1. Ко саве околностија сине о Јован ко крајо таро прво веко а.е.?

КО КРАЈО таро прво веко а.е., о Јован аракхљовела сине ко бут пхаре околностија. Сине пхуро хем сине палдимо ко остров Патмос. Веројатно ов сине о последно апостоли со панда сине џивдо (Отк. 1:9). О Јован џанља кај о отпадникија ширинена сине ховавне сикљојба хем керена сине поделбе ко собранија. Шај дикхјола пе сине кај панда хари нане те постојнел нијекх таро чачутне христијања (Јуда 4; Отк. 2:15, 20; 3:1, 17).

2. Спрема Откровение 7:9-14, сави интересно пророчко визија добинѓа о Јован? (Дикх и слика тари насловно страна.)

² Џикоте сине ко адала пхаре околностија, о Јован добинѓа таро Девел јекх интересно пророчко визија. Ов дикхља сар јекх ангели вакерела јавере штаре ангеленге те икерен е баре неволјакере бавлала со уништинена, са џикоте јекх група Девлескере робија на овена конечно обележиме печатеа (Отк. 7:1-3). Ки адаја група иси 144.000 џене кола со ка владинен заедно е Исусеа ко небо (Лука 12:32; Отк. 7:4). Пало адава о Јован спомнинела јекх јавер група која со сине бут бари. Ов вакерѓа: „Дикхљум баро мноштво мануша колен со нијекх нашти те гејнел лен, таро са о нацие хем племија хем народија хем чхибја, сар терѓона англо престол хем англо Бакхро“. (Читин Откровение 7:9-14.) Замислин туке кобор бахтало сине о Јован кеда дознајнѓа кај ки иднина ка овен бут мануша кола со ка служинен е Девлеске ко исправно начин!

3. а) Соске е Јованескири визија ваљани те керел позорали амари вера? б) Со ка дикха ки акаја статија?

³ Акаја визија сигурно керѓа позорали е Јованескири вера. Ама, панда повише ваљани те керел зорали амари  вера адалеске со живинаја ко време кеда ој исполнинела пе. Амен дикхаја сар кхедена пе милионија мануша со иси лен надеж кај ка преживинен и бари неволја хем ка живинен вечно ки Пхув. Ки акаја статија ка дикха сар о Јехова, повише таро 80 берш англедер, откринѓа пле народоске кој тано о баро мноштво. Пало адава, ка дикха дуј буќа башо акава мноштво: 1) кај тано бут баро хем 2) ки лесте иси мануша таро цело свето. Акала буќа ваљани те керен позорали сариненгири вера сој тане дело тари акаја група.

4. Кова библиско чачипе на хаљовена о цркве таро христијанско свето, хем сар о Истражувачија е Библијакере разликујнена пе сине лендар?

⁴ Обично, о цркве таро христијанско свето на вакерена е манушенге о чачипе тари Библија кај јекх диве о послушна мануша ка живинен вечно ки Пхув (2. Кор. 4:3, 4). Авдиве, побаро дело таро цркве сикавена кај са о шукар мануша кеда мерена џана ко небо. Ама јекх тикни група Истражувачија е Библијакере, кола со икалѓе о списание Стражарско кула ко крајо таро 19 веко, мислинена сине појавер. Ола халиле кај о Девел палем ка керел рај ки Пхув хем кај милионија послушна мануша ка живинен акате ки Пхув — а на ко небо. Сепак ваљани сине ленге време те шај јасно те хаљовен кој ка овен адала послушна мануша (Мат. 6:10).

5. Со халиле о Истражувачија е Библијакере башо 144.000?

⁵ Џикоте проучинена сине е Девлескоро лафи, о Истражувачија е Библијакере исто аѓаар дознајнѓе кај јекх група мануша ка овен „кинде тари пхув“ те владинен заедно е Исусеа ко небо (Отк. 14:3). Халиле кај ки адаја група иси 144.000 ревна христијања кола со верно служинѓе е Девлеске џикоте живинѓе ки Пхув. Ама, со мислинѓе башо баро мноштво?

6. Со мислинена сине о Истражувачија е Библијакере башо баро мноштво?

