1-3. Со значинела те служина е Јеховаске „цело вилеа“? Вакер пример.

САРИНЕ сием несовршена хем грешинаја. Благодарна сием со о Јехова денѓа откупнина хем тано спремно те простинел аменге. Ако сием скромна хем кајнаја амен, шај те рода лестар те простинел аменге. Шај те ова сигурна кај о Јехова нане те постапинел аменцар „спрема амаре грешке“ (Пс. 103:10). Ама, амен мора те служина леске цело вилеа (1. Лет. 28:9). Сар шај те кера адава иако сием несовршена?

² Ка добина одговор ко акава пучибе ако спорединаја о живото е Асаскоро хем о живото е Амазијаскоро. О солдуј царија керена сине адава сој шукар англо Јехова, ама исто аѓаар керѓе грешке соске сине несовршена. И Библија вакерела кај о Аса служинѓа е Јеховаске цело вилеа са џикоте сине џивдо (2. Лет. 15:16, 17; 25:1, 2; Изр. 17:3). Ов секогаш трудинела пе сине те керел е Јеховаскири волја. Тари  јавер страна, о Амазија на служинела сине е Јеховаске цело вилеа. Кеда побединѓа е Девлескере душманен, ов анѓа пеа ленгере идолен хем почминѓа те обожавинел лен (2. Лет. 25:11-16).

³ Окова со служинела е Јеховаске „цело вилеа“ иси ле баро мангипе е Девлеске хем мангела те служинел леске засекогаш. Кеда ки Библија керела пе лафи башо „вило“ обично мислинела пе ко адава саве сием андрал хем вклучиме тане амаре желбе, мисле, ставија, мотивија хем целија. Иако сием несовршена, шај те служина е Јеховаске цело вилеа. Служинаја леске соске чаче мангаја те кера адава, а на адалеске со мора или само адалеске со уло аменге навика (2. Лет. 19:9).

4. Со ка дикха акана?

⁴ Таро пример е Асаскоро хем таро јавера трин верна царија ки Јуда, шај пошукар те хаљова со значинела те служина е Јеховаске цело вилеа. Адала трин царија сине о Јосафат, о Езекија хем о Јосија. Иако акала царија керѓе грешке, о Јехова сине задоволно лендар хем мангела лен сине. Ов дикхља кај ола служинѓе леске цело вилеа. Соске о Јехова дикхела сине аѓаар ки ленде, хем сар шај амен да те ова сар ленде?

5. Со керѓа о Аса кеда уло цари?

⁵ О израелско народо одвинѓа пе ко северно царство Израел хем јужно царство Јуда. Трито цари ки Јуда сине о Аса. Кеда уло цари, о Аса сине одлучно те цидел о ховавно обожавање хем о сексуално неморал таро пло царство. Ов уништинѓа о идолија со обожавинена лен сине о мануша хем палдинѓа е муршен со керена сине неморал јавере муршенцар ко храми. О Аса цидинѓа чак пле баба тари царско положба, соске керѓа одвратно идоли (1. Цар. 15:11-13). Исто аѓаар, охрабринѓа е народо те роден е Јехова хем те шунен о законија хем о заповедија. Ов керѓа са со шај те поможинел е јаверенге те служинен е Јеховаске (2. Лет. 14:4).

6. Со керѓа о Аса кеда о Етиопјања нападинѓе лен?

⁶ Ко прва деш берш џикоте владинела сине о Аса, ки Јуда сине мир. Пало адава, о Етиопјања кола со сине лен јекх милиони војникија хем тришел кочие але те марен пе против о Јудејција (2. Лет. 14:1, 6, 9, 10). Со керѓа о Аса? Ле сине ле доверба ко Јехова хем адалеске молинѓа е Јехова те поможинел лен те побединен ки адаја борба. (Читин 2. Летописи 14:11.) Понекогаш, чак кеда о царија на сине верна е Јеховаске, ов поможинела лен сине те побединен. О Јехова керела сине адава те сикавел кај ов тано чачутно Девел (1. Цар. 20:13, 26-30). Ама, акава  пути поможинѓа пле народо, адалеске со е Аса сине ле доверба ки лесте. О Јехова шунѓа лескири молитва, хем поможинѓа лен те побединен (2. Лет. 14:12, 13). Пало несаво време, о Аса керѓа бари грешка кеда родинѓа помош таро Сириско цари, наместо таро Јехова (1. Цар. 15:16-22). Иако керѓа адава, о Јехова дикхела сине кај о Аса мангела ле. Џикоте сине џивдо, ов служинѓа е Јеховаске цело вилеа. Сар шај амен да те ова сар о Аса? (1. Цар. 15:14).

