1. Со мора те кера сарине амен?

ДАЛИ би мангеа те праста ки несави пхари трка, посебно ако сиан насвало или уморно? Веројатно на. Сепак, о апостол Павле вакерѓа кај са о чачутне христијања прастана ки јекх трка (Евр. 12:1). Сарине амен, бизи разлика дали сием терне или пхуре, силна или уморна, мора те истрајна џи ко крајо ако мангаја те добина и награда со ветинѓа аменге о Јехова.

2. Соске о Павле шај сине слободно те дел о совет сој пишимо ко 2. Тимотеј 4:7, 8?

² О Павле шај сине те дел совет е христијаненге истрајно те прастан ки адаја трка, адалеске со коркори ов успејнѓа те завршинел ла. (Читин 2. Тимотеј 4:7, 8.) Ама, сој тани уствари и трка баши која со керѓа лафи о Павле?

3. Баши сави трка керѓа лафи о Павле?

³ О Павле понекогаш пишинела сине башо буќа со керена пе сине ко трке ки пурани Грција те шај те сикавел важна поуке (1. Кор. 9:25-27; 2. Тим. 2:5). Ко некобор прилике, ов спорединѓа е христијаненгоро живото тркаја (1. Кор. 9:24; Гал. 2:2; Фил. 2:16). Амен кхуваја ки акаја „трка“ кеда даја лафи е Јеховаске кај ка служина леске хем ка крстина амен (1. Пет. 3:21). А ка реса џи ки цел кеда ов ка дел амен и награда — вечно живото (Мат. 25:31-34, 46; 2. Тим. 4:8).

4. Со ка дикха ки акаја статија?

⁴ Ки која смисла јекх маратонско трка тани слично е христијанско животоја? Иси некобор буќа сој тане слична. Те дикха трин лендар. Прво, мора те праста ко исправно  друмо; дујто, мора те мислина ки цел; хем трито, мора понадари да те праста чак кеда ка овен амен проблемија.

5. Ко саво друмо мора те праста, хем соске?

⁵ Те шај те добинен и награда ки јекх дословно трка, о тркачија мора те икерен пе ко правилија со чхивѓе лен окола со организиринена и трка, сар на пример те прастан ко исправно друмо. Слично, ако мангаја те добина о вечно живото, мора те икера амен ко библиска начелија (Дела 20:24; 1. Пет. 2:21). Ама, о Сатана хем окола со џана пали лесте мангена те кера појавер избор, хем те чхивен амен палем те праста ленцар (1. Пет. 4:4). Адалеске, асана башо начин сар живинаја хем вакерена кај о друмо котар со ола џана тано пошукар, хем кај ингарела џи ки слобода. Ама, адава тано баро ховајбе (2. Пет. 2:19).

6. Со сикљовеа таро пример е Брајанескоро?

⁶ Секој со одлучинела те прастал заедно околенцар сој тане дело таро свето е Сатанаскоро сигате ка хаљол кај о друмо со биринѓа ле на ингарела ки слобода него ко ропство (Рим. 6:16). Те дикха со случинѓа пе е Брајанеа. Лескере родителија воспитинѓе ле те живинел сар христијани. Ама, кеда сине тинејџери, почминѓа те пучел пе дали адава живото ка керел ле бахтало, хем одлучинѓа те овел сар окола со живинена спрема е Сатанаскере мерилија. Ов вакерела: „Ни хари на мислинѓум кај и слобода со бут мангљум ла ка керел ман те овав робо буте лошна навикенге... Сар со накхела сине о време почминѓум те користинав дрога, те пијав хем те живинав неморално. О јавера некобор берша почминѓум те користинав са попхаре дроге хем уљум зависно лендар... Почминѓум те бикинав дрога те шај те авав џи ко паре башо мле лошна навике“. Пало несаво време, о Брајан одлучинѓа те живинел спрема е Јеховаскере мерилија. Ов уло христијани хем крстинѓа пе ко 2001 берш. Авдиве ов тано чаче бахтало адалеске со биринѓа о исправно друмо. *

7. Спрема Матеј 7:13, 14, таро кола дуј друмија шај те џа?