⁶ Ки визија со добинѓа ла, о Јован дикхља кај адаја група мануша „терѓона англо престол хем англо Бакхро“ (Отк. 7:9). Адала лафија керѓе о Истражувачија е Библијакере те хаљовен кај, исто сар о 144.000, о баро мноштво да ка добинел живото ко небо. Ама, ако о солдуј групе ваљани сине те живинен ко небо, тегани која тани и разлика машкар ленде? О Истражувачија е Библијакере мислинена сине кај о баро мноштво најверојатно тане о христијања кола со на сине целосно послушна е Девлеске џикоте живинена сине ки Пхув. Иако постапинена сине спрема о библиска морална мерилија, несаве лендар шај на иклиле таро христијанска цркве. О Истражувачија е Библијакере мислинѓе кај акале манушенге нане те овел дендо те владинен е Исусеа адалеске со на сине доволно ревна. Адалеске со ленгоро мангипе на сине доволно баро, о Истражувачија мислинена сине кај о мануша таро баро мноштво шај те терѓон ко небо англо престол, ама нашти те бешен ко престолија те владинен.

7. а) Спрема о Истражувачија е Библијакере, кој ка живинел ки Пхув џикоте о Христос владинела милја берша? б) Со мислинѓе о Истражувачија башо е Девлескере верна слуге кола со живинѓе англедер о Христос?

⁷ Тегани кој ка живинел ки Пхув? О Истражувачија е Библијакере мислинена сине кај, откеда и група таро 144.000 хем о баро мноштво ка овен кхедиме ко небо, милионија јавера ка добинен прилика те живинен ки Пхув хем те уживинен ко берекетија кеда о Христос ка владинел милја берша. О Истражувачија е Библијакере мислинена сине кај адала милионија мануша нане те служинен е Јеховаске англедер те почминел е Христосескоро владибе. Наместо адава, ола ка овен сикавде башо Јехова џикоте трајнена адала милја берша. Пало адава, окола со  ка икерен пе спрема е Јеховаскере мерилија ка ачховен те живинен вечно ки Пхув, а окола со ка бунинен пе ка овен уништиме. О Истражувачија е Библијакере исто аѓаар мислинена сине кај окола со тегани ка служинен сар „кнезија“ ки Пхув — машкар кола сој несаве таро воскресниме слуге е Девлескере со живинена сине англедер о Христос — шај ко крајо таро милја берша ко несаво начин ка овен наградиме животоја ко небо (Пс. 45:16).

8. Спрема о Истражувачија е Библијакере, кола трин групе сине вклучиме ки е Девлескири намера?

⁸ Значи, о Истражувачија е Библијакере мислинена сине кај иси трин групе: 1) о 144.000 со ка владинен е Исусеа таро небо; 2) о баро мноштво христијања со на сине доволно ревна хем со ка терѓон англо престол хем англо Бакхро ко небо; хем 3) о милионија мануша со ка живинен ки Пхув хем ка овен сикавде башо Јехова џикоте о Христос владинела милја берша. * Ама, ко пло време, о Јехова мукхља панда побари светлина упри визија башо баро мноштво (Изр. 4:18).

9. а) Ки која смисла о баро мноштво ки Пхув терѓола „англо престол хем англо Бакхро“? б) Соске о начин сар хаљоваја о Откровение 7:9 тано логично?

⁹ Ко 1935 берш е Јеховаскере сведокија појасно халиле кој тано о баро мноштво тари е Јованескири визија. Ола халиле кај о баро мноштво на ваљани дословно те овел ко небо те шај те терѓол „англо престол хем англо Бакхро“. Адава керена ле ки симболично смисла. Иако ка живинен ки Пхув, окола сој тане дело таро баро мноштво шај те терѓон „англо престол“ аѓаар со признајнена е Јехова сар Владетели хем спремно шунена ле (Иса. 66:1). Ола терѓона „англо Бакхро“ аѓаар со сикавена вера ки е Исусескири откупно жртва. Панда јекх библиско стихо сикавела кај о Откровение 7:9 иси ле симболично значење. Ко Матеј 25:31, 32 пишинела кај „са о народија“ — чак окола сој лошна — „ка кхеден пе“ англо Исус, кова со ка бешел ко пло славно престол. Јасно тано кај са акала народија нане ко небо, него ки Пхув. Акава појасно хаљојбе тани логично. Адава сикавела соске и Библија на вакерела кај о баро мноштво ка овел лендо ко небо. Само јекхе група манушенге тано ветимо вечно живото ко небо — е 144.000 џененге, кола со „ка владинен сар царија упри пхув“ заедно е Исусеа (Отк. 5:10).

