1-2. а) Спрема и заповед е Исусескири сој пишими ко Матеј 28:18-20, која тани и главно задача е христијанско собраниескири? б) Башо кола пучиба ка добина одговор ки акаја статија?

О АПОСТОЛИЈА сигурно сине бут возбудиме кеда геле ки планина коте со ваљани сине те аракхен пе е Исусеа откеда воскреснинѓа (Мат. 28:16). Шај ки акаја прилика о Исус појавинѓа пе повише таро 500 пхраленге (1. Кор. 15:6). Соске о Исус родинѓа пле ученикондар те кхеден пе адари? Те шај те дел ленге јекх важно заповед: „Џан хем керен ученикија таро мануша таро са о народија“. (Читин Матеј 28:18-20.)

² О ученикија кола со шунѓе адава со вакерѓа о Исус покасно уле дело таро христијанска собранија ко прво веко. И главно задача адале собраниенгири сине те поможинен е јавере манушенге те овен е Христосескере ученикија. * Авдиве иси повише таро 100.000 собранија е чачутне христијаненгере ко цело свето, хем ленгири главно задача тани панда исто. Ки акаја статија ка добина одговор башо штар пучиба: Соске тано важно те кера ученикија? Сој тано вклучимо ко адава? Дали секова христијани шај те поможинел ко керибе ученикија? Хем соске ваљани аменге стрпливост те шај те кера ученикија?

3. Спрема Јован 14:6 хем 17:3, соске тано бут важно те поможина е манушенге те овен е Христосескере ученикија?

³ Соске тано бут важно те поможина е манушенге те овен е Христосескере ученикија? Адалеске со само тегани  шај те овен е Девлескере амала. Освен адава, окола со џана пало е Христосескоро пример иси лен пошукар живото панда авдиве хем иси лен надеж башо вечно живото ки иднина. (Читин Јован 14:6; 17:3.) Чаче, о Исус денѓа аменге јекх бут важно задача, ама ки акаја задача на сием коркори. О апостол Павле пишинѓа: „Амен сием е Девлескере соработникија“ (1. Кор. 3:9). Кобор бари чест сикавѓе о Јехова хем о Христос е несовршена манушенге!

4. Со сикљоваја таро искуство со сине е Иване хем е Матилда?

⁴ Адава со поможинаја е манушенге те овен е Христосескере ученикија керела амен бут бахтале. Размислин башо искуство со сине е Иване хем е Матилда, јекх брачно пари тари Колумбија. Ола сведочинѓе јекхе терне манушеске со викинела пе Давиер, кова со вакерѓа ленге: „Мангава те керав промене ко мло живото, ама нашти“. О Давиер сине боксери, користинела сине дрога, пиела сине бут хем живинела сине пле џувљаја е Ерикаја. О Иван објаснинела: „Почминѓем те проучина леа и Библија. Ов живинела сине ко јекх гав со сине бут дур, хем те шај те реса адари ваљани сине саатенцар те возина точаконцар хем адава ко чхикале дрома. Откеда дикхља кај о Давиер менинела пе ко пошукар, и Ерика да почминѓа те проучинел и Библија“. Сар со накхела сине о време, о Давиер чхинавѓа те користинел дрога, те пиел хем те боксујнел. Исто аѓаар, ов венчинѓа пе е Ерикаја. И Матилде вакерела: „Кеда о Давиер хем и Ерика крстинѓе пе ко 2016 берш, сетинѓем амен ко адава со вакерела сине ов: ’Мангава те керав промене ко мло живото, ама нашти‘. Сием сине добором бут бахтале со чак ровѓем“. Кеда поможинаја е манушенге те овен е Христосескере ученикија, чаче сием бут бахтале.

5. Која тани и прво бути со ваљани те кера те шај те поможина е манушенге те овен ученикија?

⁵ И прво бути со ваљани те кера те шај те поможина е манушенге те овен ученикија тани те рода околен со мангена те сикљовен башо Јехова (Мат. 10:11). Сикаваја кај сием чаче е Јеховаскере сведокија кеда трудинаја амен те сведочина са е манушенге со аракхаја лен. Исто аѓаар, сикаваја кај сием чачутне христијања кеда шунаја е Исусескири заповед те проповедина.

6. Со шај те поможинел аменге шукар те кера амари служба?

⁶ Понекогаш аракхаја манушен кола со мангена те џанен о чачипа тари Библија. Ама, исто аѓаар иси бут џене со ко почеток шај на интересинела лен о чачипе. Ко асавке мануша, важно тано те поттикнина о интерес башо чачипе. Те шај шукар те кера амари служба, ваљани шукар те спремина амен. Најангле размислин саве буќа веројатно ка интересинен е манушен ко тло подрачје. Пало адава, размислин саво увод ка кере те шај те почмине разговор баши тема колаке со мангеа те кере лафи.

