1, 2. а) Саво мир шај те овел амен авдиве? б) Соске авдиве нашти те овел амен целосно мир? (Дикх и слика ко почеток тари статија.)

СЕКОВА јекх амендар мангела те овел ле мир хем ма те овел ле проблемија. Адалеске, сием бут благодарна со иси амен „о мир таро Девел“. Адава мир поможинела аменге те борина амен против о негативна мисле хем чувствија (Фил. 4:6, 7). Амен ветинѓем кај ка служина е Јеховаске, адалеске сием „ко мир е Девлеа“. Акава значинела кај амен сием паше леа (Рим. 5:1).

² Ама, панда на ало о време кеда о Девел ка анел целосно мир ки Пхув. Живинаја ко последна диве, адалеске иси амен бут проблемија кола со керена те ова секириме. Живинаја машкар о насилна мануша (2. Тим. 3:1-4). Исто аѓаар, ваљани те борина амен против о Сатана хем о ховавне сикљојба кола со ширинела лен ов (2. Кор. 10:4, 5). Ама, нешто со шај највише те секиринел амен тано кеда противинела пе аменге амари  фамилија со на служинела е Јеховаске. Несаве лендар шај асана аменге башо адава со верујнаја или кривинена амен кај кераја проблемија ки фамилија. Шај вакерена аменге кај ако на чхинаваја те служина е Јеховаске, ка откажинен пе амендар. Сар ваљани те дикха ко противибе тари фамилија? Сар шај те овел амен мир кеда иси амен асавко проблеми?

3, 4. а) Сар влијајнѓа упро мануша адава со сикавела сине о Исус? б) Кеда посебно некаске шај те овел пхаро те џал пало Исус?

³ О Исус џанља кај нане сарине те прифатинен адава со сикавела ов. Ов исто аѓаар џанља кај лескере учениконге ка ваљани храброст соске несаве ка противинен пе ленге. Асавко противибе шај сине те руминел о мир ко ленгере фамилие. О Исус вакерѓа: „Ма мислинен кај аљум те анав мир ки Пхув. На аљум те анав мир, него мачи. Соске аљум те одвојнав мануше таро лескоро дад, е чхаја тари лакири дај хем е бојра тари лакири сасуј. Чаче, е манушескере душмања ка овен лескере кхерутне“ (Мат. 10:34-36).

⁴ Со мангља те вакерел о Исус кеда вакерѓа: „Ма мислинен кај аљум те анав мир“? Ов мангља о мануша те џанен кај ка овел лен последице ако уле лескере ученикија. Точно, е Исусескири цел сине те сикавел е манушен башо Девел, а на те одвојнел о фамилие (Јован 18:37). Ама, лескере ученикија ваљанѓе те џанен кај нане те овел ленге секогаш локхо те џан пало лескоро пример, посебно кеда ленгере паше амала или фамилија на мангена те прифатинен о чачипе.

5. Со доживинѓе е Исусескере следбеникија?

⁵ О Исус вакерѓа кај о противибе тари фамилија тано јекх таро буќа со лескере следбеникија ваљани те овен спремна те трпинен (Мат. 10:38). Те шај те докажинен кај тане лескере ученикија, ола ачхиле истрајна кеда ленгере фамилие асана сине ленге или отфрлинѓе лен. Ама, ола добинѓе бут повише таро адава со нашавѓе. (Читин Марко 10:29, 30.)

6. Со на ваљани те бистра ако иси амен противибе тари фамилија?

⁶ Амен мангаја амаре фамилија, чак кеда ола противинена пе аменге адалеске со служинаја е Јеховаске. Ама, те на бистра кај амаро мангипе башо Девел хем башо Исус ваљани те овел побаро таро било со јавер (Мат. 10:37). Исто аѓаар, на ваљани те бистра кај о Сатана шај те искористинел амаро мангипе баши амари фамилија те шај те керел ма те ова верна е Јеховаске. Акана ка дикха сар шај те истрајна ко несаве пхаре ситуацие.

