1-2. Која споредба поможинела аменге те хаљова о лафија таро 1. Петрово 2:21?

ЗАМИСЛИН туке кај сиан дело тари јекх група која со пхирела ко јекх опасно тхан пхердо ивеа. Водинела тумен јекх искусно водачи. Џикоте пхирела ко ковло ив, ов пали песте мукхела траге таро пле чекорија. Ко јекх моменти нашти те дикхе е водаче! Ама, на астарела тут паника. Наместо адава, ту хем о јавера тари група слединена о чекорија е водаческере најшукар со шај.

² Сар чачутне христијања, ки несави смисла амен пхираја ко адава опасно тхан — акава лошно свето. Амен сием благодарна со о Јехова денѓа амен е најшукар водаче — пле Чхаве, е Исус Христосе, пало каскере чекорија шај те џа (1. Пет. 2:21). О Петар спорединела е Исусе сар јекх водачи. Исто сар о водачи сој спомнимо по упре ки споредба, о Исус да мукхља траге таро пле чекорија со шај те следина лен. Те дикха со значинела те џа пало е Исусескере чекорија. Соске ваљани те кера адава хем сар шај те кера адава?

3. Со значинела те џал пе пало некаскере чекорија?

³ Со значинела те џа пало некаскере чекорија? Ки Библија о лафија „џала“ хем „про“ понекогаш однесинена пе ко адава со керела јекх мануш ко пло живото (1. Мој. 6:9; Изр. 4:26). О начин сар јекх мануш живинела пло живото шај те овел споредимо сар траге таро чекорија кола со мукхела лен пали песте кеда пхирела. Спрема адава, те џал пе пало некаскере чекорија, значинела те џал пе пало лескоро пример.

4. Со значинела те џа пало е Исусескере чекорија?

 ⁴ Тегани, со значинела те џал пе пало е Исусескере чекорија? Адава едноставно значинела те џа пало лескоро пример. Ко главно стихо тари акаја статија, о апостол Петар керела лафи башо шукар пример со мукхља о Исус адалеске со истрајнѓа кеда сине ле неволје. Ама, иси панда бут јавера начинија сар шај те џа пало е Исусескоро пример (1. Пет. 2:18-25). Чаче, цело е Исусескоро живото — са адава со вакерѓа хем со керѓа — тано аменге пример те следина ле.

5. Дали шај о несовршена мануша те џан пало е Исусескоро совршено пример? Објаснин.

⁵ Сар несовршена мануша, шај ли чаче те следина е Исусескоро пример? Оја, шај. Амен нашти совршено те џа пало е Исусескоро пример. Ама, ако сар несовршена мануша даја амендар са те џа пало лескере чекорија, тегани применинаја о лафија таро апостол Јован кова со вакерѓа: „Те живина сар со живинѓа [о Исус]“ (1. Јов. 2:6).

6-7. Соске шај те вакера кај ако џаја пало е Исусескере чекорија ка ова попаше е Јеховаја?

⁶ Ако џаја пало е Исусескере чекорија, тегани ка ова попаше е Јеховаја. Соске шај те вакера адава? Прво, о Исус мукхља бут шужо пример башо адава сар шај амаре животоја те угодина е Девлеске (Јован 8:29). Адалеа со ка џа пало е Исусескере чекорија, амен ка кера е Јеховаскири волја. Хем, шај те ова сигурна кај амаро небесно Дад ка овел паше околенцар со бут трудинена пе те овен лескере амала (Јак. 4:8).

⁷ Дујто, о Исус ко совршено начин џала сине пало пле Дадескоро пример. Адалеске, о Исус шај сине те вакерел: „Кој дикхља ман, дикхља ме Даде да“ (Јован 14:9). Амен шај те сикава сар е Исусескере особине хем те понашина амен е јаверенцар сар ов со понашинела пе сине. На пример, сине леске жал  башо јекх лепрозно мануш, сикавѓа сочувство јекхе ромњаке која со сине бут насвали, хем сикавѓа сочувство е манушенге со муло лендар некој паше. Кеда слединаја е Исусескоро пример амен слединаја е Јеховаскоро да пример (Мар. 1:40, 41; 5:25-34; Јован 11:33-35). Кобор повише трудинаја амен те ова сар о Јехова, добором попаше оваја леа.

8. Објаснин сар адава со џаја пало е Исусескере чекорија поможинела аменге „те победина“ о свето?

⁸ Ако џаја пало е Исусескере чекорија нане те дозволина акава лошно свето те лел амаро внимание. Ки последно рат таро пло живото акате ки Пхув, о Исус шај сине те вакерел: „Ме побединѓум о свето!“ (Јован 16:33). Акале лафенцар ов мислинѓа ко адава кај на дозволинѓа о размислибе, о целија хем о постапке е манушенгере таро акава свето те влијајнен упри лесте. О Исус никогаш на бистерѓа и причина соске сине бичхалдо ки Пхув — те славинел е Јехова. А сар тано аменцар? Ко акава свето, иси бут буќа со шај те лен амаро внимание хем те чхинавен амен те служина е Јеховаске. Ама, ако исто сар о Исус, понадари да концентриринаја амен те кера е Јеховаскири волја, амен да исто аѓаар „ка победина“ о свето (1. Јов. 5:5).

