авена ко адала тхана обожавибаске. О Павле мислинѓа ки асавки симболично изградба кеда вакерѓа о лафија таро амаро главно стихо со аракхљона ко 1. Солуњаните 5:11. (Читин.)

2. Со ка дикха ки акаја статија?

² О апостол Павле тано бут шукар пример аменге соске џанела сине сар те охрабринел пле пхрален хем пхењен. Ов сине ленцар сочувствително. Ки акаја статија ка дикха сар поможинѓа пле пхраленге хем пхењенге 1) те истрајнен ко неволје, 2) те овен ко мир јекх јекхеа хем 3) те бајрарен пумари вера ко Јехова. Те дикха сар шај те џа пало лескоро пример аѓаар со ка изградина е пхрален хем е пхењен (1. Кор. 11:1).

3. Кова урамнотежено стави сине е Павле?

³ О Павле бут мангела сине пле пхрален. Адалеске со доживинѓа бут пхарипа ов шај сине те сикавел сочувство е пхраленге кеда сине лен неволје. Јекх пути е Павле на сине  ле више паре хем адалеске ваљанѓа те аракхел бути те шај те издржинел пес хем околен со сине леа (Дела 20:34). Адалеске со џанела сине те керел шаторија, кеда ало ко Коринт почминѓа те керел бути е Акилаја хем е Прискилаја кола со исто аѓаар керена сине шаторија. Ама „секова сабат“ ов проповединела сине е Евреенге хем е Грконге. Кеда але о Сила хем о Тимотеј „о Павле целосно посветинѓа пе те проповединел о Лафи“ (Дела 18:2-5). Ов никогаш на бистерѓа сој леске најважно ко живото, те служинел е Јеховаске. Адалеске со о Павле сине шукар пример хем ки бути хем ки служба, ов шај сине те охрабринел пле пхрален хем пхењен. Ов вакерѓа ленге те на дозволинен башо проблемија хем башо материјална гриже пумаре фамилијаке те бистрен „адава сој тано најважно“ јавере лафенцар, те керен са адава сој поврзимо е Јеховаскере обожавибаја (Фил. 1:10).

4. Сар о Павле хем о Тимотеј поможинѓе е пхраленге те истрајнен џикоте сине прогониме?

⁴ Кратко откеда о собрание ко Солун сине воспоставимо, о неве пхраља сине бут прогониме. Кеда јекх група противникија нашти сине те аракхен е Павле хем е Сила, ола влечинѓе несаве пхрален „англо поглаварија тари диз“ хем викинена сине: „Акала мануша тане против о одредбе е Цезарескере“ (Дела 17:6, 7). Замислин само кобор дарана сине акала неве христијања кеда халиле кај о мануша тари диз сине против ленде. Шај сине те чхинавен те овен ревна ки служба башо Јехова, ама о Павле на мангља адава те случинел пе. Иако ов хем о Сила ваљанѓе те џан песке, ола мангле те овен сигурна кај некој ка грижинел пе башо акава нево собрание. О Павле вакерѓа е пхраленге таро Солун: „Бичхалѓем туменге е Тимотее, амаре пхрале... те шај те зојракерел тумари вера хем те утешинел тумен, те шај никој тумендар те на перел ко акала неволје“ (1. Сол. 3:2, 3). Најверојатно о Тимотеј да сине прогонимо ки пи диз ки Листра, ов дикхља сар о Павле зајакнинѓа е пхрален адари. Адалеске со дикхља кај о Јехова поддржинѓа адале пхрален, о Тимотеј шај сине те уверинел е неве пхрален хем е пхењен кај о Јехова лен да ка поддржинел (Дела 14:8, 19-22; Евр. 12:2).

5. Сар користинѓа е Брајантеске и помош со добинѓа ла таро јекх старешина?