⁷ Кобор тано важно те бирина о исправно друмо! О Сатана мангела секова јекх амендар те чхинавел те џал таро тесно друмо „со ингарела ко живото“, хем те почминел те џал таро бувло друмо котар со џана повише мануша таро свето. О бувло друмо мангена ле бут џене хем ки лесте полокхе џала пе. Ама, ов „ингарела ко уништување“. (Читин Матеј 7:13, 14.) Те шај те ачхова ко исправно друмо хем те на мукха ништо те лел амаро внимание, мора те верујна ко Јехова хем те шуна ле.

8. Со керела јекх тркачи ако сопкинела пе?

⁸ Те шај ма те сопкинен пе, о маратонција дикхена англи песте хем на цидена пе јакхја таро друмо. Сепак, некој шај те сопкинел пе ако газинела ки несави дупка. Или, јавер тркачи шај те сопкинел ле бизо те мангел. Чак хем те перел, о тркачи уштела хем понадари да прастала. Наместо те мислинел ко адава со сопкинѓа ле, леске тано најважно те ресел џи ки цел хем те добинел и награда.

9. Со ваљани те кера ако сопкинаја амен?

⁹ Џикоте прастаја и христијанско трка, шај те сопкина амен бут пути аѓаар со ка кера грешке амаре лафенцар или понашибаја. Шај амаре пхраља хем пхења да кола со прастана заедно аменцар те керен грешке коленцар со ка поврединен амен. Акава на ваљани те изненадинел амен. Сарине сием несовршена, хем сарине прастаја ко исто тесно друмо со ингарела ко живото. Адалеске сигурно ка случинел пе те „гурина“ некас или некој те „гуринел“ амен. О Павле вакерѓа кај понекогаш секоле јекхе амендар ка овел ле причина те жалинел пе против некасте (Кол. 3:13). Ама, наместо те мислина ко адава со сопкинѓа амен, те концентририна амен ки награда со аџикерела амен. Чак ако сопкинаја амен, те ова одлучна те ушта хем понадари да те праста ки трка. Ако сием хољаме хем ако на мангаја палем те ушта, нане те реса џи ки цел хем нане те добина и награда. Освен адава, веројатно ка ова пречка е јаверенге кола со трудинена пе те прастан ко тесно друмо со ингарела ко живото.

10. Со ка поможинел аменге те на сопкина е јаверен?

¹⁰ Нане те ова „бар сопкибаске“ амаре пхраленге хем пхењенге кола со прастана заедно аменцар ако на родаја те керен о буќа ко амаро начин, него мукхаја секогаш кеда шај те керен о буќа аѓаар сар со ола мангена (Рим. 14:13, 19-21; 1. Кор. 8:9, 13). Ко акава начин, на сием сар о дословна тркачија. Ола натпреваринена пе јекх јекхеа, хем секој пробинела са пле силенцар те добинел и награда. Акала тркачија грижинена пе само песке — сар ола те побединен ки трка. Адалеске шај ка пробинен те гуринен е јавере тркачен ки страна те шај ола те овен англал. Ама појавер лендар, амен на натпреваринаја амен јекх јекхеа (Гал. 5:26; 6:4). Наместо адава, мангаја те поможина  кобор со шај повише пхраленге хем пхењенге те ресен џи ки цел заедно аменцар хем те добинен вечно живото. Адалеске, трудинаја амен те применина о совет е Павлескоро: „Ма дикхен само туменге те овел шукар, него исто аѓаар е јаверенге да“ (Фил. 2:4).

11. Ко со мислинена о тркачија, хем соске?

¹¹ Освен со дикхена англи песте џикоте прастана, о дословна тркачија мислинена хем ки цел. Чак те на дикхен ла пле јакхенцар, шај те замислинен песке сар ресена џи ки лате хем сар добинена и награда. Адава со мислинена ки награда поттикнинела лен те истрајнен ки трка.

12. Сави гаранција дела амен о Јехова?

¹² О Јехова дела гаранција пле слугенге кај, ако завршинена и христијанско трка, ка добинен награда — вечно живото ко небо или ко рај ки Пхув. Адалеске со и Библија опишинела адаја награда, панда акана шај те замислина аменге кобор шужо живото аџикерела амен ко адава време. Ако цело време размислинаја баши адаја надеж, ка ова поодлучна те истрајна хем нане те мукха ништо трајно те сопкинел амен ки трка башо живото.