9. Со мора те кера те шај те живина вечно?

⁹ Ако џаја пало е Исусескере чекорија амен ка шај те живина вечно. Кеда јекх терно барвало мануш пучља со ваљани те керел те шај те добинел вечно живото, о Исус одговоринѓа леске: „Ов мло ученико“ (Мат. 19:16-21). Несаве Евреенге кола со на верујнена сине кај ов тано о Христос, о Исус вакерѓа ленге: „Ме бакхре авена пали манде. Ме дава лен вечно живото“ (Јован 10:24-29). Е Никодимеске кова со сине члени ко Судско совет хем кова со мангља те сикљол повише башо е Исусескере сикљојба, о Исус вакерѓа леске кај окола со верујнена ки лесте ка живинен вечно (Јован 3:16). Амен сикаваја вера ко Исус адалеа со применинаја адава ов со сикавѓа хем кераја адава со ов керѓа. Ако кераја адава, амен ка шај те живина вечно (Мат. 7:14).

10. Со мора те кера те шај шукар те пенџара е Исусе? (Јован 17:3)

¹⁰ Те шај те џа пало е Исусескере чекорија ко са мора англедер шукар те пенџара ле. (Читин Јован 17:3.) Те пенџарел пе е Исусе тано нешто со мора те кера ле постојано. Амен мора са пошукар хем пошукар те запознајна ле — те сикљова башо лескере особине, башо лескоро начин сар размислинела хем башо мерилија спрема кола со водинела пе. Бизи разлика кобор време џанаја о чачипе, амен мора понадари да те трудина амен шукар те пенџара е Јехова хем лескере Чхаве.

11. Со содржинена о штар евангелија?

¹¹ Те шај пошукар те пенџара е Исусе, о Јехова  вклучинѓа ко пло Лафи о штар евангелија — Матеј, Марко, Лука хем Јован. Акала штар лила содржинена јекх историско извештај башо е Исусескоро живото хем служба. Ола вакерена аменге со вакерѓа о Исус, со керѓа хем сар осетинела пе сине. Акала штар лила поможинена аменге „шукар те дикха“ о пример е Исусескоро (Евр. 12:3). Ола содржинена о траге кола со о Исус мукхља лен пали песте. Адалеске кеда проучинаја о евангелија амен шај пошукар хем пошукар те пенџара е Исусе. Аѓаар, ка шај ко са те џа пало е Исусескере чекорија.

12. Сар шај те овел амен целосно корист таро евангелија?

¹² Те шај те овел амен целосно корист таро евангелија, мора те кера нешто повише него само те читина лен. Ваљани те одвојна аменге време шукар те проучина лен хем хор те размислина баши ленде. (Споредин Исус Навин 1:8.) Те дикха дуј предлогија кола со ка поможинен аменге те размислина башо евангелија хем те применина адава со читинаја лендар.

13. Сар шај те кере о извештаија таро евангелија те овен туке пореална?

¹³ Прво, кер о извештаија таро евангелија те овен туке пореална. Дикх, шун хем осетин адава со случинѓа пе ко адала извештаија. Ко адава ка поможинел туке ако истражинеа ко публикацие со дела лен е Јеховаскири организација. Дикх о контекст, а адала тане о настанија со случинѓе пе англедер или пало извештај кова со проучинеа ле. Роде повише информацие башо мануша хем башо тхана сој спомниме ко извештаија. Споредин о извештај со проучинеа ле е исто извештаеја сој спомнимо ко јавер евангелие. Понекогаш јекх писатели вклучинела интересно детали кова со јавер на спомнинела ле.

14-15. Со мора те кера те шај те применина адава со сикљоваја таро извештаија башо Исус?

¹⁴ Дујто, применин о извештаија таро евангелија ко тло живото (Јован 13:17). Сар шај те кере адава? Откеда шукар ка  проучине јекх извештај таро евангелие, пуч тут: „Дали иси јекх поука ко акава извештај со шај те применинав ла ко мло живото? Сар шај те користинав акава извештај те поможинав некаске?“ Трудин тут те размислине баши некасте со џанеа ле хем тегани ко соодветно време, ко љубезно хем тактично начин вакер леске и поука со сиклиљан.

¹⁵ Те дикха јекх пример сар шај те применина акала дуј предлогија. Ка дикха о извештај баши чороли удовица кола со дикхља ла о Исус ко храми.

16. Опишин и сцена таро Марко 12:41.