⁵ Ко кова јавер начин о Павле зајакнинѓа е пхрален? Кеда иранѓе пе ки Листра, Иконија хем Антиохија, о Павле хем о Варнава „именујнѓе старешине ко секова собрание“ (Дела 14:21-23). Сигурно адала именујме пхраља утешинена сине е собрание, сар со керена о старешине авдиве. Јекх пхрал кова со викинела пе Брајант вакерела: „Кеда сине ман 15 берш мо дад гело песке кхералдан хем ми дај сине исклучими. Осетинѓум ман коркори хем обесхрабримо“. Со поможинѓа леске те истрајнел ко акава пхаро периоди? Ов вакерела: „Јекх старешина кова со викинела пе Тони, керела сине манцар лафи кеда сием сине ки дворана хем ко јавера да прилике. Вакерѓа манге башо окола со доживинѓе неволје ама со сепак сине бахтале. Ов читинѓа манге о Псалм 27:10 хем бут пути керела сине манцар лафи башо Езекија, мануш кова со верно служинела сине иако лескоро дад на сине шукар пример“. Сар влијајнѓа акава упро Брајант? Ов вакерела: „Адалеске со о Тони поддржинѓа ман почминѓум е полновремено службаја“. Тумен о старешине овен спремна те поможинен околенге со, исто сар о Брајант, иси лен  потреба таро „шукар лафи“ со ка охрабринел лен (Изр. 12:25).

6. Сар адава со о Павле користинѓа искуствија охрабринѓа е пхрален хем е пхењен?

⁶ О Павле сетинкерѓа е пхрален кај „јекх баро облако таро сведокија“ истрајнѓе ко неволје адалеске со о Јехова денѓа лен сила (Евр. 12:1). О Павле халило кај о искуство околенгоро со истрајнѓе ки било сави неволја шај те охрабринел е пхрален хем е пхењен хем те поможинел лен понадари да те концентриринен пе „ки диз е џивде Девлескири“ (Евр. 12:22). Авдиве да тано аѓаар. Сарине амен сигурно сием сине бут зајакниме џикоте читинѓем сар о Јехова поможинѓа е Гедеонеске, е Варакоске, е Давидеске, е Самоилеске хем бут јавере слугенге (Евр. 11:32-35). А сар поможинена амен о примерија таро окола со сикавѓе вера ко амаро време? Ко главно седиште бут пути ресена писмија таро пхраља хем пхења коленгири со вера сине зајакними откеда читинѓе о искуствија таро адала верна пхраља.

7. Со шај те сикљове таро е Павлескоро совет сој пишимо ко Римјаните 14:19-21?

⁷ Изградинаја е пхрален хем е пхењен кеда вакераја или кераја буќа кола со керена мир ко собрание. На дозволинаја адава со иси амен различна мислења те одвојнел амен. Хем кеда несаве буќаја на пхаѓела пе нисаво библиско начело, на инсистиринаја те овел аѓаар сар амен со мислинаја. Те дикха јекх пример. Ко собрание ко Рим сине хем Евреија хем јавера христијања кола со на сине Евреија. Кеда на важинела сине више е Мојсеескоро закони о слуге е Девлескере на ваљани сине више те икерен пе ко закони башо адава со те хан а со на (Мар. 7:19). Оттегани несаве Евреенге на сине проблеми те хан о буќа со сине англе забраниме, а јавера Евреија на мангена сине те хан адала буќа. Акава керѓа о собрание те делинел пе. О Павле истакнинѓа кобор тано важно те керел пе мир хем вакерѓа: „Шукар тано те на хал пе мас хем те на пиел пе мол или те керел пе било со јавер со ка перавел тле пхрале“. (Читин Римјаните 14:19-21.) О Павле поможинѓа е пхраленге те дикхен кобор лошно влијајнена асавке расправие упро секова јекх објавители хем упро цело собрание. Ов исто аѓаар сине спремно те менинел пле постапке те шај те на сопкинкерел е јаверен (1. Кор. 9:19-22). Амен да шај те охрабрина е јаверен хем те кера мир аѓаар со нане те распрајна амен кеда керела пе лафи башо лично вкус.

8. Сар реагиринѓа о Павле кеда јекх баро проблеми шај сине те руминел о мир ко собрание?

⁸ О Павле сине шукар пример башо адава сар те овел пе ко мир околенцар со на сложинена пе сине башо важна буќа. На пример несаве таро собрание ко прво веко родинѓе таро христијања со нане Евреија те обрежинен пе, те шај о јавера Евреија те на приговоринен ленге (Гал. 6:12). О Павле ни хари на согласинѓа пе ленцар, ама наместо те инсистиринел те овел сар ов со мангела, ов понизно родинѓа совет таро апостолија хем старешине ко Ерусалим (Дела 15:1, 2). Адалеске со о Павле постапинѓа аѓаар ов поможинѓа адале христијаненге те ачховен бахтале хем те овел мир ко собрание (Дела 15:30, 31).