7, 8. Сар шај те ове сар о Аса?

⁷ Сар шај те џана дали служинаја е Јеховаске цело вилеа? Шај те пуча амен: „Дали сиум послушно е Јеховаске чак кеда манге пхаро? Дали сиум одлучно те заштитинав о собрание таро лошно влијание?“ Размислин кобор ваљани сине те овел храбро о Аса те шај те цидел пле баба тари царско положба. Исто аѓаар, понекогаш туке да ка ваљанел асавки храброст. На пример, со ако некој тари тли фамилија или несаво тло паше амал тано исклучимо таро собрание адалеске со керѓа грево хем на кајнела пе башо адава? Дали ка ове одлучно те на контактирине леа? Со ка теринел тут тло вило те кере?

⁸ Исто сар о Аса, понекогаш амен да шај те осетина амен сар те пхене сарине тане против аменде. Шај о чхаве ки школа или о наставникија асана туке адалеске со сиан е Јеховаскоро сведоко. Шај ки бути асана туке соске користинеа тло одмор те џа ко конгрес или адалеске со бут пути на ачховеа прекувремено ки бути. Ко асавке ситуацие, исто сар о Аса, нека овел тут доверба ко Јехова. Молин тут е Јеховаске те дел тут храброст те шај понадари да те кере адава сој тано шукар. Исто сар со поможинѓа е Аса, ов уверимо кај о Јехова ка поможинел туке да хем ка дел тут сила.

9. Сар шај те кера е Јеховаскири волја кеда проповединаја?

⁹ О Аса на мислинѓа само песке. Ов охрабринѓа е јаверен да „те роден е Јехова“. Амен да шај те поможина е јаверенге те служинен е Девлеске. О Јехова дикхела кеда вакераја е манушенге баши лесте. Амен кераја лескири волја кеда дикхела кај проповединаја адалеске со мангаја ле хем е манушен.

10, 11. Сар шај те ова сар о Јосафат?

¹⁰ Е Асаскоро чхаво, о Јосафат, џала сине „пало друмо пле дадескоро“ (2. Лет. 20:31, 32). Со значинела адава? Исто сар пло дад, о Јосафат охрабринѓа е манушен понадари да те служинен е Јеховаске. Ов бичхалѓа манушен те џан ко дизја ки Јуда хем те сикавен е народо таро „лил е Јеховаскере законеа“ (2. Лет. 17:7-10). Ов чак гело ко подрачје таро северно царство Израел, ко мануша таро ефремска планине, те  охрабринел лен палем те служинен е Јеховаске (2. Лет. 19:4). О Јосафат чаче родела сине е Јехова цело вилеа (2. Лет. 22:9).

¹¹ Авдиве, о Јехова мангела о мануша ко цело свето те сикљовен баши лесте, хем сарине амен шај те поможина ко адава. Дали иси тут цел секова масек те сикаве е манушен башо Девел? Дали мангеа те сикаве е јаверен тари Библија те шај ола да те служинен е Јеховаске? Дали молинеа ту башо адава? Ако деа тутар са, о Јехова ка поможинел тут те почмине библиско курси некасаја. Дали сиан спремно те жртвујне тло слободно време те шај те проучине некасаја? Сар о Јосафат со трудинела пе сине те поможинел е јаверенге палем те служинен е Јеховаске, амен да шај те трудина амен те поможина адаленге сој неактивна. Исто аѓаар, о старешине трудинена пе ко подрачје е собраниескоро те посетинен хем те поможинен околен сој тане исклучиме хем шај на керена више грево.

12, 13. а) Со керѓа о Јосафат кеда дарандило? б) Соске ваљани те ова сар о Јосафат?