7. Сар ваљани те дикхе ки тли ситуација ако тло брачно партнери на служинела е Јеховаске?

⁷ Ки Библија пишинела кај секој со кхувела ко брако ка овен ле проблемија (1. Кор. 7:28). Ако сиан ко брако некасаја со на служинела е Јеховаске, адава шај те анел туке панда побаре секирацие хем проблемија ко брако. Важно тано те дикхе ки тли ситуација аѓаар сар со дикхела о Јехова. Ов вакерела кај на ваљани те одвојна амен или те разведина амен  таро амаро брачно партнери само адалеске со на служинела е Јеховаске (1. Кор. 7:12-16). Ако тло ром на служинела е Јеховаске хем на предводинела ко духовна активностија, ту понадари да ваљани те поштујне ле сар поглавари ки фамилија. Ако тли ромни на служинела е Јеховаске, ту понадари да ваљани те манге ла хем љубезно те грижине тут лаке (Еф. 5:22, 23, 28, 29).

8. Со шај те пуче тут ако тло брачно партнери керела те овел туке попхаро те служине е Јеховаске?

⁸ Со ако тло брачно партнери керела те овел туке попхаро те служине е Јеховаске? Јекхе пхењакоро ром вакерѓа лаке кај ој шај те џал ки служба само несаве диве ко курко. Ако сиан ки слично ситуација, пуч тут: „Дали мло брачно партнери родела мандар целосно те чхинавав те служинав е Јеховаске? Ако на, дали шај те керав адава со родела мандар?“ Ако сиан разумно, ка овел тут похари проблемија ко брако (Фил. 4:5).

9. Сар шај е Девлескере слуге те сикавен пумаре чхавен те поштујнен е родителе со на служинела е Јеховаске?

⁹ Ако тло брачно партнери на служинела е Јеховаске, шај те овел туке пхаро те воспитине тле чхавен. На пример, ваљани те сикаве тле чхавен те шунен и библиско заповед: „Поштујн те даде хем те даја“ (Еф. 6:1-3). Ама, со ваљани те кере ако тло брачно партнери на икерела пе ко библиска мерилија? Шај те мукхе шукар пример е чхавенге аѓаар со ка поштујне ле. Дикх лескере шукар особине хем вакер леске кобор сиан благодарно башо са о шукар буќа со керела лен. Ма вакер негативна буќа баши лесте англо чхаве. Наместо адава, објаснин ленге кај секој коркори ваљани те биринел дали ка служинел е Јеховаске. Ако сикавеа е чхавен те поштујнен пумаре родителе со на служинела е Јеховаске, тегани ленгоро шукар пример шај те поттикнинел ле те мангел те сикљовел башо Јехова.

10. Сар шај о родители сој тано Сведоко те поможинел е чхавенге те манген е Јехова?

 ¹⁰ Несаве брачна партнерија со нане Сведокија шај мангена ленгере чхаве те славинен празникија сој паганска или те сикавен лен несаве ховавне религиозна сикљојба. Несаве рома шај те забранинен пле ромњаке те сикавел е чхавен баши Библија. Чак ки асавки ситуација, и ромни ка керел са со шај те сикавел е чхавен башо Јехова (Дела 16:1; 2. Тим. 3:14, 15). На пример, о ром шај нане те дозволинел лаке те проучинел и Библија е чхавенцар или те ингарел лен ко состанокија. Ој ка поштујнел лескири одлука, ама шај те керел лафи е чхавенцар башо пле верувања секогаш кеда ка овел ла прилика. Аѓаар, ола ка шај те сикљовен башо Јехова хем ка џанен лескере мерилија башо исправно хем погрешно (Дела 4:19, 20). Ко крајо, о чхаве коркори ка одлучинен дали ка служинен е Јеховаске (5. Мој. 30:19, 20). * (Дикх и фуснота.)

11. Соске шај те овел амен проблеми амаре фамилијаја со на служинела е Јеховаске?