9. Сар шај те џа пало е Павлескоро пример?

⁹ Кеда појавинена пе сериозна расправие, трудинаја амен те овел мир аѓаар со родаја  совет таро окола со о Јехова биринѓа лен те грижинен пе башо собрание. Бут пути шај те добина советија преку амаре публикацие или преку јавера да буќа со дела лен и организација. Амен шај те кера те овел мир ко собрание ако шунаја адала советија наместо те ова упорна кај амен сием ко право.

10. Со јавер керѓа о Павле те шај те овел мир ко собрание?

¹⁰ О Павле керѓа те овел мир аѓаар со истакнинѓа о шукар особине е пхраленгере хем е пхењенгере, а на о негативна. На пример, ко крајо таро пло писмо џи ко Римјања о Павле спомнинѓа буте џенен ко анав хем пишинѓа позитивна буќа баши ленде. Амен шај те џа пало е Павлескоро пример аѓаар со ка спомнина о шукар особине е пхраленгере хем е пхењенгере. Ако кераја аѓаар ка овен амен шукар амала хем о мангипе ко собрание ка бајрол.

11. Сар шај те кера те овел палем мир кеда иси амен несогласувања?

¹¹ Понекогаш, о зрела да христијања шај те на сложинен пе јекх јекхеа. Адава случинѓа пе е Павлеске хем лескере паше амалеске е Варнаваске. Ола на сложинѓе пе башо адава дали те лен е Марко пеа ко ленгоро мисионерско патујбе, хем адалеске добором бут распрајнѓе пе со одвојнѓе пе (Дела 15:37-39). Ама о Павле, о Варнава хем о Марко палем смиринѓе пе, адалеа сикавѓе кај ленге важно те овен ко мир јекх јекхеа хем те овел јекхипе ко собрание. Покасно о Павле керѓа шукар лафи таро Варнава хем таро Марко (1. Кор. 9:6; Кол. 4:10). Амен да ваљани те решина о несогласувања со иси амен јаверенцар ко собрание хем те продолжина те концентририна амен ко ленгере шукар особине. Аѓаар ка кера те овел мир хем јекхипе (Еф. 4:3).

12. Кола тане несаве предизвикија коленцар со соочинена пе о пхраља хем о пхења?

¹² Амен изградинаја амаре пхрален кеда поможинаја ленге те бајрарен пумари вера ко Јехова. Бут пути о колеге, о соученикија хем и фамилија кола со нане ко чачипе асана амаре пхраленге. А јавера иси лен пхаро насвалипа или боринена пе повредиме чувствонцар. А јавера кола со бершенцар тане крстиме аџикерена више бут време те авел о крајо акале светоскоро. Акала ситуацие шај те чхивен ко испит амари вера авдиве. О христијања таро прво веко соочинѓе пе слична проблеменцар. Со керѓа о Павле те шај те зајакнинел е пхрален хем е пхењен?

13. Сар о Павле поможинѓа е пхраленге хем е пхењенге коленге со асана сине башо ленгере верувања?

¹³ О Павле користинѓа о списија те шај те изградинел и вера е пхраленгири хем е пхењенгири. На пример, о еврејска христијања шај на џанена сине со те одговоринен пумаре фамилиенге кола со вакерена сине кај о јудаизам тано бут пошукар таро христијанство. Сигурно е Павлескоро писмо џи ко Евреија бут охрабринѓа адале христијанен (Евр. 1:5, 6; 2:2, 3; 9:24, 25). Лескоро шукар објаснување шај сине те поможинел ленге те џанен со те вакерен пумаре фамилиенге. Амен авдиве шај те поможина амаре пхраленге кола со соочинена пе асавке проблемеа те користинен о библиска публикацие те шај те објаснинен пле верувања. Хем ако амаре терненге асана ки школа адалеске со на славинена празникија хем на џана ко роденден, шај те поможина ленге те аракхен информацие ко лил Ов бахтало засекогаш лекција 44, те шај те сикавен е јаверенге соске на славинена празникија хем роденденија.