¹² Исто сар пло дад, о Аса, о Јосафат сине ле доверба ко Јехова кеда јекх бари војска али против о царство Јуда. (Читин 2. Летописи 20:2-4.) О Јосафат дарандило хем адалеске родинѓа помош таро Јехова. Ки молитва ов признајнѓа кај ола нашти те побединен пле непријателен. Ов исто аѓаар вакерѓа кај ов хем лескоро народо на џанена со те керен. О Јосафат нихари на сумнинѓа пе кај о Јехова ка поможинел лен. Ов вакерѓа: „Амаре јакхја дикхена ки туте“ (2. Лет. 20:12).

¹³ Амен да сар о Јосафат, понекогаш на џанаја сар те решина несаво проблеми, хем шај дараја (2. Кор. 4:8, 9). Ама, те на бистра со керѓа о Јосафат. Англо са о народо ов молинѓа пе е Јеховаске хем вакерѓа леске кобор осетинена пе слаба (2. Лет. 20:5). Сар шај те ова сар о Јосафат? Ако сиан поглавари хем тли фамилија иси ла несаво проблеми, молин е Јехова те дел тумен водство хем сила те шај те икљовен ко крајо. Ма лаџа те молине тут англи тли фамилија башо адава проблеми. Адалеа ка хаљовен кај иси тут бари доверба ко Јехова. О Јехова поможинѓа е Јосафатеске, ка поможинел туке да.

14, 15. Сар о Езекија сикавѓа кај иси ле целосно доверба ко Јехова?

¹⁴ О Езекија сине панда јекх цари со сине паше е Јеховаја, иако лескоро дад на мукхља леске шукар пример соске служинела сине ховавне девленге. О Езекија уништинѓа о тхана коте со керена пе сине паганска ритуалија. Ов исто аѓаар пхагља о бакарно сап со керѓа о Мојсеј, соске о Израелција користинена ле сине сар идоли. О Езекија цело вилеа служинела сине е Јеховаске. Ов икерела сине о заповедија со денѓа о Јехова е Мојсејеске (2. Цар. 18:1-6).

¹⁵ Џикоте о Езекија сине цари, и силно асирско војска кхувѓа ки Јуда хем мангља те уништинел о Ерусалим. О асирско цари, о Сенахирим,  асала сине е Јеховаске хем мангља те чхивел е Езекија те предајнел пе. О Езекија сине ле целосно доверба ко Јехова хем молинѓа пе леске те поможинел ле. Ов џанела сине кај о Девел тано бут посилно таро Асирција хем кај шај те спасинел пле народо. (Читин Исаија 37:15-20.) О Девел шунѓа лескири молитва хем бичхалѓа јекх ангели кова со мударѓа 185.000 асирска војникија (Иса. 37:36, 37).

16, 17. Сар шај те ова сар о Езекија?

¹⁶ Пало несаво време, о Езекија насвалило хем сине англо мерибе. Ки адаја пхари ситуација, ов молинела сине е Јехова те сетинел пе ки лескири верност хем те поможинел ле. (Читин 2. Царевите 20:1-3.) О Јехова шунѓа е Езекијаскири молитва хем сасљарѓа ле. Тари Библија џанаја кај о Јехова авдиве на керела чудија те сасљарел амен или те продолжинел амаро живото. Ама, сар со керѓа о Езекија, амен да шај те молина е Јехова те поможинел аменге хем те пхена леске: „Молинава тут, Јехова, молинава тут, сетин ту сар служинава туке сине верно хем цело вилеа“. Дали иси тут доверба ко Јехова кај секогаш ка поможинел тут, чак кеда сиан насвало? (Пс. 41:3).