13. Сави предност иси амен која со нане е дословна тркачен?

¹³ О тркачија ко грчка игре понекогаш мора сине те накхавен несаве предизвикија, сар со сине о умор хем и дукх. Ама шај сине те поможинел ленге само ленгири сила хем адава со англедер трениринѓе. Слично сар адала тркачија, амен да добинаја обука башо адава сар те праста амари трка. Ама, амен иси амен предност која со нане е дословна тркачен. Амен шај те добина сила таро Јехова, хем нане граница ко адава кобор шај те поможинел амен. Ако иси амен доверба ко Јехова, ов ветинела кај на само со ка обучинел амен, него исто аѓаар ка керел амен зорале! (1. Пет. 5:10).

14. Сар о лафија таро 2. Коринќаните 12:9, 10 шај те поможинен аменге те накха таро пречке?

¹⁴ О Павле мора сине те накхел таро бут пречке. Освен со сине вреџимо хем прогонимо, понекогаш осетинела пе сине слабо хем мора сине те боринел пе несаве проблемеа башо кова со вакерѓа кај тано „каро ко тело“ (2. Кор. 12:7). Ама, ов на мукхља акала буќа те чхивен ле те откажинел пе тари трка. Наместо адава, ов користинѓа лен те шај те сикавел кај иси ле целосно доверба ко Јехова. (Читин 2. Коринќаните 12:9, 10.) Адалеске со е Павле сине ле асавко стави, о Јехова поможинѓа леске те икљол ко крајо са е проблеменцар.

15. Ако џаја пало е Павлескоро пример, со ка осетина?

¹⁵ Шај амен да ка ова вреџиме или прогониме баши амари вера. Шај ка мора те борина амен насвалипаја или адалеа со сием ко крајо амаре силаја. Ама, ако џаја пало пример е Павлескоро, ки секоја таро адала ситуацие шај те сикава доверба ко Јехова хем те осетина лескири грижа.

16. Со шај те кере чак ако сиан насвало?

¹⁶ Дали мора те користине инвалидско количка или мора те ове пашло ко кревети? Дали иси тут проблеми тле чангенцар или слабо дикхеа? Ако оја, шај ли те праста околенцар сој тане терне хем састе? Џанѓола пе кај шај! Бут попхуре хем насвале пхраља хем пхења прастана ко друмо со ингарела ко живото. Ама, нашти те керен адава пле силаја. Ола добинена сила таро Јехова аѓаар со шунена о христијанска состанокија преку телефони или дикхена лен преку стриминг. Освен адава, учествујнена ки служба аѓаар со сведочинена е докторенге, е медицинско сестренге хем пле фамилијаке.

17. Сар дикхела о Јехова ко окола сој тане физички ограничиме?

¹⁷ Ако нашти те кере са со мангеа башо Јехова, ма обесхрабрин тут хем ма мислин кај  нашти те праста ко друмо со ингарела ко живото. О Јехова мангела тут баши тли вера хем башо са адава со керѓан баши лесте ко берша со накхле. Акана ваљани туке лескири помош повише таро било кеда англедер, хем ов нане те мукхел тут (Пс. 9:10). Наместо адава, о Јехова ка овел туја панда попаше. Дикх со пхенѓа јекх пхен која со иси ла баре проблемија састипаја: „Адалеске со мло састипе овела са полошно, нане ма прилика често те керав лафи е јаверенцар башо чачипе. Сепак, џанава кај адава хари да со керава керела бахтало е Јехова, хем бахтали сиум башо адава“. Кеда сиан обесхрабримо, ма бистре кај на сиан коркори — О Јехова тано туја. Размислин башо е Павлескоро пример, хем сетин тут ко лескере охрабрувачка лафија: „Уживинава ко слабостија... соске, кеда сиум слабо, тегани сиум силно“ (2. Кор. 12:10).

18. Кова посебно пхаро предизвик иси несаве пхрален хем пхењен?