7. а) Сар шај те почмина разговор некасаја? б) Соске тано важно шукар те шуне е манушен хем те сикаве кај поштујнеа лен?

⁷ На пример, шај те пуче е станаре: „О мануша ко цело свето иси лен иста проблемија — со мислинеа, дали адала проблемија ка решинен пе ако иси јекх влада са е манушенге?“ Пало адава шај те кере лафи башо Даниел 2:44. Или, шај те пуче: „Со мислинеа, сар шај о родителија шукар те воспитинен пумаре чхавен?“ Пало адава кер лафи баши 5. Мојсеева 6:6, 7. Бизи разлика баши сави тема ка кере лафи, мислин ко мануша со шунена тут. Размислин сар шај те користинен ленге о поуке тари Библија.  Исто аѓаар, важно тано шукар те шуне лен хем те сикаве кај поштујнеа ленгоро мислење. Аѓаар, шај пошукар те хаљове лен, а ола ка овен поспремна те шунен тут.

8. Соске ваљани понадари да те трудина амен те кера повторна посете?

⁸ Англедер те одлучинел некој те проучинел и Библија, веројатно ка ваљанел те трудине тут хем те накхаве време те шај редовно те посетине ле. Соске? Адалеске со шај нане те овел кхере кеда ка џа лесте палем те посетине ле. Освен адава, шај ка ваљанел те посетине ле повише пути англедер те мангел те прифатинел библиско курси. Ма бистре, те шај те бајрол јекх лулуди, ваљани редовно те чхиве лаке пани. Слично аѓаар, ако редовно кераја лафи некасаја со интересинела пе башо е Девлескоро Лафи, побаре тане о шансе ко лескоро вило те бајрол мангипе спрема о Јехова хем о Христос.

9-10. Соске шај те вакера кај секова објавители поможинела те аракхен пе о искрена мануша?

⁹ Секова објавители тано вклучимо ко адава те аракхен пе о искрена мануша. Акава шај те споредина ле сар кеда некој родела несаве тикне чхаве со нашавдило. Ки сави смисла? Те дикха јекх ситуација со чаче случинѓа пе. Откеда нашавдило јекх трине бершенгоро чхаво, околу 500 мануша почминѓе те роден ле. Ко крајо, пало 20 сатија, јекх таро адала мануша аракхља е чхаве ки јекх нива ченкаја. Ама, адава мануш на мангља о јавера те фалинен ле кај ов аракхља е чхаве. Ов вакерѓа: „Бут џене родинѓем ле — адалеске аракхлем ле“.

¹⁰ Бут мануша осетинена пе сар адава тикно чхаво со нашавдило. Нане лен надеж, ама мангена помош (Еф. 2:12). Повише таро офто милионија Јеховаскере сведокија  трудинена пе те аракхен акале манушен. Шај ту лично нане те аракхе некас касаја со ка проучине и Библија. Сепак, шај јавера објавителија кола со проповединена ко исто подрачје ка аракхен некас со мангела те џанел о чачипе таро е Девлескоро Лафи. Кеда јекх пхрал или пхен ка аракхен некас со мангела те овел ученико е Христосескоро, сарине со поможинѓе ко родибе ваљани те овен бахтале.

11. Иако шај на водинеа библиско курси, ко саве јавера начинија шај те поможине е манушенге те овен е Христосескере ученикија?

¹¹ Иако шај ко моменти на водинеа библиско курси, ту понадари да шај ко јавера начинија те поможине е манушенге те овен е Христосескере ученикија. На пример, шај искрено те поздравине лен кеда ка авен ко состанок. Кеда ка дикхен кај сикаваја мангипе, адава шај те поможинел ленге те уверинен пе кај сием чачутне христијања (Јован 13:34, 35). А преку тле кратка коментарија ко состанок, о неве шај те сикљовен сар те вакерен ко со верујнена ко јекх искрено начин кова ка сикавел кај поштујнена е јаверен. Освен адава, шај те џа ки служба несаве неве објавителеа хем те поможине леске те сикљол сар те користинел и Библија те шај те сикавел е манушен. Ако кереа аѓаар, ка поможине леске те џал пало е Христосескоро пример (Лука 10:25-28).

12. Дали ваљани те овен амен посебна вештине те шај те сикава е јаверен? Објаснин.

¹² Никој амендар на ваљани те мислинел кај ваљанена леске посебна вештине те шај те сикавел е манушен те овен е Исусескере ученикија. Соске? Размислин баши Фаустина, која со живинела ки Боливија. Кеда прво пути дикхља пе е Јеховаскере сведоконцар, ој на џанела сине те читинел. Акана шај те читинел, иако на добором шукар. И Фаустина крстинѓа пе, хем бут мангела те сикавел е јаверен. Обично секова курко водинела панџ библиска курсија. Иако повише џене таро адала касаја со проучинела и Библија читинена пошукар латар, ој поможинѓа шове манушенге те крстинен пе (Лука 10:21).