¹⁷ Ко саво јавер начин шај те ова сар о Езекија? Шај нешто анела ки опасност амаро амалипе е Јеховаја или лела амендар о време со шај те користина ле те служина леске. На пример, бут џене авдиве керена идолија е манушен. Ола мангена те овен сар несаве славна личностија или сар јавера мануша колен со ни на пенџарена. Трошинена бут време те читинен баши ленде хем те дикхен ленгере слике. Или, бут пути користинена социјална мреже или јавера буќа кола со поможинена лен те комунициринен е манушенцар ко Интернет. Џанѓола пе, амен да шај те користина акала буќа те комуницирина амаре фамилијаја хем паше амаленцар. Ама, о социјална мреже шај те лен бут таро амаро време. Чак хари похари шај те ова горда ако бут мануша сикавена кај свиџинена пе ленге амаре слике или коментарија со чхивѓем ко Интернет. Или, шај ка хољана ако халилем кај чхинавѓе те дикхен лен. Шај те сикљова таро шукар примерија сар сој о апостол Павле, о Акила хем и Прискила. Дали шај те замислине лен сар трошинена пло време секова диве те дикхен са со керена о јавера, особено окола со на служинена е Јеховаске? И Библија вакерела кај о апостол Павле користинела сине пло време те проповединел. Исто аѓаар, и Прискила хем о Акила користинена сине пло време те проповединен хем поточно те објаснинен о чачипе е јаверенге (Дела 18:4, 5, 26). Шај те пуча амен: „Дали пазинава те на керав е манушен идолија? Дали пазинава те на трошинав бут време ко буќа со нане важна?“ (Читин Ефешаните 5:15, 16.)

18, 19. Сар шај амен да те ова сар о Јосија?

¹⁸ О параунуко е Езекијаскоро, о Јосија, исто аѓаар икерела сине е Јеховаскере заповедија „цело вилеа“  (2. Лет. 34:31). Кеда сине тинејџери, ов „почминѓа те родел е Давидескере Девле“. А кеда сине ле 20 берш, ов почминѓа те цидел о идолопоклонство тари Јуда. (Читин 2. Летописи 34:1-3.) О Јосија трудинела пе сине те керел е Јеховаскири волја повише него бут јавера царија ки Јуда. Јекх диве, о првосвештенико аракхља ко храми о лил е Девлескере законеа. Адава изгледа сине о лил со пишинѓа ле о Мојсеј! Кеда о писари читинѓа ле е Јосијаске, ов халило кај ваљани те керел панда повише те шај те служинел е Јеховаске цело вилеа. Ов исто аѓаар охрабринѓа е јаверен да те керен адава. Адалеске, о народо служинела сине е Јеховаске са џикоте сине џивдо о Јосија (2. Лет. 34:27, 33).

¹⁹ Ако сиан терно, ту да шај те ове сар о Јосија хем пошукар те пенџаре е Јехова. Ов шај сиклило таро пло папо кова со кајнѓа пе, о цари о Манасија, кај о Јехова тано спремно те простинел. Ту да шај те сикљове таро попхуре ки тли фамилија хем ко собрание. Ола шај те вакерен туке башо бут шукар буќа со керѓа о Јехова баши ленде. Исто аѓаар ма бистре сар осетинела пе сине о Јосија кеда шунѓа со пишинела ко е Девлескоро Лафи. Ов бут мангља те керел е Девлескири волја хем адалеске одма керѓа промене. Џикоте читинеа и Библија, тли одлучност те ове послушно е Јеховаске шај те овел побари. Адава ка керел те ове попаше амал леа хем те ове побахтало. Тегани, ка манге те вакере е јаверенге башо Јехова. (Читин 2. Летописи 34:18, 19.) Кеда лично проучинеа и Библија, шај те хаљове сар пошукар те служине е Девлеске. Адалеске, де тутар са те кере акала промене, исто сар со керѓа о Јосија.

20, 21. а) Со сине лен заедничко е штаре царен сој спомниме ки акаја статија? б) Со ка дикха ки јавер статија?

²⁰ Со шај те сикљова таро акала штар царија ки Јуда кола со служинѓе е Јеховаске цело вилеа? Ола сине решиме те керен е Девлескири волја хем те служинен леске цело живото. Сикавѓе доверба ко Јехова кеда ваљани сине те боринен пе силна непријателенцар. Хем сој најважно, ола служинѓе е Јеховаске соске мангена ле сине.

²¹ Иако акала штар царија сине несовршена хем керѓе грешке, о Јехова сине лендар задоволно. Ов дикхља со иси ко ленгоро вило хем џанела сине кај искрено мангена ле. Амен да сием несовршена хем кераја грешке. Ама, о Јехова ка овел задоволно амендар ако дикхела кај служинаја леске цело вилеа. Ки јавер статија, ка дикха со шај те сикљова таро грешке со керѓе акала царија.