¹⁶ Кер о извештај те овел туке пореално. (Читин Марко 12:41.) Замислин туке кај тано 11 нисан 33 берш а.е., похари таро јекх курко англедер те мерел о Исус. О Исус скоро цело диве сикавела е јаверен ко храми. Ама, о религиозна водачија противинена пе леске. Поангле, несаве лендар пучле ле кој денѓа ле авторитети те керел асавке буќа. А јавера пучена ле сине пучиба кола со мислинена сине кај ов нашти те одговоринел лен (Мар. 11:27-33; 12:13-34). Акана о Исус гело ко јавер дело таро храми, веројатно ко дело со викинела пе дворо е џувленгоро. Адатхар ов шај те дикхел о касе башо доброволна прилогија. Ов бешела хем дикхела сар о мануша мукхена прилогија. Дикхела бут барвале мануша мукхена бут паре. Изгледа ов тано доволно паше те шунел о звуко таро паре со перена ки каса.

17. Со керѓа и чороли удовица сој спомними ко Марко 12:42?

¹⁷ Читин Марко 12:42. Пало несаво време, о Исус приметинела јекхе ромња. Ој тани јекх чороли удовица (Лука 21:2). Лакоро живото тано бут пхаро хем изгледа нане ла доволно паре те кинел песке основна буќа живибаске. Ама, ој џала ко јекх таро касе хем бизо некој те приметинел мукхела дуј тикне паре, кола со едвај шунѓона кеда перена ки каса. О Исус џанела кај ој мукхља дуј лепте — о најтикне паре со користинена пе сине ко адава време. Адале паренцар нашти сине те кинел пе ни и најефтино чирикли хајбаске.

18. Спрема Марко 12:43, 44, со вакерѓа о Исус башо е удовицакоро прилог?

¹⁸ Читин Марко 12:43, 44. О Исус тано бут воодушевимо тари акаја удовица. Адалеске, ов викинела пле ученикон, сикавела ленге е удовица хем вакерела ленге: „Акаја чороли удовица мукхља повише таро са о јавера“. Пало адава објаснинела: „Сарине ола [посебно о барвале мануша] мукхле таро адава со сине лен повише, ама ој таро пло чоролипе денѓа са со сине ла живибаске“. Кеда акаја верно удовица денѓа о последна паре адава диве, ој сикавѓа кај иси ла доверба ко Јехова кај ов ка грижинел пе лаке (Пс. 26:3).

19. Која важно поука шај те сикљова таро е Исусескере лафија баши чороли удовица?

¹⁹ Применин о извештај ко тло живото. Пуч тут: „Сави поука шај те сикљовав таро е Исусескере лафија баши чороли удовица?“ Размислин баши лате. Сигурно, ој мангља те дел повише е Јеховаске. Ама, ој керѓа адава со шај те керел — денѓа е Јеховаске пло најшукар. Хем о Исус џанља кај лакоро прилог сине скапоцено лескере Дадеске. Акаја тани јекх важно поука аменге: О Јехова тано задоволно кеда даја леске амаро најшукар — амари служба со кераја леске цело вилеа хем цело душаја (Мат. 22:37; Кол. 3:23). О Јехова тано бахтало кеда дикхела кај кераја са со шај. Акава, исто аѓаар важинела башо време хем сила со одвојнаја баши служба е Јеховаске. Амен мангаја те да амаро најшукар те учествујна ки служба хем те ова присутна ко состанокија.

20. Сар шај те применине и поука таро извештај баши удовица? Вакер пример.

 ²⁰ Сар шај те применине и поука таро извештај баши удовица? Размислин башо пхраља со ка охрабринен пе адалеа со ка сетинкере лен кај о Јехова тано бахтало со трудинена пе те керен адава со шај. На пример, дали џанеа несаве попхуре пхења со шај осетинела пе криво или кај нане корисно адалеске сој тани насвали или нане ла сила те керел повише ки служба сар поангле? Или дали џанеа несаве пхрале сој хронично насвало, иси ле дукха хем сој обесхрабримо адалеске со нашти џала ки дворана ко секова состанок? Поможин асавкенге адалеа со ка вакере ленге лафија со ка охрабринен лен (Еф. 4:29). Вакер ленге и охрабрувачко поука со сиклилем ла таро извештај баши чороли удовица. Тле охрабрувачка лафија ка уверинен лен кај о Јехова тано бахтало кеда даја леске амаро најшукар (Изр. 15:23; 1. Сол. 5:11). Кеда пофалинеа е јаверен адалеске со дена пумаро најшукар е Јеховаске, бизи разлика кобор тикно изглединела адава, ту ко са џаја пало е Исусескере чекорија.

21. Со сиан одлучно те кере?

²¹ Амен сием бут благодарна со о извештаија таро евангелија дена бут деталија башо Исусескоро живото, адалеске со ола поможинена аменге те џа пало лескоро пример, хем ко са те џа пало лескере чекорија! Дали шај ки амари лично студија или ки Фамилијарно рат те проучина о евангелија? Те на бистра, те шај те овел амен целосно корист таро проучибе, ваљани те кера о извештај те овел аменге пореално хем те применина ле ко амаро живото. Освен со ваљани те кера адава со керѓа о Исус, амен ваљани хем те шуна адава со вакерѓа. Ки следно статија ка дикха со шај те сикљова таро е Исусескере последна лафија англедер те мерел.