¹¹ Кеда почминѓем те проучина е Јеховаскере сведоконцар, шај на вакерѓем одма амаре фамилијаке. Ама, сар со почминѓа те бајровел амари вера, халилем кај ваљани те вакера ленге кај мангаја те служина е Јеховаске (Мар. 8:38). Адалеске со почминѓем те служина е Јеховаске, шај почминѓе те овен амен проблемија амаре фамилијаја. Те дикха несаве буќа со шај те поможинен аменге те ова ко мир амаре фамилијаја џикоте ачховаја верна е Јеховаске.

12. Соске шај противинела пе аменге и фамилија, хем сар шај те сикава кај хаљоваја ла?

¹² Трудин тут те хаљове сар осетинела пе тли фамилија. Бут сием бахтале со џанаја о чачипе тари Библија. Ама, амари фамилија шај те мислинел кај ховавѓе амен хем кај кхувѓем ки несави чудно секта. Шај те мислинен кај на мангаја лен више адалеске со на славинаја ленцар празникија. Шај чак дарана кај о Девел ка казнинел амен кеда ка мера. Ваљани те трудина амен те хаљова сар осетинена пе хем шукар те шуна лен со вакерена те шај те хаљова соске тане секириме (Изр. 20:5). А апостол Павле трудинела пе сине те хаљовел са е манушен те шај те вакерел ленге о шукар хабери. Ако трудинаја амен те хаљова амаре фамилија, адава ка поможинел аменге те џана сар те сикава ла башо чачипе (1. Кор. 9:19-23).

13. Сар ваљани те кера лафи амаре фамилијаја?

¹³ Кер ленцар љубезно лафи. Ки Библија пишинела: „Тумаро лафи секогаш  те овел пријатно“ (Кол. 4:6). Акава нане секогаш локхо те керел пе. Шај те молина е Јехова те дел амен пло свети дух кова со ка поможинел аменге те ова љубезна амаре фамилијаја. На ваљани те коша амен ленцар башо ленгере ховавне верувања. Ако поврединѓе амен пумаре лафенцар или адалеа со керѓе, шај те трудина амен те ова сар о апостолија. О Павле вакерѓа: „Кеда наврединена амен, даја лен берекети. Кеда прогонинена амен, стрпливо истрајнаја. Кеда дена амен армања, одговоринаја љубезно“ (1. Кор. 4:12, 13).

14. Соске ваљани те понашина амен шукар?

¹⁴ Понашин тут шукар. Соске тано важно акава? Иако адава со ка кера љубезно лафи амаре фамилијаја шај те поможинел аменге те ова ко мир ленцар, ако понашинаја амен шукар тегани адава панда посилно ка влијајнел упри ленде. (Читин 1. Петрово 3:1, 2, 16.) Тле примерно понашибаја сикав тле фамилијаке те дикхен кај е Јеховаскере сведокија иси лен бахтале бракија, грижинена пе шукар пумаре чхавенге, живинена спрема о библиска мерилија хем иси лен смисла ко живото. Чак ако амари фамилија никогаш нане те прифатинел о чачипе, шај те ова бахтале адалеске со џанаја кај радујнаја е Јехова адалеа со понашинаја амен шукар.

15. Сар адава со ка планирина англедер шај те поможинел аменге ма те коша амен амаре фамилијаја?

¹⁵ Планирин англедер. Размислин кола ситуацие шај те анен џи ко адава те коше тут тле фамилијаја. Пало адава, одлучин сар ка постапине (Изр. 12:16, 23). Акава керѓа јекх пхен тари Австралија. Лакоро састро сине баро противнико хем понекогаш џанела сине бут те хољанел. Адалеске, англедер те јавинен пе леске, ој хем лакоро ром молинена сине е Јехова те поможинел ленге ма те одговоринен леске ко грубо начин. Ола размислинена сине башо кола шукар буќа шај те керен леа лафи. Исто аѓаар, те шај ма те авел џи ко адава те кошен пе баши религија, ола одлучинѓе кобор време ка керен леа лафи.

