1-2. Со сикљоваја таро пример е Анхелитоскоро?

ДАЛИ бариљан ки фамилија со служинела е Јеховаске? Ако оја, на ваљани те бистре кај о амалипе е Јеховаја нашти те наслединел пе таро родителија. Бизи разлика дали амаре родителија служинена е Девлеске или на, секова јекх амендар коркори ваљани те керел песке амалипе е Јеховаја.

² Размислин башо искуство јекхе пхралескоро со викинела пе Анхелито. Сарине ки лескири фамилија тане е Јеховаскере сведокија. Ама кеда сине тинејџери, ов на осетинела пе сине бут паше е Девлеа. Ов вакерела: „Служинава сине е Јеховаске само адалеске со мангава сине те керав адава со керела мли фамилија“. Сепак, ов одлучинѓа те одвојнел повише време те шај те читинел е Девлескоро Лафи хем те размислинел башо адава, хем почминѓа почесто те молинел пе е Јеховаске. Со сиклило таро адава? О Анхелито вакерела: „Халиљум кај те шај те овав паше ме мангле Дадеа, е Јеховаја, мора коркори те запознајнав ле“. Акале пхралескоро пример поттикнинела амен те размислина башо некобор важна пучиба: Која тани и разлика машкар адава те џана само некобор буќа башо Јехова хем шукар те пенџара ле? Хем со шај те кера те шај шукар те пенџара е Јехова?

3. Која тани и разлика машкар адава те џана само некобор буќа башо Јехова хем шукар те пенџара ле?

³ Некој шај те мислинел кај пенџарела е Јехова само  адалеске со џанела лескоро анав хем џанела несаве буќа со вакерѓа лен или керѓа лен. Ама, те џана шукар е Јехова вклучинела нешто повише. Ваљани те одвојна аменге време те сикљова башо Јехова хем башо лескере шуже особине. Само тегани ка шај те хаљова соске вакерела или соске керела несаве буќа. А адава ка поможинел аменге те хаљова дали прифатинела амаре ставија, одлуке хем постапке. Откеда ка џана со мангела о Јехова те кера, ваљани те постапина спрема адава.

4. Соске тано корисно те дикха о примерија несаве верна слугенгере тари Библија?

⁴ Несаве шај ка асан аменге адалеске со мангаја те служина е Јеховаске, а шај ка противинен пе панда повише кеда ка почмина те џа ко состанокија. Сепак, ако иси амен доверба ко Јехова, ов никогаш нане те мукхел амен. Аѓаар ка почмина те кера аменге амалипе е Девлеа кова со ка трајнел засекогаш. Дали шај добором шукар те пенџара е Јехова? Оја, шај! О примерија со денѓе амен о несовршена мануша сар со сине о Мојсеј хем о цари о Давид сикавена кај шај. Џикоте дикхаја ленгоро пример, ка добина одговор ко акала дуј пучиба: Со поможинѓа ленге шукар те пенџарен е Јехова? Хем со шај те сикљова таро ленгоро пример?

5. Со одлучинѓа те керел о Мојсеј?

⁵ О Мојсеј одлучинѓа те служинел е Девлеске. Кеда сине ле 40 берш, о Мојсеј повише мангља те овел е Девлескере народоја, него те овел пенџардо сар „чхаво е фараонескере чхајакоро“ (Евр. 11:24). О Мојсеј откажинѓа пе тари бари положба со шај сине те овел ле машкар о мануша. Ов џанља кај адалеа со ка овел тари е Израелцонгири страна, кола со сине робија ко Египет, ка хољанкерел е фараоне кова со сине моќно владетели хем коле со о Египќања дикхена сине сар Девел. Адалеа о Мојсеј сикавѓа чаче бари вера! Ле сине ле доверба ко Јехова. Асавки доверба поможинѓа е Мојсееске те овел ле паше амалипа е Јеховаја кова со трајнѓа цело лескоро живото (Изр. 3:5).

6. Со сикљоваја таро е Мојсеескоро пример?