13. Чак ако сием бут зафатиме, кола берекетија шај те овен амен ако поможинаја е манушенге те овен е Христосескере ученикија?

¹³ Бут христијања тане бут зафатиме адалеске со иси лен важна обврске. Ама, ола одвојнена време те водинен библиска курсија хем адава керела лен бут бахтале. Шукар пример тани и Мелани тари Аљаска. Ој коркори грижинела пе сине пле чхајаке кола со сине ла офто берш. Освен адава, ој керела сине бути цело работно време хем грижинела пе сине пле дадеске кова со сине насвало таро рако. Само ој сине е Јеховаскоро сведоко ки јекх диз која со  сине бут дур таро о јавера дизја. И Мелани редовно молинела пе сине е Јеховаске те дел ла сила те џал ки служба иако сине бут шудро, соске мангела сине те аракхел некас касаја со ка шај те проучинел и Библија. Хем аѓаар аракхља е Сара, која со сине воодушевими кеда шунѓа кај е Девле иси ле анав. Пало несаво време и Сара прифатинѓа те проучинел и Библија. И Мелани вакерела: „О петокија раќате обично сиум сине бут уморно, ама ми чхај хем ме редовно џаја сине ки Сара те проучина и Библија. Адава бут користинѓа аменге да. Уживинаја сине џикоте истражинаја сине те шај те аракха о одговорија ко лакере пучиба хем сием сине бут бахтале кеда ој да ули е Јеховаскоро амал“. И Сара храбро истрајнѓа кеда сине ла притисок тари фамилија хем таро амала, мукхља пли црква хем крстинѓа пе.

14. а) Соске и служба шај те спорединел пе астарибаја мачхе? б) Ко со поттикнинена тут о лафија таро 2. Тимотеј 4:1, 2?

¹⁴ Чак ако панда на аракхљан некас со мангела те овел ученико, ма откажин тут. О Исус вакерѓа кај окола со поможинена е манушенге те овен лескере ученикија тане сар рибарија. О рибарија шај саатенцар те трудинен пе те астарен мачхе. Ола бут пути астарена мачхе касно раќате или рано сабајле, а понекогаш мора бут саатија те путујнен чамцоја (Лука 5:5). Слично аѓаар, несаве објавителија саатенцар стрпливо проповединена ко различно време таро диве хем ко различна тхана. Соске? Те шај те аракхен со шај повише манушен. Окола со бут трудинена пе често успејнена те аракхен манушен со мангена те шунен о хабери  башо Царство. Дали шај те пробине те проповедине ко време или ко тхан коте со иси побаре шансе те аракхе е манушен? (Читин 2. Тимотеј 4:1, 2.)

15. Соске мора те ова стрплива џикоте водинаја библиска курсија?

¹⁵ Соске ваљани те ова стрплива џикоте водинаја библиска курсија? Јекх причина тани адаја со амари задача нане само те поможина е интересентеске те џанел хем те мангел о библиска сикљојба. Ваљани исто аѓаар те поможина леске те пенџарел хем те мангел е Библијакере Авторе, е Јехова. Освен со мангаја те поможина е интересентеске те џанел со заповединѓа о Исус пле учениконге, ваљани исто аѓаар те сикава ле сар те применинел адала заповедија ко пло живото. Мора стрпливо те поможина леске џикоте трудинела пе те применинел о библиска начелија. Несаве успејнена те менинен пло начин сар размислинена хем пле навике само башо некобор масекија. Ама, јаверенге ваљани повише време.

16. Со сиклиљан таро адава со случинѓа пе е Раулеа?

¹⁶ Јекх мисионери ко Перу сине ле шукар резултатија адалеске со сине стрпливо. Ов вакерѓа: „Проучинава сине јекхе интересентеа со викинела пе Раул. Проучинѓем дуј лила, ама понадари да сине ле бут проблемија. Лескоро брако сине хаос, бут акошела сине хем лескере чхаве на поштујнена ле сине адалеске со понашинела пе сине лошно. Ама, редовно авела сине ко состанокија, адалеске понадари да џава сине ки лесте те шај те поможинав леске хем лескере фамилијаке. Пало трин берш откеда запознајнѓем амен, ов крстинѓа пе“.

17. Со ка дикха ки наредно статија?

¹⁷ О Исус денѓа аменге заповед те џа хем те кера „ученикија таро мануша таро са о народија“. Те шај те кера акаја задача, бут пути ваљани те кера лафи манушенцар кола со бут појавер дикхена ко буќа амендар. Несаве нане ки нијекх религија или палем на верујнена кај иси Девел. Ки наредно статија ка дикха сар шај те вакера о шукар хабери адале манушенге.