10. Соске окола сој тане дело таро баро мноштво мора те сикљовен башо Јехова англедер те почминел о Христос те владинел милја берша?

¹⁰ Спрема акава, таро 1935 берш, е Јеховаскере сведокија халиле кај о баро мноштво тари визија е Јованескири тане о верна христијања колен со иси лен надеж вечно те живинен ки Пхув. Те шај те преживинен и бари неволја, ола мора те сикљовен башо Јехова хем те почминен те служинен леске англедер те почминел о Христос те владинел милја берша. Аѓаар ка овел лен доволно зорали вера те шај „те нашен таро са адала буќа со ваљани те овен“ англедер те почминел адава владибе (Лука 21:34-36).

11. Соске о Истражувачија е Библијакере мислинѓе кај несаве ка добинен живото ко небо ко крајо таро е Христосескоро владибе?

¹¹ А соске о Истражувачија е Библијакере мислинѓе кај несаве таро адала со ка служинен сар „кнезија“ ки Пхув, ка живинен ко небо ко крајо таро е Христосескоро владибе? Ола мислинѓе кај нане те овел праведно несаве верна Девлескере слуге таро пурано време те живинен вечно ки Пхув, а несаве христијања со на сине добором верна хем ревна те овен наградиме животоја ко небо. Адалеске, ки Стражарско кула таро 15 февруари  1913 берш, пишинела сине кај шај несаве таро адала верна Девлескере слуге таро пурано време сепак те добинен живото ко небо ко крајо таро е Христосескоро владибе. Упро асавко размислибе влијајнѓе дуј погрешна хаљојба: 1) кај о баро мноштво ка живинел ко небо хем 2) кај о баро мноштво тане христијања со нане добором ревна.

12-13. Со хаљовена хем о помазаникија хем о баро мноштво баши пли награда?

¹² Ама, сар со дикхлем, таро 1935 берш е Јеховаскере сведокија јасно халиле кај о баро мноштво мануша тари е Јованескири визија, кола со „накхле и бари неволја“, уствари тане окола со ка преживинен о Армагедон хем ка живинен акате, ки Пхув. Ола ка викинен ко цело гласо: „О спасение авела таро амаро Девел, кова со бешела ко престол, хем таро Бакхро!“ (Отк. 7:10, 14). Исто аѓаар, е Јеховаскере сведокија халиле кај о верна Девлескере слуге таро пурано време нане те џан ко небо соске и Библија вакерела кај окола со ка овен воскресниме те живинен ко небо добинена „нешто пошукар“ лендар (Евр. 11:40). О нево хаљојбе таро 1935 берш поттикнинѓа амаре пхрален ревно те канинен е манушен те служинен е Јеховаске хем те овел лен надеж те живинен вечно ки Пхув.

¹³ Окола сој тане дело таро баро мноштво тане бут бахтале баши пли надеж. Ола џанена кај о Јехова тано адава со одлучинела коте ка живинен лескере верна слуге — дали ко небо или ки Пхув. Хем о помазаникија хем о баро мноштво хаљовена кај иси лен награда само башо е Јеховаскоро шукарипе кова со сикавела ле преку и откупно жртва е Исусескири, а на адалеске со заслужинена (Рим. 3:24).

14. Пало 1935 берш, соске бут џене пучена пе сине сар ка исполнинел пе о пророштво башо баро мноштво?

¹⁴ Откеда е Јеховаскере слуге добинѓе појасно хаљојбе ко 1935 берш, бут џене панда пучена пе сине сар окола со иси лен надеж те живинен ки Пхув ка овен баро мноштво. На пример, о Роналд Паркин сине ле 12 берш кеда сине објаснимо кој тано о баро мноштво. Ов вакерела: „Ко адава време, ко цело свето сине околу 56.000 објавителија, хем бут џене, шај побаро дело лендар, сине помазаникија. Дикхјола пе сине кај о баро мноштво на сине добором баро“.

15. Сар напредујнѓа о кхедибе е манушенгоро сој тане дело таро баро мноштво?