⁶ Со шај амен те сикљова? Исто сар о Мојсеј, сарине амен ко несаво моменти таро амаро живото мора те ана јекх важно одлука: Дали те служина е Девлеске хем те ова дело таро лескоро народо? Шај ка ваљани те кера несаве жртве те шај те служина е Јеховаске, хем шај ка овел амен противибе таро окола со на пенџарена ле. Ама, ако иси амен доверба ко амаро Дад сој ко небо, шај те ова сигурна кај ка поддржинел амен!

7-8. Со на чхинавѓа те сикљовел о Мојсеј?

⁷ О Мојсеј на чхинавѓа те сикљол башо е Јеховаскере особине хем понадари да керела сине лескири волја. На пример, кеда о Јехова родинѓа лестар те икалел е Израелцон таро Египет, е Мојсееске фалинѓа самодоверба. Адалеске некобор пути вакерѓа е Јеховаске кај на осетинела пе способно баши адаја задача. О Јехова сикавѓа е Мојсееске сочувство хем поможинѓа леске (2. Мој. 4:10-16). Адалеске, о Мојсеј шај сине те вакерел силна осуде е фараонеске. Пало адава, о Мојсеј дикхља сар о Јехова користинѓа пли моќ кеда спасинѓа е Израелцон хем кеда уништинѓа е фараоне хем лескере војска ко Црвено Море (2. Мој. 14:26-31; Пс. 136:15).

⁸ Откеда о Мојсеј икалѓа е Израелцон таро Египет, ола секогаш жалинена пе сине башо нешто. Сепак, о Мојсеј дикхља сар  о Јехова сикавела сине бари стрпливост спрема пло народо коле со ослободинѓа ле таро ропство (Пс. 78:40-43). Исто аѓаар, о Мојсеј дикхља е Јеховаскири бари понизност кеда откажинѓа пе тари пли намера те уништинел е Израелцон откеда о Мојсеј замолинѓа ле те на керел адава (2. Мој. 32:9-14).

9. Спрема Евреите 11:27, кобор сине паше о Мојсеј е Јеховаја?

⁹ Откеда о Израелција иклиле таро Египет, о Мојсеј уло добором паше е Јеховаја сар те пхене шај сине те дикхел пле Даде сој ко небо. (Читин Евреите 11:27.) Исто аѓаар, кобор паше амала сине ола дикхаја таро адава со пишинела ки Библија: „О Јехова керѓа лафи е Мојсееа исто сар јекх мануш со керела лафи јавере манушеа“ (2. Мој. 33:11).

10. Со ваљани те кера те шај шукар те пенџара е Јехова?

¹⁰ Со шај амен те сикљова? Те шај шукар те пенџара е Јехова, нане доволно само те џана лескере особине, него исто аѓаар ваљани те кера лескири волја. Авдиве, о Јехова мангела „различна мануша те спасинен пе хем шукар те џанен о чачипе“ (1. Тим. 2:3, 4). Јекх начин сар шај те кера е Јеховаскири волја тано аѓаар со ка сикава е манушен баши лесте.

11. Сар адава со сикаваја е јаверен башо Јехова поможинела аменге панда пошукар те џана ле?

¹¹ Кеда сикаваја е јаверен башо Јехова, бут пути амен да пошукар пенџараја ле. На пример, дикхаја сар о Јехова сикавела сочувство спрема о мануша кеда поможинела аменге те аракха околен со мангена те овен лескере амала (Јован 6:44; Дела 13:48). Исто аѓаар, дикхаја кобор тано моќно е Девлескоро Лафи кеда о мануша со проучинаја ленцар мукхена о лошна навике хем почминена те уравен и неви личност (Кол. 3:9, 10). А доказ баши е Девлескири стрпливост дикхаја ко адава со буте манушен таро амаро подрачје дела лен бут прилике те џанен ле хем те спасинен пе (Рим. 10:13-15).

12. Спрема 2. Мојсеева 33:13, со родинѓа о Мојсеј хем соске?