14. Со керѓа о Павле иако сине зафатимо проповедибаја хем сикајбаја?

 ¹⁴ О Павле охрабринѓа пе пхрален хем пхењен те сикавен мангипе аѓаар со ка керен шукарипе (Евр. 10:24). Ов поможинѓа е пхрален хем е пхењен на само лафенцар него исто аѓаар хем постапкенцар. На пример, кеда ки Јудеја сине бокхалипе о Павле денѓа несаве буќа е пхраленге со сине ленге потребна (Дела 11:27-30). Иако сине о Павле зафатимо проповедибаја хем сикајбаја, ов секогаш аракхела сине начинија те поможинел околенге каске со ваљани сине материјално помош (Гал. 2:10). Кериндор адава ов изградинѓа пе пхрален аѓаар со уверинѓа лен кај о Јехова ка грижинел пе ленге. Авдиве амен шај исто аѓаар те изградина амаре пхраленгири вера аѓаар со ка да амаро време, амаро трудо хем ка користина амаре вештине те шај те поможина лен кеда доживинена катастрофе. Шај те кера о исто кеда редовно даја доброволно прилог баши активност со керела пе ко цело свето. Аѓаар хем ко јавера да начинија поможинаја амаре пхраленге хем пхењенге те овел лен доверба кај о Јехова никогаш нане те мукхел лен.

15-16. Сар ваљани те постапина е пхраленцар со иси лен слабо вера?

¹⁵ О Павле на откажинѓа пе околендар со сине лен слабо вера. Ов сикавѓа ленге сочувство хем керела сине ленцар лафи ко љубезно хем позитивно начин (Евр. 6:9; 10:39). На пример, ко по писмо џи ко Евреија ов бут пути користинѓа о лафи „амен“ те шај те сикавел кај ов да ваљани сине те применинел о советија со денѓа лен (Евр. 2:1, 3). Исто сар о Павле, амен да на откажинаја амен околендар сој духовно слаба. Наместо адава шај те охрабрина лен аѓаар со ка сикава ленге искрено интерес. Ако кераја  аѓаар ка сикава кај мангаја лен. О начин сар вакераја несаве буќа шај повише те охрабринел таро адава со вакераја.

¹⁶ О Павле уверинѓа е пхрален хем е пхењен кај о Јехова сине свесно башо шукар буќа со керена лен сине (Евр. 10:32-34). Амен да шај те кера нешто слично кеда поможинаја јекхе пхралеске кас со иси слабо вера. Шај те пуча ле сар ало ко чачипе хем те охрабрина ле те сетинел пе ко моментија кеда о Јехова поддржинѓа ле. Шај те користина и прилика те уверина ле кај о Јехова на бистерѓа о мангипе со сикавѓа леске хем кај нане те мукхел ле ки иднина (Евр. 6:10; 13:5, 6). Асавке разговорија шај те охрабринен акале пхрален хем пхењен те продолжинен е службаја.

17. Саве вештине шај понадари да те развина?

¹⁷ Исто сар јекх градежно работнико со времеа овела са пошукар ко пле вештине, аѓаар амен да шај те сикљова панда повише те изградина јекх јекхе. Шај те поможина јаверенге те кхеден сила те шај те истрајнен ко неволје аѓаар со ка спомнина ленге примерија таро окола со истрајнѓе. Шај те кера те овел мир аѓаар со ка спомнина о шукар буќа со дикхаја ко јавера. Ка икера о мир кеда тано ки опасност те нашава ле хем ка кера палем те овел мир кеда иси несогласувања. Исто аѓаар амен шај понадари да те изградина и вера амаре пхраленгири аѓаар со ка споделина ленцар важна библиска чачипа, ка нудина ленге практично помош хем ка поддржина околен кас со иси слабо вера.

18. Со сиан одлучно те кере?

¹⁸ Окола со керена бути ко градежна проектија тари амари организација тане бахтале хем задоволна. Амен шај те ова бахтале хем задоволна кеда изградинаја ко духовно поглед амаре пхрален хем пхењен. Различно таро дословна градбе кола со пало несаво време шај те распадинен пе, адава со изградинаја е јаверен шај те анел шукар резултатија кола со ка трајнен вечно. Адалеске те ова одлучна понадари да те охрабрина хем те изградина јекх јекхе (1. Сол. 5:11).