¹⁵ Ама, ко наредна берша, ко бут пхувја сине бичхалде мисионерија хем о број е Јеховаскере сведоконгоро похари почминѓа те бајрол. Пало адава, ко 1968 берш, иклило о лил Чачипе кова со ингарела џи ко вечно живото, кова со сине кердо те проучинел пе  и Библија околенцар со сикавена сине интерес. О едноставно начин ко кова сине објасниме о библиска чачипа ко акава лил керѓа панда повише кротка мануша те служинен е Јеховаске. Штаре бершенге крстинѓе пе повише таро екваш милиони неве ученикија. Џикоте и Католичко црква са повише нашавела сине пло влијание ки Јужно Америка хем ко јавера пхувја, а о ограничувања башо амаро дело ки Источно Европа хем ко несаве делија тари Африка сине чхинавде, крстинѓе пе панда некобор милионија мануша (Иса. 60:22). Ко последна берша, е Јеховаскири организација икалѓа панда некобор публикацие коленцар со успешно шај те сикава е манушен башо библиска чачипа. Јасно тано кај кхедела пе јекх чаче баро мноштво, колесте со акана иси повише таро офто милионија!

16. Котар авена о мануша сој тане дело таро баро мноштво?

¹⁶ Кеда пишинѓа пли визија, о Јован вакерѓа кај ко баро мноштво ка овен мануша „таро са о нацие хем племија хем народија хем чхибја“. Бершенцар англедер, нешто слично пророкујнѓа о Захарија. Ов пишинѓа: „Ко адала диве, деш мануша таро са о чхибја со керена лафи о народија ка астарен таро шеј јекхе Еврее, ка астарен ле хем ка вакерен: ’Ка  џа туменцар, соске шунѓем кај о Девел тано туменцар‘“ (Зах. 8:23).

17. Ко саво начин поможинела пе е манушенге таро са о народија хем чхибја?

¹⁷ Е Јеховаскере сведокија хаљовена кај о шукар хабери мора те проповединел пе ко бут чхибја те шај те кхеден пе о мануша таро са о народија. Иако повише таро 130 берш превединаја хем печатинаја публикацие проучибаске и Библија ко различна чхибја, авдиве амари литература превединела пе ко повише чхибја таро било кеда порано. Адалеа со кхедела о баро мноштво таро са о народија, о Јехова чаче керела чудо ко амаро време! Адалеске со иси духовно храна ко са повише чхибја, са акала мануша фалинена е Јехова сар јекх. Освен адава, е Девлескере слуге тане пенџарде пало пло пхраликано мангипе хем пало пло ревно проповедибе. Са акава сигурно керела позорали амари вера! (Мат. 24:14; Јован 13:35).

18. а) Спрема Исаија 46:10, 11, соске на сием изненадиме со о Јехова исполнинела о пророштво башо баро мноштво? б) Соске окола со иси лен надеж те живинен ки Пхув на мислинена кај чхинавела пе лендар нешто?

¹⁸ Бут сием бахтале со хаљоваја о пророштво башо баро мноштво! Ни хари на сием изненадиме со о Јехова исполнинела акава пророштво ко асавко чудесно начин. (Читин Исаија 46:10, 11.) Окола сој тане дело таро баро мноштво тане благодарна баши надеж со денѓа лен о Јехова. Ола на мислинена кај чхинавела пе лендар нешто адалеске со нане помазиме е Девлескере духоја те шај те служинен заедно е Исусеа таро небо. Ки Библија иси извештаија башо верна мурша хем џувља кола со сине водиме таро свети дух, ама палем нане дело таро 144.000. Јекх асавко Девлескоро слуга тано о Јован Крстител (Мат. 11:11). Јавер тано о Давид (Дела 2:34). Ола хем бут јавера ка овен воскресниме те живинен ко рај ки Пхув. Саринен лен — заедно е баре мноштвоја — ка овел лен прилика те сикавен пли верност спрема о Јехова хем те поддржинен ле сар Најбаро Владетели.

19. Ко со ваљани те поттикнинел амен адава со дикхаја кај исполнинела пе и визија башо баро мноштво?

¹⁹ Прво пути ки манушикани историја, о Девел кхедела милионија манушен таро са о народија те шај те фалинен ле сар јекх. Бизи разлика дали иси амен надеж те живина ко небо или ки Пхув, мора те поможина кобор со шај повише манушенге те овен дело таро баро мноштво таро „јавера бакхре“ (Јован 10:16). Панда хари, ки пророкујми бари неволја, о Јехова ка уништинел е владен хем е религиен кола со анѓе баре муке е манушенге. Кобор бари чест иси саринен сој тане дело таро баро мноштво — те служинен е Јеховаске вечно ки Пхув! (Отк. 7:14).