¹² О Мојсеј ценинела сине пло амалипе е Јеховаја. Адава со о Јехова користинѓа е Мојсее те керел бут моќна буќа сикавела кај о Мојсеј шукар џанела ле сине. Сепак, ов молинѓа е Јехова те поможинел леске панда пошукар те пенџарел ле. (Читин 2. Мојсеева 33:13.) Кеда родинѓа адава, е Мојсее сине ле повише таро 80 берш, ама џанља кај иси панда бут со ваљани те сикљовел башо пло Дад сој ко небо.

13. Кова тано јекх начин сар сикаваја кај ценинаја амаро амалипе е Девлеа?

¹³ Со шај амен те сикљова? Бизи разлика кобор време служинаја е Јеховаске, никогаш на ваљани те чхинава те ценина амаро амалипе леа. Јекх начин сар шај те сикава кај ценинаја амаро амалипе е Јеховаја тано аѓаар со ка молина амен леске.

14. Соске и молитва тани бут важно те шај шукар те пенџара е Девле?

¹⁴ И шукар комуникација тани бут важно башо јекх зорало амалипе. Адалеске, ов попаше е Девлеа аѓаар со често ка молине тут леске. Никогаш ма дара те вакере леске тле најхор чувствија (Еф. 6:18). И Криста, која со живинела ки Турција, вакерела: „Мло мангипе спрема о Јехова хем мли доверба ки лесте бајровела секогаш кеда ки молитва вакерава леске сар осетинава ман хем кеда пало адава дикхава сар поможинела манге. Адава со дикхава сар о Јехова одговоринела ко мле молитве поможинела манге те дикхав е Јехова сар мло Дад хем мло Амал“.

15. Сар о Јехова опишинѓа е царе е Давиде?

¹⁵ О цари о Давид припадинела сине ко еврејско народо кова со денѓа лафи кај ка служинел е Јеховаске. Ама, о Давид на служинела сине е Јеховаске само адалеске со лескири фамилија керела сине адава. Ов коркори керѓа песке паше амалипе е Јеховаја, хем о Јехова бут мангела ле сине. О Јехова опишинѓа е Давиде сар „мануш спрема [лескоро] вило“ (Дела 13:22). Сар о Давид уло добором паше е Јеховаја?

16. Со сиклило о Давид башо Јехова џикоте дикхела сине о буќа со створинѓа лен?

¹⁶ О Давид сикљовела сине башо Јехова таро буќа со сине створиме. Кеда сине терно, о Давид саатенцар сине авријал џикоте аракхела сине пле дадескере бакхрен. Шај тегани почминѓа те размислинел хор башо буќа со створинѓа о Јехова. На пример, џикоте раќате дикхела сине ко небо на само со шај сине те дикхел пхердо ѕвезде, него исто аѓаар шај сине те размислинел башо особине околескере со керѓа адала ѕвезде. О Давид сине поттикнимо те пишинел: „О буќа ко небо објавинена е Девлескири слава, ола керена лафи баши бути која со ов пле вастенцар керела ла“ (Пс. 19:1, 2). Џикоте размислинела сине башо начин сар о Јехова керѓа е манушен, о Давид халило кобор тано мудро о Јехова (Пс. 139:14). Кеда размислинела сине башо буќа со створинѓа о Јехова, ов халило кобор тано тикно ки споредба леа (Пс. 139:6).

17. Со шај те сикљова ако размислинаја башо буќа со створинѓа лен о Јехова?

¹⁷ Со шај амен те сикљова? Размислин башо адава со створинѓа о Јехова. Одвојн туке време секова диве те дикхе хем те воодушевине тут башо акава шужо свето со керѓа ле о Јехова. Размислин со шај те сикљове башо Јехова таро растенија, таро животне хем таро мануша. Аѓаар секова диве ка сикљове нешто нево башо амаро Дад кова со бут мангела амен (Рим. 1:20). Хем секова диве ка дикхе сар тло мангипе спрема лесте бајрола са повише.

18. Спрема о 18 Псалм, со халило о Давид?