¹⁸ Несаве таро окола со прастана ко друмо со ингарела ко живото иси лен панда јекх предизвик. Ола мучинена пе проблеменцар кола со о јавера нашти те дикхен лен хем шај нане ни те хаљовен лен. На пример, несаве боринена пе депресијаја или тане претерано секириме хем дарана. Соске акава шај те овел посебно пхаро акале пхраленге хем пхењенге колен со о Јехова бут мангела лен? Адалеске со кеда некас иси пхаго вас или тано ки инвалидско количка, сарине тане свесна башо лескоро проблеми хем адалеске тане поттикниме те поможинен леске. Ама, кеда некас иси емоционално или душевно насвалипе, адава на дикхјола пе секогаш. Шај акала пхраља хем пхења осетинена бари дукх исто сар те пхене пхагле пло про или пло вас. Ама, адалеске со о јавера нашти те приметинен ленгири дукх, нашти секогаш те сикавен ленге сочувство хем кај хаљовена лен.

19. Со сикљоваја таро Мефивостеј?

¹⁹ Ако ту те да иси тут асавке предизвикија хем дикхеа кај о јавера на хаљовена тут, шај те охрабрине тут таро пример е Мефивостеескоро (2. Сам. 4:4). Ов сине инвалиди, хем ки јекх прилика е Давиде сине ле погрешно мислење баши лесте хем на сине леа праведно. О Мефивостеј ни хари на сине криво башо адава со случинѓа пе леске. Сепак, на мукхља адава те влијајнел упри лесте хем те овел негативно него ценинела сине о шуже буќа со случинѓе пе леске. Сине благодарно башо шукарипе со керѓа леске о Давид (2. Сам. 9:6-10). Адалеске, кеда о Давид анѓа погрешно осуда баши лесте, о Мефивостеј трудинѓа пе те дикхел и цело ситуација. На мукхља е Давидескири грешка те керел ки лесте лошна чувствија хем мисле, хем на керѓа криво е Јехова башо адава. О Мефивостеј мислинела сине ко адава со шај те керел те шај те поддржинел адале кас со о Јехова чхивѓа те овел цари  (2. Сам. 16:1-4; 19:24-30). О Јехова мукхља лескоро бут шукар пример те овел пишимо ки Библија те шај амен те сикљова лестар (Рим. 15:4).

20. Сар влијајнела упро несаве пхраља хем пхења адава сој тане претерано секириме, ама ко со шај те овен сигурна?

²⁰ Адалеске сој тане претерано секириме, несаве пхраља хем пхења на осетинена пе шукар ко ситуацие коте со иси јавера да мануша. Шај пхаро ленге те овен ки побари група, ама ола понадари да џана ки дворана хем ко конгресија. Иако ленге пхаро те керен лафи манушенцар со на пенџарена лен, ола сепак керена адава ки служба. Ако акава случинела пе туке да, ов сигурно кај на сиан коркори. Бут јавера осетинена пе сар туте. Ма бистре кај о Јехова бут тано бахтало со понадари да служинеа леске цело душаја. Адава со ту на откажинеа тут тано доказ кај ов дела тут берекетија хем кај дела тут и сила со ваљани туке * (Фил. 4:6, 7; 1. Пет. 5:7). Ако служинеа е Јеховаске иако иси тут проблемија е састипаја или емоционална проблемија, ов сигурно кај адава керела ле бут бахтало.

21. Адалеске со о Јехова поможинела амен, со шај те кера сарине амен?

²¹ Шукар тано адава со иси разлике машкар и дословно трка хем и трка баши која со керѓа лафи о Павле. Ко трке со икерена пе сине ко библиска времија, само јекх тркачи добинела сине награда. Ама, ки христијанско трка, секова јекх со верно ка истрајнел џи ко крајо ка овел наградимо вечно животоја (Јован 3:16). Исто аѓаар, ки дословно трка, са о тркачија мора те овен ки шукар физичко состојба ако мангена те побединен. Ама, амен истрајно прастаја иако буте џенен амендар иси лен проблемија састипаја (2. Кор. 4:16). Адалеске со о Јехова поможинела амен, сарине ка праста и трка џи ко крајо!