16. Сар шај те на осетине тут криво ако нашти секогаш те накхе шукар тле фамилијаја?

¹⁶ Точно тано адава кај понекогаш ка овен амен проблемија амаре фамилијаја со нане Сведокија. Ко асавке ситуацие, шај ка осетине тут криво соске мангеа тле фамилија хем мангеа те ове ленцар шукар. Ама, ма бистре кај тано поважно те ачхове верно е Јеховаске него те сикаве тле фамилијаке кај мангеа ла. Кеда тли фамилија ка дикхел акава шај ка хаљовел кобор тано важно те служинел е Јеховаске. Тари јавер страна, нашти никас те терине силаја те прифатинел о чачипе. Ама, шај те поможине тле фамилијаке те дикхел сар користинела туке адава со служинеа е Јеховаске. О Јехова ленге да дела исто можност сар аменге —  те биринен дали ка служинен леске (Иса. 48:17, 18).

17, 18. Со шај те поможинел туке ако некој тари тли фамилија мукхела е Јехова?

¹⁷ Кеда некој тари фамилија тано исклучимо или коркори одвојнела пе тари организација, адава шај бут те дукхал, исто сар те пхене некој посавела тут мачеа. Со ка поможинел тут те издржине адаја дукх?

¹⁸ Ачхов зафатимо духовна активностенцар. Кеда иси тут асавки дукх, ваљани те кере тли вера позорали. Читин редовно и Библија, спремин тут башо состанокија хем џа ки ленде, џа ки служба хем молин е Јехова те дел тут сила те истрајне (Јуда 20, 21). Со ако кереа са акава, а и дукх нисар те накхел? Ма откажин тут! Ачхов зафатимо духовна активностенцар. Сар со накхела о време адава ка поможинел тут те контролирине тле мисле хем чувствија. Акава случинѓа пе е писателеске таро 73 Псалм. Јекх периоди ко лескоро живото сине леске пхаро те контролиринел пле мисле хем чувствија. Ама, адава со на чхинавѓа те служинел е Јеховаске поможинѓа леске палем те дикхел исправно ко буќа (Пс. 73:16, 17). Акава шај те поможинел туке да.

19. Сар шај те сикава кај поштујнаја о укор таро Јехова?

¹⁹ Поштујн о укор таро Јехова. О Девел џанела кај о укор шај те користинел сариненге, хем околеске да сој исклучимо. Иако бут дукхала кеда некој со мангаја ле тано исклучимо, адава шај те поможинел леске те иранел пе ко Јехова. (Читин Евреите 12:11.) Са џи тегани, ваљани те шуна е Јеховаскири заповед ма те дружина амен адаленцар сој тане исклучиме (1. Кор. 5:11-13). Адава нане локхо. Мора те избегина те контактирина ленцар преку телефони, пораке, писмија, имејл или социјална мреже.

20. Ко со ваљани те надина амен?

²⁰ Никогаш ма нашав надеж! О мангипе „ко са надинела пе“. Адалеске, надинаја амен кај амаре мангле ка иранен пе ко Јехова (1. Кор. 13:7). Ако иси тут доказ кај некој тари тли фамилија почминела те менинел пло стави, шај те молине тут леске те добинел сила тари Библија хем те прифатинел е Јеховаскири покана: „Иран тут манде“ (Иса. 44:22).

21. Со ваљани те кере ако тли фамилија противинела пе туке адалеске со слединеа е Исусе?

²¹ О Исус вакерѓа кај на ваљани те манга нијекхе мануше повише лестар. Ов сине уверимо кај лескере ученикија ка овен храбра хем ка ачховен леске верна чак кеда ленгири фамилија ка противинел пе ленге. Адалеске, ако тли фамилија противинела пе туке со слединеа е Исусе, нека овел тут доверба ко Јехова. Роде лестар те поможинел туке те ове истрајно (Иса. 41:10, 13). Шај те ове бахтало соске џанеа кај о Јехова хем о Исус тане задоволна тутар хем кај ка наградинен тут баши тли верност.