¹⁸ О Давид халило кај о Јехова поможинела леске. На пример, кеда мударѓа јекхе лаве хем јекхе мечка те шај те заштитинел пле дадескере бакхрен, ов халило кај о Јехова поможинѓа леске ко адава. Кеда побединѓа е војнико е Голијате, кова со сине џини, е Давидеске сине јасно кај о Јехова водинѓа ле ко адава (1. Сам. 17:37). А кеда нашља таро љубоморно цари о Саул, о Давид сине свесно кај о Јехова спасинѓа ле (Пс. 18, натпис). Те овел сине гордо, о Давид шај сине те мислинел песке кај адала буќа керѓа лен пле силаја. Ама ов сине понизно хем адалеске шај сине јасно те дикхел сар о Јехова поможинела леске ко живото (Пс. 138:6).

19. Со шај те сикљова таро пример е Давидескоро?

¹⁹ Со шај амен те сикљова? Нане доволно само те молина е Јехова баши помош. Мора исто аѓаар те трудина амен те хаљова кеда хем сар дела амен адаја помош. Ако сием понизна, ка хаљова кај амен нашти те кера са коркори хем кај о Јехова поможинела аменге те кера адава со амен нашти те кера. Аѓаар амаро амалипе леа ка овел са позорало. Акава доживинѓа јекх пхрал таро Фиџи со викинела пе Ајзак, кова со бершенцар више служинела е Јеховаске. Ов пхенела: „Кеда размислинава башо мло живото, хаљовава кај таро време кеда почминѓум те проучинав па са џи авдиве, о Јехова секогаш поможинела манге. Адалеске, мло амалипе е Јеховаја тано бут позорало“.

20. Соске о Давид сине паше е Јеховаја, хем со шај те сикљова таро лескоро пример?

 ²⁰ О Давид сикавѓа е Јеховаскере особине. О Јехова створинѓа амен аѓаар те шај те сикава лескере особине (1. Мој. 1:26). Кобор повише сикљоваја башо е Јеховаскере особине, добором полокхе ка овел аменге те ова сар лесте. О Давид шукар пенџарела сине пле Даде сој ко небо хем адалеске трудинела пе сине е јаверенцар те постапинел аѓаар сар со би постапинела сине о Јехова. Те дикха јекх пример. Иако о Давид грешинѓа е Девлеске кеда керѓа прељуба е Витсавеаја хем пало адава мударѓа лакере роме, о Јехова одлучинѓа те сикавел леске милост (2. Сам. 11:1-4, 15). Соске? О Давид постапинела сине исто сар о Јехова, сикавела сине милост е јаверенге. Адалеске со сине бут паше е Јеховаја, о Давид уло јекх таро омилена царија ко Израел, хем о Јехова користинѓа ле сар пример спрема кова со проценинела сине е јавере израелско царен (1. Цар. 15:11; 2. Цар. 14:1-3).

21. Спрема Ефешаните 4:24 хем 5:1, соске тано шукар те постапина сар о Девел?

²¹ Со шај амен те сикљова? Ваљани те постапина сар о Девел. Кеда кераја аѓаар, иси амен корист таро адава хем поможинела аменге пошукар те пенџара ле. Исто аѓаар, кеда трудинаја амен те сикава лескере особине амен докажинаја кај сием лескере чхаве. (Читин Ефешаните 4:24; 5:1.)

22-23. Со ка случинел пе ако применинаја адава со сикљоваја башо Јехова?

²² Сар со дикхлем, шај те сикљова башо Јехова таро лескоро Лафи, и Библија, хем таро адава со створинѓа. Адава посебно лил тано пхердо примеренцар таро верна слуге е Девлескере колен со шај те имитирина, сар сој о Мојсеј хем о Давид. О Јехова керѓа пло дело. Амен да ваљани те кера амаро дело хем те сикљова кобор со шај повише баши лесте.

²³ Никогаш нане те чхинава те сикљова башо Јехова (Проп. 3:11). Ама нане најважно кобор бут џанаја баши лесте, него со кераја адалеа со џанаја. Ако применинаја адава со сиклилем хем ако трудинаја амен те џа пало пример амаре мангле Дадескоро, ов ка овел са попаше аменцар (Јак. 4:8). Преку пло Лафи, о Јехова уверинела амен кај никогаш нане те мукхел околен со родена ле.